Wednesday, August 29, 2007

لماذا كل هذا الحزن

على مدونه حائر فى دنيا الله قرات تعليق بيقول ان رئيس مصر حسنى مبارك مات
يوم 23 اغسطس ومكتمين الخبر حسيت احساس بالحزن فظييييع وبكيت وزادت نبضات قلبى وجريت على التلفزيون لا بحث على القنوات الاخباريه هل الخبر مؤكد ام اشاعه سبحان الله استغربت قوى انا ليه حزنت قوى كدة قلت معقوله حسنى مبارك مات وخصوصا انى شوفت رؤيه من اسبوعين وانا والله لا افكر فى حسنى ولا تشغلنى السياسه نهائى لانى شايفه انه مافيش فايدة ايوة عملوا احزاب وجرايد معارضه بس بجد هو فيه حاجه تغيرت فعلشان كدة مش بحب السياسه نهائى حتى المدونات اللى بتتكلم فى السياسه مش بحاول ادخلها نهائى لان علشان الدنيا تتغير من حولينا لازم احنا نتغير الاول الرسول صلى الله عليه وسلم لما نزلت الرساله نظم نفوس الناس الاول وبعد كدة نظم الدوله مش قام وقال لاهل مكه ولقريش انا عايز اغير فى الاحكام والاعراف االى اتعودوا عليها لا لما هذب النفوس استقبلت كل احكام جديدة وقامت الدوله الاسلاميه بنفوس متقبله اى شرع وسياسه جديدة دة الشئ الكويس بقى نادر لدرجه ان الناس بستغرب لما تجد احد صالح وامين كما حدث مع العمال الامناء اللى ذكرهم كل من استاذ عصفور المد ينه وبينو وداعيه المستقبل يعنى المهم نغير نفسنا الاولى علشان نعرف نغيرالسياسه لان هايكون رجال السياسه وقتها منكم ناس صالحين وهايستجيبوا لرغابتكم طالما ترضى الله ولمصلحه الناس ( لايغير الله ما بقوم حتى يغيروا ما بانفسهم ) اعود للرؤيه رايت ان احد ما يقول لى حسنى مبارك لن يتعدى الثمانين عام وهايموت عند حلوله الثمانين وهايموت مريضا وليس مقتولا وهاتحدث فوضى فى البلد ووقتها الناس هاتقول احنا عايزين جمال مبارك وهايمسك جمال مبارك الحكم والله العظيم انا شوفت الرؤيا كدة وانا لاتفرق معى مين يحكمنا اصلا لانى بصراحه اريد حكم اسلامى ياتى باختيار مجموعه من الاشخاص يتوسم فيهم الخبره والتقوى والامانه عن طريق مجموعه من العلماء ويقومون باختيار واحد من هؤلاء الاشخاص وليس واحد يرشح نفسه مين قاله انه يستحق انه يحكم اوجدير بالحكم اصلا المهم ربطت الرؤيا بخبر الوفاة واستغربت ليه حزنت يمكن علشان خلاص اتعودت على وجودة طول عمرى لم اجد احد غيره رئيسا لبلدى طفولتى ومراهقتى وشبابى كبرت وهو من اجده امامى اتعودت على وجوده مع كرهى لافعاله وللحال اللى وصلت عليه البلد من تردى فى كل شئ اخلاقيا واقتصاديا واجتماعيا بس مع كل دة حزنت هل انا فيا حاجه غلط وخصوصا عرفت انه مريض قووووى جاء دة على احد الفضائيات ولكن وزير السياحه قال انه بخير وبيستجم شويه فى شرم الشيخ بس طبعا مش مصدقه وزير السياحه لانه خلاص السن يحكم برضه
ومافيش حد كبير على المرض والموت.. يمكن لو كان خرج من الحكم وهو مازال على قيد الحياه لما كنت حزنت ولكن الموت ليس فيه شماته وفرح ابدا الموت يسبب شفقه ويحدث تعاطف مهما كان الميت ظالم
انا عارفه انا هاصدم ناس كتير بس انا حزينه وبجد لو مات هاكتئب وهافتقده كتير وعلى فكرة احنا مش ضامنين اللى هايجى بعده هايعمل فينا ايه علشان معلش يعنى احنا لا نستحق حاكم عادل لاننا اصلا محتاجين تغير من جوانا واصلاح ذات البين اولا لان الرسول قال صلى الله عليه وسلم (اينما كنتم ولى عليكم ) انا لا ادافع عنه لانى فعلا لا احبه او حد يقول انى من مؤيديه لا والله ولكنه التعود لا اكثر يعنى لو احنا كويسين جاءنا حاكم عادل واذا كنا غير ذلك جاءنا حاكم ظالم واى حكم غير الشريعه الاسلاميه يبقى كلهم
حسنى مبارك او جمال عبدالناصر او السادات
نفسى مرة حاكم يرحل عنا من غير موت يقول كفايه كدة عليا يمكن يجى حد احسن منى حتى لا نتعاطف معه عند موته وننسى كل ما فعله معنا

Wednesday, August 22, 2007

الى كل فتاه تؤمن بالله ورسوله...حجابك

فيه موضوع عارفه انا فيه ناس كتير اتكلموا فيه اول لما بدات التدوين كان موضوع الحجاب مثار وكل الدنيا بتتكلم فيه بسبب كلام وزير الثقافه عنه فقلت مالوش لازمه اتكلم فيه طالما فيه ناس كتير اتكلمت فيه لانى مش باحب اتكلم فى موضوع اتكلم فيه ناس كتير باكتفى بكلام الاخرين وخلاص لانه زى فرض الكفايه طالما واحد اتكلم فى موضوع مالوش لازمه الدنيا كلها تتكلم بس كنت على مدونه الصارم الحاسم ووجدت تعليق بيقول ان فيه ناس لسه بتذم فى الحجاب دخلت عندهم اتفجأت بالكلام واتصدمت منه طبعا مش هاقول هما مين ومش هاقول قالوا ايه
لاقيت نفسى استفزنى الكلام فقلت لازم اتكلم فى الموضوع بس مش هاتكلم عن اثبات القران والسنه للحجاب وفرضيته
لان ناس كتير اتكلمت فى الامر دة هاتكلم عنه بطريقتهم فى التفكير لانهم بيحبوا يمنطقوا كل حاجه وبيحبوا استخدام العقل والكلام دة مجرد وجهه نظرى
ليه اصلا الحجاب مهم بالنسبه للمرأه بدايه كدة هاسال سؤال بسيط للرجل المتزوج كيف تحب ان ترى زوجتك وهى فى البيت هل تحب ان تراه لابسه طرحه ولابسه عبايه باكمام طويله ولا ترى منها اى شئ ام تحب ان ترى زوجتك فى كامل زينتها وفى احسن ملابس وياريت لو ملابس تظهر جمالها
هاتكون سعيد بيها قوى وهى عامله فى نفسها كدة فى البيت علشان تتمتع بيها و بالنظر اليها دة حقك لانها زوجتك
يعنى الرجل يستمتع بالمراه ويفتن بها لما تكون فى كامل زينتها طيب اللى بيطالب المرأه بالتحرر من الحجاب انت عارف ان نواياك سيئه لانك تريد تستمتع برؤيه المرأة سافره وتستبيح لنفسك كل النساء انك تريد متعتك انت فقط انك من اعوان الشيطان تشجع المرأة لرغباتك الشخصيه فقط
سؤال للمراه بالله عليكى انت لما بتخرجى وتتزينى وتذهبى الى الكوافير وتلبسى الملابس الفاضحه على راى انيس منصور ان فتاه اليوم بتلبس ملابس وهى خارج البيت كانت تستحى امها تلبسه فى غرفه النوم شوفى مين بيقول الكلام انيس منصور وانتم عارفين انيس منصور ولا متدين ولا شيخ نرجع للسؤال ليه بتخرجى بالمنظر دة اوعى تقولى علشان نفسك مش هانضحك على بعض انتى بتتزين كدة علشان تلفتى نظر الرجال اليكى
قال الشيخ الشعراوى مرة ان المرأه اللى بتخرج فى كامل زينتها تلح على الرجل لينظر اليها بتقوله بص يا اعمى دة كلام الشيخ الشعراوى يعنى انتى بتتزين ليستمتع بكى الرجال مهما تقوليلى انا على خلق وباصلى متفقه معاكى ولا اعيب على خلقك اى شئ بس ايه ذنب انسان لا يستطيع الزواج ولا يستطيع الوصول اليك ان تفتنيه وتسببى فى افسادة هاتقوليلى ربنا قال غضوا البصر يبقى هو يغض بصرة بيبص ليه طيب ياللى بتقولى ربنا قال طيب ليه انت مش سمعتى كلام ربنا وغطيتى نفسك ورحمتى الشباب من الفتنه
انتى مش عارفه انك لما تخرجى كدة وكل انسان يفتن بيكى يبقى دة بيزيد فى عداد سيائتك وبتحملى وزره
انت مش عارفه ان الرجل غير المرأه الرجل بيفتن بالمراه ايا كانت لكن المراه تفتن بالكلمه الحلوة
اضافه بسيطه(عارفه لو فتن بكى انسان ملتزم وعارف ربنا هايكتم فى نفسه خوفا من الله لكن لو واحد مش ملتزم ولا يعرف ربنا هايخطف اى طفله ويغتصبها لانه مش قادر عليكى ولكنه هايقدر على طفله لا حول لها ولا قوة او اضعف الايمان هايتحرش باى بنت تقابله ليفرغ الشحنه التى اتشحنها بسببك ) عرفتى بقى سبب التحرش والاغتصاب وخالى بالك هاتشاركيه الاثم لانك كنت السبب فى اثارته وجعله يقوم بهذه الجريمه يعنى المفروض تتحاكمى معه لانك مشاركه فى الجريمه
انت مش عارفه انك ممكن تجعلى رجل يبغض زوجته بسببك لانها اكيد فى البيت مش هاتكون فى كامل زينتها مثلك يبقى انتى كدة تسببت فى خراب بيت وزاد عداد سيئاتك اذا كنت يعنى مهتمه بالحسنات والسيئات
ام اذا كنت غير مهتمه ومش فارق معاكى فاعملى اللى انتى عايزاه بس لازم تعرفى حاجه زى ما فتنتى رجل وجعلتيه يبغض زوجته ربنا هايسلط عليكى نفس اللى عملتيه فى غيرك وزوجك هايفتن بواحدة تانيه غيرك
لانه تزوجك فى الاول علشان شكلك ومظهرك فلما يزهق منك هايدور على شكل تانى وهايلاقى بسهوله جدا
بالنسبه للرجل اللى بيترك ابنته او زوجته او اخته تخرج بهذا الشكل ولا يغار عليه عارفين الرسول قال ايه عن الرجل الذى لا يغار على اهل بيته انه ديوث والديوث لا يدخل الجنه مش انا اللى بقول دة الرسول صلى الله عليه وسلم اللى بيقول مثلا واحدة تقول نفسى اتحجب بس مش قادرة انت لو مؤمنه بالله ورسوله والحساب هاتنفذى الامر فورا انت لو قال ليكى مديرك افعلى كذا لاما اذا لم تفعليه هاتتجازى واذا فعلتيه هايكون لكى حوافز تفتكرى هاتنفذى الامر من غير تفكير ولا لا طيب ليه بتفكرى كتير فى اوامر ربنا هاتقولى مش قادرة طيب انتى احسن من حلا شيحه ولا حنان ترك ولا رانيا علوانى اللى تركوا الشهرة واللبس المبهر علشان ربنا انتى تكونى ايه جنب شهرتهم وعلى فكرة هما ولا كبار فى السن ولا مرضى عارفه حنان ترك اتطلقت من زوجها بسبب الحجاب لانه رافض حجابها نيجى بقى للى لبست الحجاب ومش حجاب الحجاب مش مجرد قطعه قماش تضعيها على راسك انتى عارفه شروط الحجاب انه يكون سابغ يعنى مغطى الجسم كله لا يشف ولا يصف ولا يكون زينه
يعنى ولا بنطلون ضيق يصف جسمك ولا بادى مش عارفه لبستيه ازاى اصلا ولا 15 كيلو ميكياج على وجهك
ولا برفان زاعق يشمه الناس على بعد كيلو متر مربع طالما اتحجبتى يبقى التزمى الرسول قال علمت فالزم
يعنى طالما عرفتى الحجاب يبقى لازم تلتزمى بضوابطه والا انا افضل تشيلى قطعه القماش اللى ما لهاش اى لازمه نهائى وخليكى من غير حجاب علشان لا تنحسبى على المحجبات وتكونى حجه للعلمانين على المحجبات
طبعا فيه ناس بتقول ان الرقى والتقدم فى السفور طيب حنان ترك وحلا شيحه دول مش المفروض من المجتمع الراقى وصفوة المجتمع طيب اتحجبوا ليه اصلا طالما ان الحجاب ضد الرقى هاتقولى عليا انى معقدة ولا متخلفه او اتحجبت لظروف خاصه اوانضغط عليا علشان اتحجب الحمد لله اتحجبت وانا فى سنه تانيه ثانوى والحمد لله كنت متفوقه محبوبه من مدرسين ومعظم بنات المدرسه كانوا صديقاتى وكنت محبوبه منهم جدا اصغر واحدة فى اخواتى والحمد لله اسرتى مترابطه جدا وبنحب بعض بفضل الله ولا اعانى اى مشاكل فى شعرى لاحسن حد يقول انى اتحجبت علشان عندى مشاكل مع شعرى ولا حاجه امى اتحجبت بعد زواج اختى الكبيره واخواتى فيه اللى اتحجب بعد الزواج وفيه اللى اتحجب بعد الجامعه يعنى الحمد لله ولا كنت بمر بظروف سيئه
ولا حاجه ولكنى عندما عرفت الامر بالحجاب الحمد لله ارتديته مع ان كان كل صحباتى كانوا مش محجبات والحمد لله ربنا من عليا ان فيه ناس منهم تشجعوا وارتدوا الحجاب بفضل الله والحمد لله مازلت ارتديه ولم افكر يوم فى عدم ارتدائه ربنا يديمها عليا نعمه اللهم امين الحمد لله لا يعوقنى فى اى شئ نهائى بالعكس انا كنت الاول لما امشى فى الشارع مع صديقاتى لان كان حجابى كان حجاب امريكانى يعنى كان ملفت فى الاول كنت بامشى مرووشه خايفه حد يقرب منى ويعمل اى حركه مش لطيفه لما لبست العبايه ( الحجاب بضوابطه الشرعيه) لا اجد الا كل احترام ومعامله طيبه بفضل الله يعنى انا واحدة زيكم مش من المريخ ولا حاجه باروح النادى وبتعامل مع النت ومش متخلفه ولا حاجه وفيه بنات صديقاتى منتقبات برضه حياتهم طبيعيه ولا يعوقها اى شئ نهائى
فكرى كدة اختى وراجعى نفسك هل اشيائك الثمينه تتركينها فى العراء ام تخافين عليها وتبعديها عن عيون الناس هكذا انت جوهرة ثمينه يريد الاسلام حمايتك من الاخرين هل تاكلين الحلوى المكشوفه اما تاكلين الحلوى المتغلفه شوفتى الشئ المغلف بيكون محمى من التلوث ليه ترخصى نفسك ويكون جسمك مستباح لكل الناس الا تعلمين انه يستمتع بكى الكناس والغفير وغيرهم وغيرهم وطبعا ببلاش من غير ما يدفع ولا مليم الله اكرمك وجعلك حرة لا تباعين فى سوق الرقيق ليه مصره تكون جاريه ليه مصرة تظهرى ان جمال المرأه فى الشكل فقط والزينه لا المرأة افضل من كدة بكتيرواهم من ان تنحصر فى الشكل الخارجى
اخيرا كلامى الى كل فتاه تؤمن بالله ورسوله وكتابه هل عندك شك ان الله لايريد بك الخير المفروض لما الله ورسوله يقولوا امر نقول نحن سمعنا واطعنا ولا حتى نفكر مجرد تفكير فى الامر هل تشكين فيمن كان يرزقك وانت جنين فى بطن امك انه لا يريد لك الخير عندما امرك بالحجاب لازم تاخدى كل اوامر الله من غير تفكير ولا تردد كما تثقين فى دكتور التخسيس وتاخدى كلامه وانتى مستسلمه تماما ليه مش بتاخدى اوامر الله بنفس الطريقه بالاستسلام التام للامر

هدانا الله واياكى الى سواء السبيل ورزقنا حسن الاتباع

اللهم اجعلنا من الذين يستمعون القول فيتبعون احسنه

اللهم ارزقنا الاخلاص فى القول والعمل

موضوع مرتبط بهذا البوست على
مدونه حائر فى دنيا الله

ايضا عند الباشمهندس ماعلينا موضوع

Friday, August 17, 2007

يوم رزق زكريا الولد


اقترب نبى الله زكريا من نهايات العمر اصابه الكبر وكانت زوجنه عاقرا لكنه دعا ربه ان يرزقه الولد لم يكن زكريا ليشك لحظه فى قدرة الله لكن ربما دفعه ليرفع دعاءه بالولد ما راى من رزق بلاحساب او سبب فى المحراب عند العذراء مريم وقد كان يكفلها كان يجدعندها فاكهه الصيف فى الشتا وفاكهه الشتا فى الصيف فدعا زكريا وقال ( رب هب لى من لدنك وليا يرثنى ويرث من ال يعقوب واجعله ربى راضيا) ولبى الله نداء زكريا ونادته الملائكه بان الله يبشره بولد اسمه يحى ( ونادته الملائكه وهو قائما يصلى فى المحراب ان الله يبشرك بيحى مصدقا بكلمه من الله وسيدا وحصورا ونبيا من الصالحين) وهنا يتسال زكريا وهو اعلم بحاله بانه طاعن فى السن وزوجته ايضا عجوز وعاقرا (قال ربى ان يكون لى غلاما وقد بلغنى الكبر وامراتى عاقر) تعامل زكريا مع الامر كبشر يتناول اى مساله بمنطق السبب والنتيجه وبهذ ا المنطق لايمكن له ان يامل فى الانجاب وذكره ربه ان تحقيق امله فى الذريه امر هين كيف لا ( وقد خلقتك من قبل ولم تك شيئا ) ولكن لماذا لم يدعو زكريا ربه بالذريه قبل كدة لماذا كانت دعوته فى ايام العذراء مريم هناك حكمه من ذلك حكمه ان يرى زكريا الرزق عند مريم من غير حساب فيطمع فى كرم الله ويدعوه مع عجز الاسباب عنده ولتثبت مريم العذراء شاء الله ان يثبتها عندما يهبها المسيح عيسى ولم يمسسها بشر فالقادر على ان يهب زكريا برغم كبر سنه وعقم زوجته الولد قادر على ان يهبها غلاما بغير زوج لانه وحدة الذى لا تستند قدرته الى مسببات فسبحان الوهاب القادر العظيم
انظروا الى قصه سيدنا زكريا والسيدة مريم ادعو الله واجملوا فى الطلب لان الله لا يعجزه شيئا فى الارض ولا فى السماء
اوعى تتدعو الله وانت شاكك فى ان دعائك لن يستجاب
او تستعظم امر مهما كان على الله ثق انه هو الوهاب الذى راعاك وانت جنين فى رحم امك قادر ان يراعك
اطلب فوق قدرتك ان الله يحب ان تعظموا فى الطلب اطلب التى تعجز يدك عن الوصول اليه
اطلب كل شئ اطلب الجنه بصدق تنالها ان شاء الله
هل لما تطلب شئ من عامل بسيط كما تطلب شئ من رئيس الدوله
فما بالك وانت تطلب من الله القادر على كل شئ خالق الارزاق ومقسمها
فهل سوف يعجزة طلبك
اسال الله ان يحقق لكل صاحب حاجه حاجته مهما كانت عظيمه فى نظره ومستحيل الوصول اليها
اكثروا من الدعاء فى هذه الايام قال رسول الله صلى الله عليه وسلم ( ان فى ايام دهركم لنفحات الا فاغتنموها ) صدق رسول الله صلى الله عليه وسلم
مهما كان طلبك كبير فالله اكبر
شكرا لكل من اهتم بالسؤال عنى جزاكم الله عنى خير الجزاء

Wednesday, August 15, 2007

بابا و حشتنى

خمس شهور على رحيلك والدى لسه مش قادرة استوعب انك مش موجود حاسه بعدم اتزان حاسه انى ضعيفه قوى كنت انت مصدر قوتى ومعرفتش كدة الا بعد رحيلك انا مش معترضه على ارادة ربنا بفقدك ولكنه الحزن والافتقاد الرسول عندما فقد عمه وزوجته السيدة خديجه سمى هذا العام بعام الحزن وانا فقدت اختى وبعدها بشهرين فقدتك والدى يبقى دة عام الحزن بالنسبه لى ليه استعجلت كدة على الرحيل ليه ماستنتش علينا شويه لما نفوق من صدمه فقد اختى اعلم انها ارادة الله وراضيه بقضائه بس فراقك صعب علينا الحمد لله على كل حال

بابا رمضان قرب كنت باكون فرحانه بقدومه بهجته مش حاسه بيها مين هاينافسنى فى كم مره نختم القران مين هايقوم ماعيا يصلى قيام الليل ازاى هافطر وانت مكانك على السفره فاضى مين هاكل من ايده التمر باللبن اللى كنت لازم تعمله لنا من بدايه شعبان تجيب لنا كل احتياجات رمضان عمرك ما قطعت هذه العادة قطعتها هذا العام رغما عنك انا اتمنى انك تكون فى مكان افضل وفى رفقه وصحبه افضل منا

بس يابابا حسيت قد ايه كنت انت الامان كنت انت الاستقرار دلوقتى كل يوم احناعند حد من اخواتى فقدت استقرارى فقدت عاداتى اللى اتعودت عليها كان وجودك الامان والاستقرار الخوف يتملكنى مفتقده الحنان قبل ما اطلب الحاجه بتكون جايبها ليا بابا انت كنت الولى فى جواز كل اخواتى ليه مش انتظرت لما تكون ولى فى زواجى ازاى حد غيرك اسمه يكون مكتوب على عقد زواجى

انا بقيت باكره انى اخر واحدة فى اخواتى لانى مشبعتش منك زيهم بقيت بحب الموت قوى لانه هايقربنى من انى اكون بقربك

يمكن مقلتش لك كتير انى بحبك قوى يمكن كنت بانسى ياريت تكون حاسس قد ايه انا بحبك سامحنى على تقصيرى معك
سامحنى على جهلى معك بابا الدنيا وحشه قوى من غيرك

وربنا يلطف بينا لما يجى اول رمضان وانت مش معانا

رمضان سامحنى اول مرة مش اكون فرحانه بقدومك غصب عنى

Monday, August 13, 2007

مين يستحق صحبتك

اولا كل سنه وانتم بالف خير اول شهر شعبان المبارك الذى ترفع فيه الاعمال وكان اكثر صيام الرسول صلى الله عليه وسلم بعد شهر رمضان كان فى شهر شعبان والحمد لله الجو اتحسن شويه ياريت بقى نستن بسنه الرسول ونجتهد فى الصيام فى هذا الشهر تقبل الله منا صالح الاعمال اللهم امين يارب العالمين

انا هاكمل بوست فى ظل الرحمن علشان نعرف من يستحق ان نصحبه وهل نحن فعلا نستحق ان نكون من الصحبه الصالحه كل واحد يدور فى نفسه هل هو فعلا يعرف حق الصحبه بحق واذا كان فعلا يتصف بهذه الصفات فمن يستحق صحبته

البوست دة هايتكلم عن حقوق الصحبه

اكيد مش كل انسان يصلح للصحبه قال صلى الله عليه وسلم ( المرء على دين خليله فلينظر المرء الى من يخالل) ولازم يتميز بصفات يرغب بسببها فى صحبته تكون فوائد من هذه الصحبه وهى فوائد دينيه ودنيويه من الفوائد الدينيه للصحبه منها الاستفادة من العلم والعمل ومنها الاستفاده من الجاه تحصنا به من اى شئ ممكن يصد عن العبادة ومنها التبرك بمجرد الدعاء ومنها انتظار الشفاعه فى الاخره فقد قال السلف استكثروا من الاخوان فان لكل مؤمن شفاعه فلعلك تدخل فى شفاعه اخيك وروى فى غريب لبتفسير فى قوله تعالى (ويستجيب الذين امنوا وعملوا الصالحات ويزيدهم من فضله ) قال فيشفعهم الله فى اخوانهم فيدخلهم الجنه معهم ويقال اذا غفر الله للعبد شفع فى اخوانه ولذلك حث السلف على الصحبه والالفه والمخالطه قال احد الصالحين لاتصحب من الناس الا من يكتم سرك ويستر عيبك فيكون معك فى النوائب
ويؤثرك بالرغائب وينشر حسناتك ويطوى سيئتك فان لم تجده فلا تصحب الا نفسك
حقوق الصحبه والاخوه
الحق الاول : فى المال
قال رسول الله صلى الله عليه وسلم ( مثل الاخوين مثل اليدين تغسل احداهما الاخرى) وانما شبههما باليدين لانهما يتعاونان على غرض واحد فكذا الاخوان انما تتم اخوتهما اذا ترافقا فى مقصدواحد فهما من وجه كالشخص الواحد وهذا يقتضى المساهمه فى لسراء والضراء والمشاركه فى الحال والمواساه بالمال مع الاخوة واحد السلف قل الا نفاق على الاخوان افضل من الصدقات على الفقراء قال على رضى الله عنه لعشرون درهم اعطيها اخى فى الله احب الى من ان اتصدق بمائه درهم على المساكين وقال ايضا لان اصنع صاعا من طعام واجمع عليه اخوانى فى الله احب الى من ان عتق رقبه قال رسول الله صلى الله عليه وسلم (ما من صاحب يصحب صاحبا ولو ساعه من النهار الا سئل عن صحبته هل اقام فيها حق الله ام اضاعه ) وقال ايضا صلى الله عليه وسلم ( ما اصطحب اثنان قط الا كان احبهما الى الله ارفقهما بصاحبه)او كما قال الرسول صلى الله عليه وسلم

الحق الثانى :فى اللسان بالسكوت

وهو السكوت عن العيوب فى غيبته وحضوره بل يتجاهل عنه بالسكوت عن الرد عليه ولا يتجسس عليه واذا راه فى الطريق لا يساله عن وجهته حتى لا يضطر الى الكذب وليسكت عن اسراره ولا يبثها الى غيره ولا يكشف شيئا منها ولو بعد القطيعه فان ذلك من لؤم الطبع وخبث النفس

الحق الرابع : على اللسان بالنطق

النطق باللسان تشمل التودد اليه والسؤال ان احواله اذا حدث له عارض فمعنى الاخوة المساهمه فى السراء والضراء وقال صلى الله عليه وسلم ( اذا احب احدكم اخاه فليخبره ) وانما امر بالاخبار لان ذلك يوجب زياده الحب فن عرف انك تحبه احبك بالطبع ومنها ايضا ان يناديه باحب اسمائه اليه فى غيبته وحضوره قال عمر رضى الله عنه ثلاثه يصفين لك ود اخيك ان تسلم عليه اذا لاقيته اولا وتوسع له فى لمجلس وتدعوه باحب اسمائه اليه وتثنى عليه بما تعرف من محاسن احواله فان ذلك من اعظم الاسباب فى جلب المحبه ومن اعظم ذلك تاثيرا الدفاع عنه فى غيبته وكذلك التعليم والنصيحه وتنبهه الى عيوبه ويكون ذلك فى السر لا يطع عليه احد

العفو عن الزلات والهفوات

وهفوه الصديق ممكن تكون فى دينه بارتكاب معصيه او فى حقك بتقصيره فى الاخوة اما ما يكون فى الدين واصراره على المعصيه فعليك يالتلطف فى نصحه بما يعيد له الصلاح واذا اصر على معصيته فابغضه من حيث احببته

اما زلته فى حقك فى الاولى العفو والاحتمال وخلق الاعذار فقد قيل ينبغىان تستنبط لزله اخيك سبعين عذرا فان لم يقبله قلبك فرد اللوم على نفسك فتقول لقلبك ما اقساك يعتذر اليك اخوك سبعين عذرا فلاتقبله فانت المعيب لا اخوك ومهما اعتذر لك اخوك كاذبا او صادقا فاقبل عذره

وقال صلى الله عليه وسلم المؤمن سريع الغضب سريع الرضا ( علشان مش حد يزعل انى عصبيه ) فلم يصفه بانه لا يغضب وكذلك قال الله والكاظمين الغيظ ولم يقل والفاقدين الغيظ وهذا لان العادة لا تنتهى الى ان يجرح الانسان فلا يتالم بل تنتهى الى ان يصبر ويحتمل

الحق السادس: الدعاء

الدعاء للاخ فى حياته وبعد مماته بكل ما يحبه ولا هله وكل متعلق به فتدعو له كما تتدعو لنفسك ولا تفرق بين نفسك وبينه فقد قال صلى الله عليه وسلم (اذا دعا لرجل لاخيه فى ظهر الغيب قال الملك ولك مثل ذلك )

وفى حديث ( يستجاب الرجل فى اخيه مالا يستجاب له فى نفسه ) صدق رسول الله صلى الله عليه وسلم اسالكم االدعاء لانى فى حاجه شديدة لدعائكم هذه الايام من فضلكم

الحق السابع: الوفاء والاخلاص

ومعنى الوفاء الثبات على الحب وادامته الى الموت وبعد الموت مع اولاده واصدقائه فان الحب انما يراد للاخره فاذا انقطع قبل الموت حبط العمل وضاع السعى ويقال ماتاخى اثنان فى الله فتفرق بينهما الا بذنب يرتكبه احدهما وكان احد الصالحين يقول اذا قصر العبد فى طاعه الله سلبه الله من يؤنسه وذلك لان الاخوان مسلاه للهموم وعون على الدين ومن ثمرات المودة فى الله ان لا تكون مع حسد فى دين ودنيا وكيف يحسده وكل ماهو لاخيه فاليه ترجع فائدته وبه وصف الله المتحابين فى الله فى الله تعالى فقال ( ولا يجدون فى صدورهم حاجه مما اوتو ويؤثرون على انفسهم ولو كان بهم خصاصه) ووجود الحاجه هو الحسد ومن الوفاء ان لا يتغير حاله فى التواضع مع اخيه وان ارتفع شانه واتسعت ولا يته وعظم جاهه فالترفع على الاخوان بما يتجدد من الاحوال لؤم قال الشاعر

ان الكرام اذا ما ايسروا ذكروا من كان يالفهم فى المنزل الخشن

دة جزء بسيط من حق الاخوة فى الله فهل نحن فعلا نقوم بحق الاخوة ولا كلا منا مقصر فى حق اخيه ولا يعطى للاخوة حقها

كم صديق عرفته بصديق صار احظى من الصديق العتيق

ورفيق رايته فى طريق صار عندى هو الصديق الحقيقى

من كتاب احياء علوم الدين جزء حقوق الصحبه

لا تنسونى بالدعاء لانى فى ظروف احتاج فيها الى دعائكم

جزاكم الله خيرا مقدما

Monday, August 06, 2007

فى ظل الرحمن

الموضوع دة مرتبط بموضوع عمر والمعتصم يعنى ايه حب فى الله وليه فيه انسان ترتاح له عن غيره وليه انسان اول ماتشوفه تحس انك تعرفه من زمان وتالفه وما هى حق الاخوة فى الله ومن الذى يستحق صحبتك ومن الذى يجب ان لا تعطيه ثقتك لانه لا يستحقها
الموضوع دة دايما شاغلنى وبسال ليه الاصدقاء مش يكونوا صافين مع بعض ويحبوا بعض بصدق الصديق فعلا اغلى شئ يحصل عليه الانسان فى هذه الدنيا علشان كدة سيدنا ابوبكر رضى الله عنه لقبه الرسول بالصديق لانه تشمل معنى الصديق ومعنى التصديق ومؤازة الصديق فى وقت الشدة والضيق الله الكلام طلع فيه سجع ربنا يستر وماعلينا مش يقول عنى انى بتقعر فى الحديث فى هذه الايام وجدت معظم الناس تشتكى من قله وجود الصديق والخل الوفى وتشتكى انها لوحدها فى الدنيا طيب هل انت صديق بحق وخلا وفى هل تعامل الناس كما تحب ان تعامل ولا انت بتعامل الناس على قدر تعاملهم معك ان احسنوا احسنت وان اساؤ اسئت واحيانا ان احسنوا اسات
الرسول الكريم صلى الله عليه وسلم قال ( لا تكن امعه ان احسن الناس احسنت وانا اساءو اسأت ولكن كن ان احسن الناس احسنت وان اسأءو احسنت ايضا ) او كما قال رسول الله صلى الله عليه وسلم
مشكلتنا اننا ننتظر المعامله الحسنه من الاخرين الاول طيب ليه مش ناخد احنا المبادرة ونعامل الناس بالحسنى لو انسان فيه خير سوف تاثره بحسن خلقك ولو انسان قلبه قاسى يبقى على الاقل حاولت معه لانى اعلم ان هناك ناس ولا تنفع معهم اى رقه فى التعامل قلوبهم قاسيه كالحجارة وقد ذكرهم الله سبحانه وتعالى فى القران فى سورة البقره
قال رسول الله صلى الله عليه وسلم ( المؤمن الف مألوف ولا خير فيمن لا يألف ولا يؤلف)وطبعا كلنا عارفين الاحاديث التى تتكلم عن الحب فى الله ودرجات المتاحبين فى الله ومن السبعه الذين يظلهم الله فى ظله يوم لا ظل الا ظله رجلان او امراتان تحابا فى الله اجتمعا عليه وتفرقا عليه شوفوا الحديث الروعه هذا
قال رسول الله صلى الله عليه وسلم(ينصب لطائفه من الناس كراسى حول العرش يوم القيامه وجوهم كالقمر ليله البدر يفزع الناس وهم لا يفزعون ويخاف الناس وهم لا يخافون وهم او لياء الله الذين لا خوف عليهم ولا هم يحزنون فقيل من هؤلاء يارسول الله فقال هم المتاحبين فى الله تعالى ) يا الله حاجه بسيطه وكلنا هانسعد بها وهى الحب هاتجعل الناس المتحابين بهذه الصورة واحنا للاسف مش بنحب نفسنا لو بنحبها كنا حاربنا علشان نوصل لهذه المرتبه وهذه المرتبه تكون بالحب فى الله بصدق مش كلام وبس ولكن احيانا تحدث امور خارجه عن ارادتنا وهى نحب اشخاصا ونالفهم عن اشخاصا اخرى فان شبه الشئ ينجذب اليه بالطبع ودة سر خفى لا يعلمه الا الله وعبر الرسول صلى الله عليه وسلم عن ذلك بقوله ( الارواح جنودا مجنده فما تعارف منها ائتلف وماتناكر منها اختلف) فالتناكر نتيجه التباين والائتلاف والتناسب نتيجه الذى عبر عنه التعارف
قال رسول الله صلى الله عليه وسلم(ان ارواح المؤمنين ليلتقيان على مسيره يوم وما راى احدهما صاحبه قط ) واظن دة واضح قوى فى التدوين انا عن نفسى فيه مدونات احب اصحابها وااتالف معهم وارتاح لهم وانا لا اعلمهم لا ن الكلام الذى يخرج من القلب يدخل القلب وهكذافى حياتى لا اتعامل الا مع من يوافق النفس والروح لانى لا احب النفاق والحب والبغض دة من اسرار الله
وحب من تشاء وابغض من تشاء ولكن اجعل حبك لله وبغضك لله ولا تؤذى من تكرهه او تكون سببا لايلامه
الرسول الكريم قال ( هذا قسمى فيما املك فلا تلومنى فيما لا املك)واكيد بيكون الائتلاف دة بسبب التناسب فى الطباع والاخلاق باطنا وظاهرا اما الاسباب التى او جبت تلك المناسبه فليس فى قوة البشر الاطلاع عليها ولتصديق ذلك
قال رسول الله صلى الله عليه وسلم ( لو ان مؤمنا دخل مجلسا فيه مائه منافق ومؤمن واحد فقط لجاء حتى يجلس الى هذا المؤمن ولو ان منافقا دخل الى مجلس فيه مائه مؤمن ومنافق واحد فقط لجاء حتى يجلس اليه) ودة يدل على ان شبه الشئ منجذب اليه بالطبع وان كان هو لا يشعر به وكان مالك ابن دينار يقول لا يتفق اثنان فى عشرة الا وفى احدهما وصف من الاخر وانا اجناس الناس كاجناس الطير ولا يتفق نوعان من الطير فى الطيران الا وبينهما مناسبه قال فراى يوما غرابا مع حمامه فعجب من ذلك فقال اتفقا وليس فى شكل واحد ثم طارا فاذا فاذا هما اعرجان فقال من ههنا اتفقا

ان اردت حسن العشره فالق صديقك وعدوك بوجه الرضا من غير ذله ولا هيبه منهم وتوقير من غير كبر وتواضع من غير مذله وكن فى جميع امورك فى اوسطها وازهد ما فى ايد الناس يحبك الناس وعامل الناس كما تحب ان تعامل وحبك
للناس اكيد هايحبك الناس
سبحان من جعل الأخوة بيننا..رب القلوب مقسم الأرزاق.
.مني إليك تحية ممزوجة..بمحبة من داخل الأعماق.
.يارب أنت خلقتنا وجمعتنا..فأجعل لنا بعد الفراق تلاقي.
.في مجلس ذكر " لا..بل " في..جنة الفردوس أو في النعيم الباقي

للصحبه حقوق ان شاء الله البوست القادم اذكرها بالتفصيل

اعتذرلاستاذى عصفورالمدينه انى لسه مش عملت التاج بس انا خارج البيت ومش بدخل النت كتير والبوست دة كتبته من زمان وكان فى الدرافت
ان شاءالله اعمل التاج قريبا