Sunday, July 29, 2007

يوميات صائم فاشل


عندما بدات الصيام وانا صغيره كان رجب وشعبان ورمضان كانوا بيجيوا فى الخريف والشتا وطبعا كان الصيام كان يسير جدا ومش بحس به نهائى واليوم قصير جدا حتى اكتشفت انا فاشله جدا انا متعودة اجهز نفسى لرمضان من رجب وشعبان بالصيام فيهم و الامردة منذ تعودت على الصيام من اول رجب وانا الحمد لله اصوم اتنين وخميس حتى جاءت الايام البيض وتصادف وجود موجه شديدة شديدة الحرارة واول مرة اصوم فى هذا الجو شديد الحرارة لااستطيع ان اوصف حالتى ناس كتيراعرفهم امتنعواعن الصيام بسبب هذا الجو شديد الحرارة بالاضافه لطول فترة الصيام حتى الثامنه مساءا وطبعا هما شايفين حالتى عامله ازاى زى ما تكون واحدة بتحتضر نفسى اشرب ميه ولما اشوف حد بيشرب قدامى ااقوله هاتروح من ربنا فين ارحمونى شويه بجد كانت حالتى صعبه

تذكرت يوم القيامه وقرب الشمس من رؤوسنا والعرق الذى سيتصبب مننا وعطش يوم القيامه لا يقاس بعطش الدنيا وفعلا اكتشفت انى فاشله ومش قادرة اتحمل الصيام فى هذا الحر الشديد ولكنى اقاوم بكل ما اوتيت من قوة

اللهم نجنامن حرجهنم وعذابهاوادخلنا الجنه بدون سابقه عذاب

وارحمنا من عطش يوم القيامه واجمعنا بنبينا محمد صلى الله عليه وسلم فى جنات النعيم واسقنا بيديه الشريفه شربه لا نظمأ بعدها
ولاتجعلنا ممن تقول فيهم وقتها انهم ليسوا من قومك انك لا تعلم ما احدثوا بعدك

رحماك يارب رحماك يارب

من يوميات صائم اثبتت التجربه فشله وانه ضعيف جداااااااااا

Tuesday, July 17, 2007

فسقى لهما

اتذكرون قصه سيدنا موسى عليه السلام مع الفتاتين فى سورة القصص موقفه معهم وماذا فعل لهما قال الله تعالى
وَلَمَّا تَوَجَّهَ تِلْقَاء مَدْيَنَ قَالَ عَسَى رَبِّي أَن يَهْدِيَنِي سَوَاء السَّبِيلِ
وَلَمَّا وَرَدَ مَاء مَدْيَنَ وَجَدَ عَلَيْهِ أُمَّةً مِّنَ النَّاسِ يَسْقُونَ وَوَجَدَ مِن دُونِهِمُ امْرَأتَيْنِ تَذُودَانِ قَالَ مَا خَطْبُكُمَا قَالَتَا لَا نَسْقِي حَتَّى يُصْدِرَ الرِّعَاء وَأَبُونَا شَيْخٌ كَبِيرٌ
فَسَقَى لَهُمَا ثُمَّ تَوَلَّى إِلَى الظِّلِّ فَقَالَ رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ

قصه بتحكى ان سيدنا موسى لما خرج من مصر خوفا من فرعون وجنودة توجه الى مدين وجلس تحت شجرة ليستريح وجد فتاتين لا حول لهما ولا قوة تقفان بعيد توجه اليهم وسالهما مابكما قالتا نريد ان نحصل على المياه ولكن الرجال كثير حول المياه ولا نستطيع المزاحمه وبرروا خروجهما ان ابوهما شيخا كبير لا يستطيع الخروج فبكل مرؤه زاحم الرجال واحضر لهما المياه تذكرت هذه القصه وانا كنت فى نفس موقف الفتاتين بعد وفاه والدى رحمه الله عليه كانت هناك امور لازم اقوم بها بنفسى كان والدى رحمه الله عليه هو اللى بيعمل لينا كل حاجه اول مرة يكون ليا احتكاك مباشر بالمصا لح الحكوميه والبنك والقيام بشراء بعض الاشياء اللى كان والدى بيعملها لنا
اول مرة اعرف يعنى ايه طابور كنت اسمع عنه واشوفه من بعيد لكنى لم اتعامل معه عن قرب بكيت لاول احتكاك ليا بهذا العالم فوجئت بمزاحمه الرجال للنساء وانا لا اعرف اتزاحم فضلت واقفه بعيد انتظر ان يقل الزحام انتظر ان حد يفكر يساعدنى لم اجد على العكس الرجل ممكن يعمل لمس اكتاف علشان يبعد المرأة ومافيش مانع يخبطها ويزاحمها فى سبيل الوصول الى هدفه تذكرت وقتها قصه سيدنا موسى وكيف ساعد الفتاتين للاسف لا يوجد احد الان بهذه المرؤة مش عارفين ان ممكن يكون فيه بنات مش متعودة على المواقف دى للاسف حاجات كتير لا يهتم بها الناس مع انها ممكن تكون كبيره عند ربنا
لانه اغاث صاحب الحاجه الملهوف وكمان حافظ على بنت من انها تتبهدل وسط الرجال احنا للاسف بنقرا القران لكن ولا بنعمل باى حاجه فيه حد لو وجد بنت واقفه محتاره لا حيله لها هل بيفكر يساعدها هل فكر يسالها محتاجه ايه امامك نبى من انبياء الله فعلها ليه ربنا بيذكر الامثله دى علشان المفروض نعمل كدة لكن احنا بتقرا القران من غير تتدبر واعتبار ونفهم ليه ربنا ذكر الامر دة القران ربنا انزله ليعلمنا كيف نتعايش فى هذه الدنيا وينظم بها حياتنا واحدة مثلى ابوها مش شيخا كبير ابوها شيخا توفاه الله وهى لم تتعود على كدة والدها لم يتركها لهذه الامور ان تفعلها فى حياته كان يقوم بعمل كل شئ لها واضطراتها الظروف للخروج والاحتكاك بالعالم الخارجى وللاسف اتفجأت بواقع مرير واتصدمت فى الناس حتى المتدينين المتدين حجته ماينفعشى اكلم واحدة مش اعرفها انت مش هاتكلمها انت هاتقضى لها حاجتها
وخلاص يعنى انت افضل من نبى الله سيدنا موسى عليه السلام يعنى انت متقى الله خيرا منه وسبحان الله علشان سيدنا موسى عمل خير وفقه الله للزواج وتزوج واحدة من الفتاتين مع انه كان لا اهل له فى هذه البلد ولا زاد ولكنه عمله الصالح يسر له الخير
اللى واجهته بعد وفاه والدى رحمه الله عليه عرفنى قيمه والدى وقد ايه كان بيعملنا كتير من غير من نقوله شكرا لك يا والدى
جزاك الله عنا خير الجزاء واسكنك الله الفردوس الاعلى اللهم امين بارب العالمين
بجد ياريت بجد نقرا القران بتدبر اكتر ونعرف ماذا يريد الله منا من كل موضع من مواضع القران هاتفرق كتير الحياه
واظن هاتكون افضل كتير

Saturday, July 14, 2007

كل سنه وانتم طيبن والى الله مقربين


كل سنه وانتم بالف خير وامان وطمئنينه وراحه بال مش معقوله يهل علينا شهر رجب وهو من الاشهر اللى فضلها الله عن بعض الشهور ولا اهنيكم بيه
فقد فضل الله بعض الناس على بعض وبعض الشهور على بعض وبعض النبين على بعض وبعض الاماكن على بعض وشهر رجب من الشهور المفضله لانه من الاشهر الحرم وكمان بيقربنا من رمضان فيياريت كلنا نحاول نشحن فيه انفسنا ايمانيا حتى نستعد لاستقبال شهر رمضان الكريم وعلى فكرة كل الفضل اللى فى شهر رجب انه من الاشهر الحرم وربنا قال ( ولا تظلموا فيهن انفسكم) يعنى الانسان يبعد فيهم عن المعاصى بقدر الامكان طالما ان الله حرمهما كما ان المعصيه فى البلد الحرام مضاعفه فالمعصيه فى الاشهر الحرام ايضا مضاعفه واكيد الثواب فيه مضاعف ان شاء الله وايضا من مميزات شهر رجب الاسراء والمعراج وعلى فكرة وقت الاسراء والمعراج غير مؤكدة بس دة اجتهاد العلماء انها كانت فى 27 رجب والغرض اننا نتذكر هذه الليله الكريمه ونعرف فيها قدر الرسول عند الله
ونعرف فيها قدرة الله تعالى ونصرته لنبيه صلوات الله عليه وسلامه و لعبادة المؤمنين وايضا عظمه الليله فى انها فرضت فيها الصلوات الخمس
ويجب ان نتذكر هذه الاحداث قال الله تعالى ( وذكرهم بايام الله) حتى لو نسينا من طول الفترة تذكرنا واسترجعنا وعدنا الى ربنا وطلبنا منه قبولنا
اللهم بارك لنا فى رجب وشعبان وبلغنا رمضان .... حديث ضعيف
لمعرفه اكتر عن شهر رجب اليكم هذا اللينك
شهر رجب