Sunday, April 29, 2007

سؤال محيرنى


انا مازلت بعيد عن بيتى وحياتى اللى اتعودت عليها بس فيه موضوع دايما بيتعبنى وبيشغل تفكيرى وسؤال دايما بداخلى ومحيرنى وهويلح عليا بشدة فى الوقت دة ولسه مش هارجع بيتنا دلوقتى فحبيت انى اتكلم فيه ولانى بعانى منه كتير فى حياتى يمكن يكون عادى لناس كتير بس انا مش بعرف اتاقلم مع هذا العالم طبعا عايزين تعرفوا ايه هوالسؤال سؤالى هو ليه فيه ناس بتحب تاذى غيرها ايه المتعه فىرؤيه الغير يتالم ليه اللى بيكره انسان مش يبعد عنه وخلاص ليه يترجم الكرة دة لافعال ياذى بها غيرة ليه الصديق ياذى صديقه ليه الجارياذى جارة ليه الدكتور ياذى مريضه ومن الدكاترة اللى بيمارسوا الطب كتجارةويتلاعب بجسد المريض ويسرق جزء من اعضائه من اجل شويه ورقات حتى يعيش بها مترف فى الدنيا المسئول اللى بياذى مرؤوسينه .الشاب اللى بياذى بنت ويتسلى بيها ويجرح مشاعرها ليه فيه حروب فى كل مكان والانسان حياته محدودة فى هذه الدنيا ليه كل انسان يمارس الشر ليه مش يضع نفسه مكان من يؤذيه ليه ناسى انه ممكن تتدور الدوائر عليه الله تعالى يقول ( ان يمسسكم قرح فقد مس القوم قرح مثله وتلك الايام نداولها بين الناس) لو كل انسان جرب الاذى والجرح مش هايفكريجرح اويؤذى غيرةفيه ناس بتقولى انتى حساسه زيادة عن اللزوم
طيب ليه الناس مش تتعامل بنيه خالصه وصافيه ليه زى ما هما عايزين معامله حسنه ليه مش بيطبقوا دةعلى نفسهم الرسول صلى الله عليه وسلم قال عامل الناس كما تحب ان تعامل مشكلتى مش بعرف اتعامل بخبث ولابعكس ما بداخلى يمكن انا مش مثاليه وليا اخطاء كتير بس بينى وبين نفسى لا احب اخطائى تتعدانى لا احبها تصيب غيرى مش بتحمل اذيه بشر مش بتحمل اشوف انسان يتالم حتى ولو مش بسببى بجد احيانا مش بعرف اتعامل فى كتيرمن الاوقات مع ناس كتير وبضايق من كلمه انتى حساسه هولما اكون برفض الشر اكون حساسه ليه اصلا يكون فيه شر ساعات باحس ان هناك بشر غلبوا الشيطان فى شرة لان الشيطان لم يدعى الفضيله اويضع ماسك الفضيله ولكنه اعلن الشرصراحه واعلن بغضه لبنى ادم واقسم على اغوائه لكن البشر منهم من يدعى الفضيله وقلبه كله سواد ومنتظر الفرصه ليظهر شره واذيته لخلق الله

فيه حدعنده اجابه لسؤالى ليه فيه ناس تحب تاذى غيرها ليه الانسان الطيب يتقال عليه اهبل وعبيط وهل انا غلطانه فى طريقه تفكيرى وحتى ولوانا غلطانه مش هاقدراتغير ومش هاقدراتعامل غيربطريقتى اللى يمكن تعبانى كتير بس مش هاقدر اكون غيركدة
ياريت كل انسان بيفكر يؤذى غيره سواء ايذاء معنوى اومادى يقعد يفكر بينه وبين نفسه لو الايذاء اصابنى اواصاب احد ممن يهمنى امرهم هل هاتحمل هذا الاذى انا بتكلم عن الانسان السوى وليس المرضى النفسين لان فيه ناس عندها امراض نفسيه وتتلذذ بتعذيب الاخرين مثلا كما نرى فىالسجون هؤلاء ساديون هوايتهم فى الحياة ومتعتهم الوحيدة اذى مخلوقات الله ليس لهم حل الا مستشفى الامراض النفسيه والعصبيه عافنا اللهم منهم

Wednesday, April 18, 2007

مازلت على فيد الحياة


بجد مش عارفه ابدأ كلامى منين لانكم بجد احرجتونى بزوقكم انا الحمدلله بخير بس انا مش فى بيتنا انا عند اخى ومش عايزة ااقول لكم اولادة مش بيعطونى فرصه اقعد على الكمبيوتر واذا حدث وقعدت علىالجهاز مش قادرة ااقول لكم على الحاله العصبيه اللىبتركبنى بسبب انا النت دايل اب غير ان الكيبورد الازرار بتاعها بتعلق من كتر لعب الجيم عليها من اولاد اخى خصوصا مسطرة المسافات بعد ما اكتب كتير اكتشف انى مش عارفه اقرا انا كتبت ايه وامسح واعيد الكلام تانى فاثرت السلامه واخترت انى مش اتعامل مع هذا الجهازنهائى كفايه اللى انا فيه انا دلوقتى بتعامل معه علشان اطمنكوا انىمازلت على قيد الجياة لولاقيتو كلام غلط مش منى دة من الكيبورد

شكرا لماعلينا وخالدوبينو وامانى بنت الجنوب فعلا اطيب مدونه كما قال عليها ما عليناوشكرا ميمو جزاك الله خيرا على مشاعرك الجميله وخمسه فضفضه ربنايكرمك على سؤالك

بقول ايه كفايه كدة انا هايجيلى انهيار عصبيى من الكيبورد

اشوفكم علىخيرا

Monday, April 02, 2007

تاج ما علينا

ما علينا بعت ليا تاج علشان اجاوب عليه هاتسالونى مين ما علينا لانكم اكيد هاتفتحوا اللينك الخاص بيه مش هاتلاقوا اثر لمدونته التى اختفت فى ظروف غامضه نرجو ان يكون الاختفاء لعمل مفاحأة سعيدة لينا بمجموعه من البوستات الجميله وشكل جديد للمدونه ماعلينا من المدونين المحترمين اللى ساعدونى وانا فى بدايه التدوين وساعدوا على التعريف بمدونتى جزاه الله كل خير عنى بس بجد موضوع اغلاق المدونه دة مش المفروض اى مدون يعمله لان الكتابات الموجودة على المدونه دة بقى حق للجميع طالما خرج للنور هل اى شخص الف كتاب او كتب مقال فى جريدة لو شعر فى يوم انه مش عايز يكتب يقوم رافع كل مؤلفاته وكتاباته من ايد الناس مثلا الامام البخارى او الدكتور مصطفى محمود لو شعر انه نفسيا لا يستطيع الكتابه هل يرفع كل كتبه من السوق ومن ايد الناس ممكن الشخص يبعد شويه يراجع نفسه وكلنا محتاجين لمراجعه النفس بس ابعد من غير ما اغلق مدونتى حتى لو بطلت كتابه نهائى لا اغلق مدونتى ليه بس... ممكن اغلق التعليقات لكن المدونه كلها لا وعلى فكرة فيه لينكات للشاعرة ايمان البكرى موجودة على مدونه ماعلينا وللاسف مش سيفتها عندى علشان مطمنه لما احتاج ليها ادخل عند ما علينا وافتحها يارب تكون فترة الراحه خلصت وترجع تكتب تانى يا ماعلينا وياريت من فضلكم اى حد من المدونين لا يغلق مدونته لانكم بجد بتسببوا لينا احباط واكتئاب لان احلى حاحه انا كل واحد فينا بيستفيد من فكر التانى وبيجعله ياخد باله من اشياء يمكن كانت تايه عنه بجد انا بزعل جدا يعنى مرة دخلت مدونه سمراء النيل وجدتها مغلقه بجد زعلت جدا لانى خلاص ارتبطت بكل المدونين وفعلا باقلق لو اى حد فعلا اغلق مدونته بحس بجد ان الدنيا خلصت وانا مش ناقصه بجد فقد فى حياتى كفايه اللى فقدته كتير حتى لو انا مش اعرفه شخصيا بس متخيله شكل كل مدون ومدونه وفعلا مش عايزة اتعرف عليهم فى الحقيقه لانى افضل الصورة اللى فى خيالى لكل مدون ومدونه اتكلمت كتير اسفه ندخل بقى على
السؤال الاول هل كنت طالب شاطر فى المدرسه
بصراحه انا بعانى من مشكله ملازمنى لحد دلوقتى انى الحمد لله بمفهم بسرعه ومن شرح المدرس كان بيكفينى ومشكلتى انى مش بحب احفظ ولا بحب المذاكرة فكنت فى الشفوى احسن واحدة واى سؤال مهما كان اجاوب عليه لكن التحريرى بالنسبه لى مشكله لازم احفظ علشان التعريفات ولازم اذاكر علشان اكتب ياسلوب الكتاب ودايما ااقل درجه او درجتين فى التحريرى مع انى مع المدرسين كنت اكتر واحدة باجاوب معهم فى الشفوى وظلت هذه العادة مستمرة معى حتى الان مع انى كنت فى كليه تجارة ادارة اعمال يعنى فيه محاسبه وكان فيه بورصه ومواد اداريه وتجارة خارجيه بس يرضه اقرا الموضوع مرة واحدة واحس انى فهمت ادخل الامتحان انا فاهمه بس للاسف مش عارفه اكتب الحمد لله تخرجت بتفوق منقطع النظير بتقدير جيد حتى لما التحقت بمعهد اعداد الدعاة لانى كنت عايزة اعرف دينى صح وكمان كنت عايزة احقق حديث الرسول من سلك طريقا يلتمس فيه علما سهل الله له طريقا الى الجنه تخيلوا كانت الدراسه عبارة عن ايه
قران وعلوم قران وتفسير وحديث ومصطلح حديث وفقه واصول فقه و سنه وبدعه وسيرة ولغه عربيه ومادة دعوة وخطابه وعقيدة تخيلوا كل دة كنت بستمتع انى اسمع ولم افكر اكتب وبرضه دخلت الامتحان بالفهم بس من غير مذاكرة ولا حفظ الحمد لله عاديت سنه اولى بنجاح لكن سنه تانيه بقالى فيها 3 سنين كل سنه امتحن كام مادة فاضل بس مادة القران عندى جزءين لازم امتحن فيهم يارب انفع ادخل الامتحان السنه دى

ايه اكتر مادة حبيتها واكتر مادة كرهتها فى المدرسه وفى الجامعه

اكتر مادة كنت بحبها جدا التاريخ و الاحياء التاريخ بحبه جدا لانى كنت نفسى اعيش ايام زمان ايام الحياة المخمليه البسيطه الهادئه القلوب فيها صافيه ونقيه الشر فيها قليل والخير فيها كتير قوى عكس الزمن اللى احنا فيه ومن اكتر الازمان اللى احب اعيش فيها عصر المماليك علشان لما اقرأ عنه اشعر انى بقرأ قصص الف ليله وليله قد ايه كان عصر جميل قوى انا كنت بستمتع بحصه التاريخ جدا وايضا كنت اتمنى اعيش فى زمن بدايه القرن الماضى بدايه عصر الصناعه ولسه الناس بمبهورة بالمصباح الكهربائى والعربيه الى بتمشى بالبخار وشكل الناس المريح والطيبه والبرائه على الوجوه بما اننا بنتكلم عن التاريخ تفتكروا الزمن اللى احنا عايشين فيه ينفع ينذكر فى التاريخ ممكن حد يقولى هاينكتب يتقال ايه ومين الشخصيات التى تستحق ذكرها من هذا الزمان فى كتب التاريخ كان فى التاريخ لكل دوله او لكل امه عصور من الازدهار وعصور من الاضمحلال اعتقد ان العصر اللى احنا فيه هايكون من عصور الاضمحلال ولن يذكر الا سطر واحد فقط عصر الاضمحلال المبارك

بالنسبه لحبى للاحياء لانها تشعرنى بمدى عظمه خلق الله وابداعه وبستمتع بمعرفه اصل كل كائن حى وتكوينه

اكتر المواد التى كنت لا احبها هى الانجليزى مع الاسف والهندسه الفراغيه ممكن حد يقولى يعنى ايه هندسه فراغيه لحد الان مش اعرف عنها اى حاجه وطبعا الفيزياء برضه يعنى ازاى ممكن نقيس نصف قطر الارض والمشكله ان مدارسنا كانت بتعتمد على الكتاب وبس

وفى الجامعه طبعا كل المواد كنت مش بحبها علشان مش بحب الكليه اصلا
السؤال الثانى كنت عايز تتطلع وانت صغير
بابا رحمه الله عليه كان نفسه اى حد يدخل كليه طب وطبعا ولا واحد دخل من اخواتى وبما انى اصغر واحدة كبرت الفكرة فى دماغى بس برضه الطب عايز مذاكرة فىالثانويه وانا مافيش فايدة معتمدة على فهمى وبس وطبعا اتشحنت على كليه تجارة اول رغبه طبعا علشان
المجموع
امرر التاج
اولا لاستاذى الجعان لانى حبيت وتعلمت التدوين من خلاله فاعذرونى لتحيزى له دايما جزاه الله عنى خيرا
الدكتور (استراحه المحارب).. كبير المتشردين.. اهل الجنه..هبه المحبه للاسلام..مدونه حامد..
خالد صاحب الحواديت.. حائر فى دنيا الله.. كلبوزة.. مدونه الاستاذ محمد مفيد.. انسانه.. العراق المعتصم.. الصارم الحسام .. بينو وامانى انتم جنيتوا على نفسكم لما علقتم عندى
وياريت كل الموجودين فى المدونه عندى
دى بعض صور للزمن اللى كنت نفسى اعيش فيه ودى الناس اللى كنت نفسى اعيش معاهم الطيبه على الوجوة تظهر ما داخل النفس والسكينه فعلا زمن جميل