Monday, April 02, 2007

تاج ما علينا

ما علينا بعت ليا تاج علشان اجاوب عليه هاتسالونى مين ما علينا لانكم اكيد هاتفتحوا اللينك الخاص بيه مش هاتلاقوا اثر لمدونته التى اختفت فى ظروف غامضه نرجو ان يكون الاختفاء لعمل مفاحأة سعيدة لينا بمجموعه من البوستات الجميله وشكل جديد للمدونه ماعلينا من المدونين المحترمين اللى ساعدونى وانا فى بدايه التدوين وساعدوا على التعريف بمدونتى جزاه الله كل خير عنى بس بجد موضوع اغلاق المدونه دة مش المفروض اى مدون يعمله لان الكتابات الموجودة على المدونه دة بقى حق للجميع طالما خرج للنور هل اى شخص الف كتاب او كتب مقال فى جريدة لو شعر فى يوم انه مش عايز يكتب يقوم رافع كل مؤلفاته وكتاباته من ايد الناس مثلا الامام البخارى او الدكتور مصطفى محمود لو شعر انه نفسيا لا يستطيع الكتابه هل يرفع كل كتبه من السوق ومن ايد الناس ممكن الشخص يبعد شويه يراجع نفسه وكلنا محتاجين لمراجعه النفس بس ابعد من غير ما اغلق مدونتى حتى لو بطلت كتابه نهائى لا اغلق مدونتى ليه بس... ممكن اغلق التعليقات لكن المدونه كلها لا وعلى فكرة فيه لينكات للشاعرة ايمان البكرى موجودة على مدونه ماعلينا وللاسف مش سيفتها عندى علشان مطمنه لما احتاج ليها ادخل عند ما علينا وافتحها يارب تكون فترة الراحه خلصت وترجع تكتب تانى يا ماعلينا وياريت من فضلكم اى حد من المدونين لا يغلق مدونته لانكم بجد بتسببوا لينا احباط واكتئاب لان احلى حاحه انا كل واحد فينا بيستفيد من فكر التانى وبيجعله ياخد باله من اشياء يمكن كانت تايه عنه بجد انا بزعل جدا يعنى مرة دخلت مدونه سمراء النيل وجدتها مغلقه بجد زعلت جدا لانى خلاص ارتبطت بكل المدونين وفعلا باقلق لو اى حد فعلا اغلق مدونته بحس بجد ان الدنيا خلصت وانا مش ناقصه بجد فقد فى حياتى كفايه اللى فقدته كتير حتى لو انا مش اعرفه شخصيا بس متخيله شكل كل مدون ومدونه وفعلا مش عايزة اتعرف عليهم فى الحقيقه لانى افضل الصورة اللى فى خيالى لكل مدون ومدونه اتكلمت كتير اسفه ندخل بقى على
السؤال الاول هل كنت طالب شاطر فى المدرسه
بصراحه انا بعانى من مشكله ملازمنى لحد دلوقتى انى الحمد لله بمفهم بسرعه ومن شرح المدرس كان بيكفينى ومشكلتى انى مش بحب احفظ ولا بحب المذاكرة فكنت فى الشفوى احسن واحدة واى سؤال مهما كان اجاوب عليه لكن التحريرى بالنسبه لى مشكله لازم احفظ علشان التعريفات ولازم اذاكر علشان اكتب ياسلوب الكتاب ودايما ااقل درجه او درجتين فى التحريرى مع انى مع المدرسين كنت اكتر واحدة باجاوب معهم فى الشفوى وظلت هذه العادة مستمرة معى حتى الان مع انى كنت فى كليه تجارة ادارة اعمال يعنى فيه محاسبه وكان فيه بورصه ومواد اداريه وتجارة خارجيه بس يرضه اقرا الموضوع مرة واحدة واحس انى فهمت ادخل الامتحان انا فاهمه بس للاسف مش عارفه اكتب الحمد لله تخرجت بتفوق منقطع النظير بتقدير جيد حتى لما التحقت بمعهد اعداد الدعاة لانى كنت عايزة اعرف دينى صح وكمان كنت عايزة احقق حديث الرسول من سلك طريقا يلتمس فيه علما سهل الله له طريقا الى الجنه تخيلوا كانت الدراسه عبارة عن ايه
قران وعلوم قران وتفسير وحديث ومصطلح حديث وفقه واصول فقه و سنه وبدعه وسيرة ولغه عربيه ومادة دعوة وخطابه وعقيدة تخيلوا كل دة كنت بستمتع انى اسمع ولم افكر اكتب وبرضه دخلت الامتحان بالفهم بس من غير مذاكرة ولا حفظ الحمد لله عاديت سنه اولى بنجاح لكن سنه تانيه بقالى فيها 3 سنين كل سنه امتحن كام مادة فاضل بس مادة القران عندى جزءين لازم امتحن فيهم يارب انفع ادخل الامتحان السنه دى

ايه اكتر مادة حبيتها واكتر مادة كرهتها فى المدرسه وفى الجامعه

اكتر مادة كنت بحبها جدا التاريخ و الاحياء التاريخ بحبه جدا لانى كنت نفسى اعيش ايام زمان ايام الحياة المخمليه البسيطه الهادئه القلوب فيها صافيه ونقيه الشر فيها قليل والخير فيها كتير قوى عكس الزمن اللى احنا فيه ومن اكتر الازمان اللى احب اعيش فيها عصر المماليك علشان لما اقرأ عنه اشعر انى بقرأ قصص الف ليله وليله قد ايه كان عصر جميل قوى انا كنت بستمتع بحصه التاريخ جدا وايضا كنت اتمنى اعيش فى زمن بدايه القرن الماضى بدايه عصر الصناعه ولسه الناس بمبهورة بالمصباح الكهربائى والعربيه الى بتمشى بالبخار وشكل الناس المريح والطيبه والبرائه على الوجوه بما اننا بنتكلم عن التاريخ تفتكروا الزمن اللى احنا عايشين فيه ينفع ينذكر فى التاريخ ممكن حد يقولى هاينكتب يتقال ايه ومين الشخصيات التى تستحق ذكرها من هذا الزمان فى كتب التاريخ كان فى التاريخ لكل دوله او لكل امه عصور من الازدهار وعصور من الاضمحلال اعتقد ان العصر اللى احنا فيه هايكون من عصور الاضمحلال ولن يذكر الا سطر واحد فقط عصر الاضمحلال المبارك

بالنسبه لحبى للاحياء لانها تشعرنى بمدى عظمه خلق الله وابداعه وبستمتع بمعرفه اصل كل كائن حى وتكوينه

اكتر المواد التى كنت لا احبها هى الانجليزى مع الاسف والهندسه الفراغيه ممكن حد يقولى يعنى ايه هندسه فراغيه لحد الان مش اعرف عنها اى حاجه وطبعا الفيزياء برضه يعنى ازاى ممكن نقيس نصف قطر الارض والمشكله ان مدارسنا كانت بتعتمد على الكتاب وبس

وفى الجامعه طبعا كل المواد كنت مش بحبها علشان مش بحب الكليه اصلا
السؤال الثانى كنت عايز تتطلع وانت صغير
بابا رحمه الله عليه كان نفسه اى حد يدخل كليه طب وطبعا ولا واحد دخل من اخواتى وبما انى اصغر واحدة كبرت الفكرة فى دماغى بس برضه الطب عايز مذاكرة فىالثانويه وانا مافيش فايدة معتمدة على فهمى وبس وطبعا اتشحنت على كليه تجارة اول رغبه طبعا علشان
المجموع
امرر التاج
اولا لاستاذى الجعان لانى حبيت وتعلمت التدوين من خلاله فاعذرونى لتحيزى له دايما جزاه الله عنى خيرا
الدكتور (استراحه المحارب).. كبير المتشردين.. اهل الجنه..هبه المحبه للاسلام..مدونه حامد..
خالد صاحب الحواديت.. حائر فى دنيا الله.. كلبوزة.. مدونه الاستاذ محمد مفيد.. انسانه.. العراق المعتصم.. الصارم الحسام .. بينو وامانى انتم جنيتوا على نفسكم لما علقتم عندى
وياريت كل الموجودين فى المدونه عندى
دى بعض صور للزمن اللى كنت نفسى اعيش فيه ودى الناس اللى كنت نفسى اعيش معاهم الطيبه على الوجوة تظهر ما داخل النفس والسكينه فعلا زمن جميل

44 comments:

مـحـمـد مـفـيـد said...

السلام عليكم
اختيب في الله / رفقه

جزاكي الله خيرا وده شرف كبير لي والله انك تمرري لي التاج وان شاء الله اول ما افضي من الشغل لاني بجد مطحون جا في الشغل ممكن اعمل التاج
رفقه
ربنا يبارك لك

طلب صغير
ممكن يا رفقه تشيلي ال
Word Verification
علشان بتعاكس في التعليق
ده طلب من حقك ترفضي طبعا ده مجرد راي

Mohamed A. Ghaffar said...

أسهاب مطلوب لا تنقصه الصراحه

انا بردو اتفاجئت بما حدث لما علينا وكت فاكر المشكله عندى

لو عاوز يعتزل التدوين اكيد هو حر بس يطمنا عليه ، احنا ارتبطنا ببعض بشكل ما ولا يصح الأختفاء الغامض

احنا لينا عليه حق

واضم صوتى لصوت محمد مفيد ياريت تشيليه عشان زهقنى

حامد said...

رفقه العزيزه اشكر لك هذا التقدير وارجوا ان اكون عند حسن ظنك..
بالنسبه لصور الزمن الجميل .. كنت مررت ادارج من مجموعه الحازميه يحوى بعض الصور القديمه لمصر.. الادراج اسمه .. مصر من 150 عام..تجديه فى مدونتى ان شاء الله ينال اعجابك
مع تحياتى

أمــانــى said...

السلام عليكم
وماله يختى تجارة برضو من كليات القمة وحتى الحقوق والاداب والدليل على كده هما اعلى نسبة خرجين ههههه
بس عارفه جميل اوووى انك تكملى فى معهد الدعاه ربنا يكرمك ياااااارب وتكون خير داعية يااااااارب امين

BinO said...

انا كان نفسي أدخل تجارة
بس مش حقول ليه
:P

رفقه عمر said...

استاذ محمد مفيد
ربنا يعينك اللهم امين
المشكله انى مش كنت اعرف تقصدوا ايه وبعدين فكرت كتير وقلت اكيد الحروف اللى موجودة اللى لازم تنكتب قبل نشر التعليق المهم دخلت على الكومنت والحمد لله وصلت تتشال منين انا كمان بتنرفزنى لما الاقيها عند حد

رفقه عمر said...

استاذ محمد عبد الغفار
انا فعلا زعلانه قوى من اختفاء ماعلينا يارب يكون المانع خير ويكون كويس... ياماعلينا النداء الاخير ارجع المودونين هايلبوا لك كل طلباتك ارجع المدونين محتاجين لك
اخيرا فهمت موضوع الكومنت والحمد لله تمت ازاله الحروف بنجاح

رفقه عمر said...

استاذ حامد
فعلا الصور جميله قوى ربنا يكرمك ومنتظرة الرد على التاج

رفقه عمر said...

امانى
كنتى تايه عنى ادبستى فى التاج يستحسن انك تجاوبى عليه مش عايزة ااقولك لو مش جاوبتى عليه هايحصلك ايه
ايوة يابنتى انتى تعصرى البلد تلاقيها تجارة اداب حقوق

رفقه عمر said...

بينو
انت دبست نفسك فى التاج دة لازم تجاوب عليه ومش تكسفنى زى المرة اللى فاتت وياريت تقول لنا كنت عايز تتدخل تجارة ليه حسسنى انى دخلت كليه مهمه
منتظرة التاج ودة امر من السلطات العليا

ana ga3an said...

هو انا شكلي ناقص تاجات يا جوجو
هانعمل اية بقي حكم القوي
اوعدك اول تدوينة جديدة هاتكون التاج دة

رفقه عمر said...

استاذى الجعان
بصراحه عايزين نعرف كنت شاطر فى ايه انا متأكدة انها كل المواد اكيد
فى انتظار الاجابه على التاج

Sampateek said...

جميلة اجاباتك يا رفقة عمر يا اختي بس سامحيني
انا مقدرش اجاوب على الاسئلة دي لاني معرفش اقول معلومات شخصية عني
حتعرف
:))
انا كمان كاتبة في الصفحة الاولى
التاج ممنوع و الزعل مرفوع
مع خالص تحياتي ليكي

khaled said...

السلام عليكم
ازيك يا رفقة
عارفة انا برضه باحب التاريخ و كان نفسى ادخل اداب تاريخ لكن برض باجيب كتب تاريخ كتير و اقعد اقراها
انا عملت التاج خلاص

حائر في دنيا الله said...

بصي يا ستي
لو مش عايزانا نخسر بعض
أو أخسر نفسي ومعنتش أدون تاني
محدش يسألني عن أي حاجة في الدراسة أو الكلية او التعليم أو ما شابه

انا بيجيلي العصبي كل أما اسمع كلمة نتيجة او امتحان والضغط يقل جداً ونا داخل المحاضرات مش عارف ليه

صحيح مكنتش خايب اوي بس طريقي مع التعليم مش سالك اوي فياريت محدش يفكرين بيه تاني

والتاج الجاي بإذنك يارب هجاوب عليه ونا مغمض حتى لى لو كان فيه شطة
بس دا
إلا دا
مخدوش يماما
مخدوش يماما

شفتي بقه التعليم عمل فيها

سيبيني في حالي الله يكرمك


مع تحياتي

رفقه عمر said...

سامبتيك
منورة ومتألقه دايما كالعادة بس بجد احرجتينى وكسفتينى اول مرة اطلب منك حاجه حاسستينى انى لما جاوبت على التاج فعلت خطأ كبير قوى

رفقه عمر said...

خالد
شكرا ياخالد جبرت بخاطرى ربنا يخليك التاريخ اصلا متعه انا بحب القصص والحكايات اصلا كنت احب اسمع ابله فضيله والتاريخ ما هو الا قصص وحكايات

رفقه عمر said...

حائر فى دنيا الله
ربنا ينجحك يارب بس كنت لازم تجاوب على التاج علشان العقدة تنفك وكمان كنا نفسنا نعرف دراستك ايه اللى محياراك دى

حائر في دنيا الله said...

رفقة
بعد ما أنهيت تعليقي عندك بلحظات جاءني هاتف
أخبرني ان نجحت من غير مواد ولا خلافه
ولله الحمد
فا قلت آجي آظبط العك اللي عكيته هنا

بس برضه مش مجاوب على التعليم
معلشي اعذريني

وتقبلي اعتذاري وتحياتي

رفقه عمر said...

حائر فى دنيا الله
الحمد لله عقبال اخر السنه يارب اللهم امين مش مهم تجاوب كفايه عليا فرحه نجاحك ربنا يكرمك كمان وكمان وينجح كل اللى لسه بيدرسوا اللهم امين

يعقــــوب .... said...

أكتر حاجة عجيتني في التاج ده هو ايام زمان..زمان قوي ...و الصور الانتي حطاها ده بتاعت زمان صور روعة و رايقة قوي....يا بختهم و ربنا معانا

smraa alnil said...

اللي اتمني ان تكون رفقة عمري

انا بس حبيت اشوف التاج المصيبة اللي جه للكل دة

بس انا كمان كان نفسي اعيش زمان اوي

وبرضه بكره الفيزياااااااااا
بتجيبلي العصب
انا لحد دلوقتي مش عارفة انا نجحت فيها ازاي
بقعد اضحك والله لما بلاقي نفسي نجحت فيها وانا اصلا مش عارفة هي بتتكلم عن ايه

وبعدين الهندسة دي بقي
اصلا مش عارفة فيها حاجة فير ان في زاوية اسمعا زواية قايمة 90 درجة
ليس اكثر
وبرضه نجحت فيها
ازااااااااااااي مش عارفة
المهم يا قمر انا بخير الحمد لله
بس لسة مش عايزة احكي مع حد
ادعيلي يارفقة بجد
ربنا يفرجها من عنده

koukawy said...

هي الحقيقه فره ماشيه بين المدونين غريبه اوي
مش عارفه ايه سببها؟
مع ان التدوين ادمان من رأي
و انتي ازيك يا عائشه؟

خالد وليس بخالد said...

يا ترى موضوع التاجات ده بدعة ولا سنة؟؟
-ابتسامة- :)

بسبب صاحبة المدونة..في احد الاخوة بعت لي تاج..بس هنتظر شوية ان شاء الله على التاج ده

مشكلة المدونين لن كله بيقول على نفسه انه مكنشي بيذاكر..بس مخه نضيف...
وانا بنضم للقايمة دي..اللي مبيذاكروش بس مخهم نضيف
والله المستعان
أقول..رحمة الله على والدك..لو انها متأخرة

أمــانــى said...

السلام عليكم
اين انتى يا اخت رفقة
اللى هيغيب من غير عذر هيدفع بالدينار الكويتى
:D
يــاااااااااااارب تكونى بخير وفى احسن الاحوال يااااااااارب امين

ma_3alina said...

أيوا صح .. يا رفقة فينك ؟؟

BinO said...

رفقة
سامعاني
انت مستخبية فين


أخي خالد
انها الفهلوة الفرعونية المجيدة مش موضوع مذاكرة

نور العظماء said...

مدونه كويسه بس بصراحه انا عايز اهتمام شويه بالجانب التاريخي بمعني عايزين شوية تاريخ نعرف الناس التاريخ ادعوكي لزيارة موقعي لان به كثير من التاريخ والصور النادره والفيديوهات النادره
وشكرا
www.nourhetler2006.jeeran.com

Sharm said...

رفقة .. كل تاج وانتى طيبة

سكتم بكتم said...

ماعلينا خلاص رجع وأعتذر فخلاص بقي.مااعلينا وعلي رأي عبد الحليم بلاش عتاب.وباي باي أبقي شرفيني في الشقةالجديدة قصدي البلوج الجديد

Arabian GiRl said...

جميل

العــــراق said...

http://www.abo-ali.com/Flashat/3raq2.swf
السلام عليكم رفقة عمر
اتمنى ان تكوني بخير وبصحة جيدة \
طمنينا عليك
عزيزتي رفقة كنت ومازلت احاول كتابة موضوع عن اطفال العراق ومن قبلي حاول عمر ولكن حقيقة الامر افضع من الكلمات وعندما ابدا وبعد عدة اسطر اجدني مهما كتبت لم اعطي الموضوع حقه فارجوا منك ان لم يكن لديك مانع بان تتولي انت الموضوع وقد لمست ان لديك ملكة للكتابة واحساس وهذا ماشجعني لاطلب منك الكتابة وفي هذا الرابط فلاش جميل اسمه صرخة طفلة عراقية
وجزاك الله خير

khaled said...

رفقة عمر
انا سمعت انك مسافرة؟
صحيح؟
ترجعيلنا بالسلامة ان شاء الله

خمسة فضفضة said...

السلام عليكم ورحمة الله وبركاته

جميل اوي يا رفقه التاج بتاعك ده

تخيلي انا كمان كان نفسي اوي اعيش في ايام زمان ايام البال الرايق الناس الرايقه اللي كانت اي حاجه ترضيهم وتسعدهم

ربنا يوفقك

وياتري انت فعلا مسافره

عموما ترجعيلنا بالف سلامة

حائر في دنيا الله said...

انتي فين يا بنت الناس
هوا ماعلينا يرجع وحضرتك تختفي

طمنينا عليكي
السلام عليكم

أمــانــى said...

السلام عليكم
ياااااااااارب تكونى بخير
انتى فين كل ده سفر ليه مسافرة فين دا كله اوعى تكونى هنا عندنا فى اسوان ومش بتقولى والله ازعل
:D
المهم بقى بجد فينك
بصى ده ايميلى
tmr_hendy80@hotmail.com
عايزة بتعتيلى عليه اووك
معلش بقى انا كده مش هأبطل كتابة وكل يوم هادخل اسيبلك تعليق لغاية ما تعبرنى
ســــــــــــــلام

أمــانــى said...

السلام عليكم
ازيك يا رفقة ايه برضو مش ناوية تردى علينا ولا حتى تعبرنى
اهئ اهئ اهئ
المهم يااااااارب يا مسهل ادينى متنظرة اشوفك على خير

ma_3alina said...

وانا كمان حدخل كل يوم اسيب تعليق ... لغاية ما الجماعة بتوع البلوج سبوت يزهقوا ويرجعوكي بالعافية ..

وخلي بالك يا رفقة الأفوكاتو أماني بتعد عليك الغرامة بالدينار الكويتي .. شوفي بقى عليكي كام لغاية دلوقتي

كفاية بقى كده .. واحنا في الانتظار

أمــانــى said...

السلام عليكم
ازيك يا اختى العزيزة يااااارب تكونى بخير وفى احسن الاحوال
ايه برضو مش ناوية يا قمر تردى عليا ولا ايه
خلاص بقى هاشوف مكبرات صوت واطلع الف بيها فى الشوارع
أهئ أهئ أهئ
اشوفك على خير فى اقرب وقت
:D

ma_3alina said...

إحم إحم .. يارب يا ساتر

ما حدش يا اخواننا شاف صاحبة المدونة

عليها تيجان متأخرة ولسه ما دفعتهاش

دا غير غرامات التأخير اللي بالدينار الكويتي

طيب أنا حسيب الكعب تحت عقب الباب ولما تيجي حد يوصلوا ليها

أمــانــى said...

السلام عليكم
يوميآ سلسلة الغلاسة وراكى وراكى ما تحاوليش على الرغم شكلى بقى لامؤاخذة وحش اووووووووووى
بس يلا كله يهون علشانك يا قـمر
ســـلام اشوفك على خير
:D

Memo said...

عودي يا رفقه
وحشتيناااااااااا

ma_3alina said...

آلوووووووووووووووووووووو

أمــانــى said...

السلام عليكم
زى ما اخدت عهد على نفسى انى كل يوم اسيب تعليق فبرضو هاعمل كده
المهم انها بخير وبتسلم على الجميع وبتقولكم اعذروها لانها مش عارفة تدخل ولا حتى تتابع لانها فعلا مســافرة
يــااااااااارب ترجعى بالســــلامة
على فكرة يا رفقة برضو يوميا هيكون فى تعليق
:D
اشوفك على خير