Friday, May 27, 2011

الثورة اختذلت فى مطاردة رجل مريض مسن

اكد شهود عيان لبوابة الوفد بأن الرئيس المخلوع حسنى مبارك تم نقله بسيارة اسعاف بيضاء اللون في حدود الساعة الحادية عشر مساء أمس باتجاه مهبط الطائرات المتواجد خلف مستشفي شرم الشيخ الدولي لنقله عبر طائرة حربية.
كما أكد شهود العيان بأن كاميرات المراقبة داخل المستشفي والتي كانت متواجدة أول أمس قد اختفت مع اختفاءالحرس الشخصي المتواجد في الدور الثاني والثالث وأكدوا أيضا بأن الأجهزة الأمنية المتواجدة أمام المستشفي قد تم تخفيضها عما كانت عليه أول أمس..وأكدوا أن مبارك تم نقله في سرية تامة

اقرأ المقال الأصلي علي بوابة الوفد الاليكترونية شهود عيان:هروب مبارك بطائرة حربية



اصبح هدف الثوار حاليا هو مطاردة الوحش

لقد تحولت الثورة الى بلاى ستيشن

لعبة مطاردة الوحش

تسقط مصر فى سبيل الحصول على الوحش

Monday, May 23, 2011

الاسد الانسان





ربما البعض منكم يعلم بقصة الأسد الذي اغتال مدربه ((محمد الحلو)) و قتله غدراً في أحد عروض السيرك بالقاهرة و ما نشرته الجرائد بعد ذلك من انتحار الأسد في قفصه بحديقة الحيوان واضعاً نهاية عجيبة لفاجعة مثيرة من فواجع هذا الزمان ...



و القصة بدأت أمام جمهور غفير من المشاهدين في السيرك حينما استدار محمد الحلو ليتلقى تصفيق الجمهور الحاضر بعد نمرة ناجحة مع الأسد المسمى ((سلطان)) .. و في لحظة قفز الأسد على كتفه من الخلف و أنشب مخالبه و أسنانه في ظهره .. و سقط المدرب على الأرض ينزف دماً و من فوقه الأسد الهائج .. و اندفع الجمهور و الحراس يحملون الكراسي و هجم ابن الحلو على الأسد بقضيب من حديد وتمكن أن يخلص أباه بعد فوات الأوان ..



ومات الأب في المستشفى بعد ذلك بأيام ..

أما الأسد سلطان فقد أنطوى على نفسه في حالة اكتئاب و رفض الطعام ..

و قرر مدير السيرك نقله إلى حديقة الحيوان باعتباره أسداً شرساً لا يصلح للتدريب ..



و في حديقة الحيوان استمر الأسد سلطان على إضرابه عن الطعام فقدموا له أنثى لتسري عنه فضربها في قسوة و طردها و عاود انطواءه و عزلته و اكتئابه ..



و أخيراً انتابته حالة جنون فراح يعض جسده و هوى على ذيله بأسنانه فقضمه نصفين .. ثم راح يعض ذراعه ، الذراع نفسها التي اغتال بها مدربه ، وراح يأكل منها في وحشية و ظل يأكل من لحمها حتى نزف و مات .. واضعاً بذلك خاتمة لقصة ندم من نوع فريد ... ندم حيوان أعجم و ملك نبيل من ملوك الغاب عرف معنى الوفاء و أصاب منه حظاً لا يصيبه الآدميون ..



أسد قاتل أكل يديه الآثمتين ..



كانت آخر كلمة قالها ((محمد الحلو)) و هو يموت .. أوصيكم أن لا تقتلوا سلطان .. وصية أمانة لا أحد يقتله ..



هل سمع الأسد وصية مدربه ؟ و هل فهمها .. و هل عرف معنى الندم ؟ و هل عاقب نفسه على جريمته ؟



درس بليغ يعطيه حيوان للمسوخ البشرية التي تأكل شعوباً و تقتل ملايين في برود على الموائد الدبلوماسية و هي تقرع الكؤوس و تتبادل الأنخاب و كأنه لا شيء حدث .. و درس للذي يقتل إنساناً بريئاً طمعاً في متاع الدنيا الفاني ثم ينام قرير العينين ..



إني أنحني احتراماً لهذا الأسد الإنسان ...



بل إني لأظلمه و أسبه حين أصفه بالإنسانية ...





■ ■ ■



د. مصطفـى محمـــود

من كتـــــاب : رأيت الله

Monday, May 16, 2011

طلبى من الله وليس من احد



.أريد مُفاجأة كبيرة لا يسع قلبي تصديقها و لا يسعه نسيانها
أريد من الدعواتِ المؤجلة أن تضمّني بكل ما أُعطيت من قوة
لتقول لي أنها كانت تعرف أن الآن هو وقتها المناسب
أريد غدًا يُشبه أحلامي كفرحة لم أنتظرها



أريد من نفّسي رضا
كي لا أتعبَ ولا أشقى
أريد من عينيّ أن تُخبرني أن فرحةَ ما مختبئةً خلفَ مائها
لأنها تعلم كم أحبُّ المفاجاأت
كم أن الأفراح الحقيقة لا تتطلب منّا أي استعداد اي معرفة كم أن الحياة مُدهشة
أريد أن أنسى ما حدث و ما سيحدث
أريدُ أن أغسلني نسيانًا و أُلحفني طمأنينة و رضا
أريد أن لا أفهم أكثر عن هذه الحياة التي و على الرغم من أن طُرقها معبّدة
إلّا أنه من الصعب فيها أن تقرر . أن تخطو . أن تصل . لأن كل الأشياء هشّه . و تظهر مالا تخبئ
كل ما أريد، تصريف ما لم ينطقه اللسان و وقر في القلب
كل ما أريد استكمال الايمان و استغلاله في بلوغ رضى الرحمان

كل النداء اذا ناديت يخذلنى

الا النداء اذا ناديت

ياربى

Sunday, May 15, 2011

اين الحجاج

بصراحة احنا محتاجين واحد زى الحجاج فى الفترة الانتقالية اللى بنمر بيها دى لان اللى بيحصل دة لا يحتمل و من الكوميديا السوداء ان فيه ناس بطالب بثورة غضب تانى ثورة غضب على مين المرة دى

هو احنا مالناش الحرية والديمقراطية ولا ايه هو احنا وارثين العبودية والقهر من ايام الفراعنة

هو ليه مافيش اعتبار لرأى الاغلبية ليه النخبة المثقفة بتقوم الدنيا

ليه العلمانيين بيحاولوا يخوفوا النصارى من المسلمين

مصر اسمها عند الغرب البطة الثمينة قرأت زمان كتاب كنت لسه فى اعدادى كان الكتاب يخص اخى وقرأته ووجدت ان الغرب بالنسبة لمصر زى الذئب المنتظر ان يفترس فريسته ويسمون مصر بالخارج بالبطة الثمينة

وقرأت ان سقوط مصر صعب وصعب اختراقها والحل الوحيد هو احاطتها من كل اتجاه ودة اللى حاصل فعلا مصر اصبحت داخل طوق والغريب انهم اخترقوا الداخل ايضا

ارجوكم بلاش المصالح الشخصية فى الوقت دة كلنا هانضيع والمركب هاتغرق بنا جميعا

يارب احفظ مصر من كل سؤ

Saturday, May 14, 2011

يامين يرجعنى للايام دى

فى وسط القلق اللى عايشين فيه لاقتنى رجعت لورا حوالى خمس سنين :)) كدة لاسترجع ايام الطفولة الجميلة واهم فتره فيها فترة المدرسة





طابور الصباح اللى كنا فى عز البرد نقف نعمل تمارين الصباح وتحيه العلم







فين ايام لما كنا بنقدس المدرس ونحترمه وكنا لما نشوفه فى الشارع نترعب وكنا نستغرب قوى لو لاقيناه شايل خضار لان المدرس كان حاجة كبيرة عندنا جدا



حقنة التطعيم وكشف النظر هو لسه فيه الكلام دة دلوقت ولا مش موجود


ايام جميلة






وقت الخروج من المدرسة كانت كاننا خارجين من السجن مجرد الجرس يدق كنا فى ااقل من الثانية نكون بره الفصل كانت اى حاجة بتفرحنا كان همنا الوحيد الواجب والمذاكرة كنت احيانا استعبط واسيب اخواتى اللى اكبر منى يعملولى الواجب






Thursday, May 12, 2011

لكل مسلم رفع الصليب شاهد هذا الفيديو

لكل مسلم ظلم اخوه المسلم من اجل ذنب لم يرتكبه فى حق النصارى شاهدوا هذا الفيديو



ماذا ستقول لله ايه المسلم عندما تقابل الله ويسألك رفعت الصليب وانت تعلم ان الصليب وثن وكذب يقول قرءانك وماقتلوه وما صلبوه ولكن شبه لهم اين عقيدة التوحيد التى ستقابل بها الله وانت ترفع رمز وثنى وكأنك تصدقهم بقتل المسيح وتصدقهم فى التثليث وتكذب القرءان



الاسلام حثنا على المعامله الحسنة مع غير المسلمين واوصنا بالنصارى ولكن دون ان نفقد عقيدتنا



طول عمرنا جيران مع النصارى يجلس بجانبى فى الفصل بنت نصرانية طبيب العيون الخاص بى نصرانى كنا جميعا نعيش فى وطن واحد لا احد يقول للاخر ليس هذا مكانك بالعكس النصارى يقولون عنا نحن المسلمون اننا ضيوف فى مصر ضيوف من 1400 سنه



لا مريكا التى يستنجدون بها اسالها اين الهنود الحمر وانتى فى 200 سنه قضيتى عليهم



لماذا حتى الان يوجد نصارى فى مصر من 1400 سنه لو كان المسلمين يريدوا ان يبدوا النصارى كما يقولون لابادوهم من 1400 سنه وهم مازالوا اسياد العالم وكل العالم تحت قبضتهم ماذا منعهم من ابادتهم كما فعلت امريكا مع الهنود الحمر وكما تفعل اسرائيل مع الفلسطنين او كانوا عبيد عند المسلمين ورقيق كما فعلت امريكا مع الزنوج ولكنكم اصحاب اعمال ووظائف مرموقه ماذا تريدون ؟؟



وكما فعل الغرب عندما دخلوا الاندلس وابادوا المسلمين هناك



يا امريكا فبل ما تتكلمى وتعملى نفسك السوبر مان اللى هايحمى النصارى من المسلمين الوحوش قولى لنا اين الهنود الحمر اصحاب الارض الحقيقيين



يا نصارى مصر لماذا انتم موجودن حتى الان فى مصر لماذا لم يبيدكم المسلمين



لان الاسلام وتعاليمه يأمرنا بالتعايش مع الجميع يأمرنا ان نرفق بالجماد والحيوان فما بالنا بالانسان كيف لا نرفق به مهما كانت ملته وديانته انتم من تعادونا وليس نحن



كفى خراب بمصر ارجوكم كفى



لو انتم مواطنون مصريون بحق خافوا على مصر ومصر اسلاميه وستظل اسلاميه الى قيام الساعة ولن تقسم مصر مهما حصل

Sunday, May 08, 2011

سؤال بسيط للمواطنين النصارى



ماذا قدم لكم الاحتلال الانجليزى من امتيازات احتلت مصر 70 سنة من الانجليز ما الامتيازات التى قدمت لكم مش هم نصارى مثلكم




ماذا قدمت لكم الحملة الفرنسية على مصر هل قدمت لكم امتيازات ماهى هذه الامتيازات




اليهود العرب الذين هاجروا لا سرائيل اانهم يعاملون مواطنون من الدرجة الثانية ومستحيل واحد منهم يكون رئيس وزراء اسرائيل كانوا يعيشون منعمون بمصر وكانت كل الاقنصاد المصرى بيديهم الغرب يحتقر العربى سواء نصرانى او يهودى او مسلم




من يطلب مساعدة امريكا هو خاااااااااااائن وليس مصرى




كل من يقف امام السفارة الامريكية يطلب منها التدخل يجب محاكمته بتهمه الخيانة العظمى




حسبى الله ونعم الوكيل فى كل خائن وعدو لهذه البلد




اللهم رد كيدهم فى نحرهم واجعل تتدميرهم فى تتدبيرهم

Thursday, May 05, 2011

مقالة عجبتنى جدا

عندنا مثل


بيقول " واحد شايل دقنه والتانى زعلان ليه؟" ودا بيتقال لما تحب تحرج حد وتقول له " ملكش فيه او ميخصكش او خليك فى حالك" بس بطريقه دايره....لؤم الفلاحين بآ

مع ان المفروض يعنى ومن باب الغيره للدين والحميه لأوامر الله وسنن رسوله صل الله عليه وسلم انك فعلاً تزعل ولو شويه لما تشوف حد مسلم شايل دقنه، لأنها سنه مؤكده اطلاق اللحيه وحلق الشارب؛ بس احنا بقا مع الوقت والعصريه والحداثه والبريستيج والحشرات بقينا نطنش ونستهبل ومناخدش فى بالنا لحد الموضوع ما بقا.....عااااادى وإللى بيربى دقنه بيربيها دلع او مش لاقى حاجه تانيه يربيها او لو رباها سُنه تلاقى زمايله وقرايبه وسايس الجراج كمان يقول له "ياشيخ" وكأنها عار وفضيحته بانت عليه.

ودا بقا حالنا فى حاجات كتير؛ قانون "العادى يا جماعه" بقا هو إللى سايد وصوته عالى وإللى يخالفه حتى لو صح يبقا هو إللى مش عادى ولا طبيعى ويستحق وقفه
ومن ضمن العادى انك تلاقى كل جيل يقدم تنازلات وييجى إللى بعده يورثها على انها "عادى" وزى ما لقينا أهالينا بيعملو عملنا وطبعاً لازم نضيف لمساتنا من العادى


يعنى مثلاً، جت فتره على مصر كانت فى منتهى الإنحلال ومن غير ما ياخدوا بالهم، من كتر التدرج فى التنازلات والعادى بقا عاااادى ومفيش مشكله ومتحبكهاش، يعنى القاهره المحروسه من العين والحاسدين كان فيها حوارى "للبغاء" وكانوا بياخدوا تراخيص مزاولة مهنه و(الحكومه) المحترمه هى إللى كانت بتصرح لهم بكدا وتديهم شهادات صحيه كمان!!! شوفتوا القرف إللى كنا فيه؟؟؟ اظن محدش يصدق، زى انا كمان مكنتش مصدقه وحاسه انى قرفانه وعاوزه ارجع لما شفت جرنال قدييييييييييييييييييم من ايام الثوره والمانشيت الرئيسى فيه ان " الحكومه تقرر إلغاء البغاء" دا طبعاً لما فاقوا وافتكروا انه حرام وعيب واننا عايشين فى بلد مسلم مش فى بار ولا خماره بلدى، والسؤال بقا...يا ترى الحكومه لو مكنتش لغت القرف ده كان بقا ايه حالنا دلوأت؟؟؟ اكيد بردو كان بقا "عادى" وانتشر فى كل مدينه وقريه، ما هى "مهنه" بقا والناس بتاكل منها سم هارى وبردو علشان البطاله متزيدش والإيد البًطَّاله ....... اكيد فى الحاله دى هتكون طاهره ولو مكنتش يبقا تستاهل قطعها

الحكومه وقوانينها إللى "خاضعه لأهواء ونزوات" بشر زينا زيهم واكيد بيغلطوا بقت بتتعامل معاملة "الإله" تؤمر وتنهى وتقرر وتلغى واحنا نقول "سمعاً وطاعه" حتى لو غلط، زى الشيخ بتاع فيلم الزوجه التانيه وهو بيقول لأبو العلا وبيقنعه يطلق مراته " اطيعوا الله واطيعوا الرسول وأولى الأمر منكم" الصراحه أبو العلا رد عليه رد مفحم ينفع لكل العصور المصريه " أيوا بس انت كافر يا عم الشيخ".
سيدنا ابو بكر الصديق رضى الله عنه وأرضاه وسيدنا الفاروق عمر بن الخطاب لما خلفوا سيدنا محمد صل الله عليه وسلم فى شئون المسلمين أول حاجه طلبوها من الناس انهم ينصحوهم ويراجعوهم فى الكلام ويشاوروهم ولو غلطوا يضربوا على ايديهم. لكن احنا فى عصرنا "لأ و80 مليون لأ كمان" تؤيدها نسبة الـ99.9% على كل حاجه وبدليل مبدأ الجيش الأساسي " طيع الأوامر ولو غلط يا عسكرى" وايكش تولع
إللى يغلط ماشى وإللى يعك مفيش مانع ، ومفيهاش حاجه وملناش دعوه وكبر دماغك و......عادى بقا
اعرف ان دوله مسلمه يعنى "المفروض ولازم" يظهر دا فى شكلها العام وسلوك حكومتها وناسها، وإللى عاجبه عاجبه وإللى مش عاجبه يتحرق والله الغنى عنه، لكن إحنا بردو "لأ" علشان بقينا "مودرن" خالص فلازم يكون فيه مقابل للحداثه دى وللطبقه إللى عاوزين ننحدر لها

وفيها ايه لما السياح يدخلوا مساجدنا "يتفرجوا" وهم غير طاهرين والله اعلم شاربين ايه وعاملين ايه وبملابس غير لائقه لأى حد؟
ولا فيها ايه لما مصر يكون فيها شواطئ عُرى فى شرم وعلى الصن ديك لأى كروز بغض النظر عن العماله المصريه المسلمه إللى عليها... عادى بقا، وإللى مش عادى ان حاكم امارة الشارقه فى الامارات "يلزم" السياح بإحترام البلد إللى مستضيفاهم ومفيش لبس ولا حركات غير لائقه فى الشوارع ولا الشواطئ، اتريقوا عليه فى برامجنا المصريه المحترمه وقالوا الناس جايه "تسيح براحتها" مش جايين نخنقهم عندنا، يا
ترى بقا دا "قلة أدب" ولا "انعدام أدب" ولا عااااادى يا جماعه؟؟!!

وفيها ايه لما وزارة السياحه تشترط فى الفنادق إللى عاوزه تتصنف وتاخد نجوم ان يكون فيها "بار" والنجوم على حسب خموره والعداد بيعد،مع اننا وبكلام "الله" الواضح الواحد الذى لا شريك له فى حكمه ولا امره المفروض نكون عارفين ان الخمور "حراااام" ومفيهاش جدال ولا كلام تانى والملعون فيها 10 بنَص حديث سيدنا رسول الله عليه الصلاة ،ومع ذلك "عاادى" وبقيت تدخل اوضة الأوتيل تلاقى فيها مينى بار او تلاجتك فيها كام ازازه عالماشى تحيه من الفندق!!! وحتى فندق "الحياة" إللى اشتراه سعودى ورمى خموره ولغى البار وزارة السياحه المحترمه هددوه ينزل فى التصنيف لـ3 نجوم بس، ولا حد اتكلم ولا ساند الراجل ولا قال حرام ولا حتى عيب، ليه؟؟ علشان محمد ابو سويلم مات وفيلم الارض خلص ومعدش فيه رجاله بيقفوا وقفة رجاله ولا ناس محترمه، وبقت الخمور تتباع فى المطار والمحلات والسوبر ماركت بلا حياء ولا حتى تصَنُع الاستحياء من الله وبيعها فى السر من باب عدم المجاهره بالسوء والفسوق والمعصيه، بس نقول إيه؟؟...عااادى بقا يا جماعه.

وايه يعنى لما وزارة الاعلام ما تمنع توظيف "مذيعات محجبات" فى التليفزيون المصرى وان 3 مذيعات فى القناه الخامسه يرفعوا قضيه بسبب منعهم من الظهور على الشاشه بعد الحجاب رغم اننا فى بلد "عربى مسلم" من ثوابت واساسيات دينه ان الحجاب فرض فرض فرض يللى معندكوش دم
وفيها ايه لما نلاقى الناس فى مصر فترة الستينيات والسبعينيات "مستهبلين" عالآخر والستات نسيت تلبس والرجاله لابسه محزق ومشجر وبتحط باروكه كانيش وتلاقى صور امهاتنا لابسين الفساتين الكات والحمالات والمينى والميكروجيبات ومسيبين شعرهم بيجوديه وارمنو وشينيوه وكأنهم مكانوش بيخرجو من الكوافير ودا برغم انهم مسلمين وتجاوزوا ال15 سنه وتيجى تسأل بإستغراب تلاقى رد واحد....دا كان "العادى" فى وقتها وزيك زى الناس

ولا فيها ايه لما تلاقى انحلال ومجاهره بالمعصيه فى اعلانات وافلام ومسلسلات منحطه وناس تتقصع و تحضن و.... و..... على اساس بقا زوج وزوجه ولا جوز حبيبه وعايشين الدور والمفروض نتعاطف معاهم بإسم الفن والأصح يكون بـ" إثم الفن"، مع ان دا فى الاسلام والدين ملهوش غير مسمى واحد " تحريض على الدعاره والزنا" أنا آسفه، والله العظيم بتكسف اقول كلام كده وما اعتقدش انى هتكلم فيه وجهاً لوجه مع حد لكن حتى القرآن الكريم ذكر كلمة "الزنا" فى محكم آياته الشريفه. فين بقا الشيوخ والأزهر والمسلمين علشان يثوروا لدينهم ومبادءه ووشهم يحمر غيره على دين الله وتأخذهم الحميه، حمية التضامن مش التشاحن والتباغض؟؟؟ تحسوا ان الاعلام بتاعنا بقا فعلاً له رساله واحده وبيروج لأصحاب مهنه محدده....القوادين والنخاسين، شوفوا ابسط حاجه" الاعلانات" وشوفوا بناتهم وحركاتهم وطريقتهم، شئ مقزز ومثير للقرف والغم
حتى عمرى ما سمعت عن شيخ او داعيه "رفض" يجرى لقاء او حوار او يظهر فى برنامج مع مذيعه "سافره" وملهاش اسم تانى غير ده مهما كنا معجبين بيها وبشخصيتها، دا كلام ربنا مش هنزوق فيه علشان منجرحش شعور حد، الحجاب فرض وغير كدا يبقا سفور ومحدش يقولى "ربك رب قلوب" لأن المظهر بيدل على الجوهر وزى ما بيقولوا كل اناء ينضح بما فيه، مش لابسه الحجاب اما علشان مش مقتنعه او منكراه وفى الحالتين يبقا بتنكرى كلام ربنا ومش بتنفذى اوامره فى الاساسيات فمتقنعينيش بقا انك بتنفذيه فى الفرعيات




ايه يعنى وعادى جداً لما البيه المحترم "يرقص" مراته فى الفرح ويفرج عليها الناس بحجة ان دى "ليلة العمر" وخلى الناس تفرح وتتفرج والموبايلات تصور والرايح يورى الجاى، ولا ايه يعنى لما تعمل شعرها والكوافير يكون راجل بقاله 3-4 ساعات يلعب فى وشها وشعرها وهى ما قامتش رزعته قلمين وكملت عليه بالشبشب، ولا علشان الشكل يبقا مقبول فالفستان ميكنش مقفل أوى، يعنى بحمالات او نص كم والديكولتيه واسع من على الصدر ولو محبكينها اوى يبقا هنقفل الفستان من فوق" بالشيفون او الحرير الطبيعى" علشان بردو يبقا شفاف وكاشف إللى تحته وحاجه ببلاش كده للى يحب يتفرج ويملى عينه،وزياده فى اثبات التهمه وكأننا مش مكتفيين بسجلات الملكين على اليمين والشمال..لأ، دا إحنا كمان بنسجلها على نفسنا صوت وصوره والصوره تتحط فرجه فى ألبوم أو الصالون وعلشان إللى محضرش يتفرج نحطها بالمره على الفيس بوك والماسنجر وكل برامج الشات. فين مارى منيب تيجى تؤول له " إتفوووووووه، جاتك ستين نيييييييله" وشدد على الواو والياء علشان اى حد يعمل كدا يبقا يستاهل ولا عزاء للرجاله.



المفروض لقب"راجل"ده يدوه للمذكر بعد اجراء الاختبارات اللازمه عليه ويشفوه يصلح ام لا يصلح يكون راجل بجد ولا كفايه عليه يكون قرنى فى مسرحية سكة السلامه،عنده دم كده ووشه بيحمر لما يشوف الغلط ولا بيفوت ويعديها وميخدش فى باله علشان المركب تمشى، للأسف الديوثين بقوا كتير أوى وسيدنا محمد عليه الصلاة والسلام قال ان "الديوث الذى لا يغار على عرضه"
كنت بتفرج فى محل ملابس مره ولقيت بنتين طالعين من البروفه فكرتهم نسيوا ياخدوا اللبس إللى هيقيسوه من قلة إللى مكانوش لابسينه، دورت وشى وقلت جايز علشان توكيل اجنبى يكونوا دول خواجات وكملت فرجه، الاقى الهوانم طالعين تانى ألعن من الاول وبيفرجوا "حاج كبير وحاجه كبيره لابسه طارحه" وشايلين احفادهم إللى هم ولاد البنتين دول وفى وسط الناس وعادى وايه رأيك يا بابى وايه رأك يا مامى؟؟ جاتك بو ومو انتِ وهى، فكرتهم جايبين اللبس ده يلبسوه فى البيت لكن وهم خارجين بعد ما اشتروا لقيت ان دا "العادى" بتاعهم ،بقيت اكلم نفسى، ازاى دول ابوهم وامهم وفين اخواتهم "الرجاله" وفين ازواجهم؟؟ راحوا فى الكوليرا ولا خدهم الوبا؟؟؟! والله اتقهرت وقعدت عالسلم اعيط لما الناس اتلمت عليا وكان نفسى ارقع بالصوت كمان، يا صدمة سيدنا محمد عليه الصلاة والسلام فينابقينا باردين وتنابله وجبلات، خدونا واحده واحده من الدار للنار علشان كدا محسيناش بصدمتها، تساهلات وتنازلات وعادى فى عادى



فى الاول خالص عادى ان الست تقلع "برقع الحيا" بعد ما شوفناها فى صور ثورة 1919 منتقبه وحشمه ودا كان اول ظهور علنى للمرأه المصريه المحترمه وبدايه لإنقراضها، بعد كدا بقا وشها مكشوف ونزلت الهانم- قصدى البيه- نبويه موسى بالبدله والكرافته تطالب بحريتها وبعد كدا اتجرؤوا اكتر ونزلت غيرها بالشورت فى حرم الجامعه تلعب تنس مع الشباب، وهاصت الحكايه ودى تقلد دى وبعد ما كان شئ مستهجن وشاذ انك تشوف ست مكشوفة الوجه بقا عادى انك تشوفها مكشوفة الجسم كمان


سنه ورا سنه وجيل ورا جيل ورثنا الخيبه والسلبيه والخنوع وبقينا إمعات لغيرنا وقرود فى جبلاية بيوت الازياء والقراداتيه بيرقصونا على مزاجهم ورغباتهم، اكشف من هنا واقطع من هنا وقصر من هناك وضيق من حته تانيه، بقينا مسخ من غير هويه، لا مسلمين ولا غربيين
وبعد طول الزمن لما الناس رجعت تتعدل وتلتزم ويلبسوا الحجاب خلوه "عالموضه" علشان بردو ميحتكوش وتحصل مصادمات بين الرافضين والمؤيدين، سيبوهم يغطوا شعرهم عالماشى كدا واهو نقنعهم ان دا "الحجاب" وكفايه عليكوا اوى ونعمه وفضل، احنا كنا فين وبقينا فين، دا انتوا احسن من غيركو، واتخدرنا وسمعنا الكلام علشان موافق لمزاجنا واهواءنا ونفوسنا الضعيفه
لكن بردو فضل الالتزام يزيد والناس بقت ترجع لربنا وتحكم عقلها وتستفتى قلوبها وتتبع الصح، ورجعنا نشوف المنتقبات زاينيين شوارعنا المصريه المسلمه ويدوها بعض من هويتها الحقيقيه، بس الاعلام والحكومه والمجرمين ماسابوهمش فى حالهم، مره يقولوا دا "حجاب ايرانى وبتاع الشيعه" ومره يقولوا حجه للإرهابيين ومره يقولوا مناظر شاذه فى وسط المجتمع...الصح بقا شاذ؟؟؟
عندهم حق الغرب يتجرأوا علينا ويقللوا قيمتنا، اذا كان احنا بنبهدل فى بعض ومفيش احترام لأدنى قواعد الدين و"الحريه الشخصيه" يبقا هم هيعملوا فينا ايه؟؟ قليل ان ما داسوا على رقبتنا بالجزمه ونقول لهم كمان...أعد
لما
ييجى شيييييييييييييييييييييييييييييخ الازهر، المكان إللى يعتبر مناره لكل مسلمين العالم ببعثاته ووفوده وقراراته، المكان اللى بسببه الافارقه شالوا عربية عبد الناصر على اكتافهم والناس رفعت الشعراوى الله يرحمه بعربيته، المكان إللى عاش ايام الشيخ محمود شلتوت والغزالى ومحمود عبد الحليم وجاد الحق الله يرحمهم جميعاً، لما ييجى شيخه يهزأنا على اخر الزمن ومره يحلل الباروكه ومره يحلل خلع الحجاب ما دمتى فى بلد هتسببلك مشاكل وساركوزى يتصل يؤوله اعمل ايه فى موضوع الحجاب فى فرنسا يرد عليه يقول له براحتك دى دولتك ويخلى المحاكم الفرنسيه تعيد النظر فى قراراتها، ويسيب مذيعه تحاوره والطرحه على كتفها وكأنها متكبره تغطى بيها شعرها وهى فى مكان محترم زى ده، واخيراً لما جرأ السفهاء والسفيهات على المسلمات المحترمات بقراره منع النقاب فى المعاهد الازهريه. عاوزين بعد كدا يحصل ايه؟؟ هوجه متوقعه وناكل فى بعض ونضحك الناس علينا
يوم ما اعلنوا ان فى "بيان" هام هيصدر عن الأزهر يوم الخميس 8 اكتوبر، حطيت ايدى على قلبى وخفت "يمنعوا الحج" بجد السنه دى، لكن المصيبه كانت اكبر وانا بسمع القرار، فى ظاهره يبان عادى ومن حقه مادام المعهد او المدرسه كلها بنات والعاملين فيها بنات يبقا البنت تكشف وشها عادى، لكن إللى مش عادى من شيخ الازهر انه يجبر بنت فى تانيه اعدادى تخلع نقابها ويتريق عليها بقوله" اومال لو كنتى حلوه" وكمان لو المدرسه كلها بنات وستات فهو راجل وإللى معاه كانوا رجاله، ويقول فى حديثه ان "البت كان شكلها شاذ وغريب بين اقرانها" مع ان هى حره واهلها مدخلينها ازهر علشان عاوزينها ملتزمه ومصانه شكلاً موضوعاً، ليه متكلمش على معاهد الباليه والسباحه التوقيعيه ومعاهد الرقاصات لتعليم الرقص الشرقى؟؟؟ ويقول كمان انه "ليس من الاسلام فى شئ وانه عاده وليس عباده وكمان بدعه" يا نهار اسود يا ناس!!! على كدا امهات المؤمنين زوجات سيدنا محمد عليه الصلاة والسلام وكمان بناته كانوا من أهل البدع؟؟؟ والصحابيات والتابعات زيهم؟؟؟
تعرفوا ان فضلة الشيخ منع الاسئله فى اليوم ده وقال بالحرف وبشكل انفعالى واضح وكأنه قرار ديكتاتور لكل المراسلين" مفيش اسئله، انتوا جايين علشان فيه بيان واهوه البيان خدوه انشروه وخلاص" دا فى اى شرع ولا دين ده؟؟؟
والله يا فضلة الشيخ عاوزه اسألك سؤال...مسمعناش صوتك ليه لما مخرجة افلام سافله عاوزه تعمل اول قناه اباحيه مصريه وتسميها الجريئه علشان تكمل برنامج وقاحتها؟؟

قراره ده خلا الكل اتجرأ على المنتقبات، الداخليه تقول إرهاب ووزير التعليم يقول احتياطات أمن، قال يعنى الداخليه ولا بيوت الطالبات ولا الجامعات هيعجزوا يحطوا واحده عند البوابه من الموظفات المتختخات م القاعده الفاضيه، إللى موراهمش غير النميمه والهزار فى المكاتب وتقطيع خضار الغدا علشان يتحققوا من شخصية الداخلين ،بلا نيله ؛دا انا قعدت فى الكليه أد ما قعدت دراسه ودراسات عليا محدش مره قال لى فين الكارنيه غير يوم ما مرات الرئيس جت مكتبة اسكندريه حبوا يعملوا شوية حركات يحللوا المرتب

وهى إللى ربع لابسه وداخله الكليه وماشيه فى الشارع مش خطر على الأمن؟؟ متسببوش فى اعمال تحرش وفتنه وخطف وغيره؟؟ وسط البلد فى القاهره متبهدلتش بدل المره كذا مره بسبب السافرات والرقاصات؟؟؟ ايام عجيبه؛ المحترمه بقت خطر والمنحله بقت أمان
على كده السعوديه كلها ارهابيين يا رجاله!!!

دا انا الجاهله إللى معرفش ألف باء الدين ويادوب معلوماتى من القراءه والبرامج الدينيه على طشاش لما بفضى اقعد لها عمرى ما اتجرأ ولا اتهور واقول كده، انا غلطانه وعارفه انى غلطانه ولبسى مش صح ولا اسلامى بجد ونفسى اتغير وعلشان كدا "هستتر" اخذاً بالحديث الشريف " إذا بُليتًُم فاستتروا" اصلى مبقاش غلطانه وعينى بجحه،لكن مش هقاوح واجادل واقول انا صح...عيب حتى، دا الواحد يستحى من ربنا
طب والله كل ما اقرا فى المصحف الشريف واوصل لآيات الحجاب اترعب لأنى عارفه ان دى "حجه علىَّ" مش لى، ربنا لما بيقول لسيدنا محمد" يا ايها النبي قل لازواجك وبناتك ونساء المؤمنين يدنين عليهن من جلابيبهن ذلك ادنى ان يعرفن فلا يؤذين وكان الله غفورا رحيماً" آيه 59- سورة الأحزاب .بالعقل مش بالعلم....إيه إللى بيميز حد عن التانى ويخليك تعرف ان دا فلان ودا علان؟؟؟ اكيد ملامح الوش صح؟؟ يبقا ربنا لما قال " ذلك أدنى أن يُعرَفن" عاوزنا منتعرفش ولا نتميز، لا إللى ماشيه دى بيضه او سمرا تخينه او رفيعه حلوه او وحشه اهى بشر وخلاص وتتعامل على الاساس ده ولها احترامها

تكشفها ليه انت بقا وتتفرج عليها؟؟؟ تخصك دى؟؟ لك فيها؟؟؟ وبعدين انت عاوز تبص فى وشها لييييييييييييييييه؟؟ وانت مالك؟؟ حلوه لنفسها وللى هتعيش معاه ووحشه بردو لنفسها وللى هتعيش معاه. كل إللى بينها وبينك معاملة شغل أو دراسه وزماله محترمه،المهم انها حاجه محترمه وشها بقا هيفرق معاك فى ايه؟ انت بتتعامل مع عقل ولا جسم؟؟


تخيلوا واحده من إللى القرآن الكريم بيقول عليهن "قواعد" يعنى خلاص عدت الخمسين سنه وبقت جده، طالعه فى برنامج تقول على النقاب" رداء حقير"!!! يا مين يلايمنى عليها، دى اكيد مش فى وعيها ولا عارفه بتشتم فى مين ولا بتقول ايه، جاتهم القرف خناشير وبيتحايلوا على الزمن بأعمال النصب التجميليه، شد ونفخ وحقن وتلزيق، بيقاوموا الواقع، مخهم ضرب من كتر الليزر والسيلكون والكولاجين إللى بيتعاطوه، ربنا يقول عليهن" والقواعد من النساء اللاتي لا يرجون نكاحا فليس عليهن جناح ان يضعن ثيابهن غير متبرجات بزينه وان يستعففن خير لهن والله سميع عليم" يعنى خلاص المفروض "تحترم نفسها وسنها" وتستعفف بم انها على وش آخره يعنى، ودول بردو مستهبلات ومنكوشات بكل الألوان، عاوزه تكملى حياتك العمليه ومتندفنيش بالحيا فى البيت يبقا بردو بإحترامك يا تحطى لسانك فى بؤك وتخليكى فى حالك، يعنى لا منك ولا كفاية شرك يا شيبوبه منك لها؟؟؟!!!

مين قال ان فيه تعارض بين النقاب وبين الدراسه والعمل والاندماج فى الحياه العامه؟؟؟ زوجات سيدنا محمد عليه الصلاة والسلام كن يروين الحديث عنه والسيده رفيده أول طبيبه فى الاسلام كانت خيمتها الطبيه فى قلب المسجد والرسول هو اللى أمر بكدا عليه الصلاة والسلام، النساء ايام سيدنا عمر كانت بتحضر خطبة الجمعه ومجالس العلم ومحدش ينسى موقف المرأه اللى جادلت سيدنا عمر فى قراره بعدم المغالاه فى المهور وغلطته وقال بعدها" اصابت امرأه واخطأ عمر"


والمنتقبات فى ايامنا دى فيهم ناس فى منتهى الروعه وجديرات بالاحترام فعلاً، الطبيبه ودكتورة الجامعه والداعيه الاسلاميه والمدرسات وسيدات اعمال كمان، بشوفهم حوالى فى كل حته، فى المطعم والنادى وعلى البحر وسايقه عربيتها بتوصل او بتجيب ولادها من المدرسه او رايحه شغلها، لا حد يعاكس ولا حد يغلس عليها ولا يبحلق فيها لحد ما تتكعبل وتؤع على وشها من الاحراج ويبآ هاين عليها تدب صوابعها فى عنيه وتريحه منها للأبد



صحيح انا مش منتقبه بس بحترم المنتقبات وبتكسف من نفسى لما اقابل واحده منهن، والله بتمنى انتقب من سنييييييين طويله وبدعى ربنا يهدينى وكتير بطلبها منكم تدعولى بيه، احساس حلو انك تكون ماشى "مع الله" لا شاغلك حد ولا ناس ولا كلام فاضى، حوار متصل ودائم إلى الله سبحانه وتعالى، انك تكون فى "المعيه" مش بالساهل تقدر على نفسك وتوصل لها. دا غير ان المنتقبه مصانه عن العيون واصحاب النفوس المريضه، مش ملكيه عامه ولا مشاع للى رايح وجاى، لو مقدرتش تمنع عيون الناس عنها فأضعف الايمان انها هتبعد بنفسها عن عيونهم لأن محدش يستاهل ولا يستحق ياخد حاجه مش ملكه.

يا بخت المنتقبات ويا بخت الازواج إللى زوجاتهم منتقبات، ربنا يزيد عليهم نعمه وفضله ويهدينا زيهم



الحاجه إللى انا مستغربالها هى "ليه؟؟؟" ولمصلحة مين دا يحصل؟؟ يعنى هم اتدخلوا فى كل حاجه حتى مواعيد نومنا وصحيانا باقى لبسنا عاوزين يفرضوه علينا؟؟؟ واحده عاوزه تزيد من الاحترام وانت مالك؟؟؟ عاوز منها ايه؟؟؟



الوحيد إللى كان بيعافر علشان "يعرى" البشر ويكشف سترهم هو الشيطان، من أول سيدنا آدم وامنا حوا وهو بيحرب ويحارب علشان يكشف عورات الناس ويلهيهم، عارف انها بداية كل شر ورذيله، اقرا حتى كلام ربنا :" فوسوس لهما الشيطان ليبدي لهما ما ووري عنهما من سوءاتهما وقال ما نهاكما ربكما عن هذه الشجره الا ان تكونا ملكين او تكونا من الخالدين" يبقا بقا ننضم لحزب الله ولا حزب الشيطان؟؟ للى بيدعو للحشمه ولا إللى بيدعو للعُرى؟؟ للى يحب الستر ولا يحب الفضيحه؟؟ إللى ينادى بالحشمه والفضيله ولا السفور وقلة الحياء؟؟
ننضم لمين يا اصحاب العقول والقلوب السليمه والفطره الصحيحه؟؟؟ غلبك كلام الشيوخ وتعارضهم....استفت قلبك
"ونفسِ وما سواها . فألهماها فجورها وتقواها. قد أفلح من زَّكاها. وقد خاب مَن دَّساها" ربنا يكفينا شر الخيبه ومفتعليها
قلبى حاسس وتقريباً متأكد ان فى بلوى جايه فى الطريق إلينا، اثارة موضوع زى دى وإلهاء الناس بيها مع اشتغاله تانيه زى بتاعة الانفلوانزا الجديده وارهاب الناس بالشكل ده وراه حاجه
هى فى انتخابات قريبه ولا حاجه؟؟ او جايز فى تعديلات دستوريه؟؟ ولا جايز مصيبه اكبر
عموماً واحتياطى متنسوش تدعو" اللهم لا تجعل مصيبتنا فى ديننا"وربنا يستر بقا من إللى جاى
وبردو متنسوش تدعولى ربنا يهدينى ويتفضل عليا بلبس النقاب ان شاء الله يا رب




منقول من هنا من غير اى تعديل


http://feyoud-alqalb-walkhater.blogspot.com/2009/10/blog-post_22.html





Tuesday, May 03, 2011

رد على استشهاد بن لادن







حتى لو كان ابن لادن اسوأ شخص فى الدنيا زى ما هما بيظهروه



فأن عدو عدوى صديقى



امريكا واسرائيل اعدائنا



اذن فهو صديقنا



حسبى الله ونعم الوكيل



لو كان خبر استشهاده صحيح فهو حيا باذن الله لقد منحتوه الحياة انتم الاموات وليس هو













ياحرام احنا شررين خالص وهما ملايكة ماشين على الارض واحنا اللى بنتعرض لهم وبنقتلهم




Sunday, May 01, 2011

مبروووك ياخالد











ماشاء الله ابن اخى حصل على بطولة الجيزة فى السباحة تحت 12 سنه وكان من 5 اشهر طلع الاول فى بطولة الجمهورية ربنا يحفظه ويحميه دايما رافع راسنا اللهم بارك وعلى فكرة بيطلع الاول على المدرسة







وللعلم مامته منتقبة ومعلمة قرءان واخدت الايجازة يعنى النقاب مش تخلف ولا رجعية ومامته هى اللى بتحفزه وتشجعه ومش بيعرف يدرب غير لما تكون مامته موجودة بتشجعه وتقيس له التايم وكمان هو مش بطل سباحه بس هو ماشاء الله كمان بيمارس الفروسية وسلاح الشيش والرماية لعبه اسمها الخماسى الحديث





يعنى النقاب والالتزام مش انغلاق ولا رجعيه هو احترام للذات والنفس واحترام للاهل وللزوج


عمرماكان الدين بيمنع من تمتع بالحياة طالما حلال ومتوافقة مع الشرع
زى ما العلمانين بحاولوا يصورو ان حياتنا هاتكون جحيم فى ظل الشرع





معلش حذفت نصف الصورة علشان لابس مايوة ان شاء الله لما يبلغ هايلبس المايوة الشرعى







ربنا يحفظة ويحمية ويارب يوصل للاولمبياد


الانسان الملتزم عايش االدنيا بس بيحاول يعيشها بما يرضى الله