Monday, October 22, 2007

الى كل التعساء والمكتئبين

طبعا بعد مدة الغياب اكيد افتقدت تواجدى معكم وكل سنه وانتم بالف خير ويااارب كل امانيكم تتحقق واذهب الله عنكم كل هم وكرب اللهم امين
بصراحه عندى حاله كسل للكتابه وانا مش باحب اكتب الا لما اكون حاسه اللى باكتبه ومتعايشاه مش احب اكتب وخلاص لاملاء فراغ او للتواجد وخلاص بس بجد سؤال بعض المدونين عنى بيحرجنى جدا واكيد باكون سعيدة بسؤالهم فكان عندى كذا موضوع وكنت محتاره ابدا باى موضوع كان فيه موضوع اثر فيه قوى وفعلا حبيت اكتب فيه واتمنى انه يفيدكم زى ما افادنى مش هاطول عليكم ندخل على الموضوع
مين فين راضى بحاله مين فينا بيقول انه بيحب ربنا ويقبل اختبار الله له من فينا واثق فى ايمانه تمام الثقه كنت كانت مرت بى شويه امور ضايقتنى وكانت ثقيله على نفسى من وجه نظرى وكنت اشعر باحساس نوعا بالضيق ولكن اراد الله ان يعلمنى درسا ومن انسانه المفروض فى نظر كثير من الناس انها كاانت تعصى الله علمنى ربى اكثر من شئ اولها لا تنظر لاحد على انه عاصى او انه دونك لانك لا تعلم عبادته السريه بينه وبين الله او قلبه ماذا يحمل من ايمان ويقين بالله المهم تحدثت الممثله شريهان مع عمرو اديب فى القاهره اليوم عن مرضها النادر جداجداجدا الذى لا يصيب سوى 9 من كل مليون شخص وهو مرض السرطان الذى اصاب غددها اللعابيه واثر على الحنجرة وجعلها لا تتحدث الا بالاشارة ولا تستطيع الحركه وفقدت معه الذاكرة او بمعنى اصح فقدت التركيز وضعفت ذاكرتها
شريهان التى كانت تملاء الدنيا رقص وغناء وضحك وضجيج اغنى ممثله مصريه فجأة تعانى من مرض خطير نادر جدا انظروا الى ايمانها وثقتها بالله ثقه ويقين بالله ليس عند احد بتقول انها حجت كثير وعملت عمرة كثيره لتتقرب الى الله وكان هناك امل وحيد للشفاء انها تجرى عمليه لا ستئصال الاورام التى انتشرت بالمخ وخصوصا اعصاب المخ والحاجب والخد وكان الاطباء يرفضون العمليه لان مافيش حد نجا من هذه العمليه
ولكنها تقول كنت سعيدة بالعمليه لانها سوف تقربنى من ربى كنت نفسى اذهب الى ربى ولكن ارادة الله شاءت ان اعيش بفضل الله وفكركم بعد العمليه انها خفت لا المفروض كل شهرين تذهب الى فرنسا لتتدخل حجره معدنيه على روبوت لوحدها لمدة 3 ايام ليتم حقن المخ بطريقه صعبه جدا عن طريق الرويوت بالكيماوى تخيلوا التعذيب
ولكنها راضيه وسعيدة بجد احرجت من صبرها ورضاها كثير منا يعانى من مشاكل بسيطه ولكنها فى نظره ضخمه يكفيك نعمه الصحه التى تستطيع بها فعل اى شئ حتى لو اصابك مرض تحمل وكن على يقين بان الذى خلق الداء خلق الدواء وقادر ان يعافيك شريهان تقول انها لازم تاخذ دواء فى الصباح لتستيطيع تذكر بنتها وزوجها
انظر الى المعناه التى تعانيها هل انت تحتاج لمجهود للتذكر زوجتك او اولادك هل تحتاج لمجهود لتحريك يديك او رجليك كم يغيظنى من يقول او تقول انا زهقانه انا مكتئبه وتسال يمكن فيه مشكله كبير بيمر بيها تلاقيه مجرد عنده فراغ وخلاص ودة يا حرام اللى مسبب الاكتئاب والحزن ابتلائات الدنيا عظيمه ارضى بحياتك واثبتوا لانكم لو علمتم الغيب لا خترتم الواقع ليه دايما مش بننظر للنعم اللى احنا فيها وننظر للى لسه مش فى ايدينا انا جربت احساس لما تزول منك نعمه وانا حين كانت موجودة لم اشعر بها نهائى الا عندما راحت منى ايها المكتئبون من لا شئ اعذرونى انا مش متعاطفه معاكم
شريهان علمتينى كتير من تجربتك علمتينى ان ممكن ربنا يجعل من انسان فى نظرى عاصى ايه وعبره لناس كثير صبرك ويقينك فى الله وانه قادر انه يزيل عنك الغمه علمتنى ان الدنيا بها ابتلائات لا يعلم مداها الا الله ولكنه صبره علينا وامهاله لنا حتى نرجع ونتوب بجد كشفتينى امام نفسى وتعلمت منك دروس كتير قووووى غفر الله لك بابتلائك هذا ما سبق من حياتك وملاء قلبك بالايمان
ارجوكم لا تكونوا قاسين فى حكمكم على احد ربى له حسابات اخرى لا نعرفها وكل منا له شئ يفعله بينه وبين الله فلا تتدخلوا بين علاقه العبد وربه هناك من يدخلون الجنه بسبب انهم سقوا قطه مجرد سقو ا قطه
ياريت كل منا يفعل عملا صالحا بينه وبين الله حتى ولو كان فى نظره صغيرا عسى ان يكون سببا لتفريج كرب الدنيا وكرب الاخره
الرسول الكريم صلى الله عليه وسلم يقول ان اعمال البر تقى مصارع السؤ او كما قال صلى الله عليه وسلم لا تامن لدنيا واقبالها عليك هذه شريهان مثال حى لاقبال الدنيا وفى نفس الوقت قسوتها وادبارها
من فضلكم لتسمعوا القصه كامله من شريهان نفسها وبشكل مفصل
ياريت تشوفوا اللينك دة
كنت نفسى ارفعه مع البوست حوارها بصوتها بس للاسف مش باعرف ازاى اعمل ده على العموم ده اللينك الخاص بحديثها عن مرضها والحوار على اجزاء موجود على يوتيوب
http://www.youtube.com/watch?v=FnYlvG-H9kA

انا عارفه فيه ناس كتير هاتقول اشمعنا اخترتى شيريهان فيه ناس فى ظروف اصعب منها لانها مثال لاقبال الدنيا بكل حاذفيرها على شخص صغير السن اعطته الدنيا الشهرة والمال والجمال والزوج والذريه والسلطه وهى الان محرومه من ممارسه حياتها بشكل طبيعى الا بوجود ادويه بمئات الالوف من الجنيهات شوفوا بقى انتم بتمشوا وتتنفسوا وتتحركوا وقلبكم شغال ببلاش ازاى من غير ولا مليم
الا يستحق من اعطنا هذا بغير حساب ومن غير مقابل ان نحمده ونشكره ونبطل نكون مكتئبين ووجوهنا عابسه على طول من غير سبب ياريت يكون الحزن والهم لحدث جلل مش مجرد علشان حاسس بفراغ وملل
على فكرة بقى علشان تكونوا فاهمين الهم بيعجز الناس بدرى انتم حرين وقد اعذر من انذر
اللهم اشفى جميع مرضى المسلمين وازل عنهم الهم والغم والحزن
اللهم امين
المؤمن القوى خير واحب الى الله من المؤمن الضعيف

52 comments:

آلام وآمال said...

حقيقي يا رفقة عودة رائعة
انا مش هشكر كتير في البوست لأنه بصراحة مش محتاج

وبصراحة كمان كلامك ده كأنه رسالة من ربنا سبحانه وتعالى ليا ولكل واحد حاسس بالهم والإكتئاب
ومع إنه فعلا بيكون شيء غصب عن الواحد في احيان كتير
إلا إن الإعتبار من ابتلاءات الغير شيء مهم جدا والانسان اللي بيفهم كده يبقى ربنا بيحبه فعلا

مش لاقي بجد كلام اشكرك بيه على موضوعك الجميل ده

ربنا يبارك فيكي ويجازيكي خير

ma_3alina said...

الف حمد لله على السلامة يارفقة .. وكل عام وانتي بخير .. يظهر مش أنا اللي وحدي اللي اصابه حالة من الكسل بعد رمضان

برغم سوء التفاهم الدائم بيني وبين اللي بيتسموا فنانين لكن عرض أثر فيا وزعلني فعلا واسأل الله أن يشفي كل مريض وأن يجعله وإيانا من المقربين للطاعة البعيدين عن المعاصي

أما التعساء والمكتئبون فالمثل بيقول من شاف بلاوي الناس تهون عليه بلوته

ربنا يحفظنا جميعا من البلايا اللهم آمين

حائر في دنيا الله said...

حمدا لله على سلامتك
ذكرتيني بأيام محمد عطية الذي فاز بستار أكاديمي التي كانت تملأ الآفاق حينها، وكنت في منتدى إسلامي وكان الجميع يكرهونه وفي حركة مفائجة مني أعلنت حبي للشاب، وعلى ما أتذكر قلت في أسبابي أن الشاب لم يكفر ثم أنا وهناك شباب كثير مثلي لو عرضت عليهم فرصة كتلك من شهرة ورقص وغناء لكنا سنقبل ولا أحد يعلم الآن أين يأخذ البلاء هذا الشاب ولا أين يأخذنا تدينا
فاللهم اهده وثبته
وبالطبع لا نستيطع ان نحكم على أحد لعمله الظاهر ما دام لا يشرك ولا يخرج عن الملة فيكفينا هم أنفسنا ويا له من هم


لك تحياتي
السلام عليكم

أمــانــى said...

رفقــتى حمدلله على الســلامة انك كتبتى
وبما اننى على الدايل اب العزيز فلن اسمع الفيديو
:D
علشان نكون متفقين
:D
اقولك بقى يا رفقتى
برضو الانسان سبحان الله ضعيف وملول وبيحب يكون دايمآ فى افضل حال ولكن بالنظر لحال الناس من بلاوى وامراض فأكيد هيحس بالرضا ويشكر ربنا كتير

ربنا يعافينا ويشفى مرضنا ياااااارب آمـــــــــــين
وربنا يرزقنا الرضا ويرضى عنــا ياااااارب آمــــين

mohand said...

السلام عليكم

ربنا يتولاها برحمته ان شاء الله

ويتولانا اللهم امين

انا مقرتش البوست كامل علشان اكون صريح

هقراه وهناقشك بس قريت جزئية شيريهان

تحياتي ليكي

عصفور المدينة said...

حمدا لله على سلامتك
الابتلاءات من الكفارات
الحكم على الناس ليس
مطلوبا منا
وإن كان مطلوبا منا محبة المؤمنين الطائعين ........
ابتلاءات الآخرين موعظة لنا
الله سبحانه يقبل التائب مالم يغرغر فكيف لا يقبله المؤمنون

Mohamed A. Ghaffar said...

عود احمد

التعاسة والاكتئاب نقص ايمان

الطائر الحزين said...

حمدا لله على عودتك

العبرة بالخواتيم

ولا احد يستطع ان يجزم بم سيختم له

يارب طهرنا من معاصينا قبل ان تقبضنا اليك

جزاك الله خيرا

bastokka طهقانة said...

ربنا يشفيها و يشفي كل مريض
ميرسي على التذكرة يا رفقة
احسنتي يا اخيتي


اوروفوار

حامد said...

وفى النهايه كل إنسان يحصل على ما يستحقه ولا نملك لمثلها غير الدعاء ولا نحكم عليها إلا بالرحمه لعل الله برحمتنا لأنفسنا يرحمنا..
...................
أهلا رفقه ..دائما آنس بكلماتك الرقيقه فى مدونتى .. ولا تعتقدى أن قله ردودى بمدونتك هجراً لها بل مطالعه مدونتك ومدونه حائر وربيع من الطقوس اللازمه عند دخولى النت .. حتى قبل مشاهده مدونتى ! فلك منى كل سلام .. وأكمل تقدير

رفقة عمر said...

الام وامال
بجد باكون سعيدة انك دايما بتكون اول تعليق
انا عارفه ان الواحد بيكون غصب عنه الهم وان اشد جنود الله الهم
بس لو تخيلنا ان ممكن يكون هناك اسوأ مما نحن فيه اكيد هانشكر ربنا ونرتاح وتنزل السكينه على قلوبنا
ربنا يرزقك راحه البال اللهم امين
وفرج الله همك وابدل حزنك فرحا اللهم امين يارب العالمين

************

باشمهندس ماعلينا

الله يسلمك تفتكر ايه سبب حاله الكسل
انا كتبت البوست بشق الانفس
الحمد لله انه طلع كدة
انا كمان اكيد بابغض فى الله افعال الفنانين كلهم
بس عارف قصه شيريهان اثرت فيا قوى
ياريت بجد تسمع حديثها وتشوف كم المعاناه اللى عانتها
وطالما انها مسلمه وتشهد ان لا اله الا الله
لازم نحسن الظن بها
وعلا وعسى يكون مرضها هذا غسل ذنوبها لان بجد اللى شافته فى مرضها بجد لا يتحمله احد
شافانا الله وعافان مما ابتلى به غيرنا
اللهم امين
ادام الله عليك وعلى امه المسلمين نعمه الصحه والرضا اللهم امين يارب العالمين

******************

حائر فى دنيا الله

الله يسلمك
اهلا بيك
فعلا كلامك صح طالما الانسان لم يخرج عن المله لازم نكون نحسن الظن به
علا وعسى يتوب توبه تغفر له ماسبق من تقصير
رزقنا الله حسن الخاتمه اللهم امين
سعدت بوجودك

****************

امانى
اخبارك ايه مطحونه فى الشغل برضه
ربنا يصبرك
لا ياريت بجد تحاولى تشوفى الفيديو باى شكل لان كلامها مؤثر جدا
وطبعا انا عارفه احيانا الواحد بييكون مهموم من غير سبب
يعنى ياريت نخفف عن نفسنا شويه ونطبب على نفسنا ونحاول نخرجها كلما حاولت الدخول فى هم
ربنا يزيل عنا الهم والغم اللهم امين يارب العالمين

*******************

استاذ مهند

ليه بس كنت نفسى تقرا البوست للاخر
منتظره حضرتك تكمله وتناقشنى فيه
شرفتنى بجد

*******************

استاذى عصفور المدينه

طبعا النور زاايد فى المدونه بسبب وجود حضرتك وروايح المدينه المنورة مازلت حضرتك تحتفظ بها
اصل بصراحه مرضها الغريب وان فيه 6 قبلها عملوا نفس العمليه بنفس الداكاترة وماتوا كلهم وهى سبحان الله تنجى منها ورجعت تتكلم تانى ورجعت تمشى تانى اكيد دة ليه حكمه لينا كلنا
انا اتعودت انى اتامل اى شئ قدامى واحاول اخرج بعبر وعظه من اى موقف يمر بغيرى سواء فى نظرى عاصى او طائع ربنا ليه حكمه من كل شئ يمر بنا علمه من علمه
ياريت بجد حضرتك تسمع حوارها عن مرضها ياريت بجد هاتعرف حضرتك انا ااقصد ايه

****************

استاذ محمد عبد الغفار

اخيرا حضرتك فى مدونتى مفتقدة زياره حضرتك من زمان
دايما حضرتك كلماتك قليله ولكنها فى الصميم
سعيدة بوجود حضرتك


************************

الطائر الحزين

يارب تكون الطائر السعيد
وابعد الله عنك كل هم وحزن ورحم الله الوالد رحمه واسعه وبارك الله فى بقيه احبابك اللهم امين
شكرا لسؤال حضرتك
جزاك الله خيرا


*********************

طهقانه

لا تتخيلى سعيدة بوجودك وتعليقك قد ايه
ربنا يسعدك ويكرمك ويبعد عنك الزهق والطهقان اللهم امين يارب العالمين
سعيدة بتشرفيك مدونتى المتواضعه

رفقة عمر said...

استاذ حامد
اكيد دة شئ يسعدنى كتير
ربنا يكرمك يارب
وانا باكون سعيدة فعلا بدخولى مدونه حضرتك ودايما بتتضيف ليا كتير
و لا يهمك استاذى
بس اكيد سعادتى بتزيد
لما حضرتك تفدنى ولو ببعض كلمات تعليقا على كلماتى وجزاك الله عنى كل خير

أميرة محمد محمد محمد said...

ربنا يكرمك يا رفقه
انا كنت قرات مقاله في الاهرام من كاتب سمع البرنامج وكتب يسجل اعجابه بصبرها وتحملها
سبحان الله علي الرغم من انها لم تكن كاملة الطاعه لله الا انها صبرت افضل من كثيرين لعل ما حدث يقربها اكثر لله وتلتزم بجميع اوامر ربنا لان خساره واحده بالصبر ده تاخذ ذنوب علي حاجات تافهه
ربنا يرزقنا واياها الصبر

قوت القلوب said...

السلام عليكم

نورتي يا رفقة :)

ربنا يتولاها برحمته..انا هتفرج على كل الفيديوهات ان شاء الله..بس هي شكلها عانت كتير..بس ربنا يصبرها ويرضيها ..وان شاء الله جزائها عند ربنا

بالنسبة لحكاية ان الواحد بيبقى مكتئب على حاجات قد تكون تافهة..بس بيبقى غصب عنه فعلا..والواحد بيحاول يتدارك نفسه ويلجا لربناوسبحان الله الانسان لو شاف الناس التانية فيها ايه مش هيزعل..وهيعرف انو احسن من ناس كتير..زي المثل اللي بيقول اللي يشوف بلاوي الناس تهون عليه بلوته

ربنا يهون على كل عبيده يارب..ولو الناس قربت من ربنا ..ربنا هيفرجها عليها وهتجد طمأنينة وراحة في القلب..فاي حزين يفوض امره لله وربنا مبيضيعش حد

وجزاك ِ الله كل خير على البوست الجميل..جعله الله في ميزان حسناتك وفك كربك وابعد عنك ِ الهم والغم ..اللهم آمين

تحياتي

allah-slave said...

السلام عليكم ورحمة الله وبركاته

من ساعة ما عرفت مدونتك وعمرها ما خلفت معايا معاد ... دايما تصادف ان الموضوع يكون بيتكلم عن شئ في نفسى .... سبحان الله

اقلك حاجة يا رفقة
ممكن يكون مليون واحد شاف البرنامج ومليون كمان شاف اللينكات بس محدش فهم العبرة زي ما انتى فهمتيها

ساعات مثلا اكون بتفرج على التلفزيون واتكى زرار غلط تجيلي قناة فيها برنامج دعوى او برنامج عقائدي بحس ان ربنا ساق لى البرنامج ده او الموعظة دي عشان اصلح خلل معين عندى ... عشان كدة في رأيي ربنا سمى نفسه الودود
مش محتاجلنا بس بيقربلنا

فاهمة ؟

a Dreamer with feet on the Floor said...

thx $eminding us..., the Problem is ..that we allwayes Look and think 2 what we miss ..what we need ,,what we do not have...and never look 2 what we have..and some times Allah give us those lessons 2 make us realize and b thankfull..
I ask allah 2 help us all ..and give us from his wide mercy..
thx

حياة الأحلام said...

السلام عليكم

جميل أوى بجد يا جميله مفيش كلام اقوله غير أنه بوست رائع وكلامك صح

لو كل واحد فكر فى النعم اللى ربنا مديهاله عمره ما هيقول غير الحمد لله والمؤمن كمان مصاب حتى لو فيه أبتلاء يبقى ده أختبار من ربنا وتكفير لذنوبه فى الدنيا

كلامك جميل دايما يا رفقتى فى الأحلام

تحياتى الكبيره اوى ليكى

None said...

حمد الله علي السلامه

بوست رائع ..ولا يسعني الا ان اقول

الحمد لله الذي عافانا مما ابتلي بيه غيرنا

البنت الشلبية said...

سلام عليكم
ازيك اختى
ربنا يشفيها يارب
انا كمان قريت عن مرضها
بس صدقينى الملل والفضا بجد بيتعبو وبيجيبو اكتئاب
انا واحدة من الناس عندى الحالة دى لكن ده غصب عنى
مقدرش اقول انى سعيدة وانا فعلا مش مبسوطة
شكرا ليكى

رفقة عمر said...

اميره
اخبارك ايه
احيانا ربنا يرسل للانسان رسايل لو علم به خيرا لعله يرجع ويتوب الى الله
نسال الله ان يجعل مرضها هذا لتغير مسار حياتها ويقربها الى الله اكثر


*******************

قوت القلوب

اناا عارفه ان فيه امور بتكون تافهه وبضايقنا كتير وانا فعلا احيانا حاجات صغيرة ممكن تسبب ليا ضيق شديد
بس فعلا لما اشوف حد شد منى ابتلاءا
كل حزنى بيذهب عنى واحمد الله على ما انا فيه

***************

عبدالله

عارف بجد كلامك دة اللى بيشجعنى وبيينى دفعه انى اكتب لان احيانا باحس بفتور فى الكتابه لكن لما باحسن ان فيه حد مثلك كلامى زى ما خرج من قلبى وشعرت به شعر به غيرى بنفس شعورى اكيد باكون سعيدة
وعلى فكرة بتحصل لنا كلنا بيكون بافكر فى شئ ونفسى اعرفه
الاقى اذاعه القران الكريم ااو مثلا برنامج دينى بيتكلم فى نفس الشئ اللى بافكر فيه
ودة فضل من ربنا
واتقوا الله ويعلمكم الله
ربنا يكرمك عبدالله دايما بترفع من معنوياتى
جزاك الله كل خير

**************

dreamer


اهلا بحضرتك فى عالم التدوين واهلا بحضرتك على مدونتى
فعلا كلنا كدة دايما بننظر للشئ اللى لسه مش فى ايدينا
ونكتئب اننا مش عارفين نوصله كل ما نحصل على شئ عايزين اللى بعديه وهكذا
اكيد اللى ربنا بيحبه بيبعت له رسايل يذكرة به ليعود الى ربه
ويتوب
لان الاخرة خيرا لنا من الاولى
شرفتنى

*********************

حياه الاحلام

كل الحالمين موجودين على مدونتى اهلا بيكم منورين
انت الاجمل
ربنا يكرمك على كلامك الجميل الذى لا استحقه
جزاك الله خيرا

**********

none

اهلا بيكى بجد سعيدة باول زياره ليكى وارحو الا تكون الاخيره
بناتك امارات ماشاء الله ربنا يخليهم ليكى ويباركك فيهم يارب
وربنا معاكى
سلامى ليهم كتير


***************

شلبيه

اخبارك ايه
عاارفه كلنا بنعانى من الملل والفراغ
بس عايزة ااقولك حاجه تعرفى ان الفراغ دة نعمه
الرسول الكريم يقول نعمتان مغبون فيه بنى ادم الصحه والفراغ
او كما قال الرسول صلى الله عليه وسلم
عارفه معنى الحديث ان الانسان اللى عنده فراغ عنده نعمه مش حاسس بيها لانه ممكن يقرب من الله اكتر بالعمل الصالح
حاولى تملى فراغك باى شئ ومش تفضلى منتظرة المستقبل وانتى قاعده انتظريه وانتى بتتحركى
يمكن انا اكتر واحدة ممكن اكون اعانى من الوحدة والفراغ اولا انا اصغر اخواتى وكلهم اتجوزوا من زمان معظم صديقاتى اتجوزا
بس انا بفضل الله باحاول ااقلم نفسى على وضع الحمد لله ذهبت لحفظ القران وتعرفت على صحبه صالحه تعرفت منهم على طريق اعمال الخير مساعده الاخرين
حاولت اتعلم دينى اكتر
يعنى باحاول اشغل وقتى وانسى موضوع الفراغ والملل لانى كدة ممكن اموت من الهم
حاولى تفكرى وتساعدى نفسك انك تخرجى من الفراغ اللى انتى فيه وانا الله يحب السعى
اتذكرين قصه السيدة هاجر وسعيها لاحضار الماء حتى تفجر الماء من تحت رجلين وليدها
حاولى تتحركى وهاتلاقى الدنيا بتتحرك من حواليك
ربنا يهدينا واياكى الى سواء السبيل اللهم امين يارب العالمين

رئيس جمهوريه نفسى said...

انا اول مره ادخل البلوج واتشرف بيه بس بجد البوست رائع بس للى عايز يتعظ ويعتبر للناس الى لحظه الابتلاء بتنسى انىاذا احب الله عبدا ابتلاه

mohand said...

السلام عليكم

قريت البوست

والموضوع مش محتاج نقاش خالص

بس انا هقولك علي اللي كنت قولته قبل رمضان ومفهمتيش وجهه نظري


بصي يا ستي
انا قولتلك مش كل اللي في الحياة تصدقيه

يعني في الحقيقة الناس ممكن تركب وشوش عادي جدا
ويقولوا ما ليس في انفسهم

وانا شخصيا اوقات بعمل كده ومش هقولك اني ملاك ونازل من السماء واللي بعمله بقوله واللي مش مقتنع بيه برفضه وكده
اقصد طبع البشر

انتي كتبتي عن المدونين الملاحدة والكلام ده وان اصلهم مسلمين
كان تقريبا البوست بيدور حول الموضوع ده

دا اللي فاكره
نيجي لدول بقي
صدقيني مش كل اللي بيقولوا انهم كانوا مسلمين وكفروا والحدوا وكلام من ده
بصي في واحد من ضمنهم مستعد احلف بالله انه ولا كان يعرف حاجه عن الاسلام حتي لو كان مسلم
وهو بيقول انه ملتزم
طيب دا يوضحلي ايه؟
او يوضحلك ايه

عارفه انتي لما تلاقي عمرو خالد مثلا الحد
او واحد كان ملتزم جدا والحد او غير ملته
عقيدتك هتتهز وخصوصا لما تلاقي الاعداد كترت

ودا هدف الناس اللي بتعمل كده
عايزين يحسسونا ان دينا هش وان اللي بيخرجوا منه كتير

زمان كانوا المستشرقين لما بيعيبوا علي الاسلام فيه منهم كان بيدخل الاسلام بس لو كان بينتقد بعين فاحصه واعيه ويكون غرضه فعلا كويس مش عايز يشوه وخلاص

الناس دي عارفه ان اكثرية الشعب جاهل بالدين " انا واحد من دول علي فكره معلوماتي ضئيلة في الدين "
يعملوا ايه بقي
يزعزعوا عقيدتهم

انا رغيت كتير في غير موضوع النقاش

اللي عايز اوصلهولك انك متصدقيش اي حد يكتب انه كان مسلم والحد او حتي المسلمين اللي بيطلبوا باعمال العقل
والخروج عن السلفية والجهل والكلام الكبير ده دول اللي ليهم مدونات برضه
كل ده ممكن ميكنش صح وفي الغالب بيكون اشتغالات
زي واحد كان عامل مدونه انه واحده وبيطالب بالمساواة وبتاع
وفي النص بيعيب علي الدين الاسلامي وبيتكلم بتلميح ان القرآن محرف
طبعا اتعرف انه راجل في الاخر

طيب انا رغيت كتير بجد
يا رب اكون وضحتلك وجهه نظري
السلام عليكم

eldoctor said...

احيلنا الاكتئاب بيبقى بسببفتن الدنيا .. و الفتنة مش فى الامور الواضحة يعنى حلال و حرام بل فى المشتبهات.. و حاجات لا يمكن تركها او اجتنابها لان بترتب عليها حقوق ..
عذرا مش عارف اوضح.. لان فيه حاجات مرتبطة بخصوصية العلاقة بين المريض و الطبيب و و لا استطيع السرد ولا بصيغة المجهول حتى ..
الحيرة بين احترام العهود و الحقوق .. مشكلة
, و فتنة حقيقية .. الحيرة بين الحلال و الحرام

ربيــع said...

احيانا نتساءل لماذا تمر أمام اعيننا مشاهد معينة..وفجأة نرى من خلالها حالنا..وكأنها وجهت خصيصا لتعطينا حلا..

"
بصراحة الواحد لازم يحمد ربنا على كل حال..
لا حزن ولااحباط ولا ملل هو الي يقفل الدنيا في وشنا..
:)

حلو موضوعك ان الواحد ممكن يرجعله لو مرة بالحالة دي..عشان يصحي الي جوا عقلو تاني
"

كرياكو said...

رفقةعمر
جزاكى الله كل خير على موضوع الهدف
برحمه الله
كلامك حرك فى حجات كتير اوى

اللهم اشفى جميع مرضى المسلمين وازل
عنهم الهم والغم والحزناللهم
اللهم امين اللهم امين

mo'men mohamed said...

صبر جميل
إنهم يكيدون كيدا وأكيد كيدا
يمكرون و يكر الله و الله خير الماكرين
إعرف الله فى الرخاء يعرفك فى الشدة

السلام عليكم

الراقص مع الذئاب said...

السلام عليكم
جزاكي الله خيرا يا رفقة
كم من محنة تطوي في دا خلها منحة من الله عز وجل
وه>ا ما اراده الله عز وجل لشريهان
ان يمنحها التوبة والرجوع الي الله
اللهم لا تحرمنا القرب منك
ولا لذة مناجاتك

كالعادة...موضوع رائع يا رفقة

إنـســـانـة said...

حبيبتى رفقة .. قبل اى كلام عن البوست عايزة اقولك انى بحبك اوى فى الله بجد ومع الوقت حبى ليكى بذيد اكتر واكتر

سامحينى واعذرينى لو كنت مقصرة معاكى شوية بس والله غصب عنى ولما نتكلم حبقى احكيلك ان شاء الله

البوست اكتر من رائع بكيت وانا بقراه وجزاكى الله خيرا على الحقلة قعدت اتفرج عليها ومش لاحقة اخلصها حكمل بكرة إن شاء الله

ربنا يسعدك يارفقة ويخلى حياتك كلها خير ويكرمك بحب الناس وبالرضا وحب ربنا وبالطاعات والصبر على الخير والشر اللهم آمين

حاسة انى قلبى مفتوح وبتكلم منه .. يارب يكون باب السما مفتوح وربنا يسمع كلامى .. بجد انا ببكى وانا بكتب التعليق ده يارفقة مش عارفة اقول ايه

جزاكى الله عنى خير الجزاء حبيبى قلبى

مؤمنه said...

السلام عليكم ورحمة الله وبركاته
دائما ما تقدمى لنا المفيد اعانك الله ودومتى دوما بافضل حال ولندو الله ان يلهمنا الصبر على البلاء والشكر لى نعمه
والسلام عليكم ورحمة الله وبركاته

الغلبـان said...

حمدا لله على السلامة
بتشريفك مدونتى المتواضعة
أتاح لى التعرف على مدونتك الجميلة
والعبر بالخواتيم
وربنا يهيدينا لما نحبه ونرضاه
وشكرا

أنسانة said...

تدوينة هايلة جدا جزاك الله خيرا اوعى تفترى عن الكتابة عسي ان ينفع الله بك محدش عارف الخير فين ممكن ربنا سبحانه وتعالي يشرح صدر احد بكلمه وتكونى سببها ربنا يصلح حالنا جميعا ويشفي مرضانا ومرضى المسلمين

حـريــة الــفـكــر والابــداع said...

الانسان دائما بداخلة الخير ومهما كان الانسان عاصيا فحينما يرجع لخالقة سيكون بخير دائم
شكرا يا سيدة الاحلام
تحياتى
واللهم متعنا بحياتنا بطريق الايمان

ض/خالد said...

الله يهدينا ويتوب علينا

ويثبتها ويثبت المسلمات للالتزام بدينه وسنة نبيه....

الهموم ربما تخلق حالة من الكآبة...وانا باقول ربما...
لان المؤمنين لما أصابتهم مصيبة...وذكروا الله
انقلبوا بنعمة من الله وفضل (بقاء التعقيب)
والله المستعان

ض/خالد said...

الله يهدينا ويتوب علينا

ويثبتها ويثبت المسلمات للالتزام بدينه وسنة نبيه....

الهموم ربما تخلق حالة من الكآبة...وانا باقول ربما...
لان المؤمنين لما أصابتهم مصيبة...وذكروا الله
انقلبوا بنعمة من الله وفضل (بقاء التعقيب)
والله المستعان

mazlomen said...

دي أول مرة أدخل على مدونتك ربنا يبارك فيكي وينفع بيكي

المهم الموضوع جد جميل وضرب على وتر حساس في نفس كل واحد فينا

وإلى الأمام

مـحـمـد مـفـيـد said...

بارك الله فيكي

يقول الرسول صلي الله عليه وسلم
أذا قامت القيامه وفي يد أحدكم فسيله فليغرسها
أو كما قال
باب التوبه والرجوع مفتوح ولكن لمن يعي ذلك
كلنا غافلين ولكن اسأل الله ان يزيل همومنا ويفك كربنا وان تعود اليه سريعا مهرولين

عوداً حميداً

رفقة عمر said...

رئيس جمهوريه نفسى

اهلا بحضرتك وبجد سعيدة بزياره حضرتك ومرحب بيك فى اى وقت


**************

استاذ مهند

طبعا سعدت ان حضرتك كنت متابع مدونتى بدليل قراءة حضرتك لبوست هل تعلم له سميا
ايوة انا فهمت حضرتك تقصد ايه
بس لازم برضه الواحد يكون على حذر ولا يامن مكر الله
ولازم نعرف اننا دائما مقصرين فى حق الله
بس انا اعرف ناس فعلا كانوا متتدينين وبعدوا عن الدين خالص
كالتى نقضت غزلها من بعد قوة
جزاك الله خيرا على تنبهى وتذكيرى ربنا يكرمك يارب
والف مبروك مرة تانيه على الخطوبه

**********

استاذى الدكتور

المؤمن دائما قلبه حزين مهموم بدينه وبالدعوه واحوال المسلمين وخوفه من الوقوع فى الحرام انا لا اقصد استاذى هذا الهم ياريت كل هموم المسلمين دة انا اقصد الهم والحزن عى الفائت او لانتظار لغيب او عدم الرضا بحاله
اااالدنيا بها ابتلائات كتير الحمد لله ان ربنا عافانا منها
كفايه نعمه الامان وان الانسان بينام وهو مش خايف ان بيته يلاقيه كوم تراب فوقه
عافاك الله من كل بلايا وهومو الدنيا وابدل حزنك فرحا اللهم امين يارب العالمين

***************

ربيع

وحشتينى كتير
اخبارك ايه واخبار الدراسه
احنا مشكلتنا مش بنحس بقيمه لنعمه الا لما تروح منا لازم نستمتع بكل شئ متاح لينا مش لازم ننتظر القادم الذى لانعلم متى ياتى وممكن يكون
قادم سؤ وليس قادم خير
هذا ما استعجلتم به
كما قال الله تعالى

************
كرياكو

اهلا بحضرتك
جزانا الله واياك
اللهم امين يارب العالمين

******************

مؤمن محمد

حمد لله على سلامتك
الحمد لله انك بخير
يارب دايما معانا ومش تغيب تانى
ربنا يكرمك يارب وييسرلك كل خير اللهم امين يارب العالمين

****************

الراقص مع الذئاب

فعلا لو سمعت قصه مرضها منها تحس فعلا انا ربنا له حكمه انه يختارها هى بهذا الا بتلاء على قدر انفتاح واقبال الدنيا عليها
على قدر ابتلاء بجد صعب قوى
شافانا الله وعافانا مما ابتلى به غيرنا
وربنا يلطف بنا اذا اقبلت الدنيا علينا
نسال الله العفو والعافيه فى الدنيا والاخره

**************
انسانه

ربنا يكرمك يارب انا اللى بحبك وشكرا ليكى كتير على شعوررك انتى اللى كلماتك ابكتنى والله انتى حساسه قوى
ربنا يحقق ليكى كل امالك واسمع كل اخبا حلوة عنك يارب
اللهم امين يارب العالمين

*******************

مؤمنه

اخبارك ايه
دايما مزواقه ومش بتقصرى مع اى حد
ربنا يكرمك يارب وادام الله عليكى قلبك النقى الجميل


***************

الغلبان

اهلا بحضرتك انا اللى سعدت بمدونتك جدا

وجزاك الله خيرا

ftataljanna said...

وحشتيني

مش عارفه اقول لك ايه

بس صدقيني اصعب ابتلاء

هو البعد عن ربنا

بجد اصعب من اى ابتلاء تانى

انك منعمة بكل نعمة بس بعيدة عنه وتعبانه من كده وحاسه انك مش قادرة تعملى حاجة

فعلا دعاء عظيم

اللهم لا تجعل مصيبتنا فى ديننا

مادام ده بخير يبقى اكيد مفيش مشكلة فى الدنيا تقدر تخلى الانسان يهتم

اللهم لا تجعل مصيبتنا فى ديننا

والحمد لله على كل شيء

ana ga3an said...

عزيزتي رفقة افتقدناكي حقيقي
و كالعادة تعودي بنظرة مختلفة
بسيطة لكن تمس القلب
تعليقي علي كلامك
ان كان من دعاء داود علي السلام
يا رب، كيف أشكرك؟ وشكري لك نعمة عليَّ من عندك تستوجب بها شكرًا، فقال: الآن شكرتني يا داود

فمجرد معرفة ان النعمة من عند الله فهو في حد ذاتة عبادة

متتأخريش علينا تاني
انتي اتعديتي مني ولا اية

BinO said...

حمداً لله علي سلامتك يا رفقة
وأعاد الله رمضان عليك باليمن والبركات
وتقبل منك الطاعات
وزادك رضا

رفقة عمر said...

انسانه2
اهلا بيكى فى زيارتك الاولى ارجو الا تكون الاخيره
تعرفى تعليقك دة جه فى وقت كنت بقول انا حاسه انى مش ليه لازمه فى اااالدنيا وغير مفيدة لاحد
وجدت تعليقك دة زى ما يكون بيرد عليا شكرا جدا على كلماتك التى كتبيتها وبدون ان تقصدى جددتى فيا الامل انى ممكن اكون فى يوم من الايام مفيدة لحد او ااقدر انفع حد
جزاك الله كل خير

**************

حريه الفكر والابداع
اهلا بحضرتك اسعدنى مرورك
جزاك الله خيرا
ورزقك الله الرضا وراحه البال اللهم امين يارب العالمين

******************

دكتور/خالد
اهلا بحضرتك بجد اسعدنى وجود حضرتك
ربنا يوفقك فى الامتحان واعانك عليه وجعلك من افضل اطباء العالم الاسلامى اللهم امين يارب العالمين


*********************

مظلومون

شكرا لمرورك واهلا بيك على مدونتى
جزاك الله خيرا
نفع الله بنا وبك اللهم امين يارب العالمين

***************

استاذ محمد مفيد

اهلا بحضرك وبارك الله لك فى عبدالله وعبد الرحمن وجعلهما قره عينا لك اللهم امين يارب العالمين
رزقنا الله توبه نصوحا وشهادة عند الموت اللهم امين يارب العالمين

**************

فتاه الجنه
ازيك اخبارك ايه
حقا اللهم لا تجعل مصيبتنا فى ديننا اللهم امين يارب العالمين

رفقة عمر said...

استاذى الجعان

بجد زياره حضرتك لمدونتى بيسعدنى كتير جدا جدا ربنا يكرمك يارب وجزاك الله خيرا عنى
وبجد كلماتك بتشجعنى كتير حضرتك اللى عرفتنى التدوين وحضرتك استاذى
لو حضرتك بطلت غياب انا كمان هابطل غياب
ربنا يكرمك يارب ويبارك لك فى ملك الجميله
اللهم امين يارب العالمين


*********************

بينو

لا ماينفعشى الغياب دة كله
تفتكر ينفع ندون من غير الباشمهندس بينو اللى بدا معانا التدوين
عايزين تبرير للغياب دة
علشان نشوف نلتمس العذر ولا لا
يارب يكون خير اللهم امين

MiraMar said...

السلام عليكم
بجد مدونتك جميله
والبوست رائع
ربنا بيطهرنا من الذنوب بالابتلاء
حتى الابتلاء له فيه حكمه
سبحان الله
ربنا يعافيها ويتولاها برحمته

الباحث عن الحقيقة said...

انا دخلت على اليوتوب واستمعت لكل الاجزاء
فعلا سبحان الله
اهم حاجه هى الايمان والثقة بالله "ولو اجتمعت الامة على ان يضروك بشئ ما ضروك بشئ إلا قد كتبه الله عليك" فعلا النافع والضار هو الله
وفى وقوف ربنا الى جانبها يحسسنا قد ايه احنا مقصرين فى حق ربنا ..كلنا ربنا بيحمينا بشكل او باخر ..لو تأملنا كويس على الاقل يكفى نعمة الصحة
انا مش عارف اعلق اول ايه بصراحة ..مفيش غير اشكرك يا رب لانك موجود معانا وبتحبنا

سها said...

الحمد لله
الحمد لله
الحمد لله
وبنا يشفي كل مريض
ويفك كرب كل مكروب يارب

سها said...

شرفتيني بزيارتك مدونتي الوليده
بس انا عايزة اعرف ايه هو اللي انت عارفة اللي انا باتمناه؟
ردي عليا قوام احسن الفضول هيقتلن

No Fear said...

السلام عليكم
أزيك أخبارك أية؟
يارب تكوني بخير دايما يارب
أنا أول أما قريت العنوان كنت ناوي اتكلم عن أني كنت بقول واثق بربنا بلساني بس و كنت هاحكي عن موقف أتعرضت له الفترة اللي فاتت بس وجدت مدي تفاهة الموضوع اللي كنت هتكلم فيه بالنسبة للنموذج اللي أنت أتكلمتي عنه
أحيكي علي كلامك الجميل و يارب يجعله منبه لكل واحد مشغول بحاله و مش رامي همومه علي ربنا بجد ربنا كريم قوي بس هوش مش عاوز مننا غير اننا نقول بقلبنا اللي بنقوله باللسان
معلش طولت عليكي بس بجد موضوع جميل قوي و كمان كنت حاسس به قوي اليومين دول
ربنا يشفي مرضي المسلمين
ربنا يفرج هموم جميع المسلمين يارب

رينـــــــــــا said...

رفقه بجد اولا والله وحشتينى جدا ووحشتنى كتاباتك
بجد بوست اكثر من رائع والدرس دا مهم جدااااااااااااااااااااااااا

لا تنظر لاحد على انه عاصى او انه دونك لانك لا تعلم عبادته السريه بينه وبين الله او قلبه ماذا يحمل من ايمان ويقين بالله

فى ناس كتييييييييير بتنصب نفسها الهه وتحاسب دا ودا وتقول على دا عاصى مكلموش ودا مبيعمل ذنب كذا هيدخل النار والممثل الفلانى كاااااااااافر ومش هيورد على جنه

سبحان الله العظيم وشيوخ كتير نتوقع لهم الجنه والله اعلم بهم وبنواياهم
فعلا حسابات الله وحده اعلم بيها

ربنا يغفر لها ويرحمها ويتوب على امه المسلمين ويهدينا اجمعين يارب
ويجعلنا من المتقين
جزاكى الله خيرا يا اجمل رفقه

امام الجيل said...

السلام عليكم
فعلا كتير اوى بنهول من امور صعبة ولما تعدى نقول ما ابسطها
لو كل واحد فى امور الدنيا بص للى اقل منه
هيستريح كتير اوى
بس المشكلة اننا بنبص للاعلى مننا
والمعافين
وكان في ناس بيبقوا معافين طول عمرهم
احنا بنبص بس لجانب السعادة فى حياتهم
وبنفتكر ان حياتهم كلها كده
سبحان الله

mazlomen said...

وأدعوكم للأشتراك في الأستطلاع على مدونتي
وجزاكم الله خير

رفقة عمر said...

ميرامار
اهلا بيكى المدونه تشرفت بوجودك
نسال الله العفو والعافيه فى الدنيا والاخره اللهم امين يارب العالمين

**********

الباحث عن الحقيقه
مبروك المدونه الجديدة جميله فعلا وفكرتها حلوة ربنا يوفقك يارب اللهم امين يارب لعالمين

**************
سها
ماتشغليش بالك
لما ربنا يحقق اللى بتتمنيه
هاقولك وقتها هو دة اللى ااقصده ولا لا
ربنا يجعل هذا العام مختلف عن كل الاعوام السابقه مع العافيه فى الدين والدنيا اللهم امين يارب العالمين

****************

no fear

الف مبروك قبول التمهيدى ربنا قال انا عند ظن عبدى بى فليظن بى ما يشاء
ولازم نعرف ان كل شئ من عند الله هو خيرا لنا حتى ولو كان فى نظرنا شر
ربنا يوفقك كمان وكمان اللهم امين يارب العالمين

**************

رينا

ازيك عامله ايه يارب يكون كل شئ تماما
وحشتينا بجد
شوفى رينا انا معاكى اننا مش نحكم على حد من الظاهر بس برضه دة مش يمنع اننا نبغض معصيته لله اذا كان عاصى ومجاهر بمعصيته ومصر عليه وطبعا لو نقدر ننصحه يكون احسن
ويبقى كدة مش اذناه وكمان نرضى ربنا ببغض افعال من يعصى الله
فاهمانى رينا
يعنى نحسن الظن به انه مسلم وانه ممكن يعود فى اى وقت ويتوب لكن فى نفس الوقت نظهر له عدم رضانا عن افعاله
حتى يعرف انه مخطأ لان فيه ناس بتخطأ ومش بتعرف انها بتخطأ فلازم ننبهم لكدة يمكن نكون سبب فى هدايتهم ويكون فى ميزان حسانتك فى الاخر
هدانا الله جميعا لما يحب ويرضاه
ونساله حسن الخاتمه اللهم امين يارب العالمين


***************

امام الجيل

اهلا بحضرتك سعيدة بوجود حضرتك
جزاك الله خيرا
وطبعا متفقه مع كلام حضرتك جدا لان ياريت ننظر للمحرومين من اشياء نحن منعمون بها يمكن نشعر بالرضا وقتها
بجد مرور حضرتك اسعدنى

******************
ماظلمون
ان شاء الله هاروح واشوف الاستطلاع

ma_3alina said...

بجد بجد بجد
أنا مش عارف أنتي عرفتي ازاي ؟؟
:D