Tuesday, August 05, 2008

اسرارى



فيه تاج بيلاحقنى بشكل غريب كل شويه اكون مش عاوزة اجاوبه الاقى احد من المدونين باعته ليا حسيت انه قدرى ولازم ااقبله

اسمه تاج الاسرار

اول حاجه اذكر من بعت ليا تاج من استاذ هشام صادق ومن العزيزيتين على قلبى لعلها خير وسالى ومن مدونه انا وصاحبى


شوفتوا ازاى التاج دة قدرى


اذكر قوانين الواجب او التاج انى اجاوبه وبعدين ابعته صح الاجابه ولا غلط اصل السؤال غريب شويه


اذكر 6 اسرار لا يكتشفها اول من يراك اول مرة
انا طبيعتى شخصيه اساسا مش عندى اسرار مش باعرف اخبى اى شئ يخصنى وكمان مش باعرف اخبى مشاعرى
بس ممكن احاول افتكر حاجات مش اسرار بس هى مجرد امور تخفى عن ناس غير مقربين ليا
اولا : سنى مستحيل حد يقدر يعطنى سنى اول مرة يشوفنى دايما يعتقد كل من يرانى انى لسه طالبه بثانوى بالكتير جامعه مع انى خلصت جامعه من زماااااااااااااان والسؤال اللى دايما اتساله انتى فى سنه كام
ثانيا: ممكن اللى يشوفنى اول مرة يعتقد انى قليله الكلام لان مش باخد على الناس بسرعه بس اول ما اطمن لهم يكتشفوا انى رغاااايه جدا
يمكن انا طول عمرى مش باسعى للتعرف على الاخرين لانى خجوله فى الامر دة ودايما الاخرين هما اللى يبتدوا بالتعرف على بس اول ما اشعر انهم يستحقوا ثقتى باحبهم جدا وبعد كدة انا اللى اسال عليهم دايما اكتر ما هما يسالوا عنى

ثالثا: انا من النوع اللى مش باحب ااذى حد او اشوف حد بيتالم ولا باحب اهانه اى حد سواء ااقل منى او افضل منى لان بيصعب عليا
الناس جدا بس طبعا فيه ناس ممكن تاذينى وتجرحنى وانا مش بارد اذاهم انى ااذيهم ممكن اعاتبهم بس فطبعا اللى مش يعرف شخصيتى يعتقد انى ضعيفه لانى مش رديت الايذاء بنفس الطريقه او اخدت حقى لانى اخاف ان لواخدت حقى اخده باكتر مما يستحق فاكون كدة ظلمت بدل ما كنت مظلومه وضميرى يانبنى بعد كدة يعنى دة مش ضعف ولا قله حيله كل انسان جواه طاقات من الخير وطاقات من الشر قال تعالى ( ونفس وما سواها فالهمها فجورها وتقواها) وكل واحد بينمى الجانب الذى يريد ان يعيش به فى الدنيا انا مش باحاول انمى جانب الشر لان الشئ الغير مستعمل بيضمر ويصغر حتى يتلاشى
الله تعالى قال ( وجزاؤاسيئه سيئه مثلها فمن عفا واصلح فاجره على الله انه لايحب الظالمين) سمعت الشيخ الشعراوى يفسر هذه الايه ان الانسان الذى يجرحه شخص او يصيبه اصابه ما لو استطاع ان يصيبه نفس الاصابه دون زيادة او نقص فليفعل ولكن هذا لايمكن لانه اكيد ممكن تكون رد الاصابه اكثر فينقلب من مظلوم الى ظالم علشان كدة ربنا نهى الايه بانه لا يحب الظالمين بس دة مش يمنع انى عصبيه جدا بس عصبيتى بتظهر لما تهان كرامتى او انجرح جرح كبير من حد قريب منى او اى حد لم اتوقع منه الايذاء وعصبيتى لاتتعدى البكاء بهستيريه
ولو حسيت انى اذيت حد بدون قصد او غلطت من غير ما اخد بالى فى حد لازم اعتذر فورا على فكرة انا مش مثاليه ولا حاجه بس يكفينى ذنوب نفسى ليه اتحمل ذنوب ايذاء الاخرين انا باخاف من ربنا جدا وبخاف من عقابه انا باحمى نفسى من نار وقودها الناس والحجاره ماذا يفيدنى لما ياتى احد يوم القيامه وياخذ من حسناتى او اتعاقب بسببه احب اكون مظلومه حتى يكون الله فى جوارى ومعينى
رابعا : انا طبيعتى ليست تواقه بمعنى ان عمرى ما يكون فى نفسى حاجه واكون هاموت انى لازم احصل عليها زى ناس كتير بالعكس لو معايا امكانيه انى اشترى باشترى لو مش معايا مش باشتهى اى حاجه يمكن انا احب الحنان والمشاعر الانسانيه ويسعدنى كلمه حلوه او المعامله الطيبه من الاخرين اكتر من اى حاجه فى الدنيا
خامسا: باحترم الناس كلها ومش باكرهه اى حد وباحب اسال عنهم لو غابوا او حسيت ان عندهم مشكله بازعل علشانهم جدا ويمكن كمان اكتئب بسببهم ويمكن دة انتقل معايا لما دخلت التدوين بازعل قوى لو حد غاب او حد حزين ولازم اسال عنهم باكون نفسى اساعدهم باى حاجه لانى باحب مساعده الاخرين جدا وباحس باستمتاع غير عادى لما اساعد حد او اى حد يطلب منى اى شئ وااقدر اعمله ليه
واحيانا بافضل قضاء حوائج الاخرين على حوائج نفسى لدرجه انهم اعتبروا دة حق مكتسب ليهم وانى ملكيه خاصه ليهم وكمان باحب الاشياء جدا حتى الكمبيوتر بتاعى مغلبنى جدا بس عمرى ما شتمته او اتعصبت عليه واحيانا باعتذرله لوشغلته كتيرعلى فكرة الجماد كمان بيحس بدليل جزع الشجرة اللى كان الرسول بيخطب عليه لما الصحابه صنعوا منبر للرسول صلى الله عليه وسلم حزن الجزع وسمعوا ليه انين بكاء لترك الرسول له ولم يهدا الا لما ذهب اليه الرسول وقال له ستكون رفيقى فى الجنه


سادسا: عندى الحاسه السادسه عاليه جداا باحس باى شئ ممكن يحصل قبل حدوثه لدرجه ان فيه موقف اخير حدث لى جاءانى احساس انه سوف يحدث حاولت انى لا استمع لهذا الاحساس ولا اهتم به وكنت اتصرف تصرفات غير طبيعيه وعكس طبيعتى خوفا من تحقيق مااخشاه ولكنه وقع كما احسسته تمام لا يمنع حذر من قدر وهكذا طوال سنين عمرى احيانا بتكون مؤلمه عندما تتوقع شئ غير محبب للنفس

امرر التاج دة او الواجب ل6 اشخاص

لاستاذتى مجداويه

واموله

ومؤمنه

وامانى بنت الجنوب

وعاشقه الفردوس

ومنى احاسيس


31 comments:

Unknown said...

جميل أوى أن طبعك مش طواقة للأشياء وصدق عمر بن الخطاب عندما قال أكلما اشتهيت اشتريت

بارك الله لك

مشروع انسان said...

مش عارف ايه التاجات
اللى بتبنسط بالاسرار دى
:)

ما شاء الله اجابات رائعة

زادك الله حرصا على حسن معاملة من حولك
وان تعامليهم بالحسنى حتى لو عاملوك بدون ذلك

كنت لسه بتكلم فى الموضوع ده مع واحد
وبتكلم فيه كتير
ازاى نعمل توازن بين اننا نعفو ونعامل الناس بالحسنى واننا منظرهش اننا ضعاف او منقدرش ناخد حقنا

لازم يكون فيه توازن اوى
لان للاسف الناس مبقتش ترحم

ومهمة اوى الحاسة السادسة دى ليها فوائدها مع انها بتبعث القلق فى بعض الاحيان
بس ممكن عشان الواحد يكون مستعد

اكرمك الله

Anonymous said...

هي فعلاً أشياء صعب الواحد يتنبأ بيها في اللي قصاده بس بتظهر شخصية متميزة ..

بس أنا أحياناً باكره ناس من البداية .. معرفش ليه بس بيكون إحساس من جوايا إنهم أشخاص مش كويسين و في الغالب بتكون دي الحقيقة ..

Hisham Sadek

د/اجدع بنوته said...

ماشاء الله

مفرقتيش كتير عن مكنت متخيلاكى يعنى

تاج لطيف

لانه طلع منك حجات كتير

تحياتى ويارب تكونى بخير

مـحـمـد مـفـيـد said...

من السطور والكتابات تقدري ترسمي ملامح كل شخص او جزء منه
لكن بجد والله لم تختلفي كثيرا عما تم رسمه

الزواج.....روضة الحب said...

تخيلي والله حسيت انك بتتكلمي عني ،دىصفات كلها جميلة ماعدا شوية حاجات كدة صغيرة،يعني مثلا نفسي طواقة حبتين ،ربنا يباركلك ويكرمك
ويرزقك البشري بجوار المصطفي في الجنة
عارفة مجرد دخولي مدونتك بيخليني أحس بهدوء غريب

حائر في دنيا الله said...

الأسرار لم تبعد كثيرا عما رسمته الحروف على المدونة منذ بدأتي
فالشخص لا يتجزأ إلا إذا كان منافق وقانا الله من شر تلك الخصلة

ولكن السر الجديد الحاسة السادسة دي

لك تحياتي
السلام عليكم

مؤمنه said...

السلام عليكم ورحمة الله وبركاته
على فكره انا كنت متخيلاكى كده زى ما انتى اكلمتى على نفسك
كنت متخيلاكى فعلا سنك صغير
وكنت متخيلاكى خجوله وقليلة الكلام لانك ما عندكيش الجرأه للتعرف على الاخرين
وكنت متخيلاكى عاطفيه وتحبى الكلام الجيل والكلمه عندك بتفرق
متخيلاكى حساسه وبتحبى الناس وما تحبيش تاذى حد
متخيلاى جميله وهاديه وطيبه وقريبه من ربنا اوى ودايما الناس القريبه من ربنا بتقى الحاسه السادسه عندهم عاليه
يعنى ما كنتش اسرارعليه ولا حاجه
الحمد لله حاسه انى اعرفك من زمان

بس ما شاء الله عليكى اولا ما شاء الله ربنا يزيدككمان وكمان ويثبتك اهم شئ
ثانيا بتعرفى تكلمى على نفسك كويس انا ما اعرفش اعمل كده خالص
واديكى دبستينى فيه
اوعدك لو قدرت اكلم عن نفسى هكلم ولو ما نزلش البوست قريب ممكن ينزل بعدين
دومتى بكل خير
والسلام عليكم ورحمة الله وبركاته

ammola said...

سبحان الله يا رفقة
علشان انتى صادقة مع نفسك اوى
البلوج بتاعك مراية صادقة لشخصيتك
بدليل ان معظم اللى علقوا-وانا منهم-قالوا ان اجاباتك ماخرجتش عن الصورة اللى رسمناهالك
بس مادام مش بتعرفى تخبى اسرارك..ايه رايك فى اتنين نسكافيه ونقعد مع بعض شوية؟
:)
موضوع الحاسة السادسة دايما بيكون موجود عند الناس الحالمة الحساسة.. وغالبا بيعيشوا فى مشاكل بسببه
على فكرة
انا جيت من السفر امبارح متأخر لقيتلك تعليق عندى انتى وأمانى روضة الحب..صحيت من النوم لقيتهم طاااروا ووالله مااعرف طاروا فين او ازاى..يمكن بلوجر طمعوا فيهم؟
حاجة غريبة على واحدة زيى مش بتفهم اوى فى موضوع التكنولوجيا

Anonymous said...

طبعا مش هازيد على كلام اللى علقوا قبلى
بس سبحان الله لو الناس كلها تبقى زيك ومتحبش تاذى غيرها اظن هانعيش وقتها فى المدينه الفاضله او فى الجنه
لكن للاسف فيه ناس بتستمتع باياذاء غيرهم والشر بداخلهم مستحكم
يعنى غلبوا الشيطان نفسه فى الشر
عفانا الله منهم
ربنا يزيدك سماحه ورضا
وياريت الناس تتعلم منك

عاشــــــ النقاب ـقــــة"نونو" said...

السلام عليكم
اسرارك لم تعد اسرار
وأظننا قريبين لبعض في حاجات كتيرة
احبك في الله
كل عام وانتي بخير
تحياتي

موناليزا said...

بتوصفى نفسك ذى ما انا حساكى بالظبط
واضح اننا كمان عندى الحاسة السادسة ههههههه

(المهاجر الى الله) said...

ادعوكى لزيارة مدونتى التواضعة والاسهام بمشاركاتك وتعليقاتك
www.eyuon.blogspot.com
وشكرا

دعاء مواجهات said...

دى مش اول مرة ازورك فيها

بس اول مرة اكتشف جمال شخصيتك

بجد فيها مميزات كتير محدش بيقدر

يستحمل مجرد حصولها لية

كلامى مش معقد

تقدرى تقولى بتفلسف

هههههههههههههههه

بس انا بجد معجبة بشخصيتك جدا


اتمنى دوام التواصل

روح said...

سبحان الله فيكي حاجات قريبة مني اوىىىىىىىىىىىىىىىىىىىىىىىىىى
انا بستغرب بجد للي بيحصل
متوافقين في حاجات كتير
بحبك يارفقة

Anonymous said...

السلام عليكم ورحمة الله وبركاته

اختنا فى الله رقفه
اين انت يا اختاه وكيف احوالك
بقالك فتلاة مش بتسالى عنى ولا بتزورينى
لعل المانع خير يا اختاه
حضرت للاطمئنان عليك
ولاقول لاك كل عام وانت بالف خير وصحه بمناسبة شهر رمضان الكريم اعاده الله علينا جميعا الخير والطاعات

رينـــــــــــا said...

السلام عليكم
رفقه ازيك وحشتينى
انا مبسوطه اوى انى رجعت ولقيتك كتبتى
بفتقد كتاباتك يا قمر

بالنسبه للتاج سبحان الله يابنتى انا متخيلاكى كدا

ربنا يحميكى ويحفظك

bastokka طهقانة said...

ازيك اخبارك اية؟
متنسيش الايام البيض
تحياتي

حاجات جوايا said...

ما شاء الله .. الله أكبر
ايه الواجب ده ؟؟
ده واجب علينا نقف لك احتراما
بجد يا رفقة شخصية رائعة
وانا فعلا حساكى كده
عندك انسانية مفرطة
ربنا يزيدك ويكرمك يارب

حسيت انك بتتكلمى عنى فى النقطة دى بالذات :

انا طبيعتى ليست تواقه بمعنى ان عمرى ما يكون فى نفسى حاجه واكون هاموت انى لازم احصل عليها زى ناس كتير بالعكس لو معايا امكانيه انى اشترى باشترى لو مش معايا مش باشتهى اى حاجه يمكن انا احب الحنان والمشاعر الانسانيه ويسعدنى كلمه حلوه او المعامله الطيبه من الاخرين اكتر من اى حاجه فى الدنيا

توافقى معكى يسعدنى ويزيدنى شرفا


بارك الله فيكى أختى الحبيبة
وآسفه للتأخير


سالى

ساعد نسرين الايمن said...

؟؟؟؟؟؟؟؟؟؟؟؟؟؟؟؟

دكتور حر said...

جميله الاسرار دي

وأكاد أجزم أن أجمل ما فيها انك كشفتيها وكتبتيها لنفسك

.....
بس ملحوظة لأول تعليق
أظن ان تواقه مش معناها اللي قاله عن عمر اطلاقا

بنت الصالحين said...

عارفه يارفقتي

كل الناس عارفه انك كده
وكل اللي دخلو وقالو انتي زي ماتخيلناكي

بس تعرفي انهم ظلموكي

لانك بجد اجمل واطيب واحن من اللي كتبتيه


وانتي عارفه اني بحبك اد ايه
حتي من غير ماعرفك شخصيا

وبعد ماعرفتك

بدعي كل يوم ربنا

اني اشوفك في الحقيقه
ونبقي صحبه في الجنه باذن الله اخوات متحابات في الله


احبك في الله حبيبتي

رزقك الله القبول والاخلاص

ودمتي رفقتي حبيبتي

أميرة محمد محمد محمد said...

يا جامد يا بتاع الحاسه السادسه انت
هنخاف منك بعد كده
ههههههههه
عامله ايه يا جميل وحشاني جدا
طمنينا عليكي
سلام

أمــانــى said...

رفقتى الحبيبة
لا اجد اروع ولا اجمل منك رفقتى كما تخيلتك فى الاول والحمدلله وجدتك هكذا واجمل من توقعاتى
ادعو الله لكى اختى الحبيبة ربنا يكرمك ويرزقك ويريح بالك ياااارب آمــــــين

منى said...

اول مره الاقينى مضطره اعلق بكلام غيرى قاله
لان فعلا اسرارك مش اسرار
كلنا حاسينك كده صحيح فرقت معهايه فى وصف شكلك
لكن الروح باينه اوى ومحسوسه اوى
اد ايه اناسعيده بمعرفتك
ومتشوقه لمقابلتك
تحياتى وحبى

منى said...

اه نسيت اقولك مرسيي لاهدائك
وان شاء الله هجاوبه بسرعه

منى said...

اه نسيت اقولك مرسيي لاهدائك
وان شاء الله هجاوبه بسرعه

مدحت محمد said...

جميل اجابتك على التاج ربنا يحفظك ويثبتك على طاعته دايما

رفقة عمر said...

egyboy

اهلا بحضرتك
اسعدنى مرورك الكريم


****************

استاذ امام الجيل

اهلا بحضرتك
هو فعلا لازم التسامح وان نعفو عن من ظلمنا ولكن لا نكون نحن ظالمينا اذا ارادنا ان نرد حقوقنا
انظر الى من يكون بينهم منازعات قضائيه تجد محامى كل شخص منهم بيحاول بشتى ياذى الطرف الاخر وكلا منهما لايعلمون انهم يظلمون بعضهم بعض ولا يعلمون ان الظلم ظلمات يوم القيامه
الرسول قال العفو عند المقدرة يعنى لازم يكون العفو من مصدر قوة مش من مصدر ضعف
بدليل عفو الرسول صلى الله عليه وسلم عن كفار مكه مع كل ما لاقاه منهم من
اهانه وتعذيب

وبخصوص الحاسه السادسه عندما تشعر بخطر او حزن قادم بتكون احساس قاسى جدا لانك تعيش الامر قبل وقوعه وبعد وقوعه
ولقد حدث لى ذلك كثيرا وخصوصا قبل وفاه والدى رحمه الله عليه ظللت احلم بوفاته لمدة ارربعين يوما قبل وفاته
رحمه الله رحمه واسعه
الحمد لله على كل حال

اسعدنى مرور حضرتك الكريم
جزاك الله خيرا


******************

استاذ هشام صادق

اهلا بحضرتك

على فكرة دة احساس عادى ممكن تكره انسان اول ما تشوفه وممنك ترتاح لانسان اول ما تشوفه
الارواح جنودا مجنده بس مش معنى اننا نكره انسان اننا لا نحترمه لا نسال عنه اذا مرض او اذا غاب او نقف معه فى ازماته
اتذكر موقف الرسول صلى الله عليه وسلم من اليهودى الذى كان يرمى بالقذورات امام بيت الرسول صلى الله عليه وسلم
عندما مرض افتقده الرسول وقام بزيارته

شكرا على التاج وشكرا على مرورك الكريم
جزاك الله خيرا


******************

د/ اجدع بنوته

اهلا بيكى دايما بيسعدنى مرورك جدا اتمنى ان ارى مواضيع جديدة ليكى
ربنا يكرمك يارب
وجزاكى الله كل خيرا



*******************

استاذ محمد مفيد

اهلا بحضرتك
اتمنى ان اكون كما تظنون وان يغفر لى مالا تعلمون
جزاك الله خيرا


****************

الزواج روضه الحب

اهلا بالزوجه المحبه الجميله
بتسعدنى مدونتك جدا ربنا يقدر لك كل خير اللهم امين
ولكم اسعدنى اننا متشابهتنا هذا شرف لى
لقد كانت نفسى تواقه ولكن كنت دائما اصاب بالاكتئاب بعد ان احصل على ما اريد وابكى وازهد فيه فعودت نفسى الا اتمنى شئ ليس بامكانى ان احصل عليه وان ارض بما معى واسعد به
الحمد لله على كل حال

اسعدنى مرورك جدا


*****************

حائر فى دنيا الله

اهلا بحضرتك
واشكر مرورك الكريم
اعتقد ان اقصر الطرق ان يكون الانسان نفسه حتى يقبله الناس على حاله
لا يتظاهر ولا يدعى ماليس فيه لان الطبع يغلب التتطبع
فيفقد من حوله عند ظهور شخصيته الحقيقه
وقانا الله من النفاق ونسال الله الاخلاص فى القول والعمل
جزاك الله خير



*********************

مؤمنه الرقيقه

اهلا بيكى انا قلقانه عليكى انتى فين ومدونتك حصل ليها ايه ارجوكى طمنينى
اشكرك على كلامك الجميل فى حقى الذى لا استحقه لو تعلمين عن نفسى ما اعلم ولكنه ستر الله وعفوه

اتمنى اراكى بخير
ربنا يكرمك ويقدر لك الخير وييسر لك كل امورك اللهم امين يارب العالمين


*********************

اموله الرائعه

انتى فين اتمنى تكونى بخير
بجد كلامكم بيحرجنى كتير واتمنى اكون عند حسن ظنكم
اللهم لا تؤاخذنى بما يقولون واغفر لى مالايعلمون
انتى الاجمل اموله ربنا يبارك فيكى ويزيدك من فضله ويريح بالك اللهم امين يارب العالمين


**********************


استاذ احمد

اهلا بحضرتك

اكيد سبب كل مصائب الدنيا الظلم بدليل الحروب واسلحه الدمار
ربنا يرحمنا من عنده
جزاك الله خيرا


*******************

عاشقه النقاب

اهلا بحضرتك
دة شئ يسعدنى اننا نكون متشابهتان
الحمدلله
احبك من احببتنى فيه
جزاكى الله كل خير
اللهم امين يارب العالمين


*********************

موناليزا

اهلا بيكى بيسعدنى مرورك جدا
جزاكى الله كل خير
ويقدر لك كل خير اللهم امين يارب العالمين


******************

المهاجر الى الله

اهلا بحضرتك
مبروك المدونه الجديدة
ربنا ييسر لك الخير


********************

رفقة عمر said...

دعاء مواجهات

ان الاسعد بوجودك وبمعرفتك ويسعدنى تواصلك معى
الحمدلله الذى بفضله تتم الصالحات
عندما تعلمين ان اى نعمه نحن فيها فهى من الله وهو قادر ان يعطيها وقادر ايضا ان يؤخذها فلن يغتر احد ولن يتعالى على احد
لان
اله قال ومابكم من نعمه فمن الله
كم من احب نعمه اغتر بنعم ربنا عليه وزالت عنه
كما حدث لقارون ذهب هو ماله وخسف الله بهم الارض
نسال الله الاخلاص والقبول اللهم امين يارب العالمين
شرفنى مرورك جدا
جزاكى الله خيرا


*****************

روحى

ازيك حبيبتى
اخبارك ايه يارب تكونى بخير
انا سعيده اننا اشبه انسانه جميله زيك دة شرف ليا كبير
اسال الله ان يجمعنا على محبته ويديم المحبه بنا
حتى ننال ان نستظل بظله يوم لا ظل الا ظله
ربنا يكرمك اللهم امين ويزيدك من فضله


******************

اختى الفاضله ام الابناء

اهلا بحضرتك انا بخير الحمدلله
جزاكى الله خيرا على سؤالك وعلى قلبك الجميل
ربنا يبارك لحضرتك
وكل سنه وحضرتك بالف خير وسعادة ورضا اللهم امين


*******************

رينا الجميله

وعليكم السلام ورحمه الله وبركاته
انا وحشانى اكتر يارب تكونى بخير وكل شئ تمام ربنا ييسر لك كل خير
شكرا على كلامك الجميل
جزاكى الله كل خير


********************

استاذه طهقانه

اهلا بحضرتك بيشرفنى جدا مرور حضرتك وزياره حضرتك مدونتى المتواضعه
انا الحمدلله بخير
وشكرا لحضرتك على التذكرة بفضل الله ربنا من عليا بالصيام الحمدلله
جزاك الله كل خير


*******************

سالى الحبيبه الى قلبى

سبحان الله الارواح جنودا مجنده وبجد اسعدنى جدا اننى اشبهك
احبك فى الله وبجد التدوين كان سبب لمعرفتى ناس جميله مثلك
كنت عمرى ما هاتعرف عليهم فى الحقيقه
الحمدلله رب العالمين

جزاك الله خيرا لتمرير التاج ليا
ادام الله الود بيننا اللهم امين

******************


ساعد نسرين الايمن

اهلا بحضرتك

؟؟؟؟؟؟؟؟؟؟؟؟؟

رفقة عمر said...

دكتور حر

اهلا بحضرتك
فعلا احيانا الواحد منا بيكون عاوز يفضفض يتكلم
انا هربت كتير من التاج دة بس هو كان مصر عليا بشكل غريب
الحمدلله قدر الله وماشاء فعل


************************

عاشقه الفردوس حبيبتى ومعلمتى

ازيك حبيبتى شكرا على كلامك الجميل بتحبى دايما ترفعى من روحى المعنويه
جزاكى الله خيرا
يكفى انكى تحاولى معى لاكمل حفظ القراءن وهذا جميل لن انساه لكى ابدا ربنا يكرمك يارب ويفرج كربك وييسر لك كل امورك اللهم امين يارب العالمين


******************

اميره محمد

ازيك اميره عامله ايه يارب تكونى بخير
انا بخير الحمدلله
كل سنه وانت طيبه


*****************


امانى الطيبه

انت الاجمل امانى بجد ربنا اكرمنى بيكى صديقه واخت
ربما اخا لم تلده امك
وانتى نعم الاخت
جزاكى الله عنى خير الجزاء
ربنا يباركلى فيكى ويخليكى ليا يارب العالمين


******************


منى

انتى الاجمل منى وانا كمان متشوقه لرؤيتك واكيد اللقى نصيب
ربنا يكتبه لينا ان شاء الله
جزاكى الله خيرا


****************


استاذ مدحت محمد

اهلا بحضرتك
جزاك الله خيرا
وشكرا على مرورك الكريم