Wednesday, October 22, 2008

ذكريات


مين فينا مش بيحن للطفوله وبرائتها وكان كل همنا اللعب وبس سبحان الله ربنا قال عن الدنيا
اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ وَفِي الْآخِرَةِ عَذَابٌ شَدِيدٌ وَمَغْفِرَةٌ مِنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ (20)صدق الله العظيم

الشيخ الشعراوى قال ان ربنا ذكر اللعب الاول لان فى الطفوله بيكون كل همنا اللعب ثم ذكر اللهو لان دى مرحله المراهقه والشباب بيكون لهو وبعد كدة الانشغال بكثره المال الاولاد

بصراحه انا باحب طفولتى جدا لانى بفضل الله عيشت طفوله اعتقد انها سعيده جدا وكلها ذكريات جميله وسعيده قووووى وعاوزة اشارككم ذكرياتى دى على فكره انا فكرها كلها تقريبا ولما احب انى افرح نفسى اافتكرها واشعر نفس الشعور اللى كنت باحسه وقتها يمكن علشان هى من اجمل فترات حياتى مش قادره اتعايش غير باحاسيسها



انا لحقت كتاب اللغه العربيه قبل ما يتغير كنت بحب امل وعمر جدا كانوا مهذبين قوى وبصراحه كنت باتعلم منهم حد فاكرهم







ماجد لعبه خشبيه موهبه ربانيه هو المفروض انه بنوكيو بس الترجمه العربى كان اسمه مااجد من الكارتون اللى كنت بانتظره كان بيجى الساعه 4 العصر كل يوم





النحله او الدبور تعبت كتير لغاياه ما اتعلمتها ودلوقتى باعلم ولاد اخواتى ازاى يلعبوها







كان برنامج العلم والايمان من البرامج المحببه للاسره كان بيجى الاربعاء وكانت الاسره بتنتظره كنت باخاف من موسيقى المقدمه والنهايه وكمان منظر النار كان بيخوفنى وبترعب منه بس كنت باحب مصطفى محمود جدا





البلى كنت احتفظ بيه بس لغايه دلوقتى مش عارفه بيتلعب ازاى بس شكله كان بيعجبنى جدا





مين فينا مش بيحب توم وجيرى



النحله زينه الجميله واخوها نحول برضه كانت بتيجى كل يوم الساعه اربعه لانهم كانوا بيعرضوا مسلسل كارتون فى الفتره دى





الطياره الورق كانت بتظهر فى الصيف والاجازة وكانت لما تتطير بعيد فى الهوا كانت دايما تكون اقوى منى





مجله سمير من المجلات اللى كنت باحبها ومره راسلت المجله وردوا عليا وكنت فرحانه جدا








ميكى جيب وسوبر ميكى كانت عندى منه اعداد مهوله لدرجه انى اصبحت القب باسم ميكى ماوس بين الاسره وبين صحباتى وكانوا بيستعيروا منى اعداد كتير وفى الاخر انسى انا اديتها لمين





فطوطه من الشخصيات اللى ارتبطت بيها جدا وانا صغيره لدرجه انى مش عرفت انه سمير غانم غير لما كبرت





اغنيه طيرى طيرى ياعصفورة كانت البنت رقيقه قوى وجميله







السلم والثغبان لعبه كنت باعشقها بس كان بيجيلى احباط لما اوصل لراس الثعبان الكبير وارجع تانى لنقطه البدايه









فيه حد يقدرينسى الليله الكبيره




بوجى وطمطم







ماجد من اعز المجلات الى قلبى حبيت يوم الاربع بسببها كنت باستنى بابا رحمه الله وهو راجع من الشغل وافضل ابص على ايده ادور عليها وكان بيحب يتعب اعصابى الاول بجد كنت بافرح بيها قوى جبتها قريب لاقيت الاعداد الجديدة سخيفه مش زى زمان








فضولى ونظرته الخبيثه كنت باعمل فرح فى البيت لما اكتشف مكانه قبل اخواتى







كريميت فاكرينه نفسى اعرف ازاى خنزير يحب ضفدع ميس بيجى كانت بتحبه قوى






الارنب روبى كانت بيجى الساعه 8 بالليل فى حكايه قبل النوم بس طبعا كنت بنام واحده مش 8 دى خالص








سر شويبس اللى لغايه دلوقتى بادور عليه كان اعلان لذيذ قوى








بقلظ ودمه الخفيف كان دمه خفيف قوى كنت برضه باحسبه شخصيه حقيقيه كان بيجى مع ماما نجوى فى صباح الخير






دكتور حامد وعالم البحار








محمود الخطيب وحسن شحاته كان اى مباراه بين الاهلى والزمالك كان البيت بيكون على استعداد كامل وكان كل البيت زملكاوى وانا كنت باحب الاهلى علشان كنت باشجع الخطيب







ايام الطفوله كانت كلها جميله وكنت انا طفله شقيه بمعنى شقيه ودايما كنت صاحبه اصابات من كتر الشقاوة مش كان بيضايقنى فيها حاجه غير اللوز المزمنه اللى كنت احيانا بادخل المستشفى بسببها او لو غلطت بابا رحمه الله عليه كان بيحرمنى من اللعب مع بنات الجيران ويحرمنى من النادى بس كنت باتصرف كنت بالعب فى البيت واخترع العاب وكنت احب العب فوق الدولاب قوى الذكريات كتير محتاجه بوستات كتير ابله فضيله وحكاياتها المثيرة اغنيه نيللى كان فيه فراشه صغيره وشي كايو سواقنا مافيش زيه واغنيه وده مين الحاجه الحلوة دة جابهالنا لنيللى برضه وماما زمنها جايه بحبها قوى وكل اغانى عفاف راضى للاطفال واغانى محمد ثروت واوبريتات صفاء ابو السعود فى عيد الطفوله ومسرحيه مصنع الشيكولاته لابو بكر عزت والسندباد وياسمينا
كانت ايام جميله قوى
بافكر ان يكون البوست دة تاج اللى يحب يتكلم عن ذكرياته من المدونين ياريت يقبل التاج دة



36 comments:

(صندوق الدنيا) said...

أختي
وكأنك تصفين ما كنت أعيش فيه
نفس الذكريات
رغم انني اظنك اصغر مني عمرا
أليس كذلك

سلوى said...

رفقتي الطيبه

تصدقي
أول لما شفت تاصفحه من كتاب لأمل وعمر
حسيت غني في الفصل :)

والنحله زينه دي كانت إدمان عندي

ومصطفي محمود
للآن بحب كتاباته جدا

زكريات جميله
وموضع جميل
من إنسانه جميله

ربنا يسعدك دوما رفقتي

وفكرة التاج دي جميله جدا

Ma 3lina said...

ياااااااااه فكرتينى بايام زمان و زكريات طفولتى


بجد احلى فترة الانسان بيعيشها هيا طفولته

ايه صحيح سر شويبس ده مكنش على ايامى باين ؟

mohamed ghalia said...

جميل قوى إننا نتذكر أيام طفولتنا
والأجمل إننا نبتسم وإحنا بنفتكرها
تحياتى
دمتى بود

انا حره said...

هوا فى حاجات كتير انا اعرفها وبعشقها بس فى حاجات مكونتش متابعاها اوى

تسلم ايدك ياقمر فكرتينا ب احلى ايام

كنت بموت فى بقلظ وماما نجوى وبوجى طمطم ومازنجر واغانينا الحلوه

بس كله الا عالم البحار دا الراجل دا كان بيستفزنى اصلا

Maha said...

يااااه .. كأنك تشاركينني العديد من ذكريات طفولتي :)

جزاكم الله خيرا على التذكرة الطيبة

أول مرة أمر على مدونتك فتقبلي تحياتي :)

romansy said...

الله عليكى
مع كل صوره من دى مع كل كلمه كنت بسرح معاها وبرجع تانى لايام زمان
انا فعلا بحب المجلات سمير وماجد وكمان علاء الدين
وكمان حضرت ايام امل وعمر
وكمان كنت بحب ماذنجر والكابتن ماجد
رجعتينى كتتيررررررررر لورا
بجد ذكريات جميله

كـــيــــــــارا said...

يااااااااااااااه

نفس الذكريات

مش في حاجه احلي من الطفولهوايامها

بس في حاجات مش فاكرها



تحيياتي

رفقة عمر said...

د/ام البنين

اهلا بحضرتك باكون سعيده جدا بزياره حضرتك مدونتى بجد حضرتك من المدونات اللى باعتز بيهم جدا وباسعد بالقراءه لهم ربنا يبارك لحضرتك

انا يمكن مش صغيره قوى يعنى بس عايشه دايما بمشاعر الطفوله وكمان انا كنت اصغر اخواتى وكنت بشاركهم كل دة يمكن باحبها علشان كل اخواتى كانوا لسه معايا مش انشغلوا وكانوا لسه صغيرين وكنت انا دايما معاهم وااقلدهم
يعنى لحقت كل دة يمكن ظهر بعد كدة حاجات تانيه بس دة كان افضلهم الى قلبى

اتمنى حضرتك تشاركينا ذكرياتك اعتبريه تاج وبمرره لحضرتك

*********************

سلوى حبيبتى



منورانى دايما
هما ليه طلعوا امل وعمر معاش مع انهم كانوا لطاف قوى
سلوى ياريت اعرف ذكرياتك ممكن تقبلى التاج دة


***************

د/ماعلينا

اخبارك ايه مفتقدينك جدا سعيده جدا بزيارتك الغاليه
سر شويبس انا كمان نفسى اعرفه لسه بادور عليه لغايه دلوقتى
ممكن تكتبى لينا عن ذكرياتك انا باعتبر البوست دة تاج
ممكن تقبليه


******************

استاذ محمد غاليه

اهلا بحضرتك
لان ايام الطفوله فيه غيرنا متحمل مسئوليتنا لما كبرنا بيقنا احنا متحملين المسئوليه علشان كدة هى اجمل ايام فى حياه اى حد


****************

انا حره

اهلا بحضرتك سعدت بزيارتك
الحمدلله انكم بتشاركونى نفس الذكريات
دحامد كنت باحب فيه تواضعه كان متواضع قوى الله يرحمه
لو عندك ذكريات تانيه ايه رايك تششاركينا فيها وتقبلى منى التاج دة


**********************


مها

اهلا بيكى اكيد سعدت بزيارتك الاولى بس انا بازور مدونتك كتير ومتابعه تتدويناتك هى جميله فعلا بس يمكن مش باعلق بس دايما متابعاكى حتى قرات اخر حاجه رمضان مصر كان جميل قوى
لو تحبى تشاركينا ذكرياتك يبقى اسمحيلى امررلك التاج


******************

استاذ رومانسى

اهلا بحضرتك
الحمدلله ان قدرت افكركم بذكريات الطفوله
انا بمررالتاج دة لكل المدونين اللى يحب يسترجع ذكرياته

*****************


كيارا

اهلا بيكى اسعدتنى زيارتك جدا
ربنا يكرمك اللهم امين ويقدر لك كل خير ايه رايك تحكيلنا ذكرياتك

كـــيــــــــارا said...

انا تقريبا كاتبه حاجات من ذكرياتي في بوستات سابقه ليا لكن كفره انه تاج هيبقي مختلف

وان شاء الله استرجع زكرياتي

في التاج الجميل ده

الطائر الحزين said...

لو كان تاج
يبقى كل هذه الذكريات عشناها

هات الكرة
خذ الكرة
الكرة جرت

فى سرى(يادى النيلة))
دفعه واحدة

Anonymous said...

أولا تحياتى
ثانيا
بجد البوست ده أثر فيا كثيرا أنالما بسمع أغنية كانت بتتردد فى طفولتى أو بشوف مجلة كنت بأقرأها زمان زى ماجدأوبافتكر برنامج زى عالم البحار و لا حتى اخترنا لك بحس أنى أحيانا عايزة أبكى لأن دى فترة طفولتى اللى كنت نوعا ما محمية فيها من الدنيا الواسعة بكل مافيها...البوست ده خلانى للحظات أرجع تانى لنفس الإحساس و أشوف ومضات من
صور مختزنة فى ذاكرتى
أولا تحياتى
ثالثا و ده مهم جدا!! أنا اسمى لبنى باحثة فى مجال الإعلام أقوم بعمل دراسة عن المدونات المصريات من أجل الحصول على درجة الماجستير. و يسعدنى أن تكون مدونتك من ضمن المدونات التى يشملها البحث. . لذا أرجو أن ترسلى لى بريدك الالكترونى حتى اتمكن من إرسال الاستبان و طبيعة الدراسة إليك
رجاءا حاراالمشاركة ممتدةإلى27 أكتوبر
شكرا على البوست
وعلى تعاونك
lobnabona@yahoo.com

موناليزا said...

ياااه فكرتينى بحاجات جميلة(وجه مبتسم)
هو اه مش كل الحاجات دى شاركتنى طفولتى
بس غالبيتها
تسلمى ياقمر ومشكورة على رسم البسمة على وجهى
ربنا يسعدك

osama said...

ذكريات الطفولة تحرك فينا شجناً ودفئاً .. وتجعل اوتار القلب تهتز في حزن عذب ان صح التعبير,,,

جميلة هي ذكرياتك .. ولنا معها عوامل مشتركه ... لكن ذاك الخيط الذي يجمع ذكريات الناس جميعا.. امسكت به في براعة..
هو خيط الوجدان...


دمت بكل ود..
خالص تحياتي

حاجات جوايا said...

هههههههههههه
ايه العسل ده ما شاء الله
بجد فكرة هايلة يا قمر
ده انتى كنتى طفلة بقى وانا مش آخده بالى ههههههههه
تعرفى انا كنت فاكره انى معيشتش طفولتى خالص ومعرفتش استمتع بيها لان مامتى بتشتغل وكنت من صغرى نائب بابا وماما فى البيت .. بس لما شوفت ذكرياتك لقيت انى كنت عارفة الحاجات دى برضه بس مش كلها الحقيقة ههههههههه فيه حاجات معرفهاش زى النحلة والدبور والنحلة الزينة و فضولى ..


شكلك كده نسيتى اليس فى بلاد العجائب هههههههه وفوازير عمو فؤاد وجدو عبده ومازنجر وسلاحف النينجا هههههههه

ربنا يروق بالك يا جميل ضحكتينى وفرفشتينى ......... ووحشتييييييييييييييينى جدااااااااااااااااا

أجمل سلام وتحية

سالى

بنت الصالحين said...

تصدقي

كنت مخنوقه وفرحتيني

نستينا واقعنا ولو لفتره

اسعدك الله في الدارين رفقتي


علي فكره هجااااااوب ع التاج حاااااااااااااالا

ان شاء الله

:))))))))))))

مـحـمـد مـفـيـد said...

ياااااااااه
والله ضحكتيني علي الذكريات الجميله دي
بس انتي جبتي الصور الجميله دي منين
:))

الميكروباص said...

ولله كانت أحلى أيام
اللي أثر فيا أوي من الصور كلها صورة ماجد وتذكرت الأغنيه " أنا اسمي ماجد دائما متواجد، لعبه خشبيه، .....ومش فاكر باقي الاغنيه"

ياااااااااااااااااه

وبعد ما كنت بتفرج عليه كنت بنزل الشارع أفضل ألعب في كورة لغاية باليل

فكرتيني بالذي مضى ولن يعود

رفقة عمر said...

كيارا

وانا فى انتظار ذكرياتك


********************

استاذ الطائر الحزين

اهلا بحضرتك
اكيد لان تقريبا مشاعر الطفوله واحده مش بتتغير


**************

استاذة لبنى

ان شاء الله هاشارك مع حضرتك
ربنا يوفقك اللهم امين


**************

موناليزا

اهلا بيكى
مبسوطه انى اقدرت اخليك تبتسمى يارب دايما سعيده وفرحانه


************

استاذ اسامه

اهلا بحضرتك
فعلا الحزن بيجى لاننا نفسنا نرجع تانى للطفوله بس مش قادرين
الحمدلله على كل حال


***************

سالى

اخيرا ظهرتى اهلا بيكى منورانى دايما
اه تخيلى نسيت عمو فؤاد وجدو عبده مع انى كنت باحبهم جدا
الحمدلله انى لسه فاكره
اهو لحظات بتمر على الواحد يتمنى يرجع فيها صغير تانى


******************

عاشقه الفردوس

اخبارك ايه يارب تكونى بخير وفى احسن حال
الحمدلله انى خليتك تبتسمى ولو للحظات ربنا يديم عليك السعاده دنيا واخره اللهم امين
منتظره تجاوبى التاج


******************

استاذ محمد مفيد

اهلا بحضرتك
هى فعلا ذكريات جميله وبريئه كمان
الصور اكيد من النت النت وفر لنا حاجات كتير الحمدلله على هذه النعمه


*******************

استاذ لورانس العرب

اهلا بحضرتك

ايام الطفوله ايام لاتعوض لان مافيش فيها هموم ولا احزان ولا حقد ولا كذب ولا نفاق
برائه وراحه بال ففط

مؤمنه said...

السلام عليكم ورحمة الله وبركاته

ايام الطفوله انا لا اتذكر منها الا لعبى فى الشارع
كنت بالعب فى الشارع مع بنات الجيران كل الالعاب الى تتخيليها
وكانت فى ايام بتبسط فيها واخى لاء

وايام اولى ابتدائى وحركة التنقلات الى عملتها فى المعاهد الازهريه بين معهد ومعهد
كانت مرهقه بس حلوتها خوف اهلى عليه واحتوائهم ليه السنه دى
والسنه الى بعدها حولت تربيه وتعليم

والاجازه الاسبوعيه الى كنا بنقضيها فى البلد وسط الاهل والاقارب ونرجع البيت مهدودين من التعب


ياااااااه انا برده كنت بحب اقرا القصص برده واكترها ميكى كنا بنقسمها انا واختى اقرا جزء وايهلالها تقرا جزء وترجعهالى اقرا الباقى وهكذا

كنت بحب القصص الملونه اكتر زى علاء الدين
ماجد حلوه بس ما جبتش منها كتير كنت بقراها عند قرايبى

وبابا عملنا مجلد كبير فيه قصص ليه انا واحد ولاختى واحد عشان يحببنا فى القراءه

وكمان كنت بحب بوجى وطمطم اوى وكارتون تانى لو تعرفيه بتاع السلاحف وكنت بحب اوى كارتون الفواكه

كانت طفوله جميله

دومتى بكل خير
وما تتاخريش علينا تانى فى تنزيل البوست
والسلام عليكم ورحمة الله وبركاته

محمد عبد الرحمن said...

يا خبر ..... و يا خبررررررر

كأن فى الطفولة ميراثا مشتركا من السعادة
كل أو جل ما ذكرتيه أختى الفاضلة رفقة عرفته واستمتعت به
إلى اليوم أشاهد توم وجيرى حنينا إلى أيام الصبا
إلى اليوم حين أجد مجلة ماجد فى المكتبات أشعر بحرارة حنين جارف إلى أيام كنت أدخر لأشتريها
سلام على أيام الصبا واللعب
سلام على صباح الجمعة كنا نستيقظ قبل السابعة لنستمتع بالإفطار من يد الجدة ثم باللعب كلنا حتىصلاة الظهر
سلام على أيام لم تكن القلوب فيها تغيرت والنفوس فيها تأثرت
سلام على أيام الهموم الصغيرة يوم كانت الدمعة تتلوها الضحكة وأحيانا يجتمعان بلا تناقض

منى said...

امل وعمر
طبعا فاكرها
بس انتى اخترتى الصفحه اللى كانت معقدانى مكنتش بعرف اكتب بسبس كويس
هههههههههه
برضه كنت بخاف من موسيقى العلم والايمان وعالم البحار كمان كنت بجرى استخبى بعيد
كنت بحب الكرتون جدااا ولحد دلوقتى
ومن عشاق بوجى وطمطم
مجله ماجد دى عشت معاها سنين انتى مشفتنيش هناك ولا ايه كنت براسلها دايما وقبلها براعم الايمان وبعدها كتب الهلال وبرضه مان اسمى وصورى فيها دايما
ادينى حليت تاج الطفوله
بس المفاجاءه انك طفله شقيه
مكنتش متخيله كده خالص
ههههههه
ربنا يسعدك يا رفقه
ويسعد ايامك

مجداوية said...
This comment has been removed by the author.
مجداوية said...
This comment has been removed by the author.
البحث عن الذات said...

دي فعــلاً كلها كانت حياتنا الأعلامية في فترة الثمانينات
لان التلفزيون المصري كان محدود والحمد لله ومكانش مفتوح ع البحري زاي دلوأتي

فعلاً كل ده بيفكرنا بأيمنا زمان

yoyo said...

ياااااااه بجد مع كل كلمة من كلماتك وكل صورة من الصور رجعتنى لاحلى ايام عمرى بجد أيام مجلات ميكى وماجد وسمير و توم جيرى اللى مش فى حد مش بيحبه حتى الان والله مهما كبرنا بيفضل جوانا الطفل الجميل الشقى
كنت متابعة جيدة لمصطفى محمود وعالم البحار كان التليفزيون بيجيب لهم حلقات بجد كنت بموت فيها وكانت فيها معلومات حلوة اوى

الذكريات الجميلة صعب انها تنتسى من جوانا لانها اصبحت جزء منا ومن شخصيتنا

بجد بوست جميل اوى احى بداخلى لحظات جميلة
تحياتى
يويو

أسما عواد said...

معقول
لقيت حد زيي بيحب الحاجات اللي بحبها كلها
ما عدا شيئ واحد فقط هو امل وعمر لأني مدرستش في مصر
بوست جميل جدا ويسعدني ان اقبل التاج منك
شكرا لك

رفقة عمر said...

مؤمنه

اهلا بيكى
ذكرياتك جميله وشكرا انك شاركتينى معاكى ذكرياتك
يارب تكون كل ايامك سعاده وسرور


*****************


د/طال الليل

اهلا بحضرت

سلام على صباح الجمعة كنا نستيقظ قبل السابعة لنستمتع بالإفطار من يد الجدة ثم باللعب كلنا حتىصلاة الظهر
سلام على أيام لم تكن القلوب فيها تغيرت والنفوس فيها تأثرت
سلام على أيام الهموم الصغيرة يوم كانت الدمعة تتلوها الضحكة وأحيانا يجتمعان بلا تناقض

اثرت فيا كلماتك هذه جدا وليس لدى تعليق
جزاك الله خيرا


*****************

العزيزة منى

اخبارك ايه يارب تكونى بخير
ربنا يسعدك انتى كمان ويحقق لك كل امالك اللهم امين


******************


البحث عن الذات

اهلا بحضرتك
اسعدنى مرورك الكريم
جزاك الله خيرا

**************


يويو

اهلا بيكى
مبسوطه ان البوست عجبك
ربنا يزيدك سعاده ورضا اللهم امين


****************

اسما عواد

اهلا بيكى
وانا يسعدنى اشوف اجاباتك

أمة الله said...

بصراحة انتى سعتينى بهذا البوست جدا بس انا مش فاكرة من ايام الطفولة الا قبسات بسيطةفمش عايزاكى تزعلى بما ان انت بتحبى طفولتك بالشكل ده ,و فى حاجة مشتركة بيني و بينيك انى كنت بحب مجلة ماجد قوى و جت لى فترة كنت مجمعة اعداد كتير منها و فعلا فضولى كنت انا و اخواتى بندور عليه . بس فعلا شكرا على البوست ده لان الواحد فعلا حس انه استعاد طفولته.

ريمان said...

يااااااااااااااه

بجد كانت والله ذكريات جميله اوى

وكنت بحب بوجى وطمطم اوى

بس انتى عارفه انا كنت بخاف اتفرج على الليله الكبيره

ولحد الوقتى لو جت فى التلفزيون

بترعب جدا منها

مش عارفه ليه بتخوفنى

ههههههههه

بوست جميل والله

ونفسى بجد ارجع زى زمان وانا صغيره

مجداوية said...

السلام عليكم

طيب من أول السطر

ازيك يا رفقة العمر الجميلة
يارب دايما بخير
انتى عايزة تدوينة مش تعليق عشان نقولك ذكريات الطفولة
لكن أكيد حيجى وقت لها ونحكى
أنا لما بأقعد أحكى لنسمة بتتقلب على ضهرها من الضحك
طفولة عاهات كلها
تليفزيون عاهات
ألعاب عاهات
بس مكنش قدامنا غير كده
والمضطر يركب الصعب
وبنشربه زى ملوخية شيرين فى مسرحية المتزوجون عارفاها ولا مرحلة التليفزيون كانت متوقفة على الطفولة ؟
المهم طمنينى عليكى ودايما انت ابنتى الغالية

أحمد سعيد بسيوني said...

بسم الله

يااااااااااااااااااه

فكرتينا بالايام الجميلة
ربنا يجازيك الخير

فكرتني بمراسلتي لمجلة ماجد لمدة 5 سنوات فترة الاعدادي وبداية الثانوي
وكان معايا كارنيه المجلة
وكتبت فيها اكتر من موضوع واتنشر ليا فيها اكتر من حوار

دامت ايامك بالسعادة والافراح عامرة

saheda.com said...

جزاكم الله خيرا
لقد ذكرتينى باجمل الايام
فى كل ذاكره كانت تجى البسمه
موضوع رائع

DR.HAMAS said...

بصراحة بوست أكتر من رائع

ظريف جدا جدا

ذكريات جميلة بجد

افتكرت حاجات كنت نسيتها خالص




جزاكم الله خيرا


د.حماس


على فكرة حضرتك مش سايبة لنا حق التعليق على البوست الجديد بتاع والدك


!!!!!!!!

كـــيــــــــارا said...

ربنا يرحمه يارب

وانا بقراه افتكرت جدي وخلتيني انهرت وبكيت

مؤمنه said...

السلام عليكم ورحمة الله وبركاته

حبيبتى فى الله اعلم انكى لم تكتبى البوست
لتقرئى تعليقات احد
ولكنى لا استطيع ان أن أكتم بداخلى هذه الكلمات دون ان انقلها لكى
فلكم احتوتنا كلماتك من قبل ولا زالت تحتوينا

حبيبتى فى الله رحم الله والدك وادخله الفردوس الاعلى من الجنه مع النبيين والصديقين والشهداء وحسن اولئك رفيقا
الحمد لله ان انعم عليه بابنه صالحه مثلك تدعو له وتشد من ازره
هذه رحمه من الله ولتكونى على يقين من رحمة الله به وبقبوله له انه انبت فيكم صلاحه وتقواه
ليحيا ابد الابدين بعمله الصالح
اطمئنى على اباكى يا حبيبتى
وكلنا لله وكلنا اليه راجعون
اللهم جمع ينكى وبين من تحبى فى الفردوس الاعلى من الجنه
حيث هذه هى الحياه
دومتى بكل خير
ودامت لنا كلماتك
حتى فى اوقات حزنك اشعر بحنانك واحتوائك
اللهم لا تحرمنى منها ابدا
وادم حبى لها فى الله واخوتنا فى الله
اتركك فى رعاية الله وامنه

والسلام عليكم ورحمة الله وبركاته