Tuesday, November 18, 2008

جربت تنام بردان


اتفرجت على قصه فى التلفزيون اثرت فيا قوى وبكيت فيها كتير بتحكى عن سيده فقيره طلقها زوجها لانها لم تنجب غيربنات كان عندها بنتين وهى امراه اميه وتعيش مع امها المريضه تركت منزل زوجها وسكنت فوق سطح احد المنازل فى حجره صغيره وكانت تسكن بجوارها سيده عجوز يونانيه مصريه وسيده اخرى معها طفلتين والجميع فقيرررر جدا ومع فقرهم كانوا بيساعدوا بعض وياكلوا مع بعض مرضت السيده اليونانيه ودخلت فى غيبوبه سكر ولم يكن عندها الدواء فقامت احدى جارتها التى لا تمتلك اى مال ببيع خاتمها الوحيد الذى تمتلكه لشراء الدواء

اما الزوجه التى طلقها زوجها فكانت تعمل خادمه وكان وقفه العيد وطلبت منها ابنتيها ملابس العيد وهى لا تملك شئ فسالت مخدومتها ان تعطيعها ملابس قديمه من ملابس ابنتها وكانت تسالها وعلامات الذل والخجل على وجهها فوافقت مخدومتها ذهبت الى البيت سعيده لانها حققت مطلب ابنتيها ولكن الابنه الكبرى اعترضت بشده وقاالت ازاى اعيد فى ملابس قديمه بكت الام وخرجت من البيت حزينه ولم تجد الا المسجد ودخلت وبكت وشكرت حالها لله وقالت انا لست معترضه انا الحمدلله زى الفل بس ياااارب نفسى اربى بناتى واكبرهم
كانت العجوز اليونانيه جارتها تمتلك بيانو غالى عندها قوى بيفكرها بايام الشباب ولكنها فجاه قررت تبيع هذا البيانو وفجاة اختفت هذه السيده بحثوا عنها لم يجدوها وجاء اول يوم العيد والكل راضى بحاله ومازالوا قلقنين على هذه السيده العجوز وفجاءه وجدوها تاتى وقد انهكها التعب وهى تحمل اكياس فى يديها فرح الجميع بعودتها فماذا كانت تحمل كانت تحمل ملابس العيد للبنات وهدايا لجيرانها الفقراء مثلها انظروا باعت اعز ما تملك حتى تتدخل السرور على الاخرين
وفرح الجميع وارتسمت على الوجوه ابتسامه الرضا يمكن هى تمثليه ولكنها اثرت فيا جدا لان فيه ناس اقصى حلمها تاكل لحمه او تلبس ملابس جديده نظره الذل عند السؤال بتكون صعبه قوى حمدت ربنا على نعمه الكثير عليا ومع انى اعلم ان هناك من يعيشون تحت خط الفقر ولكن عندما تشاهد كيف يعايشون وكيف عندهم رضا ليس عندنا احنا بقينا انانين مش بنفكر غير فى نفسنا وبس واللى عنده عربيه عاوز عربيه تانيه واللى عنده شقه عاوز فيلا واللى عنده زوجه عاوز زوجه تانيه وهناك من ينامون من غير عشا انا عارفه انكم عارفين كل دة وبتشفوه كان الرسول صلى الله عليه وسلم يستعيذ من الفقر والكفر لان الفقر يؤدى والعياذ بالله الى الكفر وكان سيدنا على يقول لو كان الفقر رجلا لقتلته عارفين احنا ليه مكتئبين ومش عندنا رضا لاننا شايفين حال الفقير ولا نحاول نساعده اقصى شئ ايه انك تعطيه حسنه فى الاعياد الا تذكرون قوله تعالى ان الله يربى الصدقات يعنى ربنا يبارك فى المال المزكى عنه
لماذا لا ننظر الى هؤلاء المحتاجين ونرضى بحالنا يكفى انك تفتح التلاجه تجد ما لذا وطاب او تتصل بالدليفرى ياتى لك بما تشتهى او لو زهقت من ملابسك هاتشترى الجديد فلما الاكتئاب اذن حاول تتدخل السرور على قلب محتاج ممكن يكون عامل البوفيه فى عملك ممكن تكون بائعه الخضار او بائعه اللبن لماذا لا تتكفل باسرة لو بامكانك وطبعا اتساءل اين الحكومه هل الحكومه والنواب جاءوا لخدمه رجال الاعمال والاغنياء فقط اين حق هؤلاء انا مش باعترف بالجمعيات النسائيه زى نادى الروتارى ولا الكلام دة دول عاملينها منظره وبس علشان يظهروا اعلاميا مش شايفه انهم حلوا مشكله الفقراء احنا بقينا انانين قوى كدة ليه بنحب نفسنا وبس ومع الاسف مافيش سعاده لانك عمرك ما هاتحصل عليها وانت انانى وتنسى الام غيرك ومشغول بنفسك وبس لماذا لا تزكى عن مرتبك حتى ولو فى نظرك قليل ولكنه سيبارك فيه الله وينميه ويرزقك من حيث لا تحتسب والله لما اكون مكتئبه وحزينه لا يخرجنى من اكتئابى الا مساعده احد محتاج وادخال السرور على قلبه اجد انشراح فى صدرى غير عادى الحمدلله يارب انك جعلتنى من اليد العليا وليس من اليد السفلى الحمدلله على نعمك الكثيره فلنكف عن الاكتئاب ونحمد الله انه منعنا ذل المساله هناك من يشتهى الرغيف الحاف الحمدلله اننا لسنا منهم انا باحب الناس دى قوى لانك لما تسمع لهم تجد كلمات الرضا تخرج من افواههم فتصغر فى نظر نفسك قوى لانك تمتلك الكثير وليس عندك رضا

27 comments:

لست وحدك said...

الله عليك
يا رفقتي الطيبه
عارفه إن في ناس في المدونه شئ وفي الواقع شئ تاني

وإنت في المدونه زيك في الواقع
ما شاء الله عليك
ربنا يوفقك ويسعدك .. إنت فعلا تستحقي كل خير :)

No Fear said...

السلام عليكم
جزاكي الله كل خير

La RoSe said...

في ناس أسوأ من كده بكتير اللي بتنطبق عليهم بقى الآية الكريمة "لا يسألون الناس إلحافاً" ،و"تحسبهم أغنياء من التعفف"... حقيقي لو كل حد مقتدر اهتم أنه يدور على اللي زي دول ويساعدهم هتفرق معاه هو كتير ،

جزاكِ الله خيراً :)

موناليزا said...

متهيألى ان الاعلام له دور كبير فيما حدث للناس
هيرضوا عن حياتهم ازاى وهما طول الوقت شايفيين ثراء فاحش وغنى غير طبيبعى وكلهم كمان من سن الشباب
عكس زمان كان الجار مينفعش ياكل حاجة من غير جاره مش دلؤتى ميعرفش حتى اسمه ايه
ولو قلتى لحد انظر لمن هم دونك حتى تشعر بالنعمة يقول وليه مانظرش للى احسن منى عشان ابقى ذيه
موضوع قيم غاليتى يستحق الاهتمام من وسائل الاعلام

romansy said...

جربت
الاساس دا وحش قوى بجد
اجمل حاجه فى الدنيا لما بشعر بلحظه دفا
بس الاجمل فى الموضوع اننا لازم ناخد بايد بعض
والغنى يعطف على الفقير

طيب ليه مش بنكون كده

(صندوق الدنيا) said...

الله يكرمك ويعزك يا رب
وفعلا
جربت تنام جعان؟
جربت تنام بردان؟
جربت تنام خايف؟
جربت تنام والقنابل نازله على البيت اللي جنبك؟
جربت تنام وانت مش عارف حا تلاقي فلوس تدفع مصاريف علاج بنتك أو تعليمك انت لو شاب؟
جربت تنام وانت عارف ان دي آخر ليلة تستمتع بنظرك؟
لو وضعنا أنفسنا مكانهم لعرفنا حالهم....ولن نعرفه لأننا لسنا (هم)
بارك الله فيك اختي

Anonymous said...

الله تعالى عدلا لم يزل .. فهو لا يظلم أحد بل نحن من نظلم انفسنا .. وتأكدى ان اى ظالم لغيره فى الحقيقه هو ظالم لنفسه اولا وأخيرا لان المظلوم سيرتفع الظلم عنه إما بزوال سبب الظلم او برحيل الظالم نفسه .. اما الظالم فعاقبه ظلمه فى رقبته وقد يرثها من يعقبه من ذريه .. ولله الأمر نت قبل ومن بعد
...............
رفق الغاليه .. كيف حالك ..مررت للتحيه.. وإن كان مرورى دائما رغم عدم تركى لتعليق..واراك بخير والحمد لله ..لك تحياتى

Kiara said...

والله معاكي حق بجد

جزاكي الله خيرا

سلوى said...

يا رفقتي بجد

ما شاء الله عليك
أدام الله عليكي نعمه الإحساس بالآخرين

هى فوضى said...

الجار الحق
قد اوصى رسول الله صلى الله علية وسلم
بالجار

مجداوية said...

السلام عليكم

لا يملأ عين ابن آدم الا التراب

الرسول الكريم لما قال بما معناه اخشوشنوا لأن الدنيا لا تدوم على حال

عشان كده من أكبر الافساد للنفس انك تلبى كل رغباتها واحنا تقريبا عندنا مواسم للاحساس بالفقراء زى رمضان كده فيا ريت نتعامل دايما مع الفقراء مثل تعاملنا معهم فى رمضان
لهذا يا ليت كل العام رمضان

أسما عواد said...

مشاعرك نبيلة وما تدعون اليه من الخير الذي يستوطن قلوب البشر
لأني اعمل في هذا المجال
أحب ان اقول ان الخير يملا بالفعل قلوب المصريين والا كانت الناس أكلت بعضها
لا نستطيع ان نعتمد على الحكومة في حل مشكلات الناس لكننا نستطيع ان نساعد بعضنا
شكرا لزيارتك لمدونتي

صاحب المضيفة said...

اللهم اغننا بحلالك عن حرامك وبفضلك عمن سواك


يارب ارزقنا واسترنا ولا تفضحنا يارب العالمين

أنسانة-شوية وشوية said...

رفقة
ابكيتنى والله يا اختى اكرمك الله وادام عليكي نعمة الاحساس بالاخرين

حاول تفتكرنى said...

جميل هذا المنطق

نحييك بشدة

Unknown said...

بجد قصة جميلة فيها تعايش
بين الناس
فيها احساس بالغير وصدق المشاعر وحب الخير للاخرين
فيها مراعاه للجيرة
بجد ادمعتى عينى
قصة رائعه
وفقك الله

Unknown said...

السلام عليكم ورحمة
الله تعالى وبركاته
موضوع جميل جزاكى الله كل خير عليه وذكرتينى بمقالة قرأتها مرة فى أن الشعوب الاسلامية كلها لو أخرجت
حر زكاتها فقط لبلغ رقمآ لا
اتذكرة الان حقيقة ولكنه
كافاً ليغنى فقراء الامة
الاسلامية كلها ولا
يحتاج احد
منهم
شيئاً

DR.HAMAS said...

احنا فى نعم كثيرة

و لكن لا نحس بها

الحمد لله على كل شئ

و علينا ان نحس بهؤلاء المحرومين

فالراحمون يرحمهم الرحمن

جزاكم الله خيرا



د.حماس

maha zein said...

لا حول ولا قوة الا بالله
اللهم انا نعوذ بك من الكفر والفقر
ربي اكفني بحلالك
اد ايه كلماتك مؤثرة
ربنا يقدرؤنا نساعدهم ونخددمهم
والله فعلا الرضا مفتاح السرور
ان الواحد يشكر ربنا علي النعمة اللى غيره محروم منها
لكن الطمع فعلا هو سبب كل داء
ربنا يحفظنا

جزاكي الله خير
واثابك

رفقة عمر said...

لست وحدك

ازيك سلوى ربنا يخليكى على كلامك الجميل انت الاحسن والله انا مبسوطه قوى انى عرفت انسانه جميله زيك
جزاك الله خيرا على كل حاجه قدمتيها ليا
ربنا يكرمك يارب ويحقق لكى كل ما تتمنيه اللهم امين


*******************

no fear

اهلا بيك
ربنا يوفقك ويكرمك اللهم امين

*******************

la rose

ازيك روز
مش لازم يكون مقتدر علشان يساعد ممكن انسان عادى يساعد لو جاره فقير يطعمه مما يطعم بجد لو وبحاجه بسييطه كفايه الاحساس ان فيه حد حاسس بيهم وواقف جنبهم الامان النفسى افضل كثير من الامان المادى
دايما يسعدنى مرورك روز
ربنا يكرمك يارب

*******************

موناليزا العزيزة

اهلا بيكى
فعلا عندك حق الرسول صلى الله عليه وسلم قال
مازال جبريل يوصينى بالجار حتى ظننت انه سيورثه
فين بقى حتى صباح الخير دة كاننا عايشين لو حدنا مافيش اى حد يسال عن حد هاتقولييلى ابداو انتم والله احنا بدانا كتير بابا رحمه الله عليه كان بيعمل كتير وماما كمان لكن للاسف هما برضه حابين يقفلوا عن نفسهم
علشان كدة الاكتئاب زاد والمشاكل زادت من قله التواد والتعاطف بين الناس

*******************

استاذ رومانسى
اهلا بحضرتك
نتمنى نكون كدة ويكو بنا رحمه اكثر على بعضنا البعض

****************

د/ام البنين

اهلا بحضرتك ودائما زياره حضرتك تسعدنى جدا
يالتنا نضع نفسنا مكانهم حتى نشعر بحالهم ونتفاعل معهم اكثر
جزانا الله واياكم

****************

استاذ حامد

اهلا بحضرتك شكرا للسؤال انا بخير الحمدلله
جزاك الله خيرا كثيرا
ياريت الظالمين يعتبروا بنهايه كل ظالم ولكن للاسف مش بعتبروا وحين تتدور عليهم الدوائر يندمون وقت لا ينفع الندم
نعوذ بالله من قلبا لايخشع ومن نفسا لا تشبع ومن دعوه لا يستجاب لها
اميين

*******************

مولان

اهلا بيكى
جزانا الله وايياكى

****************

تاملات

ربنا ييخليكى سلوى
جزاكى الله خيرا
ربنا يفرح قلبك اللهم امين

*****************

هى فوضى

اهلا بيكى
اسعدنى مرورك وتعليقك

********************

رفقة عمر said...

استاذتى مجداويه

اهلا بحضرتك مدونتى تزداد تشريفا بتعليقات حضرتك الجميله
يااه هاتفرق الدنيا كتير لو الناس فضلت طول السنه زى ما بتكون فى رمضان والله مشاكل كتير ها تتحل والدنيا هاتكون اجمل

********************

اسما عواد

ااهلا بيكى
انا مبسوطه قوى انك بتشتغلى فى الامر دة تعرفى لو الانسان قلبه قاسى ويعمل فى اعمال الخير بجد بيكون فى قلبه رقه وحب يستوعب كل الناس
ربنا يوفقك يارب ويجعله فى ميزان حسناتك اللهم امين


********************

صاحب المضيفه

اهلا بحضرتك
ربنا يستجب منك اللهم امين


********************

انسانه كتير

اهلا بيكى ماهو مش اى حد يبكى اصحاب القلوب الرقيقه مثلك هم ممن يشعرون بالاخرين ويبكوا لحالهم
ربنا ييكرمك ويزيدك انسانيه ورحمه
اللهم امين


**********************

حاول تفتكرنى

اهلا بحضرتك
شكرا على مرورك الكريم
جزاك الله خيرا


********************

نهر الحب
اهلا بيكى نورتينى
ربنا يكرمك يارب ويزيدك احساس بالاخرين
جزاك الله خيرا


*******************

norahaty

اهلا بيكى اسعدنى زيارتك الاولى
اكيد طبعا لو الزكاه اندفعت بما يرضى الله اكيد مش هانشوف محتاج ولا فقير


****************

د/حماس

اهلا بحضرتك
علشان الاخرين ييحسوا بنا لازم نحس بالاخرين ازاى اطلب الرحمه وانا لا املكها
ازاى اطلب من الاخريين مساعدتى وانا لا اساعدهم
صدقت المقوله
ما استحق ان يولد من عاش لنفسه فقط

**********************

انت تسال والكمبيوتر يجيب

اهلا بيكم
شكرا لدعوتكم الكريمه


***************

مها زين

اهلا بيكى سعدت بزيارتك الاولى
على فكرة مدونتك جميله قوى باحييك عليها
ربنا يكرمك ويزيدك من فضله اللهم امين

منى said...

الاحساس بالفقراء والاحسان اليهم مش محتاج جمعيات وتنظيمات محتاج قلوب حقيقيه
ولو اجتمعت القلوب دى على عمل الخير لوجه الله وفى الظل فما اجمل هذا الامر
دايما بنشوف الصح لكن ليه مش دايما بنقدر ننفذ؟
ربنا يهدينا لما يرضيه
تحياتى

الفقيرة إلى الله أم البنات said...

سبحان الله مفيش شئ تقديمه ويكون لله
إلا ويرده لك اكثر واعظم
ربنا يجعلنا ممن يحبون اخوانهم كما يحبون انفسم
جزيت خير

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

رفقة عمر said...

الفقيره الى الله ام البنات

زياره حضرتك زادت مدونتى بركه واسعدتنى كثيرا
ربنا يباركلك فى بنات حضرتك ويكونوا قره عينا لكى اللهم امين

Neveen Ali said...

عارفه يا رفقه لما بلاقي نفسي ممكن افكر في طمع الدنيا و السخط و عدم الرضا بيسيطروا عليا ببعد عن الناس اللى الدنيا كل همهم ببعد حتى عن الاتصال بيهم حتى لو كانوا اقرب المقربين و لو لفترة علشان اقدر اشوف الصورة اجمل
بقعد مع نفسي اتأمل النعم اللى عندى و اعدها
اجمل شئ نشوف اللى عندنا مش اللى اتحرمنا منه و الاجمل اننا نحس بالاخرين و يوم ما نفكر فيهم نعطيهم و نجود عليهم باغلى ما عندنا
لن تنالوا البر حتى تنفقوا مما تحبون
كان سيدنا عبد الله بن عمر يحب السكر و كان يشتريه ليتصدق به
لو كل واحد فينا فكر بيحب ايه و اشتراه مخصوص علشان غيره بجد اكيد قلوبنا حتتغير و تلين
لو شغلنا انفسنا بكل اوجه الخير مش حنلاقى وقت نفكر نفسنا فى ايه اتحرمنا منه
موبيلى مش عاجبنى اشمعنى عربيتى مش زى عربية فلان و عايزة اغير الديكور طب عايزة اسافر للمكان الفلانى ووو
بجد ميملاش عين ابن ادم الا التراب مهما ربنا فتح عليه عايز اكتر و اكتر

رفقة
دمتى رائعة يا حبيبتى

رفقة عمر said...

عزيزتى ام منه
انا باحبك قوى على فكرة
انا كمان مش باحب اللى بيتكلموا عن الدنيا وبيكونوا عندهم كتير وعاوزين اكتر
ليا واحده صديقتى ماشاء الله
متزوجه وعندها بنتين وزوجها كان زميلها فى الجامعه وعندها كل حاجه ودائما تحادثنى وهى تشتكى وانا افضل اصبرها كل هذالانها للاسف تفتقد الرضا
بعد ما شوفت والدى رحمه الله تعالى وهو يحتضر امامى علمت ان الدنيا لا تحتاج لكل هذه الصراعات لان الموت ممكن يزونى فى اى وقت
ربنا يحسن خاتتمنا ويرحمنا برحمته الواسعه