Tuesday, December 23, 2008

تجربتى

من حوالى 10ايام حاولت ادخل مدونتى وللاسف كلما حاولت الدخول اجد رساله تقول لى لقد تم تعطيل حسابكم بجد كان موقف صعب مدونتى ومجهودى ومش عارفه ادخل عليها حسيت بالقهر وقله الحيله ازاى يحصل كدة بدون ابداء اى اسباب ازاى فى لحظه ممكن افقد مجهودى وذكرياتى حسيت فجاه ان جوجل لم يعد امينا على مدوناتنا وانه ممكن فى لحظه يغدر بينا بس ارجع واشكره لانه عرفنى قد ايه مدونتى غاليه عليا قد ايه انا باحبها مدونتى بجد انا باحبك انتى كنتى فى اوقات كتير بتانسينى فى وحدتى كنت بتواسينى فى حزنى منذ عامين بالظبط عندما بدات اول خطواتى فى التدوين فى ديسمبر حوالى 22 ديسمبر كنت سعيده انى هاقدر اعبر عن راى انى ااقدر ادافع عن دينى يمكن اول ما بدات التدوين توفت اختى وبعدها والدى شعرت وقتها ان ربنا اراد ان ادخل التدوين لانه خفف عنى كثير واقع الصدمه لان بصراحه المدونين كلهم وقفوا جنبى وساعدونى على تخطى الازمه وكانت الكتابه تخرجنى من حزنى والالامى يمكن انا مش باخرج كتير لانى كائن بيتى التدوين عرفنى على ناس باحبهم قوى حبونى من غير ما يعرفونى وقفوا جنبى وساعدونى كتير من غير ما ااقدم ليهم اى حاجه بجد باستغرب للى بيغتال مدونته بايديه ويمسحها وينسى اخوانه اللى شاركوه افراحه واحزانه ممكن ابعد شويه اخد اجازة لكن امسح مدونتى طيب ليه مش هى دى اللى كنت بتشتكى ليها مش هى دى اللى كانت انيسك فى وحدتك ووقت شدتك انا اعتقد اللى مش عنده وفاء لمدونته بيكون مش عنده وفاء لاى حد الرسول عندما ترك جزع النخله وسمع انينه من الحزن ذهب اليه ووعده انه سيكون رفيقه فى الجنه و كان الرسول بين الحين والاخر يترك المنبر ويجلس عند جزع النخله اللى اتعود يخطب فى الصحابه عنده يعنى الوفاء حتى للجماد فلماذا بعض المدونين يتخلوا عن مدونتهم بكل سهوله اعتقد ان ابسط انواع الوفاء يثبت هل هذا الشخص وفى ام لا فالوفاء للاشياء الصغيره مهما كانت ضائلتها تثبت الوفاء عند الانسان الا اذا كان هناك حالات اضراريه لترك التدوين او التخلى عن اى شئ كان يمتلكه لم اعرف مقدار محبتى لمدونتى الا عندما حرمت قهرا من الدخول اليها بجد مدونتى انا باحبك وباشكرك جدا انك كنتى كتير بتخرجينى من ضيقى وكنتى بتخففى عنى كتير وانستينى كتير فى وحدتى

الحمدلله انك رجعتيلى تانى

سؤال بسيط

ليه الناس اللى بيحبونا قوى ونتأكد انهم بيحبونا ونطمن من حبهم لينا دول اول ناس بنتجاهلهم ومش بنهتم بيهم ومش بنهتم اننا نحافظ على حبهم لينا واننا ننمى الحب دة علشان يزيد مش ينقص

ااقرب مثال الوالدين دول اكتر اتنين فى الدنيا بيحبونا وهما اكتر اتنين نتجاهلهم وكأن حبهم شئ مسلم به ولاننا مطمنين انهم بيحبونا فامش بنهتم بيهم ويمكن هما اكتر ناس فى اخر اولوياتنا فى اهتمامنا

واذا فقدنا احدهما نظل نندم عمرنا كله اننا فقدنا اهم حب فى حياتنا لماذا نندم بعد فوات الاوان ليه مش بنستفيد ونستمتع بكل لحظه وكل نعمه انعمها الله علينا ليه دايما بندور على الشئ اللى مش نملكه وليس فى ايدينا واللى فى ايدينا نهمله ليه بنزهد فيما نمتلكه ولا نهتم به فلنستمتع بكل لحظه تمر علينا ونحمد الله عليه ونحاول ان نحافظ على احبابنا ونهتم بهم اكثر


19 comments:

http://kasperb4.blogspot.com/ said...

طب الحمد لله انها رجعت تاني
ناس كتير الايام دي بتحصل معاها الموقف ده
حقيقي مدونتك من المدونات اللي يتزعل عليها لو اتقفلت
--

بالنسبة للسؤال
فعلا وللأسف كتير مننا بيقع ف الغلطة دي
وانا شايف انك جاوبتي على السؤال وانتي بتسأليه
وهي ان احنا مطمنين لحبهم لينا
لكن احنا فعلا محتاجين نتعلم اننا نظهر مشاعرنا لأقرب الناس لينا

موناليزا said...

الف مبروووك
والحمدلله ياحبيبتى والله كنت حاسة بيكى
بس كان الغلط فين؟

شــــمـس الديـن said...

الحمد لله يا رفقة ان المدونة رجعت و عرفتي تدخليها

يالا بسرعة اعملي استيراد لمحتوياتها علشان تبقي عندك علي الوورد برس

اما بالنسبة لتساؤلك فعندك حق فعلا

يمكن لاننا بنعتبره بحكم التعود حق مكتسب و مش بتفكر في ان الحق او الحب دا ممكن يتقطع مهما قسينا عليهم

يعني بس لو فكرنا تملي ان حبهم مش حق مكتسب و ممن يضيع في اي لحظة هنغير كتير من طريقة تعاملنا معاهم لان فعلا الناس الحقيقية دي كنوز

دمت في حفظ و رعاية الله دائما

Jana said...

الحمد لله يا رفقة
حمدالله على سلامة حسابك
:)

صحيح مدونتك دى بيتك التانى واحيانا يكون التالت
لكن حكاية ان حد يتخنق ويقفلها فى لحظة انفعال بيحصل فعلا من شدة الضيق لأمر ما زى انك تتخنقى كده فتقصى شعرك او تبوظى الدايت وانتى عارفة انك كده بتأذى نفسك
مرتين حصلت معايا
مرة رجعت فى كلامى فى آخر وقت
ومرة الكهرباء اتقطعت وايدى على الماوس يشير الى ديليت بلوج
مش باقولك العند ربنا يكفينا شره

اخر كلمتين عندك كانوا فى الصميم

مدونتك عندنا غالية اوى يا رفقة
ربنا يا بنتى يحفظك واهلك ومدونتك

la3lahakhier said...

الحمد لله يا ستى على سلامتك وسلامة مدونتك ولا حرمنا الله منك ابدا
فى انتظار جديدك
اما عن سؤالك فلا اجد له جوابا عندى فانا تعلمت ان احب حبيبى هونا ما فاذا ماانقلب عدوى يوما ما لم احزن واموت كمدا او ان فارقنى اكملت حياتى وان اختلفت
دمتى بكل الخير
قولى للبت جنى انى زعلانة منها

romansy said...

الحمد لله رجعتلنا بالسلامه
اما بالنسبه لاسئلتك
فالاجابه انا مش عارفها بالظبط
بس ممكن يكون علشان عارفين اننا مهما عملنا فيهم هيفضلوا يحبونا مهما كان
وعلشان دايما النفس البشريه بتحب الممنوع دايما

yoyo said...

حمد لله على سلامة المدونة ويارب دايما منورة مدونتك و المدونات كلها

حاسة بيك اوى لانى عشت التجربة دى
والله أنا بكيت بالفعل خوفا من ان المدونة تكون ضاعت منى لانها ببساطة مش مجرد مدونة و خلاص لان انا بالفعل دخلت العالم دا و حبيته جدا و حبيت ناس رغم اننا مش اتقابلنا بس سبحان الله الارواح والقلوب تتقارب

عالم التدوين عامل زى البيت الكبير اللى كلنا بنتجمع فيه ينفع تتخلى عن بيتك او حتى اوضتك ينفع تتخلى عن نفسك عن حتة منك أعتقد صعب اوى
مهما كانت الظروف لازم نحافظ على الاشياء اللى بنحبها و نحافظ عليها

المشكلة اننا مش بنحس بقيمة الشىء الا لما يبدا يضيع منا طول ماهو قدامنا خلاص اهوا موجود رغم ان الانسان دا بيكون يستحق منا اكتر واكتر و لكنها طبيعة البشر يا عزيزتى

دمتى بكل خير
أختك
يويو

Maha said...

ياللتعاسة

هو انا مش باجي عندك كتير ليه ..

:)

فايت عليا نص عمري :)

تدوينتك ممتعة .. والفقد من أصعب المشاعر .. يمكن التدوينة كانت بتدور حول شعور الفقد واللقيا :)

سلمت يداك وسلمت من كل شر

الطائر الحزين said...

مشاعر الفقد سيئة
مبروك عودة المدونة

مشروع انسان said...

مبارك عودة المدمرة اخرى

وصحيح لازم ندرك فقيمة الشئ وقتها قبل ان نفقدها

ولكن للاسف الشئ مش بيزيد بريقه فى عنينا الا لما يبعد عننا ونفقده
سواء جزئيا او كليا

مبارك عودتك مرة اخرى

خمسة فضفضة said...

السلام عليكم ورحمة الله بركاته

حمد الله علي سلامة المدونه

وكل سنة وانت طيبه وعقبال ميتين سنه تدوين يارب

Ahmed Mostafa said...

السلام عليكم ورحمة الله وبركاته

الاخت رفقة عمر...ألف مليون مبروك على رجوع مدونتك..وكلامك عن مدونتك يدل على مدى وفائك وإخلاصك لها..إن شاء الله ربنا ما يحرمك منها مرة أخرى..ولكن خدى بالك إذا كنت قدأضفت أى ويدجيت أو توول جديدة فاحيانا هذا يعطل المدونة حتى يتم التاكد أنها صديقة للبيئة ...دمتى بكل خير ولكى منى كل تقدير وإحترام..

أحمد سعيد بسيوني said...

الحمدلله على رجوعها مرة اخرى

فعلا المدونة تعتبر البيت والملجأ الأول والأخير للأفكار والذكريات

دمتم

mo7amaad said...

سلام عليكم
عتقد اللى مش عنده وفاء لمدونته بيكون مش عنده وفاء لاى حد
الجملة ديه وقفت معاها كثير
مش عارف هي صح لا غلط
بس أكيد ليها ارتباط
بأهمية المدون لدى مالكها
وعودة سعيدة للتدوين

Ma 3lina said...

الحمد لله ان المدونة رجعت و عرفتي تدخليها

فعلا احنا محتاجين نتعلم اننا نظهر مشاعرنا لأقرب الناس لينا


بوست جميل كالعادة:)

Kiara said...

ليه الناس اللى بيحبونا قوى ونتأكد انهم بيحبونا ونطمن من حبهم لينا دول اول ناس بنتجاهلهم ومش بنهتم بيهم ومش بنهتم اننا نحافظ على حبهم لينا واننا ننمى الحب دة علشان يزيد مش ينقص

************

اولا معاكي حق بجد في كلامك

ثانيا

الف مبروك لرجوعك لمدونتك ويارب تفضلي منوراها دايمااااااااااااا

منى said...

الحمد لله رجعوها بالسلامه
بس عارفه يارفقه
كتير بفكر لو اى حد من اللى نعرفهم ونحبهم مسح مدونته فجاه من غير ما نعرف طريقه تانيه نوصله ازاى
هنتصرف ازاى؟
هو ازاى بيفتكروا اننا بسهوله هننسى بعض ناس عرفناهم وكل يوم بنقرا افكارهم واحاسيسهم وبقوا زى اهلنا اواى فجاه تجيلهم جراه وقسوه ويلغوا ده كله
الموضوع كبير يا رفقه خلينا نكمل على الايميل
تحياتى

Anonymous said...

السلام عليكم ورحمه الله
بارك الله فيكي واساله ان يجعلك من عباده المخلصين
طالعت الكثير من كتاباتك الرائعه بتلك المدونه الراقيه والتي هي نتاج لروح نقيه طاهره وعقل يعلم تماما انه مسخر لخدمه هذه الروح
للاسف انا لست مدون ولكني اتابع عدد لا باس به من المدونات ومدونتك علي راسهم
ولكي ان تتخيلي مدي انزعاجي من توقفك عن الكتابه الذي لم اعرف سره الا الان
خالص تحياتي وتقديري لمجهودك بمدونتك الرائعه
خالص دعواتي لكي بالتوفيق
متعك الله بالرضا والسعاده
وعوضك بفضله عن ابيك واختك بكل ما هو خير لكي في دنياكي واخرتك
احمد

سلوى said...

الحمد لله على عودة مدونتك
طبعا كنت حاسه بيكي

بالنسبه لتساؤلك
فعلا إحنا مش بنعرف قيمه الناس أو الأشياء إلا لما نفقدهم

يريت فعلا ناخد بالنا ونتجنب الموضوع ده

ربنا يحفظك رفقتي وشكرا لسؤالك
ربنا يخليكي :)