Monday, December 21, 2009

هذا الفيس البغيض


من المواقع التى اكرهها جدا موقع الفيس بوك وقصتى فى معرفة الفيس بوك بدأت بعد ما بدأت التدوين


على فكرة يمر اليوم 3 سنوات على مدونتى فقد بدأتها منذ 21/12 /2006 المهم اتعرفت على احد المدونات وقالت لى انها اشتركت على موقع جديد اسمه الفيس بوك وقالت انها تتضع صورها هناك ودعتنى للاشتراك فيه حتى ارى صورها هناك وفعلا اشتركت فيه ورايت صورها وكنت تائهه فيه لا اعلم فيه شئ ولكن لم يحدث بينى وبينه الفه فتركته ولم اهتم به حتى بدات دعوات من هم على ماسنجرى لاضافتهم وكنت ادخل لاقبل الاضافه ولا افعل شئ
ثم اغلقته بعد ذلك نهائيا فتحته من كام يوم لارى ماذا يجرى ولكنى مازال الانقباض بداخلى لا ادرى لماذا

كيف يكون معلومتنا الشخصيه وصورنا ومشاعرنا على الملء هكذا هذا الفيس اللعين تتدخل فى خصوصيات الناس كل المعلومات متاحة الصور الشخصية وخصوصا صور البنات كيف تقبلين ان رجل غريب يظل يـتأمل فى وجهك او يدخل ويعلق ويقول لك ايه الحلاوة دى ازاى مشاعر الناس واحاسيسها اصبحت مشاع نفسى اعرف ايه الفائدة من الفيس بوك ولا هو تقليد اعمى وخلاص للغرب

يمكن فيه ناس بتستخدمه للدعوة بس كام واحد بيدخل يقرأ وسط هذا الغثاء يمكن ناس هاتزعل من رأى دة مشكلتنا اننا بنستخدم اى تتطور من الجانب السئ احيانا استغرب من وضع صور شخصية جدا جدا كيف يقبل رجل او اخ ان تكون صور اخته او زوجته هكذا كل الناس تراها اين الحياء

هناك حديث لرسول الله صلى الله عليه وسلم فيما معناه ان المرء لو كان فى خيمته وكانت خيمته بها قطع ونظر مار من هذه الفتحه وتلصص على هذه الخيمه يجوز ان يفقأ صاحب الخيمه عينه وليس له ديه انظروا كيف يحافظ الاسلام على خصوصيات الناس

والى اى بنت هل النت ولانك تتحادثين من وراء الشاشة ضيعت حياءك الغريب الذى وجدته ان الفيس بوك عمل خاصية جديدة وهى ان كل من على الفيس بوك يرى بعضه بعضا سواء من قائمه الاصدقاء او لا وللاسف لا احد اخد باله عندما فتحت حسابى
وجدت رساله من الفيس بوك تكلمنى عن الخصوصية وانها اصبحت متاحه للجميع طبعا دخلت على السيتنج وغيرت الاوبشن دة وابقيت ان يكون حسابى لا يراه سوى الموجودين فى قايمه اصدقائى فقط الان تفتح اى بروفيل تجده متاح

يمكن المدونة والتدوين حبيته اكتر لان افادنى انا كنت نفسى اعبر عن رأى واعبر عن محبتى لربى ولدينى كنت احلم من زمان ان يكون عندى سايت اتكلم فيه عن دينى والحمدلله ربنا يسر لى المدونة كتير خرجتنى من ضيقى وكتير شغلت وقت فراغى لم احب لقاءات المدونيين
حتى اظل اكتب براحتى لا يعلم احد عنى شئ يمكن اتعرفت على بعض المدونات وفعلا هن شخصيات محترمه جدا ولكنى عذرا لا احب اللقاءات التى فيها اختلاط

كثير دعونى لهذه اللقاءات ولكنى كنت ارفض البنت مش معنى انها تتكلم خلف شاشة الكمبيوتر ان تنسى حيائها وتكون جريئه وتتضحك مع هذا وتمازح هذا انا عندما اضع صورة على المدونه اكون حريصه جدا انها لا تكون ملفته ولا مثيرة حتى الكلمه تخرج منى بحساب
لا ن الله قال (فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ ) مش معنى ان احد لا يرانى ولا يعلم من انا ااقوم اتحرر فى كلامى
وهذه مشكلة الفيس بوك اباح كل شئ للبنت واباح ان اى رجل يحادثها ويغازلها علنا
ولكرهى للفيس بوك اغلقته مرة اخرى

فيه ناس هاتقولى ممكن تقومى بالدعوة فيه طب ما انا عندى مدونتى وانا سعيدة بيها فيه الترافك بفضل الله بيبين لى ان فيه ناس بتعمل بحث عن مواضيع معينه وتظهر مدونتى فى هذا البحث وهذا يرضينى اصبحت اكتب لهؤلاء المجهولين الذى يمرون على مدونتى كعابرى سبيل يمكن الجامعة اللى بتعلم فيها العلوم الشرعية والقران شغلتنى عن المدونه بس المدونة تظل مكانتها فى قلبى كبير

اسوأ شئ كان فى التدوين هو بعض الالفاظ التى لا اعلمها وعرفتها من قراتى لبعض التتدوينات مثلا احلقله و نفضله والفاظ اخرى

غير بعض الافكار السيئة وبعض التحرر من بعض المدونات يمكن دة مش كنت احب اعرفة كنت حابة اكون زى ما انا لان الاشياء هذه سببت لى ضيق فى نفسى شديد بجد الفطرة اللى ربنا خلقنا عليها جميله قوى واحنا اللى بنشوها بتصرفتنا
واعتذر لم اقصد الاساءة لاحد ولكنى اكره الفيس بوك واراى ان الغرب عرف يسيطر علينا كويس ويشغلنا عن السبب الذى خلقنا الله له
وهو عبادته وحده وعمارة الارض فلا نحن عبدناه حق العباده ولا حتى عمرنا الارض الغرب هو الذى يعمر وليس نحن


كما قال الرسول صلى الله عليه وسلم لتتبعن السنن الذين من قبلكم شبرا بشبر وذراعا بذراع حتى ولو دخلوا جحر ضب دخلتم خلفهم وفى رويه لتتبعنهم حذو القذة بالقذة ….قيل يا رسول الله اليهود والنصارى تقصد ؟قال ومن يكون غيرهم

للاسف الفيس بوك دة بعيد عن اخلاقنا خالص وبيحصل فيه تجاوزات كثيره جدا

انا اكرهه جدااااا

وارجو اننا نقعد مع نفسنا ونشوف هل عرض صورى الشخصية وخصوصياتى على الملئ يرضى الله ورسوله

هل ان يتغزل فى صورى الرجال هل هذا يجوز
اين الرجولة مين يتقبل ان امرأة من محارمة تكون صورها عرضه على الملئ ويتغزل فيها الرجال
اللهم اهدينا لاحسن الاخلاق انه لا يهدى لاحسنها الا انت
دة رأى شخصى غير ملزم لاحد
وكل انسان على نفسه بصيرة




17 comments:

موناليزا said...

متفقة معاكِ طبعا
فده برضه كان اول انطباع ليا عنه انه بيضيع الوقت ومع التصفح برضه وجدت صور صحباتى وبقيت مستغربة جدا وقلت بداخلى كل ما عبرتى به هنا
ولكن فى الفترة الاخيرة قدرت اوصل لفايدة بالنسبة لى وهى انى ممكن اكلم صحباتى من عليه عن طريق الشات او ترك رسايل خاصة لان مش كلهم عندى على الميل ده غير ان الماسنجر عندى اوقات كتير مش بيرضى يفتح فبقيت اعتبره وسيلة اطمن فيها على صحباتى حتى لو مش هقعد عليه كتير
وده على فكرة كان هدف اللى أنشأه ان الاصدقاء والمعارف يعرفوا طريق بعض بعد طول فراق

رفقة عمر said...

موناليزا

اهلا بيك موناليزا منورانى دايما

انامش معترضه عليه كوسيله للتواصل
مثل الماسنجر
بس اضافه اى اشخاص من غير معرفة مسبقه
ويدخل ويطلع على معلوماتى
او اضافه رجال وتكون صورى متاحه لهم دة الذى اراه خطأ وقع فيه الكثير
ودة خطر جدا لان ممكن الصور تستخدم استخدام سئ جدا
احنا تجاوزنا الحدود
ليه مش يكون حسابنا بشخصيه رمزيه وصورة رمزيه زى المدونات
واكيد المقربين لك يعلمون شخصيتك الرمزيه
لكن كثير تجاوز الحدود واصبحت المعلومات مشاع للجميع وسبحان الله لم يحدث ود بينى وبينه
واذا افتقدت احد صديقاتى باتصل عليها على الموبيل او البيت
او اترك لها تعليق على مدونتها
حاساه مش مفيد قوى للدرجه دى
واى حاجه موناليزا لو رعينا دينا فيها اكيد هانستخدمها صح لكن لو تعاملنا تبع هوانا اكيد هانخطأ
على فكرة ناس كتير بتكره زى

ebn roshd 777 said...

انا ليه حساب بالفيس بوك وفيه رجال وسيدات وعلي ما اتذكر لم اري ابدا صوره حقيقيه لاي بنت او سيده من اصدقائي
بل انني شخصيا لم اضع صورتي الشخصيه
الا مره واحده لمده قصيره جدا وبعدين قلت لنفسي
طب اصحابي ذنبهم ايه يشوفوني
انا اؤيد حضرتك ان وضع الصور علي النت عموما كارثه
لكن انا شخصيا شايف ان الفيس بوك ده اختراع جميل
ودي برضه وجهه نظر شخصيه جدا
والسكين مفيد جدا في تحضير الطعام ولكنه احيانا اداه للقتل
دومتي بكل الخير

مجداوية said...

السلام عليكم

ازيك يا احلى رفقة عمر
دخلت اكتر من مرة اكلمك على الياهو ملقتكيش

المهم

لو ركبتي مثلا تاكسي وكل مرة تيجي تركبيه يحصل حاجة أو حادثة لا قدر الله حتتعقدي ومش حتركبي تاكسي تاني لكن هل معنى كده أن وسيلة التاكسي وحشة للناس كلها ؟ طبعا لأ والفيس عمل معاكي كده لأن استخدامتنا له محدودة لكن هو كفكرة يعتبر فكرة عبقرية لأن ملايين الناس بتستخدمه وهو زي اى تكنولوجيا حديثة لها مميزات كتير ولها عيوب ,و انتي قابلتي عيوبه فكرهتيه لكن أقولك مثلا على مميزات منه
فيه جروبات فيه بتدعو إلى الله ونشر دين الاسلام وجروبات لأحاديث الرسول وجروبات للحث على الأخلاق وجروبات لدفع الظلم وجروبات للي دخلوا الاسلام وده أفضل شىء للدعوة ,, فيه جروب مثلا لتحميل الكتب أكثر من رائع فيه جروبات لأعلام الأدب والفكر والدين بيكون فيها كل أعمالهم ,, فيه تبادل معلومات فوري , فيه العالم مفتوح تقدري تشوفي بيحصل فيه ايه وفيه فيديوهات بتعرض معلومات واخبار في غاية الروعة والأهمية
وفيه ناس استخدمته كمجال بيزنس وتسويق لمنتجاتها وفيه عرض لهوايات وافكار ناجحة
وفي المقابل فيه زي ما المدونات فيها كل القبح والسفالة والانحطاط الأخلاقي والالحاد والفسق
عالم المدونات دنيا مصغرة وكذلك الفيس بوك ستجدي فيها النافع والضار
وكل اللي ذكرتيه صحيح
لكن عيوبه أنا أقدر أتجنبها واستخدامك له على حسب شخصيتك وميولك لكن بصراحه مميزاته رائعة
لكن الهايفين و الباحثين عن الخطأ أينما كان احتلوه زي ما احتلوا دنيانا كلها
أنا فكرت بالفعل أكتر من مرة ألغي حسابي فيه وأخرج منه نهائي بسبب هذه العيوب
لكن وجدت إني ححرم نفسي من فائدة كبيرة في المقابل فعدلت عن الفكرة وحصنت حسابي كويس وحددت وقتي فيه لكن امتنعت عن التفكير أو مجرد التفكير في انشاء جروب و لو كل حاجة سيبناها عشان الشر اللي فيها فالأولى نسيب الدنيا الكبيرة اللي مليانة شر دي

لكن أرجع واقول عندك حق تكرهي البشاعة الموجودة فيه
بس يا ريت تجربي الوش التاني منه

أحمد شريف said...

السلام عليكم
أنا أيضاً أكره الفيس بوك بالمناسبة

سعدت بهذا الطرح وعلى تواصل إن شاء الله

أحمد شريف said...

لكن بالمناسبة هو أداة إن أحسن استخدامها فهذا جيد وأن أسيء فلا يسيء هذا لها في كونها أداة لكن أنا بصفة عامة أكره تلك المواقع الاجتماعية المتشعبة بشدة والتي تستخدم محتواك الخاص بصورة دعائية كبيرة للغاية

رفقة عمر said...

استاذ ابن رشد

هوممن يكون اختراع مفيد بس ل استخدم صحه لعمل صفحات للشخصيات التاريخيه المهمه ونشر الفيديوهات المفيدة لتواصل الشركات مع بعضها البعش
لكن للاسف المساوئ التى فيه اكثر بكتير
ويمكن علشان انا مش حباها فامش حابه اعرف مزاياه
مع ان كانت هناك جروبات اتابعها مثل جروب عن الاسرة المالكه ومصر زمان
بس الجروبات دى باعرف ادخلها من غير اشتراك لو حبيت اخد منها اى معلومه او صور



***********************

استاذة مجداوية

اخبار حضرتك ايه يارب تكونى بخير
الرسول قال اتقوا الشبهات ومن حام حول الحمى يوشك ان يقع فيه
غصب عنى ارى الاشياء السيئه فيه كيف اتجنب صورة غير لائقه او لفظ غير لائق فالافضل انى اتجنب وخصوصا النت ملليان بالمعلومات والاخبار
لو حد قال لى هناك شيخ رائع يخطب فى قاعة ديسكو فهل ادخل لا سمع الشيخ
ولا اتجنب المكان كله حتى لا تتدفعنى نفسى الامارة بالسؤ بالتعلق بما يحدث داخل قاعه الديسكو
انا باتبع اسلوب من خاف سلم
وانا لا اعرف نفسى فلذلك اتجنب اى شئ ممكن يضرنى


**********************

استاذ احمد شريف

وعليكم السلام ورحمه الله وبركاته
ان شايفه اننا نتنبه افضل
وللى يستطيع انه يتعامل مع الفيس بوك دون ان يتأثر بالجو العام هناك
فدىى حريته ومعرفته بنفسه وبمدى قدرته على تجنب الامور التى لا ترضى الله ورسوله

الفقيرة إلى الله أم البنات said...

رفقه يا حبيبتى بعد إذنك نشرت التدوينه على الفيس بوك
بس انا متفقه تماما مع مجداويه وعلى فكرة
مشكلة الفيس بوك بالنسبه لى ولا شئ مما ذكرتى أكثر من انه بيضيع الوقت بس فعلا فرصه للتواصل
انا شكوت فى مونتى انى كنت العب مع ابنتى ولكنى احيانا تحتاجى شئ مختلف ولا يدوم بالنسبه لى اللعب
ولكن كما قالت لك ماجده فعلا كل شئ حسب استخدامك
ولكن ما تقوليه نسبه كبيرة تقع فيه
ولكن سأتكلم عن من اضيف ومن اراه عندى لاشئ البته خارج او مهين لانى لا اضيف إلا من أعرف ومن لا يعجبنى بعد فترة احذفه وينتهى الامر

اعلم انك تتكلمى عن الامر بشكل عام
جزاك الله خير على التنبيه والتذكرة

اريد ان اتواصل معك
كيف
اريد ان اشترك فى موضوع الجامعه
هل آخذ ايميلك من مجداويه على الفيس بوك؟
رأيتى والله غير مقصوده بس اهو جانب قد نستفيد من الفيس بوك فيه
فى انتظار ردك
ان شاء الله
على فكرة فى مدونتى تقدرى تدخلى على صفحتى فى الفيس بوك وترسلى لى رساله بايميلك حتى اعرف كيف نتواصل واشترك معك ياحبيبتى
دمت بالف خير وجزيت خير على التذكرة فذكر ان الذكرى تنفع المؤمنين

ربى يسعدك ياابنتى الحبيبه

موناليزا said...
This comment has been removed by the author.
كلمات من نور said...

يسلم فمك يا رفقة العمر ........شوفي اساسا الصور حتى عالماسنجر بقت مشاع ممكن أي واحد يدخل في ال
msn network
serching for new friends
تلاقي الام اس ان يفتحله اصدقاء جدد ويوريه الصفحات بتاعتهم وفيها صور الماسنجر...الأول كانت صورة الماسنجر خاصة دلوقتي لا ...ثانيا وبعيد بقى عن الصور لي صديقة أمريكية مسلمة رفضت تعمل لنفسها فيس بوك وقالتلي بالحرف الواحد داه عامل زي تجميع للداتا عن الإنسان حتى الابليكيشن المضحكة تلاقي الاسئلة بتاعتها معمولة بطرق علمية تجمع عنك قاعدة بيانات كاملة يعني مثلا فيه ابليكيشن اسمها : شجرة العائلة ..بيخليكي تحطي نفسك واخواتك ووالديكي و جدودك واخوالك وخالاتك وعماتك وووووووووووو

كان عندي موقع بيتكلم عن الفيس بوك و أهدافه الخفية حادور عليه بأمر الله و احطه عندك ...انا الفيس بوك بتاعي حاليا لمجرد التواصل مع الأهل خارج مصر و الأخوات كمان.

الجديد يا رفقة العمر بقى ولاحظته لعب عالفيس بوك اولادي الصغار صمموا يشتركوا فيها زيهم زي اصحابهم واقاربهم
farmville
fishville
مش حنتكلم عنهم وعن ضياع الوقت بلاش بس حاتكام عن نوع الهدايا الايام دي..الهدايا كلها كريسماس وشجر وشرابات وحلوى كريسماس ووووو حتى السور بتاع المزرعه مزين بنباتات الكريسماس ............أنا اتكلمت مع اولادي الصغار وعمرهم 7-9 واتفقت معاهم عدم قبول أي هدية خاصة بالكريسماس او اي عيد اخر والاكتفاء باللعبة كلعبة فقط لاغير وبرضه كلمتهم انها لعب مش مفيدة بالعكس غير العاب الجيم بوي ووووو ويارب يقدرني ازهقهم منها واقنعهم بالعقل الا داه جيل ميعرفش كلمة : هو كده تسمعوا الكلام من غير نقاش

ودي كلمة احنا كنا بنحترمها بس الجيل داه جيل اقنعني.......تحياتي

موناليزا said...

رفقة ياجميلة ميرسى على التوضيح
انا مسحت تعليق كنت كتبته عندك لانى كنت مفكراكى لسه عاملة خاصية الاشراف

salma mohamed said...

انا شايفه ان كلام حضرتك في جزء كبير من الصواب,
انا صحيح لسه جديده جدا في الفيس بوك
لكن بحمد الله يمكنني تلافي عيوبه,
اولا وضع صوره رمزيه وعدم كتابة موضوعات اراها خاصه او حساسه,
وعدم اضافة رجال,وعدم قبول دعواتهم,وعدم قبول اي صداقه او اضافة صداقه للنساء الا لما اسال اللي اعرفهم عنها,
هي بالنسبة لي مكان للتواصل,وكمان باقرا او اشاهد فيه موضوعات قيمه من خلال المواضيع والفديوهات المطروحه في الجروبات الاسلاميه
واوقاتي عليه محدوده جدا,
احنا اللي ممكن نستخدم اي حاجه كسلاح ذو حدين.

فراشة said...

انا معاكى طبعا فى كل كلمة يا رفقه
ماينفعش صورنا وحياتنا الشخصيه تكون على الملأ كده
فين الخصوصيه
وبعدين مين ضامن الصور دى ممكن يتعمل بيها ايه
على فكرة انا على الفيس بوك بس موضوع الصور الشخصية ده مرفوض تماما
انا دائما كنت اقول ان صورى وحياتى ملك لى ولاسرتى واصدقائى فقط لا يمكن لغريب ان يراها دون معرفتى

ححكيلك على موقف يبين اد ايه موضوع الصور ده بيقلل من شأن البنت او حتى الولد
كنت اعرف زميله وهى حاطه صورها على الفيس بوك هى قمة فى الاحترام والتدين بجد والله
لكن زميله اخرى برده قمة فى الاحترام لكن واحد طلب منها عايز عروسه وكانت مواصفتها تنطبق على الزميلة الاولى فالزميلة التانيه اخذت صورتها من الفيس وورتها لهذا الشخص وقعد بقى براحته ينظر لها دون ان تعلم صاحبه الصورة الموضوع
بغض النظر عن نهايه هذا الموضوع
انا حسيت قد ايه فى اهانه للبنت انها تكون عبارة عن صورة يتفحصها كل من يريد

ربنا يحفظنا وياعالم فى ايه تانى
بس كل انسان يقدر يطوع كل شىء للخير
يعنى ممكن نجعل الفيس بوك وسيلة خير مش للصور وبس

تحياتى ومعلش طولت عليكى

حاجات جوايا said...

رفقة عمر الغالية
وحشتينى يا قمر
كل سنة وانتى طيبة وبكل الخير يارب
بمناسبة بدأالعام الهجرى وبمناسبة عيد ميلاد مدونتك الثالث
ربنا يخليهالك ويخليهالنا ويخليكى لينا يا قمر
وعقبال 100 سنة يارب

بالنسبة للفيس بوك انا متفقة معك تماما فى كلامك
اول ما اشتركت فيه من سنتين تقريبا حسيت انى واقفة فى الشارع .. لانى مكنتش فاهمة فيه حاجة ومكنتش عارفة اعمله خصوصية .. وده خلانى سيبته .. لا قفلته ولا كملت فيه
السنة دى رجعتله تانى لما لاقيت اصحابى كل واحدة تروح الفيس بوك معدتش ترجع التدوين الا على فترات متباعدة
فدخلت اشوف الحكاية وايه سر انجابهم ليه
بصراحة عجبنى
اه بجد .. لما عرفت اعمله خصوصية ومحدش يشوفنى غير اصحابى بس .. يعنى اللى عايزة تتكلمى فيه بتقوليه بشكل مباشر فى حدود اسطر وتاخدى راى اصحابك .. مش لازم تقعدى تحضرى لبوست عشان تنزليه .. اللى ييجى على بالك على طول تقوليه ده غير ان فيه تواصل جميل بين الاصدقاء بالالعاب والهدايا

اما عن الصور والمعلومات الشخصية فالفيس بوك ملوش ذنب فى الموضوع ده
يعنى مش هيضرب حد على ايده عشان يحط صوره
انا مش حاطة صور خاصة خالص ولا بفكر حتى
فده عيب اللى بيستخدموه مش عيب فيه

وبالنسبة للشات مش بدخله اصلا

للاسف كل حاجة جديدة فيه ناس بتسئ استعمالها
زى الموبايل والنت والبلوتوث والكاميرا اللى عمالة تصور اى حد عمال على بطال بدون وجه حق
بس برضه فيه ناس بتستخدمها صح وفى محلها

كل سنة وانتى طيبة يا قمر وبكل الخير يارب

ranim said...

هو ده اللي كان نفسي اسمعه من اي حد انا زيك كده بكره الفيس انا عندي واحد صحبتي عملتهولي بس مامتي موافقتش ادخل بصراحة انا كمان مش بحبه وطبعا معاكي حق ازاي حد يحط صورة له علي الفيس الناس كلها تشوفها
اول مرة ادخل هنا بس شكلها مدونة تحفه يللا هروح اكمل قرأه

تحياااااتي مبتسمة دائماا

رفقة عمر said...

امى العزيزة ام البنات

اهلا بحضرتك المدونه كلها تحت امر حضرتك دة شئ يشرفنى
ويسعدنى جدا اتواصل مع حضرتك فى اى وقت
ربنا يزيدك من فضله اللهم اميين
انا عارفه ان الفيس بوك فيه حاجات حلوة بس ليه فيه ناس بتستخدمه استخدام سئ ليه دايما نبوظ اى حاجه جميله ونشوهها بتصرفتنا
النت دة رااائع جدا واصبح الواحد عنده مكتبه كتب ومكتبه افلام وثائقيه ومعلومات فى مكان صغير ودة معجزة فى حد ذاتها وقد ايه بيملى الفراغ بحاجات مفيدة مثلا زى الجامعه ياريت كل البنات والسيدات تشترك فيها فعلا بتتعلمى العلم النافع واحنا قاعدين فى بيتنا ليه مش نستخدم التكنولوجيا
فى اللى يفيد دينا ودنيانا الاغلابيه بتستخدمها للتسليه والترفيه وتضيع الوقت مع ان الوقت نعمه سنسال عليه يوم القيامه
حاولت كتير اتواصل مع الفيس بوك بس دايما انفر منه مش عارفه ليه
اتمنى ارى حضرتك قريبا معنا على الجامعه


*******************

كلمات من نور

اهلا بحضرتك
جزاكى الله خيرا كثيرا
ربنا يباركلك فى اولاد حضرتك ويجعلهم ذريه صالحه اللهم امين


********************

موناليزا

انا تحت امرك فى اى خدمه موناليزا
ربنا ييسر لك كل خير اللهم اميين

***************

سلمى محمد

اهلا بيكى سعدت بزيارتك الاولى
ربنا يرشدنا للصواب ويردنا الى دينه ردا جميلا
هو اكيد فيه حاجات مفيدة
بس معظمنا بيستخدم الجانب السئ فيه بس
هو فتنه كبيره ربنا يحفظنا ويصلح لنا الاحوال اللهم اميين


*****************


فراشه الجميله
وحشيتنى جدا انت ووردة
انا باقولك انا اساسا اشبهك كتير احيانا تتكلمى باللى باكون عاوزة ااقوله بس انت مشاء الله لغتك وطريقتك ابداعيه اكتر منى
ربنا يكرمك يارب
عارفه فراشه حتى مواقع الزواج هدفها هدف خير للتوفيق بين الشباب للزواج برضه استخدموه استخدام خاطئ علمت ان هناك بنات وسيدات تستخدمه للتعارف والتلسيه فقط وايضا بعض الرجال منهم يستخدمه للنصب والبعض الاخر غير جاد
يعنى التعامل مع النت يجب ان يكون بحذر شديد جدااا
وخصوصا للبنت
نسال الله ان يهدينا للصواب
اللهم اميين


*****************

سالى القمر عندى
فرحتى كبيرة بيكى
والله اسعدتينى بتهنئتك الجميله ربنا يبارك فيكى يارب ويخليلك دودو

طيب انا عامله مدونتىللدعوة الى الله
كتير ناس بتتدخلها لكن على الفيس بوك اصدقائى بس اللى هايقروا ليه يبقى انا كده بعدت عن الهدف اللى خلانى اعمل مدونه وبقيت اكتب لصحباتى وبس
كمان الفيس بوك بيخلي الناس تتبع خطواتك اليوميه انا احينا لا ادخل الماسنجر بالايام علشان اترك لصديقاتى مساحه للتنفس
لانى لا استطيع ان ترانى صديقاتى اون لاين ولا اسلم عليها
الرسول قال القى السلام على من تعرف ومن لا تعرف فكيف اشوف صديقتى امامى ولا اقولها ازيك
لكن الفيس بوك بيظهر اى حركه لكى عليه يعنى الناس شايفانى كل يوم ودة فى حد ذاته مش حلو
الحمدلله انا مكتفيه بمدونتى والجامعه والحمدلله على كل حال
ربنا يرزقنا الاخلاص وربنا يقبلنا عنده اللهم امين
اسعدنى وجودك جدا وعايزة اشوفك دايما


************

رنيم

اهلا بيكى حبيبتى ماشاء الله عليكى انتى صغنونه قوى
ربنا يبارك فيكى يارب ويحفظك لوالديكى اللهم اميين


يارب تفضلى مبتسمه دائما

د/عرفه said...

السلام عليكم

انا وصلت للبوست من خلال أمة الله

ورأيت طرحك للموضوع


طبعا متفق معاكى فى شيئين
اولا انه مش مناسب ان البنات يحطوا صورهم باى حال خصوصا لما بيكون فيه شباب علشان
الغزل والتعليقات وما شابه
طبعا مش مناسب ابدا خصوصا وجود شباب بيستهبل كتير

ومتفق
كمان انه فى شباب كتير بيستهبل خصوصا فى التعليقات وارسال رسايل شخصية


ولكن
الفايس بوك يتشكل وفقا لاضافات الشخص للاصدقاء
يعنى لما يضيف ناس محترمة سيكون محترم وهكذا
وبالخبرة سيبدا الشخص فى التعرف على نوع الاناس على الفايس بوك
ويسهل عليه حذف او اضافة ما يشاء

ولكن يبقى التميز على الفايس بوك
فى سهولة الوصول للناس والتنوع
بلينكات او جروبات او كلام فى الاستيتس او ايفنتات او فديوهات سهلة جدا ومباشرة من اليوتيوب
او اى شىء متعلق بالفايس بوك
وممكن يكون دعايا للمدونة فى نفس الوقت

ولكن المدونة تبقى محدوديتها فى وسيلة الدعايا
وهو الكلام والمقالات وفقط


واشكرك على الطرح وادعوك لاعادة النظر فى وجهة نظرك على الفايس بوك