Tuesday, July 17, 2007

فسقى لهما

اتذكرون قصه سيدنا موسى عليه السلام مع الفتاتين فى سورة القصص موقفه معهم وماذا فعل لهما قال الله تعالى
وَلَمَّا تَوَجَّهَ تِلْقَاء مَدْيَنَ قَالَ عَسَى رَبِّي أَن يَهْدِيَنِي سَوَاء السَّبِيلِ
وَلَمَّا وَرَدَ مَاء مَدْيَنَ وَجَدَ عَلَيْهِ أُمَّةً مِّنَ النَّاسِ يَسْقُونَ وَوَجَدَ مِن دُونِهِمُ امْرَأتَيْنِ تَذُودَانِ قَالَ مَا خَطْبُكُمَا قَالَتَا لَا نَسْقِي حَتَّى يُصْدِرَ الرِّعَاء وَأَبُونَا شَيْخٌ كَبِيرٌ
فَسَقَى لَهُمَا ثُمَّ تَوَلَّى إِلَى الظِّلِّ فَقَالَ رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ

قصه بتحكى ان سيدنا موسى لما خرج من مصر خوفا من فرعون وجنودة توجه الى مدين وجلس تحت شجرة ليستريح وجد فتاتين لا حول لهما ولا قوة تقفان بعيد توجه اليهم وسالهما مابكما قالتا نريد ان نحصل على المياه ولكن الرجال كثير حول المياه ولا نستطيع المزاحمه وبرروا خروجهما ان ابوهما شيخا كبير لا يستطيع الخروج فبكل مرؤه زاحم الرجال واحضر لهما المياه تذكرت هذه القصه وانا كنت فى نفس موقف الفتاتين بعد وفاه والدى رحمه الله عليه كانت هناك امور لازم اقوم بها بنفسى كان والدى رحمه الله عليه هو اللى بيعمل لينا كل حاجه اول مرة يكون ليا احتكاك مباشر بالمصا لح الحكوميه والبنك والقيام بشراء بعض الاشياء اللى كان والدى بيعملها لنا
اول مرة اعرف يعنى ايه طابور كنت اسمع عنه واشوفه من بعيد لكنى لم اتعامل معه عن قرب بكيت لاول احتكاك ليا بهذا العالم فوجئت بمزاحمه الرجال للنساء وانا لا اعرف اتزاحم فضلت واقفه بعيد انتظر ان يقل الزحام انتظر ان حد يفكر يساعدنى لم اجد على العكس الرجل ممكن يعمل لمس اكتاف علشان يبعد المرأة ومافيش مانع يخبطها ويزاحمها فى سبيل الوصول الى هدفه تذكرت وقتها قصه سيدنا موسى وكيف ساعد الفتاتين للاسف لا يوجد احد الان بهذه المرؤة مش عارفين ان ممكن يكون فيه بنات مش متعودة على المواقف دى للاسف حاجات كتير لا يهتم بها الناس مع انها ممكن تكون كبيره عند ربنا
لانه اغاث صاحب الحاجه الملهوف وكمان حافظ على بنت من انها تتبهدل وسط الرجال احنا للاسف بنقرا القران لكن ولا بنعمل باى حاجه فيه حد لو وجد بنت واقفه محتاره لا حيله لها هل بيفكر يساعدها هل فكر يسالها محتاجه ايه امامك نبى من انبياء الله فعلها ليه ربنا بيذكر الامثله دى علشان المفروض نعمل كدة لكن احنا بتقرا القران من غير تتدبر واعتبار ونفهم ليه ربنا ذكر الامر دة القران ربنا انزله ليعلمنا كيف نتعايش فى هذه الدنيا وينظم بها حياتنا واحدة مثلى ابوها مش شيخا كبير ابوها شيخا توفاه الله وهى لم تتعود على كدة والدها لم يتركها لهذه الامور ان تفعلها فى حياته كان يقوم بعمل كل شئ لها واضطراتها الظروف للخروج والاحتكاك بالعالم الخارجى وللاسف اتفجأت بواقع مرير واتصدمت فى الناس حتى المتدينين المتدين حجته ماينفعشى اكلم واحدة مش اعرفها انت مش هاتكلمها انت هاتقضى لها حاجتها
وخلاص يعنى انت افضل من نبى الله سيدنا موسى عليه السلام يعنى انت متقى الله خيرا منه وسبحان الله علشان سيدنا موسى عمل خير وفقه الله للزواج وتزوج واحدة من الفتاتين مع انه كان لا اهل له فى هذه البلد ولا زاد ولكنه عمله الصالح يسر له الخير
اللى واجهته بعد وفاه والدى رحمه الله عليه عرفنى قيمه والدى وقد ايه كان بيعملنا كتير من غير من نقوله شكرا لك يا والدى
جزاك الله عنا خير الجزاء واسكنك الله الفردوس الاعلى اللهم امين بارب العالمين
بجد ياريت بجد نقرا القران بتدبر اكتر ونعرف ماذا يريد الله منا من كل موضع من مواضع القران هاتفرق كتير الحياه
واظن هاتكون افضل كتير

31 comments:

أمــانــى said...

رفقــتى
المزاحمة فى ناس بتتعمد المزاحمة ومضايقتك والجملة اللى تسمعيها دائما وباستمرار مش انتو عايزين المساواة مين اللى قالكم احنا عايزين المساواة ساعات الظروف هى اللى بتحكم
على فكرة من ضمن اسبابى انى اسيب مهنة المحاماه للاسف الشديد الزميل مش بيراعى زميلته لالالا بيعاملها كانه زميل له
يااا الله على هذا الزمان
ولو حد فكر وعملك حاجة وقام بالواجب بيكون عايز يتقرب يعنى مفيش حاجة لله حاجة لاخت فعلآ محتاجة حد يقضى عنها حاجتها
وبرضو نسوا قول المولى عز وجـل
بسم الله الرحمن الرحيم
قول معروف ومغفرة خير من صدقة يتبعها أذى صدق الله العظيم

اللهم ارحمنا برحمتك الواسعة يااا الله
اللهم استرنا فوق الارض وتحت الارض ويوم العرض عليك
اللهم كنا معانا ولا تكن علينا نحن الضعفاء اليك

رينـــــــــــا said...

السلام عليكم
اولا ازيك يارب تكونى با الف خير
ثانيا للاسف احنا فى مجتمعنا اصبح قليل اوى اللى موجد عندهم شهامه رغم اننا مشهورين بكدا
بس بردوا ارجع واقول ان اللى هما كمان بيشوفوه من قرف فى وقت تخليص ورقهم هما كمان يعميهم عن اى حد فى الدنيا
دى مشكله نظام يا رفقه

ربنا معاكى دايما ويوقفلك ولاد الحلال يا جميله يارب

smraa alnil said...

حببية قلبي

اولا اعذريني علي تقصيري معاكي

انا بعتلك رساله فيها الرقم الجديد
وصلتلك ولا لا

بس بجد والله مشغولة جدا وبقيت انام بدري يا رفقة

عاااااااااا


المهم

اولا الله يرحم والدك ويسكنه فسيح جناته يارب
ويجازيكي عنه كل خير يارب

بالنسبة بقي للطابور والمرؤة

فانا عايزة اقولك ان في رجاله ممكن يساعدوكي بس لازم تكون فيكي شروط معينة

يعني لو بنت واقفة مش محجبة وحاطة 4 كيلو مكياج علي وشها ولابسة ضيق ولا مانع من ابتسامة او نظرة رضا لاي شخص
عشان ييلها ويوقولها اي خدمة يا انسة

غير كدة اصدمك واوقك اسفة
طريقك مسدود يا ولدي

واحشاني اوي اوي اوي اوي اوي اوي

ftataljanna said...

رفقتى

ربنا يصبرك يا حبيبتي

لو نقر القرآن بتدبر هانتعلم حاجات كتير اوى

مش بس اداب التعامل

ربنا له قوانين فى الكون

نظم العلاقات ونظم الآداب كل حاجة حتى القلوب

بس للاسف مابقاش في حد بيتدبر القرآن

ربنا يفرج كربك ويعينك على بلاءك واصبري واحتسبي الاجر

ويرزقك خيرا منها

.:.-=- ELGaZaLy-=-.:. said...

مش قادر اعلق...بس ربنا يصبرك..ويفك كربك...ومش قادر اعلق

رفقة عمر said...

امانى
عارفه لو كل واحد اعتبر ان اخته او مامته او بنته فى موقف تحتاج منه المساعدة هل هايتاخر عنها اكيد لا طبعا
طيب ليه كل واحد مش يعتبر اى امراة اخته او بنته فيه ناس فعلا مش عندها حد يساعدها انا الحمد لله قلت اجرب واعتمد على نفسى بس اللى شوفته خلانى ابعد عن الامور دى والحمد لله عندى اخواتى واقاربى بيعملوا ليا كل شئ دلوقتى بس موقف اتعرضت له بعد وفاه والدى وحبيت اعرضه لانه مش يخصنى انا بس يخص نساء شيوخ وبنات ليس ليهم احد يساعدهم ليه احنا مقصرين ومش نحاول نساعد من لا معين له
انا مش بعرض مشكله ليا لان الحمد لله عندى من يقضى لى حوائجى طيب والاخرين
لهم الله

رفقة عمر said...

رينا الجميله
اخبارك ايه
كل سنه وانت بالف خير
هما اكيد الله يكون فى عونهم بس بجد لو الانسان عمل خير ربنا هايسر له كله امورة
بس احنا مش عارفين كدة وبنعتمد على مجهودنا بس ومش بنتوكل على الله حق التوكل

رفقة عمر said...

سمرا النيل
وحشانى كتير ووحشنى طالتك
طيب واللى مش بيحب يحط مكياج يعمل ايه
ولو امراة عجوز تعمل ايه
مش عارفه يابنتى زمان المراه كانت ليها وضع تانى واهتمام
كانوا بيعتبروها زى الجوهرة دلوقتى للاسف بقت ولا حاجه دلوقتى ومتبهدله من الكل
ربنا يسامحك يا قاسم امين هاتروح من ربنا فين

رفقة عمر said...

فتاه الجنه حبيبه قلبى
شوفى مين اللى خلقنا الله وهو الاعلم ايه اللى ينفع لصنعته فجعل لنا القران
ليسير به حياتنا بس احنا ولا احنا هنا احنا فى وادى تانى خالص للاسف
بنعمل ما يحلو لهوى انفسنا
ربنا يكرمك على الدعاء
انا الحمد لله كويسه بس انا شوفت امور مش شوفتها قبل كدة حبيت اتكلم فيها
مش علشان نفسى لان انا الحمد لله عندى من يقضون لى امورى بس فعلا فيه ناس مش عندها حد دول يعنى يروحوا فين
مش كفايه اللى هما فيه كمان مش يلاقوا مساعده من الاخرين
المشكله عامه مش خاصه

رفقة عمر said...

استاذ الغزالى
شكرا ليك كتير على موقع القران انا استعنت بيه فى وضه الايات ربنا يكرمك يارب ويجازيك خير
انا والله الحمد لله بخير دة كان موقف كدة ومر وخلاص والحمد لله عندى من يقومون بهذا الامر لى انا بتكلم عن اللى مش عندهم حد يعملوا ايه يتذلوا ويتبهدلوا ولا اصحاب المرؤة والشهامه يحافظوا عليهم لان المفروض كل بنات المسلمين امه او اخته
دة اللى اعتقده يعنى

mo'men mohamed said...

معلش اختى برضه اعذرى الناس
كل واحد فيهم عنده همومه و مشاكله وبيته اللى عايز يرحله بعد ما يكون أنجز واجباته
بس انا عارف ان الناس فعلا فى غفله
لأنهم تقريبا كده مبيقروش القرآن أصلا ولا حول ولا قوة الا بالله

نسرين - أمة الله said...

السلام عليكم
ازيك يا رفقه
ربنا يرحم والدك واموات المسلمين اجمعين ويجريك فى مصيبتك ويخلفك خيرا منها
بصى يا رفقه احنا لو بصينا للموضوع لازم نبصله من الناحيتين
اولا فعلا الاغلبيه من الرجاله او اللى كانوا بييصولك كده وانتى محتاره نظره شماته زى كده ما يكونوا بيقلولك تستهلى مش انتوا عايزين كده
بس فى رجاله كتير بيكوانوا فعلا عايزين يساعدوا بس بيخافوا من رد فعلك انتى او من الفكر اللى ممكن يجى فى بالك من التصرف ده وعشان همم مش ضامنين رد الفعل بيفضلوا يبعدوا
ده من ناحيه الرجاله
بس كمان بصراحه فى بنات ممكن يتسببوا للرجاله فى مشاكل كتيره لو اتصرفوا معاهم كده يعنى بصراحه كده انا مش عارفه اجبهالك الذاى بس برضه فى بنات نيتهم مش كويسه
يعنى الحكايه مش من ترف واحد عشان منظلمش حد بس ده طبعا ميغنيش عن ان الشهامه فى طور النسيان

عصفور المدينة said...

أختي الفاضلة
بارك الله فيك لقد توفي أبي وعمري 28 سنة ومتزوج ومخلف وباعرف أعمل كل حاجة في الدنيا ومقطع السمكة وديلها
وحسيت بنفس أحاسيسك دي وقتها حسيت إني بقيت لوحدي وعلي أن أواجه الحياة لوحدي بدون عون فما بالك بك كفتاة أعانك الله
رحمه الله ورحم الله والدك ووالدينا أجمعين
أما بخصوص الموضوع الرئيسي
أقول وبالله التوفيق كثرة رؤيتنا للفتيات يزاحمن جعلت الإنسان يعاملهن عادي وده سبب لا يمكن إغفاله
شخصيا أحاول أن أساعد قدر الإمكانمن كام يوم أقربها
رأيت امرأة نصرانية وقع منها كيس فيه خضار واتقطع وقفت لميته لها وبعدين رحت اشتريت لها كيس بربع جنيه :) وحطيت الحاجة فيه وهي في غمرة الذهول والخوف ومش مصدقة وبعدين قعدت تدعي لي وأنا شايل الشنطة بتاعة القنابل
:)

abdallah mortada said...

سلامو علكو ازيك يا رفقة
معلش بقالى جتير مجتش عندك هنا بس انا كان عندى تدريب وما صدقت فضيت عشان اجي ارد


اولا المروءة غابت لما اساس المروءة غاب
لما الدين ينصلح هيصلح معاه الاخلاق

مرة واحدة وقعت في الطريق والحاجات اللى معاها اتبعترت رحت الم معاها الناس بقت تبصلى كانى بعاكسها
واصحابي اتريقوا عليا على اساس انى انخدعت وكدة
بس لحد دلوقتى مش شايف فيها حاجة
ان ا لو عندى اخت اتمنى انى لو مش موجود انها متتعبش وتتبهدل

انا بيصعب عليا حالى لما بشوف بنات بتزاحم الولاد في الموقف وبنات تانية زي حالاتك ممكن يستنوا ساعة واتنين على بال ما يلاقوا فرصة
على فكرة انتى عارفة البنت اللى اقصدها

على العموم بالنسبة لوضوع تدبر القرا
قال تعالى ( افلا يتدبرون القران ام على قلوب اقفالها)

بالنسبة لوالدك
انا هدعيله زيما بدعي لوالدى بالظبط ربنا يرحمهم جميعا

اللهم اغفر لهما وارحمهما واهدهما واجبرهما وعافهما واعف عنهما واكرم نزلهما ووسع مدخلهما واغسلهما بالماء والثلج والبر ونقهما من الذنوب والخطايا كما ينقى الثوب الابيض من الدنس وابدلهما دارا خيرا من دارهما ونزلا خيرا من نزلهما وزوجا خيرا من زوجهما واولادا خيرا من اولادهما

اللهم ان لم يكونا قد عملا عملا يتنفع به او لم يتصدقا صدقة جارية
فاجعلنا اولادهم الصالحون الذين يدعون لهم

امين امين


ملاحظة اتكى على اسمى عشان تلاقى مفاجأة

Anonymous said...

هى فعلا قصه جميله جدا
وبتبين اد ايه سيدنا موسى كان شهم وجينتل
بوستاتك جميله جدا
ربنا يكرمنك ويعينك
تحياتى ليكى
سلام

eldoctor said...

طيب و اللى بيقرلأو القرأن .. صبح و ليل ؟؟ و برضه مفيش فايدة ..؟؟؟
المشكلة فى التطبيق مش فى القراءة ولا فى الفهم ... يعنى مش عايز اقولك ان فيه ناس عندها علم الواحد يتمنى ربعه أو عشره انما فى التطبيق العملى ... صفر .. مفيش علاقة بين العلم و العمل .. عافانا الله و اياكم ..

BinO said...

أختي في الله رفقة عمر
كيف الحال
أتمني أن تكوني في خير حال
أشكرك علي السؤال
وأعلم أني مقصر نوعاً
ولكن
الكلام يأتي علي هواه
وطرطشة الأفكار تملاء الساحة
وتشعرني بالغثيان
حتي ردود أفعال الناس علي أخر موضوع كتبته
:)
كانت عجيبة
لا أتكلم علي الذين علقوا
أنا بتكلم علي اللي معلقوش

وأتكلموا معايا في محدثات خاصة
:)
وأنا قصدت نوعاً أني أترك الموضوع فترة طويلة
----------------------------------
سيدنا موسي عليه السلام
ذلك القوي الأمين
في أحد التفسيرات قيا أن نبي الله موسي قد أتي و البئر مغطي بصخرة تستلزم أربعة رجال لرفعها
وقام برفع الصخرة وحده وسقي لهما

الفتاتان الصالحتان
لا يخرجان من بيتهما الا لضرورة
ضرورة يا جدعان
بل وبررار ذلك أيضاً
أبوهما شيخ كبير
أين تلك الفتيات اليوم

قيل أيضاً أنه عند عودة أحدهما لدعوة سيدنا موسي ليقابل والدهما
مشي سيدنا موسي أمام الفتاة
حتي لا ينظر اليها
وكانت توجه بحصوات ترميها يمين وييسار
لم تكلمه حتي
حتي لا ينزغ الشيطان

عندما ذهب سيدنا موسي وقابل والدهما
أختاره زوجاً لأبتنه
لماذا
؟؟؟؟؟
لأمانته
فقط
وهو لا يملك من الدنيا شئ
أين هؤلاء الأباء
--------------------
اختنا رفقة
رحم الله والدك
أمين
ولكن كما ترين
الصورة تحتاج الي أكتمال
حتي أبطال قصص الشهامة متكافئين
أين هم الأن

طبعاً هناك أباء مثل أبا البنتين
وهناك فتيات مثل البنتين
فما المانع من وجود هؤلاء الشهماء
؟؟؟؟
موجودن
حتي تلك الحجة التي نعت بها المتدينين
ليست غالبة
كما تتخيلين
ولكن مواقف الفتيا نفسها تغيرت بتغير الزمن
و الثوابت نفسها أتغيرت
البنت دلوقتي بتنزل من بيتها تشتغل
ليه؟؟؟؟
محتاجة فلوس
لأ
أثبات ذات
؟؟؟؟؟
حاجة؟؟؟؟
ضرورة؟؟؟؟
والله أنا مش بنفي قضاء حاجات الأخرين
ولكني أحاول أن أوضح الفرق بين المواقف
وأتساع نطاق الفتن
ربما بسبب أحتكاكي بالحياة العملية أكثر
حوالي 10 سنوات متغرب بين أكثر من بلد وقابلت ناس كتيير وحصلت لي مواقف وأحتكاكات كتير

الملتزم الذي يعرف دينه
يعرف مدي أهمية قضاء حوائج الأخرين
ومتي يلزم عليه تقديم المساعدة
ومتي يبتعد بنفسه ليدرء عنها الفتنة

هل تعلمين قصة عابد بني أسرائيل؟؟؟

معذرة
واضح أني كتبت بوست مش تعليق
أعتذر
وجزاكم الله خيراً

بقي أن أذكر
إِنَّ اللّهَ لاَ يُضِيعُ أَجْرَ الْمُحْسِنِينَ }التوبة120

نعم هو كذلك
والمحسنين موجودون

والله المستعان

الطائر الحزين said...

السلام عليكم

حمدا لله على سلامتك
جزاك الله خيرا
بصراحة هناك مقاييس متلخبطة
يعنى ليست كل المواقف ينفع تطبق عليها نفس المعايير
يعنى لو بنجيب عيش والطابور كبير
ده موقف مينفعش نقول مساواه الكلام الغريب هذا

العبرة فى ابتغاء وجة الله
لو كلنا فكرنا

و فى كدة يبقى مفيش مشكلة
مادمنا نبتغى وجة الله
تحياتى لحضرتك

رفقة عمر said...

مؤمن محمد
والله عارفه ان الرجال برضه تعانين ومشاكل الحياه منسياهم حاجات كتير
بس بجد انا وانا لما حدث ليا الموقف دة افتكرت قصه سيدنا موسى مع الفتاتين
لان فعلا فيه بنات متعرفشى تقتحم هذا العالم متعرفشى تزاحم الرجال قولت يااه لو الناس تعمل بالقران وذكرت كمان موقف الفتاتين لامى برضه معترضه على مزاحمه النساء للرجال لان البنت عندى انها لاتقضى حاجاتها خير لها من ان تزاحم الرجال
القصه رساله لناس كتير مش لحد بعينه

رفقة عمر said...

نسرين- امه الله
اخبارك ايه يارب تكونى بخير
شوفى انا مع عدم خروج المرأه الا لضرورة واذا عملت يبقى فى عمل يحتاجها فعلا مثلا دكتورة للنساء معلمه للنساء يعنى الووظائف اللى تخدم بها اخواتها من النساء غير كدة لا
انا دراستى ادارة اعمال واى عمل اقوم به يحتاج احتكاك مباشر بالرجال انا مش حبيت دة فضلت البيت وماصدقت اصلا انى انهى دراستى فى الجامعه بسبب الاختلاط اللى كا بيخنقنى جدا
سواء من البنات اللى مش بتراعى حرمه اى شئ او من بعض الرجال الا بيعامل الفتيات بطريقه مش لطيفه
يعنى انا لما حاولت اتعامل بنفسى واقضى حوائجى وجدت انا مانفعشى لهذه المهمه لانى معرفشى ازاحم وادخل وسط الرجال ابدا
بس فيه ناس بتخرج لضرورة فعلا عارفه لو الاسلام بيطبق صح الاسلام لديه حلول لكل دة لانه بيتكفل بكل فرد حتى الارمله والييتم الاسلام اهتم برعايتهم
يالله لازم نتحمل زمننا هذا

رفقة عمر said...

استاذ عصفور المدينه
فعلا الحياه بتفرق كتيير بعد فقد الاب رحم الله اباءنا رحمه واسعه اللهم امين يارب العالمين
لا تتخيل سعادتى بحضرتك قد ايه لانى باكون سعيدة قووووى بكل واحد يطبق الاسلام صح مش هيئه وبس لان الدين مش عبادة وبس الدين اخلاق
الرسول الكريم قال اقربكم منى مجلسا يوم القيامه احاسنكم اخلاقا
جزاك الله خيرا استاذى عصفور المدينه

رفقة عمر said...

allah-slave
السلام عليكم عبدالله اخبارك ايه مبروك دخولك البلوج سبوت وشكرا للاستجابه ربنا يكرمك يااااااارب
انا عارفه عبدالله اخلاقك وانى احسبك ان شاء الله من الذين يستمعون القول فيتبعون احسنه معلش مع انك لسه صغير فى السن لكنك كبير فى ايمانك واخلاقك واتباعك للصح ربنا يزيدك ويثبتك يااارب وياريت يكون فيه ناس كتير مثلك الدنيا هاتفرق كتييييير قوى
ربنا يوفقك تكون احسن مهندس فى بلاد المسلمين اللهم امين يااارب العلمين

رفقة عمر said...

استاذ محمد جادو
اهلا بحضرتك ربنا يكرمنا واياكم
وجزاك الله خيرا

رفقة عمر said...

استاذى الدكتور
مشكلتنا اننا بناخد من القران اللى يوافق هوانا وبس
الله تعالى قال
افتؤمنون ببعض الكتاب وتكفرون ببعض فما جزاء من يفعل ذلك منكم الا خزى فى الحياه الدنيا ويوم القيامه يردون الى
اشد العذاب
رزقنا الله حسن الاتباع اللهم امين يارب العالمين

رفقة عمر said...

اخى بينو
انا الحمد لله بخير جزاك الله خيرا للسؤال وانا معاك فى ان فيه كلام كتير على المدونات يثير الغثيان بس انت لاترك الساحه لهذا الغثاء لاز م تحاربه بالكلمه الطيبه
انا معاك ان فى بعض البنات غيرت صورة البنت فى نظر الرجال وانا معك انى اعترض على طريقتهم بس برضه فيه بنات بتضطر للخروج زى كدة لما كنت لازم اذهب للبنك بنفسى ولازم انهى بعض الاوراق بنفسى وانا طول عمرى لا احب المزاحمه ممكن اقف ساعات ولا ازاحم
وبعدين مشكله عابد بنى اسرائيل انه خلا بالفتاه لكن ان الواحد يساعد فتاه فى مكان عام ايه المانع يعنى مثلا هو واقف فى الطابور ووممكن مثلا يقطع لها تذكرة معه او يدفع له او اى شئ ايه الغلط فى دة
على فكرة كنت نفسى تتطول اكتر من كدة كلامك بجد فى الموضوع جميل وخسارة انه تعليق مش بوست
ربنا يكرمك يارب ويوفقك لما يحبه ويرضاه

رفقة عمر said...

الطائر الحزين
اهلا بحضرتك
الله يسلمك جزاك الله خيرا
فيه حاجات كتير متلخبطه واحنا للاسف السبب فى اللخبطه دى لاننا اتدخلنا فى تشريع الله علشان كدة الناس نسيت امور كتير قوى وبقت عايشه ازاى تحصل على الرزق وبس
فضاعت حاجات حلوة كتير كانت فينا

Anonymous said...

عندك الف حق طبعا


اتذكر مرة كنت خارج من صلاة القيام في رمضان منذ ما يقرب من عشر سنوات وصديق يكبرني بعدة سنوات كثيرة وملتحي ولابس للجلباب واللي ما يعرفوش يقول اكيد متطرف وقافش على الدنيا


لقينا بنتين واقفين جنب سيارتهم-كان شكلهم خارجين من القيام برضه -هو فهم من اول نظرة للموقف وذهب ودفع السيارة اللي بتسد عليهم الطريق لخروج سيارتهما....ثم تولى الى الظل...رجع لنا يعني


احنا طبعا-الأصغر سنا-كنا متنحين ولا فهمنا الموقف بسرعة كده مثله
لكن شخصيا عجبني جدا اللي عمله


لكن الموقف اظن انه علق مع كل واحد منا

فعل رجل في الف رجل خير من قول الف رجل في رجل...من قالها كان محقا

لحظة said...

طبعا لازم يحصل لنا كده واكتر من كده
مش نزلنا الشارع
وقال بيقولو الشارع لنا
انا دلوقت معتكفة في البيت
مش بنزل غير لضرورة
عشان اكف عن نفسي الاذى
وقرف المواصلات
وزحمة الناس
ومستوى الحوار
وفوضى الاصوات
بس انا عندي اللي يقضيلي حاجتي
اللي معندهمش يعملو ايه؟

رفقة عمر said...

الصارم الحاسم
حمد لله على سلامتك الحمد لله انك بخير
كلامك طبعا كله صح والحمد لله ان فيه ناس مثلك بتفكر فى مساعدة الضعفاء سواء كانوا نساء او شيوخ او اطفال
----------
لحظه
اخبارك ايه منورة المدونه
انا كمان مثلك بقى خروجى محدود جدا لان الدنيا بقت زحمه قوى ولناس بتخبط فى بعضم مش بيفرقوا بين رجل وامرأة
ربنا يصبرنا على اقدارنا اللهم امين يارب العالمين

صاحب البوابــة said...

اعتذر عن التحليق خارج السرب

لكنني أريد رأيكم للأهمية في آخر موضوع لي

بعنوان

شكــر وإعتــذار

تحياتي

قوت القلوب said...

السلام عليكم

اعتذر ليكي عن تأخيري في الرد عليكي..بس الظروف عندي صعبة شوية..

طبعا انت تناولتي موضوع مهم جدا..وجيتي على الجرح زي ما بيقولوا

دلوقتي حاليا والله الواحد نادرا اما يلاقي راجل شهم او جدع ..بقم قلة قليلة جدا

والله انا بتبهدل بسبب الجنس الاخر دول بهدلة فظيعة

زي مثلا حكاية المواصلات دي..مرة نركب اتوبيس انا وصحبتي وفضلنا واقفين وتلات اربع الاتوبيس رجالة..ومفيش واحد احترم نفسه وقام يقعدنا ..

ولا وايه كمان..فضي كرسيين قام واحد جاري وداخل ..وقفنا بصيناله انا وصحبتي كده..يعني فعلا حاجة بقت لا تحتمل

وفي باقي المواصلات يزاحموكي ويزقوكي كمان عشان يركبوا

وفي المصالح والحاجات دي..كله بقى بهدلة في بهدلة..زي ما حصل معاكي

يلا الواحد ليه ربنا ..وربنا يستر ويتولانا برحمته يارب

والف شكر ليكي يا رفقة على البوست الجميل ده..وربنا يوفقك يارب ويكرمك ويرزقك بالزوج الصالخ اللي يسعدك في الدنيا والاخرة..اللهم آميين

والسلام عليكم