تحقيق المستحيل

يوم 24 يناير كانت هناك مستحيلات هى

رحيل السيد مبارك الرئيس السابق ( احتراما لكبر سنه) عن الحكم

الغاء فكرة التوريث تماما

حل مجلسى الشعب والشورى

استقاله جمال مبارك

استقالة حكومة نظيف

حبس العادلى وعز المغربى وابو العنين وغيرهم من المسئولين ورجال الاعمال

فتح معبر رفح

تعديل الدستور

تجميد اموال جمال مبارك وعائلة مبارك

الافراج عن المعتقلين اللى هما نفسهم كانوا يأسين من انهم يخرجوا

خطبة الشيخ القرضاوى على ارض مصر

ظهور المتحدث الاعلامى للاخوان فى التلفزيون الحكومى المصرى منذ انشاء التلفزيون من 60 سنة

بمعنى ان مصر اتقلبت من رأسا الى عقب واتغير الحال بشكل مدهش للجميع

وطبعا كل دة كان من المستحيلات قبل يوم 25 يناير

ومع كل التغيرات السريعه هذه مازال الثوار فى شك ان كل ما يحدث حقيقة ويشككون فى نوايا اى احد

حتى انهم يقولون ان هناك ثورة مضادة اى ثورة تتحدثون عنها مضادة تفتكروا جمال مبارك ليه عين يحكم البلد تانى بعد الفضايح دى كلها

تفتكروا انه يقدر يحكمنا غصب عنا بعد ان كسرنا حاجز الخوف وتحدى الثوار اعتى الجيوش وهو الامن المركزى والبلطجية

تفتكروا بعد استنشاق عبير الحرية والقدرة على قول كلمه لا فيه احد هايقبل انه يستعبد مرة اخرى

بيقولوا بيرققوا قلب الناس على الرئيس السابق مبارك وانه مريض وفى غيبوبه ياجماعه ايه المانع ان يكون الرجل فى غيبوبه دة بشر وضعيف وكبير فى السن ومريض دة لو مدير تم فصله من الشغل لمات بالسكتة القلبية من الحزن ما بالكم برجل تم نزع الملك منه بشكل لا يحسد عليه نسأل الله العفو والعافية

حتى احمد شفيق اللى الكل كان يتمنى ان يكون رئيس وزراء مصر واللى عاوز يعمل ميدان التحرير هايد بارك علشان اللى يحب يتظاهر يجد المكان المناسب للتظاهر تريدون تغيره وانا بصراحة شايفاه بيحاول يصلح ويكون اهل ثقة للشعب المصرى

كلنا من النظام السابق كلنا تأثرنا بشكل ما بالنظام السابق مش معقولة محدش فينا اعطى رشوة علشان يقضى مصلحة ما حتى ولو غصب عنه مش معقولة محدش فينا اشتغل بالواسطة كل واحد اول ما يتخرج بيدور على واسطه وممكن ياخد حق واحد معاه تقدير ممتاز وهو ممكن يكون جاب مقبول بالعافية

هو المفروض لو فيه رجل شريف يمنع نفسه ان يكون وزيرا فى النظام السابق طيب مصر لو كان كل الشرفاء فيها تركوا العمل فى النظام السابق كانت هاتمشى ازاى

يبقى لو احنا رافضين كل من كان يعمل مع النظام السابق يبقى احنا كدة محتاجين نستورد شعب جديد ونترمى جميعا فى النيل وتبدأ مصر من اول وجديد على نضافة بناس نضيفة لم تتعامل مع النظام السابق

يااهل مصر مصر اهم ارجوكم بلاش شقاق اكتر من كدة اتركوا السفينة تسير

فيه مثل بيقول المركب اللى فيها قبطانين بتغرق

البلد منذ 30 سنة تتدار بالنظام السابق ارجوكم انتقوا من النظام السابق من هو معروف عنه الشرف يسير بمصر هذه الفترة على خير ويعين مع كل وزارة ناس من اهل الثقة من الحكماء يراقب عمل الوزارة ويتعلم ويعرف كل شئ عن ادارة الدولة ويكونوا مستشارين لهم حتى اذا مرت الفترة الانتقالية على خير يكون وقتها المستشارين علموا بخبايا الحكم وادارة الدولة وبعدها يتم تشكيل الوزارة الجديدة منهم

وعاوزة اذكركم بنبينا الذى هو معلمنا وهو ما ينطق عن الهوى ان هو الا وحى يوحى

تذكروا ان خالد ابن الوليد كان اكثر من حارب الرسول وهو كافر فى معارك كثيرة وهو بذكائة كان سبب الثغرة التى حدثت فى غزوة احد

ثم اصبح بعد اسلامه سيف الله المسلول

ووحشى الذى قتل سيدنا حمزة رضى الله عنه كان هو من قتل مسليمة الكذاب مدعى النبوة

ارجوكم كلنا مصرين والفاسد سيعاقب والصالح الناجح نبقى عليه فى ظل جو النظافة اللى هايكون فيها سيعطى كثيرا خياركم فى الجاهلية خياركم بعد الاسلام

ارجوكم نفسى مصر ترجع مستقرة تانى وبفضل الله ثم بعزيمتكم ستكون هى الدولة الاولى فى العالم ان شاء الله

رجاء كفاية تخوين ونبدأ نشتغل ولتسير عجلة الحياة مع استمرار شعلة الثورة مشتعلة لتحمى مطالبكم وليتم تنفيذها

ولتظهر فى اى وقت يتم فيها التخاذل

عندى فكرة للثوار المخلصين لماذا لا تتفقوا مع الحكومة ان يتم تشكيل لجنة مراقبة منكم على كل وزارة وفى كل محافظة لمتابعة ما يتم انجازة من الحكومة وبكدة هانحل جزء من مشكلة البطالة ومشكلة عدم الثقة الموجودة بينا وبين الحكومة

ليا رجاء للممثلين اللى كانوا مشاركين فى الثورة نحن بنادى الان بعود اخلقنا الجميلة من فضلكم لا نريد رؤية مشاهد عارية ولا الفاظ خارجة نريد ان نرى اخلاق جميلة نتعلم منها كما انكم علمتم الناس سؤ الاخلاق ارجو ان تعلموهم الاخلاق الحميدة

عاوزين نطهر مصر من النظام القديم ومن افلام واغانى ومسلسلات وبرامج النظام القديم كله يكون باخلاق الثورة وادبياتها

شكرا للثوار الذى اعاد ترتيب البلد مرة اخرى وكشف لنا عن الوجة القبيح التى كانت عليه مصر وكنا نعتقد ان مصرفقيرة علشان كدة كنا ساكتين وراضين بالقليل

الحمدلله الذى بفضله وحده تم النصر

وما رميت اذ رميت ولكن الله رمى

ورجاء لا تفكروا كثيرا فى نظرية الثورة المضادة لان الشعب الان اصبح على كلمة رجل واحد فاى ثورة مضادة تقدر على 80 مليون مصرى

ما شاء الله اللهم بارك

ورجاء نترك احمد شفيق رئيسا للوزراء لان الرجل اعتقد من كلامه انه صادق وجاد ومتحمس للثورة جدا حتى تجد نظرة الفرحة فى وجه حتى لما كان الرئيس السابق مازال لم يتنحى بعد لقد احيتوا احساس الوطنية بداخلنا جميعا واعتقد ان حتى الفاسدين زمانهم نادمين انهم لم يكونوا معكم فى ميدان التحرير