وداعا اختى

طوال حياتى وانا اكره الفراق اى كان هذا الفراق لانه اصعب شئ فى الدنيا انك ممكن ياتى يوم لاترى فيه من تحبهم سواء اقارب اصدقاء جيران وانا ممكن اتحمل اى شئ فى الدنيا واى الام الافراق من احب هذا بالنسبه لفراق الدنيا وانا اعلم انه حى بس مجرد عدم رؤيه من احبهم يحزنى مابالكم بفراق الموت احساس صعب انك تفقد اقرب الناس اليك لقد فقدت اختى الكبيرة يوم الاثنين الماضى 15/1 بعد فترة قصيرة من اصابتها بجلطه دخلت على اثرها المستشفى واخبرنا الاطباء انها تحتاج الى عمليه ويجب ان نعجل بها فعلا كلمنا مدير المستشفى وهو قريب لنا وطبعا قام بتوصيه كل اطباء المستشفى وطقم التمريض عليها وكانت رعايه 7 نجوم وايضا قام اهل زوجها بابلاغ المحافظ لانه قريب لهم حتى يقوم هو ايضا بتوصيه الاطباءعليها والاهتمام بها واحنا طبعا كنا مطمنين بكل هذا الاهتمام ونحن فى غفله ان كل دة لايجدى بشئ طالما ان الله لايريد لها الحياة وانها خلاص فى ايامها الاخيرة ونحن لانعلم والاطباء حولها ونحن قريبين منها ولا ندرى انها ساعاتها الاخيرة كنا مغيبين تماما مطمنين انها تلقى رعايه فوق العادة ونحن بجهلنا اعتقدنا ان الاطباء هما اللى بايديهم حياتها ونسينا الله فى غفله منا وقف الاطباء بكل الاجهزة والادويه حتى يقوموا باحياء القلب بعد ان توقف لكنهم عجزوا وفاضت روحها الطاهرة رحمه الله عليه تذكرت قوله تعالى (فلو لا اذا بلغت الحلقوم, وانتم حينيذ تنظرون, ونحن اقرب اليه منكم ولكن لا تبصرون , فلولا ان كنتم غير مدنين, ترجعونها ان كنتم صادقين)صدق الله العظيم لم يفيد اى شئ ولا اى رعايه زيادة ولا اى واسطه ولا توصيه لها لما امر الله نفذ لم يجدى اى شئ وقف الطب والاطباء عاجزين عن فعل شئ يارب لك الحمد على كل شئ ولكنه الام الفراق

وقفت اتامل كثيرا لما حدث لانه كان مفاجأة لينا وجدت ان الموت هو الحقيقه الوحيدة فى هذه الدنيا وانه لامفر منه وانه ياتى بغته سالت نفسى ليه الناس بتتعدى على غيرها ليه الحروب والدمار وهم اموات لايعلمون متى تأتى ساعاتهم الناس اللى عايشه حياتها بالطول والعرض وتفعل كل شئ يغضب الله لماذا ينسون الموت هل هم مش مؤمنين انه بعد الموت فيه حياة اخرى اما جنه او نار هل الامر هين عندهم قوى كدة لانى انا اول مرة اشوف انسان متوفى امامى وكانت اختى رحمه الله عليها فجأة بعد ماكانت لسه بتكلمنا فجأة انادى عليها لاترد احركها لاتتحرك اصبحت لا حول لها ولاقوة لانى اول مرة ايضا احضر غسل وتكفين ميت اكتشفت ان المرأة لازم ترتدى الحجاب عند تكفينها يعنى الكفن بالاضافه الى الحجاب يعنى يامن ترفضون الحجاب هاتلبسيه هاتلبسيه شئتى ام ابيت يبقى تلبسيه باردتك احسن حتى تقابلى ربك وهو راض عنك لانك هاتلبسيه يوم موتك وتكفينك فعلا كما قال الرسول الكريم( كفا بالموت واعظا) صدق الرسول الكريم حبيت اكتب هذا البوست لارثى فيه اختى الحبيبه التى عملت لنا مفاجأة لم تكن فى حسبنا

وجدت هذه الكلمات فى مدونه هبه المنشاوى وعجبتنى واثرت فيا لم يكن فى بالى انى ممكن استخدمها فى رثاء اختى رحمه الله عليها

ليـــــه يــا زمـــان بتـاخــد منا اعـــز النــــاس

وتسيــبنــا بعــدهــــا نعـــانـــي الـــويـــل والآه

دة مش اعتراض على القضا وعايشه والله على الرضا

بس كل خوفى من الجفا قلبى يتعود على كدا

خدت منا اغلى الناس وسيبتنا كدا من غير كلام

نعيش مع صدمه الايام نرجع نقول خلاص دى اخر الاحزان

ونغرق تانى فى الاحلام ونعرف ناس ونتعلق بناس ونحب ناس

ترجع تفوقنا على فراق امر من اللى فات

وينزل علينا الخبر ولا على البال والدور هايجى علينا فى يوم من الايام

ونبقى ذكرى عدت على بال ناس

ناس تعدى على ناس وناس تسيب ناس

واهى دايرة تنزل ناس وتطلع ناس الله يرحمكم يا اعز الناس

دامهما طال الزمان وطول مالعمر فيه ايام

هاتبقوا دايما فى البال ولا ممكن تكونوا فى النسيان

ارجو من يقرأ هذا البوست ان يدعو لاختى ولكافه اموات المسلمين بالرحمه والمغفرة