Tuesday, October 04, 2011

ساقط قيد

انا ليا صديقات احسبهم على خير ولا ازكيهم على الله ملتزمات حافظات للقران محبات لفعل الخير المهم هؤلاء الصديقات بيقوموا بعمل اطعام للفقراء فيما بينهم من غير مايكونوا تحت جمعيات او اى شئ واحدة داعيه فاضله ارشدتهم على الاماكن التى يتواجد فيها المحتاجين هن نشاطهن عبارة عن القيام بزيارة هؤلاء المحتاجين كل اثنين وخميس ومرة يكون الطعام جاهز للاكل و المرة الاخرى يكون عبارة عن مواد غذائيه مثل ارز سمن فول عدس وهكذا يعنى وشنطه شهريه تشمل كل متطلبات الشهر وفى المواسم مثل الاعياد ورمضان يتم توزيع ملابس واحذيه وفى الشتاء يتم توزيع بطاطين لمن يحتاج واذا احتاج احد علاج ايضا يقومن بمساعدتهم فى الحصول على الدواء ويحصلون على مواردهم من اهل الخير ومش عارفه ااقول ازاى بيتذلوا علشان يحصلوا على هذه الاموال اهم ما فى الموضوع انهم بيذهبوا بنفسهم الى هؤلاء المحتاجين كل واحدة بتعرف تقود العربيه تأخد عربيه والدها او عربيه اخوها او عربيه اى حد من اقاربها ويتم وضع شنط الطعام فى شنطه كل عربيه وبيكون حوالى اربع او خمس عربيات وكل عربيه فيها حوالى خمس بنات ويتم توزيع كل عربيه على منطقه معينه المهم كنت مرة مكتئبه وحاسه بضيق فظيع اقترحت عليا واحدة من هؤلاء الاخوات انى انزل معهم وقد ايه ان كل الحزن اللى عندى هايروح وانى هاسعد بهذا العمل وفعلا نزلت معهم ويا لهول ما رأيت ناس عايشين تحت خط الفقر بكثير وجدتهم يعانون من امراض مستعصيه دخلنا اماكن اشك انها على الخريطه اصلا شوارع ضيقه جدا لا تمر خلالها العربيه تخيلوا لسه هذه الشوارع مرصوفه بالبلاط الاسود بتاع زمان يعنى من ايام المماليك بيوت نزلت تحت الارض من كتر عوامل الزمن المجارى ضربه فيها والمياه تملئها لا يدخلها شمس ولا هواء الرائحه لا تطاق انا كنت هايغمى عليا من الرائحه البيوت عبارة عن مجموعه حجرات وكل اسرة بكامل افرادها يعيشون فى هذه الحجرة بداخل الحجرة سرير وكنبه وبوتجاز وترابيزة عليها تلفزيون وطبعا كل حاجه قديمه جدا والحمام مشترك بين جميع الاسر وعبارة عن متر فى متر وطبعا حمام بلدى غير بقى بالاضافه لهذا الفقر امراض مستعصيه مش قادرة اقول لكم قد ايه اتعصبت من صمت الحكومه وترك هؤلاء من غير حتى ماتفكر تعمل ليهم اى شئ دول اول ناس لازم يكون فى اولويات اى حكومه انا حسيت انى فى بلد تانيه ولم اصدق ان الاماكن دى موجودة ومجهوله من غير ماحد يفكر يشوف هى محتاجه ايه وبكيت لما شوفت ان ناس ذى دى محدش حاسس بيها واكثر شئ ابكانى والله العظيم اللى بقوله دة حصل واحد جرت ورانا وقالت وعلى وجها ابتسامه رضا لم اجد مثلها فى حياتى قالت من فضلكم انا عايزة مرتبه اضعها تحت السرير علشان اولادى بيناموا تحت السرير على البلاط وانا وزوجى بنام فوق السرير لاننا عايشين فى غرفه واحدة والدنيا برد على اولادى ودة يعنى اقصى امانيها كانوا لما بيشوفونا واحنا جايين بيكونوا طايرين من السعادة ان فيه حد حس بيهم حد بيزورهم كانت واحدة من الاخوات ربنا يكرمها كانت تقول لنا استحضروا نيه اطعام محتاجين ونيه زيارة اخوة لنا فى الله ونيه عيادة مريض حتى نأخذ الثواب بعد قيامى بهذا العمل صغرت الدنيا فى نظرى احنا عندنا كل شئ ومتبطرين على حياتنا وعندنا اكتئاب انا بقيت انكسف البس ملابس غاليه لان فيه ناس محتاجه تعيش الشهر كله بثمن هذا الطقم اللى هاشتريه فيه ناس حزينه انها بقالها شهرين مش عارفين يغيروا الموبيل وهؤلاء البؤساء المنسين اللى انا سمتهم ساقطى القيد ترى السعادة والرضا على وجوهم اقصى امانيهم انهم يجدوا لقمه يأكلوها فى هذا اليوم ويباتوا يشكروا الله على كل شئ سألت نفسى اين الحكومه اين نواب الشعب اللى المفروض الناس دى ملزمه منهم اين فلوس الزكاه مصر مليانه اغنياء تعدت اموالهم المليارات يعى زكاته لاتقل عن واحد او اتنين مليون فى السنه اين ايرادات التى تحصل عليها الحكومه من تحصيل فواتير الكهربا والمياة والتليفونات والضرائب والقطارات وقناة السويس والبترول والصادرات هؤلاء فين حقهم من كل دة احنا كلنا هانتحاسب عليهم لان ربنا قال فى كتابه الكريم ( وفى اموالهم حق معلوم للسائل والمحروم) دى ايه خاصه بالزكاة يعنى الفقراء احنا بناكل حقهم دة حقهم مش تفضل منا عليهم واذا لم نعطيه لهم هانكون بنأكل فلوس حرام لانها مش فلوسنا دى فلوسهم هما والايه الاخرى خاصه بالصدقات( وفى اموالهم حق للسائل والمحروم) لم يذكر الله هنا معلوم لان الصدقه دى ليس لها حدود اعطى على قدر طاقاتك وربنا لم يجعل لهم سوى 2.5% دة كتير ازاى يكون فيه ناس عايشين كدة ولا يدرى بهم احد الله وحدة اللى عالم بهم وهؤلاء سوف يدخلون الجنه قبل الاغنياء بخمسين الف سنه الرسول صلى الله عليه وسلم قال (ان الفقراء يدخلون الجنه قبل الاغنياء بخمسن الف سنه) حتى سيدنا عثمان بن عفان كان يقلقه هذا الحديث جدا لانه كان من الاغنياء والرسول صلى الله عليه وسلم قال اللهم احشرنى فى زمرة المساكين هؤلاء المساكين هم احباب الله وهو اعلم بهم كل غنى هايقف وهايسأل عن كل فقير فى هذه البلد كل نائب خدع الناس وقال انا ممثل لكم حسابه عند ربه يوم لا ينفع مالا ولا بنون ايها المكتئبون وانتم تملكون كل شئ اذهبوا الى هذه الاماكن وشوفوا الرضا على الوجوة وجوه لم تتدنسها المدنيه ولا العولمه واجمل شئ ليس فى قلوبهم حقد يأخذونا بالاحضان والقبولات ولانسمع منهم سوا الدعاء لنا وشكر الله وهم فى سعادة لا نملكها نحن اتذكر انه فى ولايه سيدنا عمر بن عبد العزيز كان من كتر عدله وتوزيعه العادل للثروات كانوا بيضعوا اشوله الاموال امام الناس ولا يوجدواحد يمد يدة لانهم كلهم استكفوا ولم يعد هناك محتاج اقرأوا قصه سيدنا عمر بن عبد العزيز وانتم تعرفوا القصه
ايها ساقطى القيد المنسين لكم الله وحسبى الله ونعم الوكيل على ظالميكم واكلى حقوقكم سيقتص الله لكم منهم عاجلا لا اجلا امين يارب العلمين
واصبر حتى يحكم الله وهو خير الحاكمين
البوست دة كتبته فى يوم
18 /2/2007
وبافكركم ان اللى بيدير الحكم نفس اللى كانوا موجودين فى النظام السابق ويعلم بحال هؤلاء تفتكروا حالهم هايتغير ولا هايظلوا كدة ليوم القيامة

16 comments:

omar said...

السلام عليكم ورحمة الله وبركاتة
رفقة والله لو مشينا على شريعتنا وسنة رسولنا الكريم لن يكون هناك محتاج الله سبحانه خلق من الخير مايكفي الكل ولكنه جشع من نسى الله وان هذة الدنيا ما هي غير فترة مهما طالت فهي قصيرة فلا أعرف كيف يستطيع هؤلاء اللصوص الذين يسرقوا قوت الشعوب أن تغمض لهم عين ولكن أذا غمضت أعينهم فهناك عين لا تنام سوف تنتقم منهم

ma_3alina said...

الحقيقة البوست مفاجأة لي .. مفاجأة حقيقية ..
مش لأني ما كنتش أعرف إن دا حالنا وحال المسلمين .. فأنا اعرف أن مصر يحكمها عصابات ليس لديها ضمير بتدوس على أي حد عشان مصلحتها حتى لو كان الحد ده أطفال نايمين ع البلاط تخت السرير .. وما خفي كان أعظم
لكن المفاجأة الحقيقية عندي هما صديقاتك .. الحقيقة أنا مش كنت عارف إن فيه كده .. أنا مش حزكيهم كتير لأني جنبهم لا شيء وتزكيتي لهم مش حتزيدهم شرف .. لأنهم حازوا كل الشرف
بلغيهم سلامي .. قولي لهم .. واحد مسلم بيقول لكم أنتم تاج على رؤوسنا .. وأنتم شعاع الأمل لأمتنا ومصدر عزتها .. قولي لهم كمان كما تصدقوا على الفقراء فلا ينسوا مثلي بصدقة يدعون فيها له بظهر الغيب بالرحمة

khaled said...

ياااااااه يا عائشة
كنا بنسمع عن الناس دول بس عمر ما حد فينا شافهم و اتعامل معاهم
جزاكى الله خيرا على اللى عملتيه معاهم انت و صحباتك
جزاكن الله خيرا
اللى عملتوه ده معاهم هو الفايدة الحقيقية مش مجرد اسمع قصتهم و اقعد اتشحتف عليهم و خلاص
انما نعملهم حاجة تفيدهم كل واحد يبقى سمعه تقيل و اللى عامل نفسه مش فاضى

رفقه عمر said...

عمر
ماهما مش عايزين يمشوا على الشريعه علشان كدة علشان يعرفوا يأكلوا حق الناس من غير ماحد ما يحاسبهم الرسول ليه كفار مكه حاربوه لانه جاء ليعطى للضعفاء حقوقهم فطبعا كانت شريعه الاسلام مش على هواهم علشان كدة قاوموا دعوته بكل شراسه حكام هذا لزممن مثل صناديد قريش ابو جهل وابولهب والوليد بن المغيرة مع العلم ان هؤلاء كان فيهم شهامه ورجوله غير الموجودين دلوقتى يعنى الموجودين دلوقتى اشد منهم فى الظلم

رفقه عمر said...

ماعلينا
انا كمان مش قلت كل حاجه لانى مش بحب اكتب كتير ومش بحب اطول علشان لا احد يزهق وهو بيقرأ انا شوفت حاجات فعلا لا تصدق وناس تستغرب هما ازاى مستحملين هذه الحياة سبحان من صبرهم ربنا يعفو عنهم ويثبتهم على دينهم امين يارب العالمين
ان شاء الله هاقول لصديقاتى ادعو ل
ماعلينا هايسالونى مين ما علينا هاقول لهم ماعلينا
انا مش عارفه اسمك هو ينفع الدعاء من غير اسم

رفقه عمر said...

خالد
ايوة ربنا يجازيهم خير الحمد لله لسه فى ناس فى قلوبهم خير بس للاسف قليل قوى فى هذا الزمن وعارف اسمهم فى امن الدوله لانهم معظمهم لابسين اسدال او منتقبات ومنهم المهندسه والدكتورة والصيدلانيه بيسيبوا كل دة فى ايام الاطعام

حسن محمود said...

كده فوقتينا على واقع مرير

لا اله الا الله

الواحد حزين جدا على الناس دى بس الحمد لله ان ربنا مخلى ناس قلبها طيب تاخد بالها من الناس دى

ربنا يحميكم ويوفقكم

ma_3alina said...

شوفي يا ستي .. بعد الرجوع للسادة المختصين فأفادونا جزاهم الله خيرا إنه يجوز الدعاء لفاعل كذا وكذا أو قائل كذا وكذا ... حتى لو كان بدون اسم .. والله عليم خبير .. خليهم بس يدعوا ..
..
الحاجة التانية إني احنا صح اتفقنا نقبل الرأي الآخر .. وانا قبلته ولم أناقش أحد فيه مع إني عندي تحفظ على كل الردود .. لكني لم أرد .. واكتفيت بالتحذير على كده ..
لكن إني ما ازعلش فدي ما اتفقناش عليها .. ودي صعبة جداً على واحد زي حالاتي .. وبعدين إزاي مزعلش من اساءة أدب أخينا .. إزاي ما زعلش ومفيش حد أخد باله من الصورة كاملة .. أنا زعلت بس مش من المعارضة .. زعلت لأسباب تانية غير مجرد المعارضة
الحاجة التالتة .. انا ارفض عقابك ليا بالامتناع عن الاعتراض على ما اكتب .. ويطالب الدفاع هيئة المحكمة بتخفيف العقوبة على المتهم أو العفو والبراءة ..

BinO said...

الأخ ماعلينا
الحمد لله أن الناس زي صديقات عائشة موجدين و كتير
أنا عايز أقولك أن أحد القائمين علي رعاية المحتاجين في منطقة سيدي بشر في الأسكندرية رجل كفيف .

الأخت رفقة جزاكي الله خيراً أنت وصديقاتك و أعانكم علي فعل الخير .

رفقه عمر said...

استاذ حسن محمود
سعيدة بزيارتك للمدونه وسعيدة بتعليقاتك الرسول صلى الله عليه وسلم قال الخير فى وفى امتى الى يوم القيامه او كما قال صلى الله عليه وسلم وربنا يتقبل منا صالح لااعمال امين يارب العالمين

رفقه عمر said...

ماعلينا
ياريت مش تزعل عادى يعنى واكيد يعنى هو لازم يدافع عن نفسه ولازم تتوقع منه كدة كبر دماغك
افهم من كدة انك مش هاتزعل تانى لو انا كنت من المعارضين على العموم هانشوف حكمت المحكمه حضوريا بقبول الالتماس والبرائه وبخصوص الدعاء لك بظاهر الغيب علم وينفذ فورا

رفقه عمر said...

بينو
وجزاك الله خيرا انت ايضا ربنا يبارك فيك وكل من يحاول ينصر دين الاسلام

koukawy said...

ربنا يكرمكوا و يجعلوا في ميزان حسنتكوا و انا علي فكره كنت لسه هكتب بوست بخصوص الموضوع ده 00 و كده هعمل لينك عليكي لأنه يعتبر امتداد

koukawy said...

ربنا يكرمكوا و يجعلوا في ميزان حسنتكوا و انا علي فكره كنت لسه هكتب بوست بخصوص الموضوع ده 00 و كده هعمل لينك عليكي لأنه يعتبر امتداد

رفقه عمر said...

كوكو
اهلا بيك مبسوطه بزيارتك مدونتك جميله ماشاء الله واى حاجه انتى عايزاها او اى لينك لاى بوست عايزاه تحت امرك الحقوق محفوظه لجميع المسلمين ربنا يكرمك اللهم امين

koukawy said...

اشكرك يا عائشه علي ذوقك 00
و اسمك منور عندي في البوست