Saturday, June 09, 2007

نفسيه المدون

انا بكتب البوست دة لانى بجد مش عارفه ليه فيه ناس زعلت لما قفلت التعليقات عندى المدون دة مش جماد او الظروف اللى حواليه ورديه المدون دة بشر بيحزن شويه بيفرح شويه احيان ظروفه متعسرة احيانا متيسره احيانا سليم احيانا مريض احيانا يحس بالملل

يعنى لازم نتحمل بعض فى جميع الظروف ونقدر ظروف بعض يعنى واحد عايز يقفل مدونته لظروف خاصه بيه هو حر ليه نحاكمه واحد عايز يقفل التعليقات اكيد عنده ظروفه اللى اخذ بسببه القرار دة اللى زعلوا انى قفلت التعليقات حد يعرف ظروفى ايه وايه كانت نفسيتى وقتها مش يمكن فيه تعليق نرفزنى او ضايقنى مش يمكن حسيت انى بكتب حاجه مش تستحق التعليق او تستحق كلمات المدح مش يمكن خفت على نفسى ان يدخل عليها العجب فعاقبتها بحرمنها من التعليقات مش يمكن اعتقدت ان دة الصالح ليا الى ان استقر نفسيا حد يعرف ظروفى ايه او نفسيتى شكلها ايه
ياجماعه ياريت تحترموا رغبات الاخرين مش تعينوا نفسكم جلادين من غير ما تقدروا ظروف الاخرين بجد استغربت من زعل بعض المدونين وانهم اخدوا موقف منى مش عارفه ليه من فضلكم تعاملوا مع المدون انه بشر مش جهاز كمبيوتر او اله مع ان الاجهزة بتحس واحيانا بتتعب وتحتاج الصيانه والرعايه خلف كل مدونه انسان له ظروف واحتياجات لا تحملوه فوق طاقته وتقبلوا منه هفواته وقرارته مش تكونوا جلادين لسنا ملائكه وكل واحد فينا بيتعامل بالاسلوب اللى بيشعر فيه انه فيه راحته كلنا مش نفسيه واحدة والظروف كمان مختلفه ولازم نحترم رغبات الا خرين وقرارتهم كل هذه العوامل مجتمعه كانت داخلى عند قرارى بغلق التعليق وكنت مخنوقه جدا وفى ضيق شديد وحاله نفسيه كنت ناويه اترك فيها التدوين لانى اصلا طبيعتى ملوله وبزهق بسرعه غير الحاله النفسيه اللى كنت فيها و بصراحه اكتر انا اخذت قرار غلق التعليقات بعد تدوينه الدكتور المحارب وحزنه من قله التعليقات عنده اضايقت علشانه جدا وفكرت انى ممكن يجيى عليا يوم برضه اكتب ولا اجد من يعلق عندى ولاقيت نفسى انا مقصره مع ناس كتير قوى لا يدخل عندهم اى حد للتعليق تذكرت حديث الرسول ان الكلمه الطيبه صدقه ليه مش ادخل واقول كلمه طيبه على تدوينه تستحق التعليق واشجع صاحبها وادخل على قلبه السرور وكمان هاخذ صدقه على هذه الكلمه
اغلقت التعليق لاعود نفسى انى ممكن اكتب ولا اجد تعليقات ولا حظت ان فيه فعلا مدونات اصحابها يكتبون كلام طيب ولا يجدون من حتى يفكر يقولهم شكرا على مجهودك ممكن كل واحد يقعد مع نفسه بجد ويسال نفسه انا ليه بعلق على مدونه ولا اعلق على مدونه اخرى لو وجدت انك تعلق لان المدونه تستحق فعلا التعليق وتستحق التشجيع فانت فعلا
على حق ولكن اذا وجدت نفسك تعلق لانى بعلق عندك او غيرى بيعلق عندك يبقى فقد التعليق اهميته والهدف منه انا لا انكر ان فيه ناس معينه لازم ادخل اعلق عندها بس لو لم اجد شئ ااقدر اعلق عليه او لا يهمنى ممكن ادخل للسلام وخلاص لانى يهمنى انهم يعرفوا انى دخلت ومتابعه مدونتهم انا لا انكر هذا... بس دة كان هدفى من غلقى التعليقات انى اتعود انى ممكن لا ياتينى تعليق انى اكتب ولا يحبطنى عدم وجود تعليقات انى اعاقب نفسى بحرمانها من التعليق حتى لا ياخذها الفرح بجد ياجماعه من فضلكم فيه ناس محبطه فعلا من عدم الاهتمام بترك تعليق وبجد بيكتبوا حلو قوى حاولوا تساعدوهم وتشجعوهم
كلمه ورجاء الى استاذى الدكتور المحارب من فضلك استاذى حجم البوست بيكون كبير والكلام بيكون كبير على امثالى من فضلك استاذىتقلل من حجم البوست وتبسط المعلومه لينا شويه انا بجد عنيا بتتعب من القراءه كتير من على الكمبيوتر وكمان لازم الف على كذا مدونه انا احيانا اقرأ البوست عندك على يومين ولما اجى اخلصه الاقى بوست جديد وطويل برضه رجاء استاذى من فضلك رفقا بامثالى ممن لا يستوعبون هذا الكلام الكبير
ياريت بجد نحب بعض اكتر ومش نكون قاسين على بعض ونتحمل بعض ونتحمل ظروف بعض
انا احب اشكر الانسان الوحيد اللى ناقشنى فى الامر وتفهم وجهه نظرى مع انه لم يعرف مدونتى الا من مدة قصير جدا ولكنه احترم قرارى
اشكرك جدا باشمهندس عصفور المدينه جزاك الله كل خير وطبعا اخى فى الله ماعلينا جزاة الله خيرا اهتم برضه يعرف اسبابى لغلق التعليق شكرا لاهتماامك اخى ما علينا
واشكر ايضا الطائر الحزين كنت لطيف فى تعليقك وقلت وجهه نظرك بطريقه مهذبه جزاك الله خيرا
بجد لم اقصد ابدا بغلقى التعليق انى اضايق حد ولم اتوقع ان ممكن حد يضايق بغلقى للتعليق
عذرا

39 comments:

ma_3alina said...

السلام عليكم ورحمة الله وبركاته

أنا بصراحة يارفقة من الناس اللي زعلت جدا من قفلك التعليقات .. أنا احترم رغبتك وقراراتك واتفهم كونك بشر تغضبي وتحزني وتملي .. لكن قفلك للتعليقات خلاني اشعر إني شخص غير مرغوب فيه .. وإن تعليقاتي ما لهاش لازمة .. زي ما بنقول إن المدونة بيت الواحد والواحد ده قفل الباب في وش زواره .. مش حاجة تزعل .. ممكن يكون الواحد في بيته زعلان متضايق لكن مش بيقفل الباب في وش زواره ... وعموما كنت بزعل جدا من اي مدونة صاحبها بيحط بوست وبيقفل التعليقات عليه .. ما يمكن البوست دا بالذات عندي تعليق مهم عايز اقوله

وبعدين حتى لو ما عنديش تعليق .. ليه تحرميني مني إني أدخل اقول لك جزاكي الله خيرا .. أو اقول السلام عليكم زي ما بتعملي .. ليه بتحرميني من الصدقة اللي انتي نصحتينا دلوقتي إن إحنا نعملها ..

كمان المدون لو فيه مشكلة مضايقاه ممكن يناقش فيها الناس ودي من مزايا التدوين إن إحنا نتبادل الرأي .. زي ما عمل الدكتور المحارب .. مش نزعل مع نفسنا وناخد قرارات منفردة ونهمل الناس اللي بقالهم شهور مادين جسور الأخوة ما بينهم ..

يارب أكون وصلت ليكي وجهة نظري يا رفقة وعرفتي ليه أنا زعلت

واتمنى إنك ما تمليش التدوين .. لكن في النهاية احترم جميع قراراتك

وعلى فكرة مش بقول كده عشان تعلقي عندي .. دي حريتك .. ومدونتي هي مدونتك .. واسمح لي أنا اعلق عندك حتى لو أنتي مش حتزوري مدونتي ..

تحياتي ليكي ويارب تكوني مش زعلانة مني

عصفور المدينة said...

شفت أنا حسيت إن ده كان بسبب تدوينة الدكتور المحارب وأنا قلت لك ما تشغليش بالك
نفسي تتابعي تعليقاتي في المدونات والله لو ما حدش جاء عندي أنا قلت لك إني باعلق كنوع من التدوين
أضيف إلى الأفكار بقدر الإمكان أحاول التأثير على المدونين الآخرين تاثيرا حسنا قدر الإمكان أكسب منهم اصدقاء
فيه استاذة اسمها امولا بتعلق دايما في المدونات وهي ليس لها مدونة

الموضو مش بالحساسية دي خالص
لو أنا باكتب تعليقات من نوع
تدوينة جامدة خالص
أو منتظر تعليقات من هذا النوع
يبقى ما انفعش مدون
أو بالف ع المدونات عشان الناس دي نفسهم يزوروني وأكثر عدد زواري وعدد تعليقاتي يبقى إيه الفايدة طيب ما هو ممكن واحد يخبط كلمة من الموضوع ويقول كلام قيم جدا شكرا بارك الله فيك زي موضوع ديفيد سانتوس مثلا

وبعدين أعتقد انني في مناقشتي معك غطيت كل الاحتمالات حتى موضوع الدكتور خد بالي منه
ده دليل على إني طبيب نفساني وممن تدفعي فيزيتا عندي
:)
شكرا أن سمحت لي بإرسال رسايل خاصة إلى عقلك عبر التعليقات
شكرا أن سمحت لي أن أخاطب قرائك عبر التعليقات عندك

عرافة لو مافيش تعليقات عند المدونين كلهم أنا حاضطر اعمل إيه
حاضطر أكتب في كل الوضوعات اللي كتبوا فيها برؤيتي أنا ويمكن أعيد كلامهم

طب انت قريتي دستور مدونتي
محتاجين نقول لبعضنا أيوة أنا أتفق معك أن لام القمر قمرية
أصل المجرمين بيشجعوا بعض برضة

واحدة بتشتم في صحيح البخاري ويطلع واحد من عينتها يشتم في راوي الحديث
وبعدين واحد في مدونة تانية خالص يعمل بوست عشان يعمل دعاية للبوست الأول ويقول إن الخاري كان بيطير بين سلوك النور عشان يلم الأحاديث
حسبنا الله ونعم الوكيل

خليك أقوى من كدة وعالجي المواضيع بطريقة قوية فيها نوع من الصمود بدلا من سياسة باب الريح

عصفور المدينة said...

وجربي ما تعلقيش عندي شهر أو شهرين وشوفي حاعلق هنا ولا لأ

عصفور المدينة said...

وبعدين أنا حاحتل المدونة دي وأستولى على الإذاعة بعد كدة وحاكتب بوستات في التعليقات
:)

إعلان

تم احتلال هذه المدونة من قبل عصفور المدينة ومدونين آخرين ونقل مقر التدوينات إلى قسم التعليقات فمن يرغب في القراءة يتوجه مباشرة لقسم التعليقات

:)

مـحـمـد مـفـيـد said...

السلام عليكم
اختي في الله رفقه
اولا استغربت جدا من غلقك التعليقات ولكن لت هي حريه احيانا يريد الانسان ان يفضفض مع نفسه دون ازعاج وان يكون الكلام له فقط وده من حقك طبعا ولكن في بعض النقاط المعروضه لابد من التعليق عليها ومناقشتها حتي تتضح لنا الاراء الغير موضحه

دمتي بخير

Islamist Bloke said...
This comment has been removed by the author.
Mohamed A. Ghaffar said...

انا اما لقيتك قفلتى التعليقات قلت فى عقل بالى ايه ده يعنى مش هعرف اقول البوقين بتوعى هنا دهما كلمه ونص اللى بقولهم ، وبعدين رجعت قلت هى حره دى حريتها الشخصيه وسكت مكنتش اعرف ان الموضوع له خلفيات وخلفيات للخلفيات

هونى على نفسك ، ها هنا مساحه للبوح والراحه لا للتعب

ولكن المجتمع بكل صنوفه حضر هنا فصارت تعب فى تعب

أمــانــى said...

أهئ أهئ أهئ
يعنى ايه اجى متأخرة راحت عليا نومة ههههههههههههه
أنا مبسوطة اوووى انك فتحتى التعليقات من جديد
وبالنسبة لموضوع الدكتور المحارب انا دخلت عنده ولقيته كاتب الموضوع بس ما علقت عنده على هذا الموضوع لانه محق وحسيت انى مش هاقدر اقول حاجة جديدة

وكمان فى حاجة لازم يعرفها الكل ان ممكن يكون المدون مش فاضى او الموضوع ليس من اهتمامه او قد يحرج من الرد فى بعض المدونات وانا على نفسى ساعات مش بأقدر اعلق الا لما أقرأ الموضوع مرتين ثلاثة حتى افهمه
وكمان انا فى مدونات بأقراها بس ومأقدرش اعلق عندهم
وفى ناس مقيمة عندهم وهم مش بيعلقوا يعنى الموضوع عادى اووى
تصدقى فكرنى برضو بارض الواقع يعنى مثلا معايا صديقة الزيارة بزيارة والاتصال بأتصال وهكذا
ههههههههههه
لالالالالا الحياه مش كده خاااالص لازم نفهم كده
ونلتمس لبعض الاعــذار
ساعات الوقت وساعات الصفحات بتوقف عندى وبتعملى مشكلة بعد ما اكتب التعليق وبأضايق واشوف غيره علطول هأعمل ايه يعنى
على فكره انا مع ماعلينا فى كل كلمة قالها وأســتاذنا برضو بأتفق معاهم شوفتى
بعتك على اول محطة ههههههههههههههههههه

ييييييييييييه شكلى طلعت رغاية اوووووووووووى ده بوست جديد
تحياتى لكى

رفقه عمر said...

ماعلينا
وعليكم السلام ورحمه الله وبركاته
يعنى معقوله ااقفل التعليق علشان زعلانه منك لا طبعا بس انا قلت اسبابى وعرفتها ولما حسيت انكم زعلانين فتحتها تانى وبعدين ازاى تقولى مش ادخل ماعلينا انا عمرى ما هانسى انك اول واحد شجعتنى وحسستنى انى ممكن حد يقرالى
جزاك الله خيراوغير كدة كمان انت كلامك بيعجبنى حتى لو مش فهمت احيانا انت تقصد ايه
علشان كدة انت اكتر واحد بيكون زعلى منه كبير

رفقه عمر said...

استاذى عصفور المدينه
جزاك الله كل خير عنى مش قادرة ااقولك تعليقك عندىلما اغلقت التعليقات اسعدنى قد ايه وبجد حسيت انك صوت العقل ليا وجعلتنى افكر تانى ربنا يكرمك يارب
وبخصوص احتلال المدونه من غير احتلال انا هاكتب صك تنازل ليك عنها وبنفس راضيه تماما هو انا اطول اصلا باشمهندس عصفور المدينه بنفس يكون هو المسئول عن مدونتى دة بصراحه احلى احتلال
جزاك الله كل خير اللهم امين يارب العالمين

رفقه عمر said...

استاذ محمد مفيد
اخبار حضرتك ايه واخبار عبدالله يارب يكون بخير وفى احسن حال اللهم امين وربنا يبارك ليك فيه
انا مش فهمت ايه الامور اللى محتاجه توضيح ياريت حضرتك تقولى عليها من فضلك انا اتكلمت كتير ونقاط كتير ايه النقاط اللى حضرتك عايزنى اوضحها

رفقه عمر said...

استاذ محمد عبد الغفار
ايوة انا كنت معتقده انا موضوع التدوين سهل لا قيته صعب جدا لانك لازم تتحمل اشياء كتير وبما انى طبيعتى شخصيه شويه لا احب التنازعات والجدال فبفضل دايما انى ابعد او اى شئ ممكن يضايقنى فببعد برضه عنى
وهى لحظه تفكير سريعه ونفذتها اول ما خطرت فى بالى وخلاص حصل خير
وبجد مع ان حضرتك بتقول كلمتين وبس بس بيسعدونى جدا

رفقه عمر said...

امانى
ازاى اتاخرتى وانت عارفه انى هافتح التعليق النهاردة وانت اللى قلتيلى افتحيها السبت انا فتحته بالليل الجمعه
وبعدين انا مش بقولك انا هاسميكى حكيمه التدوين
تعليقك اكد على كدة كلامك طبعا كله صح وعبرتى برضه على مش عرفت ااقوله فى البوست
ربنا يكرمك امانى وجزاكى عنى خير الجزاء

إنـســانـة said...

مش قادرة اوصفلك مدى إتساع الإبتسامة اللى على وشى ولا مقدار الفرحة الى فى قلبى دلوقتى

الحمد لله انك رجعتيلنا تانى ووضحتى الموقف وكدة

ويا ستى دخلتى مدونتى او مدخلتيش علقتى او معلقتيش انتى هتفضلى صحبتى وحبيبتى واختى فى الله

بغض النظر عن التدوين خاااااالص

بجد والله بحبك فى الله

:)

eldoctor said...

السلام عليكم
اولا اشكرك على تكرمك بذكرى فى تدوينتك التى تحتاج الى القراءة مرات و مرات

و انا ارى ان تدوينتك امتداد لتدوينتى
فكما قلت

الكلمه الطيبه صدقة و صدق فيها المصطفى صلى الله عليه و سلم
الفكرة مش بس التعليق بكلمة تشجيع بل احيانا تكفى كلمة متابع .. يعنى عديت من هنا و قيرت و متابع
الهدف هو نشر العلم ..
انا اكتب و هدفى الاول ان غيرى يعرف ما اعرف ... مش بس وجهة نظرى .. بل احيانا انشر وجهة نظر مخالفة لاجعل المتلقى يرى الحقيقة فاحيانا لا ترى اللون الساطع الا فى تباينه مع لون قاتم!!!


حاجة تخصنى فيما كتبت .. بالنسبة لحجم البوست انا بافكر فى حاجة بس حتاخد منى وقت .. بس بعون الله سانفذها و بدأت فى الخطوات .. انا حاعمل موقع لى و احط فيه منتدى .. واحط المواضيع لوحدها وبالتفصيل .. و ناوى اعمل زى ملخص لها .. لان الهدف زى ما قلت هو نشر المعلومة ..
جزاك الله خيرا لهذه التدوينة انا لم اعلق عند احد من فترة ... و لم ارد حتى على التعليقات فى مدونتى من فترة .. و سافعل باذن الله

allah-slave said...

والله ما عارف اقول ايه

مش عارف اساسا انتى فاكرانى ولا لا
انا عبدالله بتاع مدونة خرم ابرة

المدونة اتقفلت وضاعت معاها اللنكات واتجننت على بال ما عرفت اجيب لنك
مدونتك تانى

بجد انا محطم نفسيا من الامتحانات ومن حاجات تانية وكان نفسي اسمع دعوة جميلة خارجة من قلبك زي ما انا متعود اجى وارمى همومى في مدونتك
بس اظاهر العملية مزنقة معايا من كل ناحية

مش عراف يصح اقلك ان انا بحبك في الله ولا هتعتبريني قليل الادب

ومش عارف لو كان المفروض اكتب الكلام ده من اصله ولا لا

بس بجد بجد مخنوق وحسبي الله ونعم الوكيل في دول دكاترة وحسبي الله ونعم الوكيل في الكوسة اللى تخلى واحد زيي محطم نفسيا كدة


انا املى الوحيد حالا انك تردى

وربنا يسهلهالى ويسهلهالك يارب ويفكها عليكي ويكرمك وفقك ولو في امل اخش الجنة

يبقى اللهم اجمعنى بك في الجنة في خير ان شاء الله

رفقه عمر said...

انسانه
ربنا يكرمك وينجحك اللهم امين يارب العالمين وجزاك الله كل خير
واكيد طبعا احنا اخوات مش اصحاب كمان
احبك الذى احببتنى فيه

رفقه عمر said...

الدكتور
اكيد فكرة الموقع والمنتدى فكرة جميله وهاتكون مجال اوسع لنشر علمك فيه وكمان هاتكون كمرجع لناس كتير ترجع ليها فى اى وقت وجزاك الله خيرا على حرصك على نشر العلم الشرعى
وانا سعيده ان حضرتك هاترجع تكتب تانى وتعلق تانى

رفقه عمر said...

allah-slave
طبعا اكيد فاكراك وبدخل مدونتك كتير ومش بلاقى جديد وكنت علقت عندك ومش رديت عليا
الحمد لله انك بخير وبعدين انا اختك واشكرك على شعورك
ربنا يفرج كربك وييسر لك كل امورك اللهم امين يارب العالمين وطبعا لازم موضوع الوسايط يزعل اى حد بس انت بقى عندك واسطه احسن منهم كلهم توكلك على الله المدبر لكل الامور استعن بالله وحده واعمل اللى عليك وربنا هايكرمك فوق ما انت تتوقع ان شاء الله
وقل هذا الدعاء وكررة ان شاء الله يبدل الله حزنك فرحا
اللهم انى عبدك وابن عبدك وابن امتك ناصيتى بيدك ماض فيا حكمك عدل فيا قضائك اسألك بكل اسم هو لك سميت به نفسك او انزلته فى كتابك او علمته احد من خلقك او استاثرت به فى علم الغيب عندك ان تجعل القران الكريم ربيع قلبى ونور بصرى وجلاء همى وذهاب
وحزنى قال الرسول الكريم من قالها موقنا بها بدل الله حزنه فرحا او كما قال الرسول الكريم صلى الله عليه وسلم
ربنا يكرمك واسمع عنك كل خير وينجحك يارب ومعلش استحمل شويه
قال الله تعالى
ام حسبتم ان تتدخلوا الجنه ولما يعلم الله الذين جاهدوا منكم ويعلم الصابرين
اشكرك على حسن ظنك بى

حامد said...

اذا .. عودا حميدا

منة الله said...

العائشة في الاحلام

ادعوك للمشاركة في استفتاء

اكثر 10 مدونات تاثيرا في قرائها

و احب ان اخبرك ان مدونتك تم ترشيحها فعلا

اليك الرابط

http://www.6ef.blogspot.com/

رفقه عمر said...

استاذ حامد
وجودك بييشرفنى وتعليقك بيسعدنى قوى
جزاك الله خيرا وربنا يكرمك يارب اللهم امين يارب العالمين

رفقه عمر said...

منه
شكرا لاهتمامك باخبارى بفكرتكم وجزاكى الله خيرا

الطائر الحزين said...

السلام عليكم ورحمة الله
عود احمد ومحمود وسيد كمان
وسمديلة على الحلامة قصدى حمدا لله على السلامة
طبعا تعليقى قلتة قبل كدة
ربنا يعزك ويبارك فيك فى الدنيا ياما بنلاقى ونشوف
تحياتى

كبير المتشردين said...

انا معرفش ايه الي حصل في بوست المحارب لاني لسه مش قريته بس بجد المدونة محترمة جدا وهو بجد شخص زوق جدا جدا فوق الوصف اما بقا يا ستي بالنسبة للي قريته في البوست لازم يا رفقة عمر تاخد بشوية حاجات علي سبيل المسلمات علشان تقدري تكملي رسالتك
1- احنا شعب مجامل وانا عارف انك بتتخنقي من الرد لمجرد الرد وانا كمان بتخنق من الاسلوب ده وبحس انه اسلوب رخيص جدا بس لازم تتعاملي بنفس الاسلوب لحد ما تقدري تفرض علي الناس معني ان الرد هو وسيلة للنقاش وليس طلقتين في الهوا ومجاملة لصاحب البوست
2- اعتقد يا رفقة عمر انك من كبار المدونين حاليا ويجب ان تعترفي بذلك وده يا ستي هيفرض عليكي قيود كتير في اسلوب الكتابة وكمان في التفاعل لان الناس مش هتتقبل منك اي تصرف جديد وهيوجوه بالنقد
3- اسف بجد علي اسلوبي في دي بس انا اتعودت كده ظروفك الشخصية يا رفقة حاجة تخصك انتي مش تخص الناس الي بتقراه يمكن ايام الهواية حاجة والاحتراف حاجة تانية انتي دلوقتي بتأدي رسالة
اما بقا لو حصل مود عاطفي او حزن او فرح اعتقد ان مكانه الامثل هو الواقع وليس الواقع الافتراضي اتعاملي مع مدونتك علي انها صفحات كتاب بتسجل التاريخ او صفحات جريدة بديلة للجرائد الصفراء ستعرفي معني ان تهمتي بكلماتك
4- بلاش تتعاملي مع النقض بالاسلوب الصدامي ده لاني غلطت قبلك نفس الغلطة عارفة اقوي الناس مين يا رفقة من يتمالك نفسه عند الغضب
ولا داعي لان اذكرك ان المؤمن كالنخلة يرمونه بالحجارة ليرد عليه اطيب التمر
أخيرا وليس اخر اسف اسف اسف يا اختي اني اتكلمت بالاسلوب التعليمي لاني مش بحب ادي حد نصايح لان طعمها بيبقا مر بس انتي اختي مش غريبة علشان كده اتكلمت عادي ياريت تقبلي بصدر رحب

ftataljanna said...

انا قبل اى حاجة هاقول لك حاجة تخرجك من الحالة النفسية دى حاجة تضحكك يعنى

انا ولا اعرف اصلا ان التعليقات مقفولة يعنى ايه

يعنى اختك فى الله قعدت تلف يجي شوية كتير اوى على انى اشوف المكان بتاع التعليقات فين فوق البوست ولا تحتهه طيب راح فين

واكلم نفسي والله يا جماعه المدونات بيكون فيها حته كده تحت على جنب اسمها comments

الناس بتبقى تكتب فيها كلام
هههههههههههههه
وفى الاخر مالقيتهاش وقلت يا اما الجهاز هنج يا اما انا اللى هنجت



بصي يا رفقه انا بجد بحبك وربنا يعلم مع اننا ما نعرفش بعض وزعلانه اوى ان نفسيتك كانت وحشه كده وانتى كان المفروض تكتبى البوست ده قبل ما تقفلى التعليقات يعنى اللى خلى كل واحد فينا يعمل مدونة انه حس انه عنده حاجة يقولها للناس وانتى لما كتبتى البوست ده عرفتيني بمدونة المحارب وطبعا هادخل ان شاء الله واشوفها

انا مقصرة فى حقك وانا عارفه واسفه على كده بس انا لسه مخلصة امتحانات النهاردة وانتى اكيد مقدرة الظروف وناس كتير كده بتقرا وتمشي لان وراها حاجات تانيه امتحانات ظروف يعنى برضه الواحد يلتمس الاعذار

وبعدين ما المحارب يحط عنده عداد لما يلاقيه بيزيد يبقى عدد اكبر من المسلمين انتفع ويعرف ان اكيد اللى ما كتبش تعليق بينفع المسلمين بوقته بطريقة تانيه فيلتمس له العذر

وانتى كمان التمسي لكل حد زعلك العذر لانه بيحبك وبيحب مدونتك وما يحبش يحس انه رايه تقيل او الكومين بتاعه غير مرغوب فيه

ولا واحدة بنت حلال وطيبه زيي تقعد تكلم نفسها على ان فى حته اسمها كومينتس تاهت ومش عارفه لها طريق هههههههههههه

حبيبتى ما تزعليش و طالما انتى دخلتى التدوين يبقى اكتبى كل حاجة حتى لو اتضايقتى

ولو عايزة تشجعى مدونة مفيش مانع تعملى زى ما عملتى فى حكاية مدونة فى اخر اى بوست اكتبى يا جماعه مدونة كذا وكذا وكذا محتاجة تشجيع او مدونة حلوة روحوا شوفوها وصدقينى بنستجيب وبنشوفها

ماتزعليش يا قمر ربنا معاكى معلش بقى عالتطويل

ftataljanna said...

اسفه بس انا عندى كلمه بس للاستاذ كبير المتشردين

كل مدون الناس عرفته واستفادوا منه عرفوه واستفادوا منه لما كتب بطبيعته وخرج اللى فى قلبه وتفكيره على صفحات المدونة بتاعته

يعنى يا اختى ممكن تكتبى احاسيسك كلها فى بوست وتنشريه بس مش يبقى البوست فقط للتنفيس عن المشاعر لا يبقى علشان تفيدي الناس من التجربه وباسلوب مناسب ومفيش عيب في الهواة

ما اى حد كان سبب احترافه هو جودته كهاوى واحسن المحترفين هو اللى قدر يحتفظ بعمله زرسالته كهواية علشان لما ياديها ياديها بسعادة لانها هواية مش فرض عليه

خمسة فضفضة said...

السلام عليكم ورحمة الله وبركاته

رفقه ما تتصوريش فرحت اد ايه لما جيت اطمن عليكي النهارده وانا بادعي الاقيكي فتحتي التعليقات والحمد لله دعوتي ربنا استجاب لها

كان نفسي اوي اتكلم معاكي واعرف ايه اللي مزعلك وفكرت اني اكتب بوست عن كده بس قلت بلاش ابقي حشريه ، يمكن رفقه عاوزه تبقي لوحدها شويه بعيد عننا وعن تعليقاتنا لحد ما نفسيتها تهدي ، وكنت متأكده ان القرار ده مش هايطول
والحمد لله ماطولش

يمكن انا مش بدخل هنا بانتظام ، بس باجي اقرا كل اللي فاتني واعلق عليه ، وانت اكيد ملاحظه ده ، وحتي لو مش هاتعلقي عندي برضو هادخل واحط تعليقات ...غلاسه بقي تعملي ايه ....هههههه

تحياتي لك

رفقه عمر said...

الطائر الحزين
شكرا ليك كتير كلماتك كانت ليها تاثير كبير عليا
ربنا يكرمك يارب

رينـــــــــــا said...

:(:(:(:(:(:(:(:(::(:(:(

رفقه عمر said...

اخى كبير المشردين
انا اقول اخى وانا احسها فعلا وانت طبعا كلمتك مسموعه عندى واعتز بيها جدا وانت لو مش نصحتنى ازعل منك جدا ك منا احيانا لا يرى نفسه جيدا ودى ميزة انك تكون عايش وسط ناس يهدون اليك عيوبك وينصحوك لفعل الاحسن
بس حكايه من كبار المدونين دى حاجه كبيره عليا قوى و اتخضيت من الكلمه انا عارفه انك بتحب تشجعنى من اول يوم بدات فيه تتدوين وانت بتحمسنى وتشجعنى لكن من كبار المدونين صدقنى والله صدمتنى الكلمه لانى عندما دخلت التدوين دخلت بسبب المدونات التى تسب فى الدين وفى الرسول حبيت ادافع عن دينى بطريقتى الخاصه لم انتظر اى شئ من التدوين ولما وجدت ناس بتمدح فى كتابتى اتفجأت وكمان اكتابت لانى بقيت خايفه منك كنت بكتب الاول على سجيتى دلوقتى بقيت حريصه ومش عارفه اكتب ايه
انا كل اللى باتمناه ان المدونين كلهم يكونوا بيحبوا بعض ونتعامل مع بعض كاننا اسرة واحدة وهدفنا واحد بس كل واحد بيعبر باسلوبه مش اكتر
بجد مش عارفه اشكرك ازاى على ظنك فى ربنا يجازيكى عنى خير الجزاء
ويعطيك الله كل ماتتمنا وزيادة اللهم امين يارب العالمين

رفقه عمر said...

فتاه الجنه
بحبك وبحب عقلك الكببير وطريقه تفكيرك
ماشاء الله عليكى
انتى اخذتى الاجازة عايزين نشوف بقى بوستاتك الجميله وكلامك الطيب
ربنا يكرمك يارب وينجحك ورزقك من حيث لا تحتسبى

رفقه عمر said...

خمسه فضفضه
ازيك اخبارك ايه ياحبيبتى المدونه مدونتك وانا اللى باكون سعيدة بتعليقك وربنا يكرمك على شعورك بجد اسعدنى جدا الحمد لله انا حصل كدة علشان اعرف ان فيه ناس حاسه بيا وانا مش عارفه الحمد لله
جزاكى الله كل خير
هو بس حاله نفسيه مع زهق مع غضب كوكتيل كدة وكنت عايزة اطلع غيظى فى اى حاجه طب اعمل ايه قمت قفلت التعليقات عارفه لما تكونى غضبانه وتمسكى حاجه وتكسريها دة اللى عملته بالظبط وحسيت بالراحه فظيعه لغايه لما لاقيت ناس زعلانه منى وانا بصراحه مش احب ازعل حد قمت كلمتى نزلت المرة دى لكن المرة الجايه لايمكن ابدا
جزاك الله كل خير على السؤال
جمعنى الله وايكى على محبته وطاعته اللهم امين يارب العالمين

رفقه عمر said...

رينا
ازيك عامله ايه ربنا يريح بالك ياربوييهنيكى ويقرب البعيد اللهم امين يارب العالمين

كبير المتشردين said...

فتاة الجنة
يا ستي انا مقصدتش انها متكونش نفسها عارفة اول نصيحة بيدوها لكاتب جديد او لمذيع او مراسل جديد بتكون ايه كون نفسك واوعي في يوم اعجابك بشخص يخليك تقلده انت مش هتكون غير نفسك هي دي الحقيقة ولكن اانا قصدت ان رفقة عمر اكبر بكتير من مجرد كلمات تصف حالة تمر بها لان رفقة عمر ابتدت اسلوب كتابة جديد ومحترم ولازم تكمل الطريق ده ومبقتش مدونة عادية بالنسبة لناس كتير يارب اكون قدرت اعبر عن الي اقصدة

كبير المتشردين said...

انا تاني يا رفقة ... بس ليكي انتي المرة دي
انتي عارفة اني مش بجامل ولو عايزة تأكيد لكلامي اقعدي مع نفسك في مرة بعيد الجهاز خالص واكتبي اسامي المدونات الي كان حلمك تبقي زيهم في يوم من الايام وادخل بعدها المدونات دي قارني بين التالي
1- عدد التعليقات عندك وعندهم بعيد عن تعليقات سلمين وحته وطلقتين في الهواء علشان العريس حبيبنا
2- اسلوب الكتابة والبعد عن سب الدين واتهام الاشخاص بالباطل او استخدام الفاظ خارجة
3- اختيار موضوع الكتابة و مدي استيفاء عناصر الموضوع
4- اسلوب المدون في النقاش
وياريت المقارنة دي بجد تشمل ناس كنتي بتحسي ان وصولك ليهم حلم وقتها هتعرفي انك وصلتي لمرحلة اكبر من ناس اعتبرتيهم اعلام او معلمين في عالم التدوين مش اقصد طبعا احملك مسئولية بس لو بصيت ليه مثلا انا مفتكرش اني جبت جديد انا مجرد واحد بيكتب لنفسه قبل ما بيكتب لغيره بس بيتهيألي ان سيادتك من اول الناس الي فتحت مواضيع اسلامية بأسلوب غير ديني يعني بعيد عن الكلام الي الناس بقيت بتشك في مصداقيته او بتخاف منه اسلوب بسيط يعني بمعني اصح صاحبة طريقة جديدة او مدرسة جديدة يمكن بعد كده يكون الاسلوب ده ملوش وجود او يكون طلع الي يستحق الاهتمام اكتر ولكن انتي قمتي بواجبك ولازم تكمليه
تحياتي يا اختي ولو اني زعلان من الدعوة بتاعتك بتاعة عقبالك دي

رفقه عمر said...

كبير المتشردين
مش عارفه ااقولك ايه غير جزاك الله خيرا ربنا يكرمك يارب
وبرضه ربنا يرزقك بازوجه الصالحه التى تستحقك اللهم امين يارب العالمين

ftataljanna said...

اخى كبير المتشردين

انا فهمت قصد حضرتك

واما عن انك قلت انا واحد بكتب لنفسي قبل ما اكتب للناس

انا كمان بحس بكده بحس ان كل موضوع بكتبه ببقى بكلم نفسي اكتر ما بكلم اى حد تانى وطبعا مع رجاء ان اى حد يستفيد يعنى بكون بنصح نفسي في الاول

ما كنتش اعرف انها حاجة كويسه او موجودة يعني طبعا مع عدم وجود مقارنه ربنا يكرمك

حسستنى انى مش حاجة غريبة

ftataljanna said...

رفقه

على فكرة انا كنت متابعه كل بوستاتك بس ساعات ماكنتش بقدر اعلق علشان الامتحانات وانتى مقدرة يعنى ما كانش بيفوتنى حاجة من مواضيعك

انا بس حبيت اعرفك

وماتزعليش من اى حاجة حتى ولا على اخطائك صغيرة او كبيرة لان الانسان ما بيتعلمش الدرس الحقيقي غير من خطأه هو مهما شاف اخطاء الناس

ربنا يكرمك