التطاول على السنه يبدأ من البخارى

كنت اريد التوقف قليلا عن التدوين بسبب اننى وجدتنى احاول ترتيب الامور من حولى ونظرت الى نفسى وجدتنى بداخلى كراكيب سبحان العالم بها لولا ان الله بيستر العيوب وبيستر خبايا النفس عن الاخرين يانهار ابيض كل دى فوضى بداخلى حاولت التخلص من هذه الكراكيب واعادة تنظيم الصالح منها والتخلص من الغير صالح ووجدت من الخطأ ان نصلح من حولنا ونترك نفوسنا خربه فارغه ثم وجدت بطاريتى الايمانيه اوشكت على النفاذ فبحاول اعادة شحنها مرة اخرى والان هى على الشاحن لعلا وعسى ترد فيها الروح مرة اخرى ادعو الله ان يعيننى ويثبتنى ويردنى الى دينه ردا جميلا المهم فى موضوع اثارنى جدا حبيت اتكلم عنه ودة سبب كتابه هذا البوست لان الامر زاد عن الحد لدرجه لا تطاق لقد بدات حمله التشكيك فى صحيح البخارى اللى المفروض انه اصح كتاب بعد كتاب الله وليه هو اصح كتاب بعد كتاب الله طبيعى لانه يشمل على احاديث الرسول صلى الله عليه وسلم وطبيعى ان احاديث الرسول اصح كلام بعد كلام الله سبحانه وتعالى واللى يغيظ ان التشكيك جاء على لسان رجال دين من الطابور الخامس اللى بتعانى منه الامه الاسلاميه الان علماء الفتنه اعوان اعداء الاسلام وحجتهم كل شخص ياخذ منه ويرد الا رسول الله صلى الله عليه وسلم طيب ما البخارى كل اللى عمله انه جمع الاحاديث اللى تاكد من صحتها فى كتاب فين الخطأ اللى عمله وطبعا الامر دة هايسبب لخبطه عند الناس ولما كان اى حد يسمع ان الحديث اخرجه البخارى كان يعمل به بكل ثقه لعلمه بصحه احاديث البخارى الان بالله عليكم الناس هاتعمل ايه لما تسمع التشكيك فى صحه كتاب البخارى انا مش هاتكلم هنا عن البخارى شخصيا انا هاتكلم ليه حديث البخارى اصح الاحاديث واللى عايز يعرف بجد عن البخارى ويعرف الحقيقه يقرا حياه البخارى

بجد ياريت تقراوا عن البخارى

انا كلامى هنا عن شئ تانى خالص لازم تعرفوا يعنى ايه حديث ويعنى ايه سند ويعنى ايه متن ويعنى ايه حديث صحيح وليه صحيح البخارى اصح كتاب من كتب الاحاديث علشان لا تنخدعوا بكلام اعداء الاسلام اللى عايزين يشككوا فى السنه باى شكل وبعد كدة يشككوا فى القران الكريم والغريبه انه مش فيه حد يجرؤ يشكك فى كتابات ارسطو وسقراط لكن احنا المسلمين بقينا اى حد ممكن يتطاول علينا

المهم اعذرونى لو الموضوع طول شويه بس انا هاراعى الاختصار بقدر الامكان

لازم اولا نعرف بعض المصطلحات التى تخص علم الحديث

اولا الحديث: هو ما اضيف للرسول صلى الله عليه وسلم من قول او فعل او تقرير او صفه والتقرير هو عبارة عن قيام احد الصحابه بفعل شئ ووافق الرسول عليه ولم يعترض

الاسناد: احنا دايما نسمع صحيح الاسناد بس حد عارف يعنى ايه اسناد .هوسلسله الرجال الموصله للمتن يعنى ايه بمعنى فلان اخذ عن فلان اخذ عن فلان حتى يصل الى المتن

المتن:ماينتهى اليه السند من الكلام وهو طبعا كلام رسول الله صلى الله عليه وسلم اوكلام الصحابى وهو اصل الحديث

واصح الاحاديث الاحاديث المتواترة يعنى ايه متواتر

المتواتر : ما رواه عدد كثير تحيل العادة تواطؤهم على الكذب بمعنى فى كل طبقه من طبقات سنده رواه عدد كبير اشتهروا بالصدق ولم يختلفوا فى روايه الخبر

والخبر المتواتر يفيدالعلم الضرورى اى اليقينى كمن شاهد الامر بنفسه كيف لا يتردد فى تصديقه فكذلك الخبر المتواتر لذلك المتواتر كله مقبول

طبعا فى انواع كتير جدا للاحاديث الصحيحه منها خبر الاحاد الذى ينقسم الى المشهوروالغريب والعزيز

الحديث الصحيح

هو ما اتصل سندة( رواة الحديث)بنقل العدل الضابط عن مثله الى منتهاه من غير شذوذ ولا عله (حد فاهم حاجه) براحه كدة وان شاء الله ربنا يرزقنا الفهم ناخد جزء جزء من التعريف

اولا اتصال السند: واحنا عرفنا يعنى ايه السند معنى اتصال السند ان كل راو من رواته قد اخذ مباشرة عمن فوقه حتى يصل الى الرسول صلى الله عليه وسلم مش ينفع حد يقول سمعت عن فلان وهو لم يتقابل معه هنا هايكون فى قطع فى السند ويفقد الصحيح جزء من شروطه يعنى لازم كل روا للحديث راى من روى الحديث قبله بمعنى انا سمعت من امى وامى سمعت من جدتى وجدتى سمعت من امها وهكذا حتى نتاكد من صحه الحديث

عداله الرواه: اى كل راو من رواه الحديث اتصف بكونه مسلما بالغا عاقلا غير فاسق وليس عديم المرؤة ولم يؤخذ عليه انه كذب ولو مرة واحده

ضبط الرواه: اى ان كل راو من رواه الحديث كان تم الضبط بمعنى ان يكون قوى الذاكرة وبحث كثيرا فى صحه الحديث حتى تاكد من صحته ويكون على قدرة كبيره من الحفظ ويكون غير مخالف للثقات ولا فاحش الغلط ولا مغفلا ولا كثير الاوهام

عدم الشذوذ: بمعنى ان لا يكون الحديث شاذا والشذوذ هو مخالفه الثقه لمن هو اوثق منه بتوضيح اكثر مثلا السيدة عائشه روت حديث عن الرسول وطبعا روايه السيدة عائشه هاتكون ثقه وجاءت مثلا الرميساء وهى صحابيه ولكنها ليست من بيت النبوة يعنى ليست قريبه من الرسول وروت الحديث بشكل مختلف يبقى كدة حدث اختلاف بين الثقه اللى هى الرميساء رضى الله عنه وبين الاوثق منها وهى السيدة عائشه رضى الله عنه فيكون الحديث به شذوذ

عدم العله: اى الحديث غير معلول بمعنى انه ليس به سبب خفى يقدح فى صحته

فلو اختل شرط من هذه الشروط فلايسمى حديث صحيح

حكم الحديث الصحيح: وجوب العمل به باجماع اهل الحديث ومن يعتد به من الاصوليين والفقهاء فهو حجه من حجج الشرع لا يسع المسلم ترك العمل به

وهذه الشروط الخمسه هى الشروط التى جمع بها البخارى احاديثه وايضا مسلم فى صحيحه

وقد اجمعت الامه على تلقى كتابيهما بالقبول والبخارى يعتبر اصح من مسلم وذلك لان احاديث البخارى اشد اتصالا واوثق رجالا

وينقسم الحديث الصحيح الى سبع مراتب

اولا ما اتفق عليه الشيخان (البخارى ومسلم) وهو اعلى المراتب فى الصحه

ثانيا ما انفرد به البخارى

ثالثا ما انفرد به مسلم

رابعا ما كان على شرطهما ولم يخرجاه

خامسا ما كان على شرط البخارى ولم يخرجه

سادسا ما كان على شرط مسلم ولم يخرجه

طبعا اللى يريد ان يعرف اكتر فى علم مصطلح الحديث انصحه بقراءه كتاب تيسر مصطلح الحديث للدكتور محمود الطحان بجد من امتع الدراسه الى درستها فى المعهد لانى عرفت يعنى ايه حديث صحيح وموضوع ومرفوع وحسن وعندما اقرا اى كتاب دلوقتى وفيه حديث باكون نوعا ما فاهمه انواع الاحاديث ومدى صحته وضعفها

بجد لازم نتعلم العلم الشرعى علشان نقدر نواجه من يشككون فى دينا وتقدر ترد وتجاوب ولا تتذبذب وسوف تسال يوم القيامه طالما ان العلم كان ميسر ليه لم تتعلم وليس لك عذرا امام الله يوم القيامه زى ما انت حريص على تعلم الكمبيوتر وتعلم اللغات وتعلم كل ماهو جديد ياريت نهتم بدراسه دينا بجد العبادة عن علم لها طعم تانى خالص وربنا بيفهمك عنه جايين بعد حوالى 1200 سنه يقولوا ان صحيح البخارى مشكوك فيه وهما طبعا لا يقصدون البخارى هما عايزين يشككوا فى السنه وحسبى الله ونعم الوكيل

هذا ما قيل فى مدح صحيح البخارى

صحــيح البخــاري لـو أنصفـــــوه ـــــــــــ ما خــط إلا بمــاء الــذهــــــــب
هــو الفـرق بيـن الهـدى والعمـى ــــــــــ هــو السـد بيـن الفتـى والعطـب
أســانيد مثــل نجــوم السـمــــــاء ــــــــــــ أمــام متــون كمثـــــل الشــهب
بهــا قـام مـيزان ديـن الرســــول ـــــــــــــ ودان بــه العجــم بعــد العـــرب
فيــا عالمــا أجــمع العـالمـــــون ــــــــــــــ عــلى فضـل رتبتـه فـي الــرتب

اسفه للتطويل وبجد انا اختصرت كتير جدا وياريت بجد تقرأوا اكتر فى الامر لان بجد احنا بنتهاجم من كل مكان مش كفايه احتلال الارض لا وكمان عايزين احتلال العقيدة والعقول

ربنا يجنينا الفتن ما ظهر منها وما بطن ويرزقنا الفهم عنه اللهم امين يارب العالمين

انا عارفه ان فيه ناس اكثر علما منى فى هذا الامر وانا كتبت البوست على قدر فهمى فاعذرونىلو كنت اخطأت فى شئ وياريت لو فيه تعديل اسالكم ان ترشدونى اليه

اسالكم الدعاء لا ستاذ محمد عبدالغفار اعادة الله لنا سالما معافا اللهم امين يارب العالمين