Friday, June 08, 2007

شراسه الاطفال فى عينيه


ناس كتير بتعانى من نفس المشكله اللى هاعرضها عليكم اولا احب اعرفكم على اولاد اخى الكبير احمد وخالد ربنا يبارك فيهم ويحميهم المشكله بقى فى قنوات الاطفال الفضائيه اللى بتعرض كارتون وافلام عنيفه للاطفال وخصوصا قناه ام بى سى 3 القناه دى فعلا مدمرة لعقليه وسلوك الاطفال لاحظت على اولاد اخى ازدياد العنف عندهم بشكل فظيع الاربعه وعشرين ساعه حلبه المصارعه شغاله بين الاتنين وبيضربوا بعض ضرب عنيف جدا ونحاول منعهم من الصراع الدائر بينهم وكل المحاولات فشلت الترغيب والترهيب وكل شئ بصراحه ماعدا الضرب لاننا لا نتبع سياسه الضرب كنت اشوفهم واستغرب من العنف اللى هما فيه حتى كنت اتفرج معهم على قناه ام بى سى 3 انا من النوع اللى بحب الكارتون البسيط ذى توم وجيرى اليس فى بلاد العجائب النمر الوردى والحاجات الخفيفه دى هما بقى بيتابعوا مسلسل اسمه باور رينجرز المسلسل دة كله عنف وضرب عرفت بقى سبب عنفهم وحلبه الصراع الدائرة طوال اليوم وطبعا لا تخلو المصارعه من اصابات يوميه لكلا الطرفين المتصارعين خالد مثلا يحب فيلم ما فيا جدا وتخيلوا مين الشخصيه اللى بيحبها فى الفيلم شخصيه الجزار سالته ليه يا خالد بتحبه مع انه شرير قال علشان هو قوى مع العلم ان ما متهم ماشاء الله منتقبه حافظه للقران كله والحمد لله ختمته ووالدهم اللى هو اخى ماشاء الله برضه مصلى وفى الجامع وهما بيحفظوا قران على يد شيخ احسبه على خير هاتقولوا عندهم طاقه زياده بالعكس بيلعبوا سباحه وبيجوا من التدريب المفروض يكونوا تعبانين ويناموا طبعا لا لازم العنف يشتغل بجد مش عارفين نوصل لاى حل معاهم نهائى ليس لدينا الا الدعاء لهم بالهدايه
واكتشفت مش احنا اللى بناعنى لوحدنا معظم صديقاتى كدة برضه بسبب قنوات الاطفال الفضائيه بجد عقلهم سايق سنهم لم تعد مقوله برائه الاطفال فى عينيه لها معنى الان يعنى مثلا هاقولكم بعض مواقف من حياتهم


مثلا احمد عنده ماشاء الله 9 سنين دة بقى لازم يحط جل على شعره

ويلبس زى الكبار بس يقى ايه اللى هما روشين

خالد دة بقى لما بابا توفى رحمه الله عليه قال لمامته انا هانزل الجامع مع بابا وهو نازل يصلى صلاه الجمعه علشان ادعى لجدو طيب ياخالد جميل منك المهم بعد خمس دقايق طلع وكانت لسه الصلاه ولا الخطبه خلصت طلعت



ليه ياخالد رد خالد خلاص دعيت لجدو طب ليه مش كملت لغايه لما الصلاه تخلص رد خالد انا قلت هانزل علشان ادعىلجدو يدخل الجنه وبس انا عندى 6سنين لما يبقى عندى 7 سنين ابقى اصلى ...ليهم اخ بقى اسمه معاذ عنده سنتين دة بقى بيعرف ازاى ينفذ اللى فى دماغه ماشاء الله عليه غصب عننا بجد انا بحس انى مش عارفه اتعامل معاهم خالص لدرجه انى عندى العاب على الكمبيوتر مش بعرف اشغلها هما ماشاء الله بيشغلوها وبيوصلوا لمراحل متقدمه

كمان انا باكون مكسوفه منهم بس طبعا مش بحاول ابين انى حتى جربت العب اللعب دى علشان لا اظهر جهلى قدامهم
ليا بقى ابن اختى اسمه عمر عنده 5 سنين عمر دة بقى عايش فى فيلم كارتون على طول لازم يبقى اى مكان يروح ليه لازم يكون فيه كارتون لاما يومنا مش يعدى وخياله واسع بشكل فظيع راجع من المدرسه مامته بتساله اخدت ايه ياعمر النهاردة رد عمر مش اخدت حاجه ليه ياعمر اصل المس مش موجودة ليه ياعمر رد عمر اصلها راحت الغابه تلعب مع الاسد وحكايات بقى كتير جدا بهذا الشكل

بجد اللى لسه عنده اطفال صغيرين امنعوهم من هذه القنوات اختاروا لهم الكارتون المناسب ليهم بجد القنوات دى خربت عقول الاطفال واصبحوا الاطفال اكثر شراسه وعنف يعنى مش كفايه الاطفال المشوهين من اليورانيوم لا وكمان تخريب عقول الاطفال بجد الامهات بتشتكى من عنف الاطفال وقد هما مش قادرين يسيطروا عليهم يعنى مثلا اولاد اخى رافعين الالقاب بيندهونى باسمى كدة عادى جدا حتى ولو احنا فى مكان عام انا طبعا باعمل نفسى مش واخدة بالى انا بحبهم جدا وهما عارفين كدة كويس بس هانعمل ايه حد عنده حل لمشكله عنف الاطفال دة وانهم مش عايشين سنهم خالص مش ينفع نقول تانى برائه الاطفال فى عينيه الجديد دلوقتى شراسه الاطفال فى عينيه




الصور الاولى بالترتيب احمد وخالد ومعاذ


الصورة الثانيه خالد وهو ظاهر قد ايه هو برئ طبعا دة العادى بتاعه حتى ولو عندنا ضيوف

الصورة الثالثه خالد فى حفله التخرج طبعا من كى جى 2

الصورة الرابعه طبعا احمد وخالد

الصورة الاخيرة دة عمر اللى فاكر نفسه شخصيه كا رتونيه
ربنا يحميهم يارب ويبارك فيهم ويستخدمهم لنصره الاسلام اللهم امين يارب العالمين

8 comments:

عصفور المدينة said...

مش معاك قوي في موضوع الكارتون أنا أعرف أضرار الكارتون بس من واقع تربية الأولاد عرفت إنها فطرة حتى اتفرج على الحيوانات تلاقيهم الذكور من صغرهم يضربوا في بعض عشان يتمرنوا على الصراع فدي فطرة في الولد فعلا ممكن يكون الكرتون بيزودها لكن هي موجودة

Islamist Bloke said...

كنت عايز اعلق على الموضوع من يومين

بس كانت مغلقة

كويس انك فتحتي التعليقات

بس انا نسيت كنت عايز اقول اية
(:


مدونة جميلة...... ومعاكي تماما فى موضوع الكارتون وانا بصراحة حاسس بنظرية مؤامرة من ساعة البوكيمون وانهم يخلوا الخنزير بطل والخنزير بينقذ ويساهم فى اعمار الحياة والكلام الفارغ ده

فيه مخطط.....اما انهم يهدموا القيم ويخلوا الكلاب والخنازير ابطال.... واما انهم يخلوا اطفالنا عنيفين مع بعض...و اما اى حاجة...... المهم ان فيه مخطط وان (الاخرين) وحشين وخلاص
(:

صباح التهييس

سلام

أمــانــى said...

اكيد الكارتون له تأثير شديدآ جــدا على شخصيات الاطفال وخصوصآ الكارتون اللى فيها عنف
والمشكلة فى الافكار الغربية دى الكارثة لازم يكون معاهم مرشد فى كل شئ ويكون فى مساحة للحوار معهم
بس تصدقى بقى انا بالعب معاهم زيهم لغاية ماما تزعق
هههههههههههههههه
ربنا يخليهم ويبارك فيهم يحفظهم ياااااااااارب آمــــــــــــين
ويكون سببآ فى نصرة الاســـــلام

رفقه عمر said...

استاذى عصفور المدينه
على فكرة انا مش قلت كل حاجه ماخفى كان اعظم ممكن ايوة يضربوا بعض من وقت للتانى لكن دول بقى حتى ولو احنا فى مكان عام يعنى مثلا وقت ما كان والدى اله يرحمه فى العنايه المركزة بصينا لاقينا الاتنين على الارض قدمنا ونازلين ضرب فى بعض ولا عمالين حساب اننا فى مكان فيه مرضى وكدة وتكلمهم ولا حياه فيمن تنادى ممامتهم بجد بتبكى من وضعهم جدا وبتسال الناس الدعاء لهم بالهدايه
مش عارفه ايام ماكنا اطفال كان الكارتون قليل قوى وبيجى فى فترات قصيرة دلوقتى بقى ليه قنواات خاصه بيه حتى الاطفال مختلفين عننا خالص فى التصرفات وفى السلوك

رفقه عمر said...

islamist bloke
عارف ان فى امريكا اكتشفوا ان توم وجيرى بيعلم الاطفال سلوكيات سيئه وبينصحوا القائمين على انتاج توم وجيرى انهم يراعوا كدة ويعلموا الاطفال سلوكيات طيبه
لان الطفل دة لسه بيتشكل وللاسف ابطال الكارتون هما اللى بيشكلوا شخصيتهم
سعيدة بزيارتك الاولى للمدونه

رفقه عمر said...

امانى
لا انا مش بحب العب معاهم اخاف اتصاب بخبطه طائشه واخرج بعاهه مستديمه وهاتبقى مشكله كبيرة هما اولاد مش هم يكون فيهم اصابات لكن انا مش ينفع خاالص
انا بخاف منهم بصراحه لانهم بيضربوا بغشم

الطائر الحزين said...

السلام عليكم ورحمةالله
انا اظن والله اعلم انا الكارتون لي له اى تأثير لان الاطفال يعلموا انه كرتون وانه غير حقيقى والتقدم اللى بيحصل والكمبيوتر وتعامل الاطفال معه اصبح شىء عادى يعنى احنا كنا ممكن نتأثر به زمان التأثير الاكبر سيكون من الاباء واحتواءهم لهم و كمان ممكن يتقدموا فى رياضة مثلا او ما شابة
تحياتى ومبروك
وايه رأيك لما نعمل كتاب اسمة
الحنين فى فتح التدوين
تحياتى

رفقه عمر said...

الطائر الحزين
عارف انا كتبت ليه البوست لانى كنت بتفرج معاهم على مسلسل للاطفال اسمه باور رينجرز لا قيتهم مركزين معاه جدا وبعد ملخص حلبه المصارعه اتنصبت وبداو الصراع اليومى بينهم وبعدين مش قادرة ااقولك هما بيتعاملوا معمله طيبه ازاى وكمان بيمارسوا رياضه السباحه بجد احنا مش عارفين نعما معاهم ايه مش قدمنا غير الدعاء لهم بالهدايه