Wednesday, December 12, 2007

تاج من روايح الجنه

وصلنى تاج جميل قوى من صانعه الحريه جزاها الله خيرا انها افتكرتنى انى ارد عليه لانه به روحانيات حبيتها قوى معلش هاتكون اجاباتى طويله شويه ياريت تتحملونى نبتدى باول نفحه

ماهى سورتك فى القران(اى احب سوره اليك تقرأها فى فرحك وفى حزنك)؟

هو القران عموما باقراه فى اى وقت واشعر اننى استنشق الاكسجين وانا اقراه الحمد لله بس سورة الانعام بحبها قوى لانها كلها بتتكلم عن قدره الله وعظمته ونعمه الكثيره علينا علشان كدة تستحق ان تنزل ومعاها 70 الف ملك وكمان سورة مريم قد ايه بحس انها سورة فيها ترقيق للقلب عالى جدا وخصوصا والحوار الراقى عند مناجاه الله والتذلل له عند طلب شئ كما فعل سيدنا زكريا وهو يطلب الولد
وكمان عظمه الله وهو ملك الملوك وهو يشيد ويمدح انبيائه مثلا ققوله تعالى عن سيدنا اسماعيل انه كان صديقا نبيا
دة كمثال وليس على سبيل الحصر

ماهى احب ايه اليك الايه التى دائما تتمناها؟
الايات اللى اتمنها كتير برضه بس على سبيل المثال هاذكر منها الذى يحضرنى الان
انما يوفى الصابرون اجرهم بغير حساب
ولا تهنوا ولاتحزنوا وانتم الاعلون ان كنتم مؤمنين ان يمسسكم قرح فقد مس القوم قرح مثله وتلك الايام ندوالها بين الناس وليعلم الله الذين امنوا منكم ويتخذ منكم شهداء والله لا يحب الظالمين
قل من ينجيكم من ظلمات البر والبحر تدعونه تضرعا وخفيه لان انجانا من هذه لنكونن من الشاكرين قل الله ينجيكم منها ومن كل كرب ثم انتم تشركون

ماهى اكثر ايه تخاف منها وتدعو الله الا تكون من اصحابها
من الايات اللى بخاف منها جدااا غير طبعا الايات اللى بتتكلم عن اهل النار هى ايه كل ما اقراه اترعب جدا
قل هل ننبئكم بالاخسرين أعملا الذين ضل سعيهم فى الحيوة ا لدنيا وهم يسحبون انهم يحسنون صنعا اولئك الذين كفروا بايات ربهم ولقائه فحبطت اعمالهم فلا نقيم لهم يوم القيامه وزنا
وايضا قوله تعالى من كان يريد العاجله عجلنا له فيها ما نشاء لمن نريد ثم جعلنا له جهنم يصلها مذموما مدحورا ومن اراد الاخرة وسعى لها سعيها وهو مؤمن فاولئك كان سعيهم مشكورا كلا نمد هؤلاء وهؤلاء من عطااء ربك وماكان عطاء ربك محظورا ... قد ايه بخاف جدا لما تفتح عليا الدنيا وتعطينى الدنيا ما اريد اخاف ان يكون دة عطاء الله اخذته فى الدنيا وليس لى فى الاخره شئ واخاف اكون من المفلسين فى الاخرة
ربنا اتنا فى الدنيا حسنه وفى الاخره حسنه وقنا عذاب النار اللهم امين يارب العالمين

ماهى الايه التى تشعر انها تتكلم عنك
اى ايه تتكلم عن ضعف الانسان فهى تتكلم عنى
بس هناك ايه تذكرنى باحاولى مع نفسى
وما ابرئ نفسى ان النفس لاماره بالسؤ الا ما رحم ربى ان ربى غفور رحيما
بس فيه ايه نفيى قووى اتصف بها
وعباد الرحمن الذين يمشون على الارض هوانا واذا خاطبهم الجاهلون قالوا سلاما والذن يبيتون لربهم سجدا وقياما

من احب صحابى واحب صحابيه

كل صحابى بجد كلهم خوارق وكلهم يستحقون الحب حقا طبعا الخلفاء الراشدون دول فى المقدمه ثم احب سيدنا حمزة رضى الله عنه وخصوصا موقفه عندما دافع عن الرسول ودخل الاسلام وقتها دون تحضير من اجل ان ينصر الرسول بعد الاذى اللى فعله فيه الكافرون عند الكعبه
مصعب ابن عمير رضى الله عنه اجمل شباب قريش واحسنه مظهرا واطيبهم ريحا عندما دخل الاسلام لم يلبس اللى البس الخشن الذى لايستر من بدنه قدر ما يكشف وهذا الفتى المدلل عند موته لم يكن ردائه ليسر جميع جسدة اذا غطوا راسه به كشفت ساقه واذا غطوا ساقه كشفت راسه
سلمان الفارسى رضى الله عنه الباحث عن الحقيقه الذى ترك الملك والجاه وعمل فى وظائف وضيعه حتى يصل للدين الحق ترك الجاه والملك من اجل الله ومن اجل الاسلام
من يفعل ذلك الان

احب صحابيه
الرميصاء رضى الله عنها التى كانت تدافع عن الرسول فى غزوة احد موقفها هذا ابكانى جدا

من احب نبى اليك بعد الحبيب صلى الله عليه وسلم
سيدنا ابراهيم عليه السلام يستحق يكون ابو الانبياء فعلا اقراوا قصته وشوفوا قد ايه امتثاله لاوامر الله وقد ايه صبره وتعقله كان امه فعلا كما قال عنه الله سبحانه وتعالى موقفه من ذبح ابنه وموقفه من ترك ابنه فى صحراء قاحله شوفوا قد ايه ا متثاله لاوامر االله صلى الله عليه وعلى نبينا محمد افضل صلاه وتسليم

اذا كنت على عهد رسول الله صلى الله صلى الله عليه وسلم فمن كنت تحب ان تكون ولماذا
لو مش اكون طماعه اكون السيدة خديجه طبعا من غير تفكير لانها كانت نعمه الزوجه ومثل للزوجه الوفيه حقا

ماهو منتداك وموقعك المفضل
اى موقع مايطلبشى منى انى اعمل حساب لانى بازهق بصراحه من كل شويه اشترك فى موقع وبنسى بعد كدة انا اشتركت فين

ماهى احب الاسماء التى تحب ان تنادى بها
حاليا انا بحب رفقه جدا بحس فيها بالالفه جدا حتى بقيت استغرب اسمى وهو اصلا اسم مش عربى وهو فارسى فتحسه مالوش معنى

من هو كاتبك المفضل
مصطفى محمود وانيس منصور

مدون له فضل عليك واستفدت منه

الله السؤال دة جميل قوى بعد فضل الله طبعا من غير تفكير طبعا استاذى الجعان اللى علمنى التدوين
وبعدين ماعلينا اللى عمل كتير لتشجعى ولنشر مدونتى كفايه انه اول واحد وضع مدونتى عنده فى المدونه و اول واحدة كمان وكنت لسه فى بدايتى خالص وايضا كبير المتشردين اللى مازال يشجعنى واول واحد بعت ليا تاج وكنت لسه بقالى اسبوعين ومش كنت اعرف يعنى ايه تاج وهو اللى عرفنى يعنى ايه تاج
امانى بنت الجنوب اللى فعلا وقفت جنبى كتييير جدا ودايما تخرجنى من حاله الاحباط اللى احيانا تصيبنى كثيرا
انسانه اللى علمتنى ازاى احط بلير على المدونه لتشغيل الاناشيد
معلش انا كنت باكتب البوست سريعا لانى داخله دايل اب نسيت اذكر استاذ مهند علمنى ازاى اشغل جوجل رايدر
واستاذ عصفور المدينه اللى بيحاول يعرفنا امور فى الدين كتير منا مش بيعرفها بجد باعتذر انى نسيت فعلاوانا باكتب البوست
جزاكم الله عنى خير الجزاء ويارب مش اتحرم منكم ابدا
وطبعا كل مدون او مدونه وضع تعليق هنا شجعنى فيه بجد تعليقاتكم فرقت معايا كتييييير قوى وانتم اصاحب فضل عليا انى اظل اكتب لغايه دلقوتى
كل مدون او مدونه كتب كلمه حق فى مدونته اثرت فيا وغيرت فيا او عرفتنى شئ لم اكن اعرفه صاحب فضل عليا
ربنا يكرمكم يارب ويزيدكم من فضله

من هو قارئ القران المفضل لك
الشيخ عبد الباسط وسعد الغامدى

ماهو منشدك المفضل
النقشبندى و طه الفشنى ومحمد عمران و ابو عبد الملك

ماهو نشيدك المفضل
هما كتير قوى بس فيه للنقشبندى مولاى ولابو عبد الملك كفى يانفس

اذا كان لك دعوه تتدعوه وستتحق باذن الله فبماذا تتدعو
طبعا من غير تفكير اكون من اهل الجنه دة الشئ الوحيد الباقى
ماهو الداعيه المفضل لديك او شيخك المفضل
طبعا الشيخ الشعرواى وبصراحه كل الدعاه دلوقتى بيقلدوا طريقه الشيخ الشعراوى فى الدعوه باسلوبه السلس المصاحب بالضحكه الجميله وبساطته وومع انه كان لا يتنازل فى الفتوى بس عمرك ما تشعر معه بالتشدد فطالما الاصل فهو من احب استمع اليه جدااااا اكيد كل الدعاه كويسين بس طالما الاصل موجود فهو يكفينى
وايضا احب الامام ابى حامد الغزالى رحمه الله عليهما

ماهى اكثر عبادة تشعرك انك قريب جدا من الله
لما ربنا يفتح عليا بالدعاء بحس انى قريبه قوى واشعر بالسكينه بعدها

من احب افراد عائلتك اليك
بعد امى وابى رحمه الله عليه اخى صاحب مدونه عطشان للحريه (عصام) بحبه جدااا
لانه حنون بطريقه غير عاديه واكتر واحد فاهمنى ربنا يخليه ليا يارب ولابنه عبدالله

ماهو املك فى الحياه
نفسى يرجع العزة للاسلام تانى والناس ترجع تحب بعضها اكتر وتكون اكثر رحمه من دلوقتى
تمرير التاج دة اجبارى مافيش تراجع عنه نهائى ولن اقبل اى اعتذار
امررة
لماعلينا
وصرخه حق (مجدى ابو المجد)
بينو
اهل الجنه (مسلم)
وعبدالله (خرم ابرة)
عطشان للحريه (اخى عصام) لو فاضى يعنى
وحائر فى دنيا الله مافيش اعتذرات لو سمحت
استاذ حامد
امانى بنت الجنوب
انسانه (ياسمين)
لحظه
الام وامال
استاذ محمد عبد الفغار لا تراجع ولا استسلام حضرتك هاتجاوبه اجبارى مش اختيارى

استاذ مهند

شمس الدين ربه السيف والقلم

no fear
مؤمنه
اميرة محمد
البنت الشلبيه

طال الليل

المهاجر الى الله وزوجته
الراقص مع الذئاب
رينا
سمراء النيل
الطائر الحزين

و ياريت كل الموجودين عندى فى المفضله يجاوبه لانى بجد محتاجه اعرف اجاباتكم

27 comments:

smraa alnil said...

يااااااااااااااااه يا رفقة
جزاكي الله كل خير
بجد حسيت بالطمـنينة اووووووووي

وانا بقرا كلامك
وما اشد احتياجي للاحساس دة
وحشاني بجد
ومفتقداكي اوي

mohand said...

السلام عليكم

اجاباتك فييها ذكاء ولا انا م واخد باللي

كل الاسئلة بتقول اختاري سورة اختاري ايه اختاري صحابي

وانتي ما شاء الله
بتجمعي الكل ومش بتختاري تحديد

هههههههههههههه

ربنا يباركلك
ويعطيكي

قوليلي

ايه احساسك مع الاية دي

انا هكتب عنها لوحدها بوست

بسم الله الرحمن الرحيم

﴿ أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ ﴾

صدق الله العظيم

الاية دي بترعبني
عارفه ليه؟

عصفور المدينة said...

ربنا يبارك فيك ويسعدك في الدنيا والآخرة

المهـ إلي الله ـاجر said...

ما شاء الله

والله التجات دي فعلاً بتخرج الخير من القلوب أكتر والأكتر
بارك الله فيك اختنا الفاضلة وجزاك الله خيرا علي تمريرك البوست وغن شاء الله اقوم بالرد عليه

Mohamed A. Ghaffar said...

حاضر

ana ga3an said...

حقيقي تاج من التاجات الحلوة
وردود احلي
تجعلنا نقترب اكتر من شخصيتك
تحياتي لكي صديقتي في الكفاح التدويني

أمــانــى said...

بــــــــــــخ
ازيك يا رفقتى وحشتنيى اوووووووووووووووى
جايبة ليه فى سيرتى يا هانم
ههههههههههههههههههههههههههههههه
ههههههههههههههههههههههههههههه
جزاكى الله خيـرآ يارب آمــين
والايه اللى بتخافى منها برضو بخاف منها وبأخاف من ايات الوعيد لأهل النار
يااااااااارب أجعلنا من اهل الجنة يااااااااااارب آمـــــــــــــــين

شريف طلال said...

اجابات جميله جداً
شكراً ليكى
و منكم نستفيد يا ستى

حامد said...

قد قبلت واجبت عن التاج.. وكل تاج وأنت بخير

التوأمان said...

اجاباتك حلوة اوي
وأيمانية اوي

وانا من اكتر الآياتن الي بحبها فعلا (انما يوفي الصابرون اجرهم بغير حساب)
ربنا يجزيكي كل خير

أمـ الله ـة said...

إجابات سريعة الوصول إلى القلوب

بارك الله فيك حبيبتى

وجزاك الله خيراً على تمرير التاج إن شاء الله اجاوب عليه ولكن فلتعذرينى إن تأخرت فى ذلك

أسالكِ الدعاء لى ولكل المسلمين

رفقة عمر said...

سمراء النيل

اخيرا وحشتينى جداااا يارب يكون غيابك خيرا
ياريت نشوف احنا كمان اجاباتك على التاج ونذكر بعض باايات الله
كل سنه وانت بالف خير

****************

استاذ مهند

اصل فى ايات كتير قوى نفسى اتكلم عنها فكتبت اللى كان بيحضرنى وقتها
منتظره حضرتك موضوعك عن هذه الايه وهى فعلا تخوف لان الكلام للمؤمنين وهل هم قلوبهم خاشعه للاسف ينقصنا الخشوع سبحان الله علشان كدة التاج دة هايظهر لنا ايات كتير احنا غافلين عنها الاجابات هاتظهرها لنا
اهلا بحضرتك وباسعد بتعليق حضرتك جدا لانه دايما بيضيف ليا
جزاك الله خيرا وكل سنه وحضرتك بخير

***************

استاذ عصفور المدينه

وجزاك الله خيرا ويبارك فى حضرتك
واستخدمك الله لنصره دينه اللهم امين يارب العالمين

كل سنه وحضرتك بالف خير


***************

المهاجر الى الله

اهلا بحضرتك جزانا الله واياك
ربنا يبارك فى حضرتك الهم امين
منتظرين نشوف اجابات حضرتك
اللى اكيد هاتكون جميله كعادة حضرتك دائما فى كل مواضيعك

كل سنه وحضرتك بالف خيرا

***************

استاذ محمد عبد الغفار

جزاك الله خيرا جبرت بخاطرى
:D
كل سنه وحضرتك بالف خير

رفقة عمر said...

استاذى الجعان

اكيد طبعا حضرتك عارف قد ايه باكون سعيدة بتعليق حضرتك بجد بتدخل السرور على قلبى جدا جزاك الله عنى خير الجزاء
انا كنت نفسى حضرتك تجاوب التاج بس خفت امررة لحضرتك لتكسفنى كالعادة
وكمان قرات تعليقك على ندى وقلتلها لتاج ممنوع والزعل مرفوع
فخفت بصراحه
بس بصراحه اتمنى تجاوب عليه لو امكن يعنى

كل سنه وحضرتك بالف خير
وعيد لحمه سعيييييد جدا

******************

امااااانى

وحشتينى يابنتى ايه الغيبه التدوينيه دى لولا انى باكلمك وباطمن عليكى كان حالتى هاتكون وحشه بجد لغيابك دة
يارب تنورى عالم التدوين تانى
كل سنه وانت طيبه يااجمل واطيب بنت فى الجنوب

******************

شريف طلال


اهلا بحضرتك زيارتك الاولى اسعدتنى
شكرا على مرورك
وكل سنه وحضرتك بالف خير


***************

استاذ حامد

اهلا بحضرتك
شكرا لحضرتك كتير ودة شئ اسعدنى كثيرا
جزاك الله كل خير
و اعطاك الله كل ما تتمناه واكثر اللهم امين يارب العالمين

كل سنه وحضرتك بالف خير

*************

التوامان

اخباركم ايه واخبار الامتحانات يارب يكون كل شئ تماما ربنا يستخدمكم لنصرة دينه اللهم امين يارب العالمين
وتكونا كما الفتيان اللى قتلوا ابى جهل
ياريت تجاوبوا على التاج لو فاضين احب اشوف اجابتكم

كل سنه وانت بالف خير

***************

امه الله

اهلا بيكى منورة المدونه
ربنا يبارك لكما انت وزوجك الكريم بجد باسعد جدا من وجود امثالكم على النت نفسى النت يكون اغلبه خيرا بدل ما كان الاول لا يسمع كلمه نت الا وكل الناس اشمئزت واستنكروا استخدامه
وانا كثره الطيب يمحى الخبيث باذن الله
عقبال كدوة اولادك ما يكونوا مدونين لنصره الدين الله امين يارب العالمي
باسعد بتواجدك جدا انت وزوجك
على مدونتى ربنا يبارك لكم يارب اللهم امين يارب العالمين

إنـســـانـة said...

الله

التاج ده جميل اوى يا رفقة وان شاء الله اجوبهولك من عيونى

مش حقولك زى سمرا وامانى انك وحشانى ومفتقداكى لانك دايما معايا الحمد لله رب العالمين وماسكين فى ودن بعض دودو دودو ههههههههههههه

بس بينى وبينك كدة بس اوعى حد يسمعنا .. ها

فرحانة جدا بحالة التفاؤل والإشراق والأمل اللى حساها فى المدونة اليومين دول .. يااااااااارب دايما

اللهم آمين

بحبك فى الله
:)

الطائر الحزين said...

بارك الله فيك
وشكرا على تمرير التاج

اكرمك الله

تحياتى

صانعة الحرية said...

رفقه
السلام عليك ورحمة الله وبركاته
اجاباتك رائعه
وسعيده جدا انك جاوبتى على التاج
وجزاكى الله خيرا يا قمر
ومعلش مقصره معاكى

عمر بوك ستورز said...

كل ما تقرؤه تحت سقف واحـد

بجد بجد ... زرورنـا تجدون ما يسركم
قائمة كبيرة من شتى الكتب وبأسعار لا تقبل المنافسـة
أقل الأسـعار

بين أيديكم

مدونون ضد ابو حصيرة said...

شكرا على اشتراككم معنا في حملة مدونون ضد أبو حصيرة .. ونرجو منكم وضع بنر الحملة على موقعكم للأعلان على الحملة ونشرها .. وشكرا

No Fear said...

السلام عليكم
أولا كل سنة و أنت طيبة
و يارب السنة القادمة تكوني ممن يلبو النداء إن شاء الله
ثانيا تاج جميل قوي بجد
جزاكي الله كل خير
و يجازي من كتب أسئلته كمان كل خير
و يجعله في ميزان حسناتكم
أنا سعيد قوي أنك مررتي التاج ده لي
لكن بعد إذنك فعلا نش هأقدر أجاوب عليه
انا أسف متزعليش
جزاكي الله كل خير

MerMaid said...

ياااااااااااه

بجد انتي شخصية حلوة قوي يا رفقة عمر

بجد والله انا حبيتك في الله

و اتمني فعلا مصادقة اناس يساعدوني علي التقرب من الله

لاني بقيت بعيدة شوية

:))

اذا احب الله عبدا نادي في السموات اني احب فلان فاحبوه

الباحث عن الحقيقة said...

السلام عليكم ورحمة الله وبركاته
بفرح جدا لما بيجى تاج لاى مدون انا بحب اتابعه لانه بيخلينى اقرب منه اكتر واتعرف عليه اكتر
سعيدا جدا بهذا التاج واجاباتك عليه
ربنا يوفقك فى حياتك كلها

دكتور حر said...

الله ينور يا رفقخ عالاجابات

بس فيه تصحيح قد يكون املاءي

سلمان الفارسي
الرميصاء بنت ملحان

No Fear said...

السلام عليكم
أنا عندي القرآن مكتوب لو تحبي أبعته لك علشان أنت بتكتبي أيات كتير ساعات بتكون غلط و بدون التشكيل

No Fear said...

السلام عليكم
أبعتي لي الإيميل بتاعك
و أنا أبعته لك
الإيميل بتاعي
newmido26@hotmail.com
و طلب تاني الصورة التانية أحلي كتير
أنا عارف طلباتي كتير بس و الله بيكون نيتي خير

رفقة عمر said...

انسانه

هو انتى لازم يعنى تكشفينا على الملاء كدة
انتى حبيبتى
منتظره اجاباتك
كل سنه وانته طيبه

*************

الطائر الحزين

جزاك الله خيرا
وحضرتك تشكرنى على ايه انا اشكر حضرتك على قبوله

كل سنه وحضرتك طيب


***************

صانعه الحريه

جزاك الله خيرا لتمريرك التاج الجميل دة ليا بجد ربنا يجعله فى ميزان حسانتك
وربنا يرزقنا الاخلاص اللهم امين يارب العالمين

*************
no faer

لا ابدا مش هازعل طبعا بس اكيد كنت اتمنى انى اشوف اجاباتك
وشكرا قوى على عرضك باحضار القران مكتوب جزاك الله كل خير
وجعل ذلك فى ميزان حسناتك اللهم امين يارب العالمين

****************

mermaid

ربنا يخليكى يارب
واتمنى انى اكون كما تظنين
واتمنى كمان تجاوبى التاج لو امكن
سعيدة بوجودك
كل سنه وانت بالف خير

*************


الباحث عن الحقيقه

حمد لله على سلامتك
نتمنى نرى اجاباتك على التاج طالما حضرتك عدت للتدوين تانى

كل سنه وحضرتك طيب


***************

دكتور حر

جزاك الله خيرا
على التصحيح اسفه فعلا هاصلح اخطا ان شاء الله


كل سنه وحضرتك طيب

No Fear said...

السلام عليكم
صورة البنت اللي في البروفبل بتاعتك كانت أحسن من اللي موجودة دلوقتي

شمس الدين said...

السلام عليكم و رحمة الله و بركاتة

ازيك يا رفقة عاملة ايه ؟؟؟

بجد اجاباتك جميلة اوي اوي اوي

بس انا بعتذر و اعذريني , انا مش بحب التاجات ولا بجاوب عليها و فيه تدوينة عملتها مخصوص اسمها مدونتي ... tagfree

غير انه بيني و بينك كدا و بصراحة التاج دا عميق اوي , و انا اخشي علي نفسي من الرياء و بصراحة كدا النواحي الدينية بالذات بفضل انها تبقي من بقية حياتي الخاصة

مش بقول كدا لا سمح الله علشان حاجة و لكن كل واحد له منظورة و دا مش يمنع ان ناس تانية تجاوب عليه

تحياتي ليكي يا قمر