Saturday, December 15, 2007

هل احنا صادقين ولا بنكدب على نفسنا

النهاردة قدرا دخلت مدونه لن اذكر اسمها صاحبها يتكلم عن التدوين والمدونين وكان قاسى قوى فى حكمه وفى كلامه ولكنه اثر فيا قوى لدرجه انى فكرت انى اغلق المدونه نهائى وكان تركيزة عن المدونات التى بتتكلم فى الدين وخصوصا البنات اللى بتكتب فى الدين

وقال هو ايه دة هى كل بنات مصر بقت متدينه وكلهم يبتكلموا فى الدين واذا تعاملت معاه لا تجد منها معاملات دينيه غير جزاك الله خير وبس كلامه اثر فيا انا من ضمن البنات المدونات اللى بتحاول تتكلم فى الدين كما عرفته وحسته فيه امور مازلت مقصره فيها لا اجرؤ انى اتكلم فيها وانا لا افعلها انا دائما بحاول اتعامل على قدر ضعفى البشرى انا عليا رقيب لا يغفل ولا ينام ولايهمنى احد غيره

ولكن كلام هذا المدون جعلنى اخشى ان اكون كما قال اخشى انى لا اكون صادقه فيما اقول لن اتكلم واقول اسبابى لعمل مدونتى

انا قلت قبل كدة فى بوست سابق ليه انا بادون بس خايفه تكون البدايات كانت طيبه وكانت النيه خالصه لله اخاف الان ان اكون نيتى تغيرت رغما عنى بجد انا خايفه وخايفه اكتب تانى الصحابه كانوا يخشون ان تنزل ايه تخبر الرسول ان منهم منافق

وكان سيدنا عمر بن الخطاب دائما يخشى ان يكون من المنافقين لما سيدنا عمر رضى الله عنه كان يخشى النفاق مابلنا نحن لا نخشى على نفسنا من الوقوع فيه وان يكون عملنا ليس خالصا لله هلى نحن فعلا نريد ان نعرف الاخرين بالدين ولا نريد الظهور والمكانه بين الاخرين

ونتعالى على الاخرين باننا نعرف اكثر منهم ( وما اوتيتم من العلم الا قليلا) بجد بقيت متلخبطه ومش عارفه اعمل ايه

الرسول الكريم صلى الله عليه وسلم قال بلغوا عنى ولو ايه

يبقى هل من يفعل دة غلطان وتتشكك فى نواياه ولنفرض انه فعلا يريد الظهور والمكانه بين الناس طيب ما تستفيد من معلومته الدينيه وكن انت احسن منه مش عارفه بجد هل التدوين دة مقصور على ناس معينه ليه نشكك فى نوايا الاخريين ليه نحجر على الاخرين ونسخر منهم انهم عايزين يعبروا عن اللى جواهم حتى لو كتب اى حاجه هو حر ان شالله يكتب هو اكل ايه النهاردة هو التدوين دة حكر على حد معين
بجد انا بقيت متلخبطه وبجد ومش عارفه اعمل ايه فعلا احنا مش مثالين قوى بس هو لازم نظهر القبيح علشان نكون كويسين الرسول صلى الله عليهم وسلم قال كل امتى معافى الا المجاهرين يعنى اللى بيجاهر بالمعصيه يبقى ازاى لو فيا صفه سيئه اعلنها على الملاء او باعمل معصيه معينه اعلنها يبقى سترنى الله وانا اكشف ستر الله على ليه كل حاجه جميله بنحاول نشكك فيها ونحبطها ونهاجمها بدل ما نفرح بيها ونشجعها ونحترمها طول ما احنا كدة هانفضل تحت ولن نرتفع ابدا ياريت نحب بعض اكتر من كدة طالما اننا هدفنا واحد وهو رضا الله وليس شئ اخر

لازم ابقى مع نفسى شويه واسالها واجدد نيتى تانى ليه انا بدون وعلشان مين

اللهم انى اعوذ بك ان اشرك بك وانا اعلم واستغفرك لما لا اعلم

50 comments:

عصفور المدينة said...

مش حاعلق
المثالية - القدوة

انا قرأت هذه التدوينة المشار إليها منذ فترة
ولكن الأخ كان بيتكلم عن فتيات تعامل معهن

تصدقي انا كنت كاتب تدوينة اسمها عندما ذهبت إلى هناك
بس تراجعت عن إنزالها

لو قرأتيها حتعرفي إن الأخ ده معذور

كنت باحكي عن جدولاتي في مدونات من الجانب الآخر وكيف أنني رأيت ازدواجية بعض المعلقين

هوني عليك كل شاة تعلق من رجلها

mohand said...

السلام عليكم

قريت الموضوع اللي انتي بتتكلمي عنه

وعادي جدا

هو قال رايه الخاص به

هل معني كده ان ده راي الشعب كله بتاع المدونات

معتقدش

كوني زي ما انتي عايزه تكوني مش زي ما هما عايزينك تكوني

تحياتي

No Fear said...

السلام عليكم
أنا شخصيا بامر بحالة زي اللي أنت بتمري بها بس في الحياة عموما يعني لما بتعامل مع الناس بطريقة كويسة بأقول ياتري أنا بعمل كده علشان أمن شرهم و يقولو علي كويس و لا فعلا أنا كويس
و كمان في موضوع العبادات عموما الإنسان ساعات بيحس أنه بينافق لذلك أمتع عبادة للأنسان هي الصيام لأنها بين الانسان و ربنا بس مفيش حد بيطلع عليها
أستعيذي بالله من الشيطان و ربنا يبارك فيكي و في اللي بتعمليه
و يجازيكي خير إن شاء الله

دكتور حر said...

أختي رفقه

بداية

هوني عليك وتذكري

ترك العمل من اجل الناس رياء
والعمل من اجل الناس شرك

بمعنى
انه لا مفر لديك من الثبات على موقفك ونيتك التي بدأت بها وتستكمليها بإذن الله

******
بس ممكن ناخد من كل حاجه الحلو ونسيب الوحش ممكن نشوف ايه اللي الراجل عايز ينتقده وننظر لنفسنا فيه ونصلحه لو موجود ونكمل عادي لو مش موجود
مش شرط كل حاجه تكون انتقاد وشخط
لازم منعطيش الموضوع اكتر من حقه
*******
تدوينه قديمه ممكن تفيد

التعديلات التدوينية

***********
كمان ملاحظه ورجاء تدويني
يا ريت تكتبي بالعربي أو بالعامي فقط ياريت
لأن الهجين ده مش ظريف
ولا ايه رأيك
ده حتى العنوان كده
*********
دمت بكل خير وتقبل الله منا ومنك

عصفور المدينة said...

طيب الحمد لله إنك قرأتي تدوينتي أنا سعيد جدا

ممكن تسمحي لي أحط رابط تدوينة الأخ المشار إليها عشان الطرح العادل؟

عصفور المدينة said...

السلام عليكم ورحمة الله
فيه إعدادات
settings
وتختاري
comments
وبعدين
Comment Notification Address
تكتبي فيه عنوان الإيميل
وبعدين تأكدي إن الإيميلات مش بتروح البريد المزعج

عصفور المدينة said...

هو أنا طلبت ليه إني أحد رابط التدوينة عشان هو كان بيتكلم عن عدة موضوعات أخرى وكان الموضوع اللي لفت انتباهك أحد هذه الموضوعات

وبعدين الأخ صاحب المدونة أخ فاضل نحسبه من المتدينين أصلا

وهو يسعى دائما للإصلاح وليس من أولئك الذين ينتقدون للهدم أو السخرية

حول التدوين والمدونات

ربيــع said...

عزيزتي رفقة
اولا لا خير في كاتم العلم
واهم شيء تعتمديه في النشر
التحقق من الصحة و اختيار الموضوع الصائب
وسوى ذلك فإن نيتك لها كل الاثر

وليس لكاتب ان يحكم على نيات من حوله
فالاحرف لم تبلغ ذلك الشأن الذي يفسر كل مابداخلنا..

وان اردتي العودة الى اصل كتاباتك
فنصيحتي ان تعودي لتقرأي ادراجاتك السابقة

وستعلمين اين رفقة هنا
:)

خمسة فضفضة said...

السلام عليكم ورحمة الله وبركاته

الاول اقولك كل سنة وانت طيبه يا رفققه
اما موضوع التدوينه
فاعتقد ان دي علاقه بين الانسان وربه هو اللي هايحاسبه عليها سواء كان بيقصد بكلامه ده رياء وسمعه ولا يبتغي وجه الله سبحانه وتعالي

و كل واحد هيتحاسب وفقا لنيته ، مافيش حد بيدخل جوا نفس التاني وهو بيكتب علشان يعرف هو بيقصد ايه بالظبط عند طرحه الموضوع الفلاني او القضيه العلانيه ، سواء بقي كانت حاجه دينيه او غيرها
ومش معني ان واحد قال الناس اللي بتكتب دي مش بتبتغي وجه الله يبقي نبطل كتابه ، كل واحد مسؤل فقط عن نفسه ،
بس المطلوب هو تجديد النيه كل شويه وعدم الانصياع وراء وساوس الشيطان ، لان ده ممكن يكون مدخل ليه انه يحرمك من ثواب كبير اوي بتاخديه لما بتكتبي في الدين

ma_3alina said...

السلام عليكم ورحمة الله وبركاته

كيف حالك يا رفقة .. ارجو أن يكون غضبك واللخبطة اللي عملها الموضوع فترة مؤقتة

كنت عايز افرق لو تسمحي لي بين حاجتين في حديث النفس للنفس ..

الأولى هي الخوف من النفاق والرياء وحب الشهرة والظهور
والقانية هي وسوسات الشيطان وكيده

فأما الأولى فيترتب عليها زيادة الأعمال وتحسينها وتجميلها ..
وأما الثانية فيترتب عليها ترك الأعمال وهجرها لما يزرعه الشيطان في النفس من التشكيك في النية ..

يعني الشيطان لما يأتي للمسلم الصالح ليترك العمل الثالح لن يأمره بترك العمل مباشرة وإنما بيلف ويدور ويقول له نيتك واظبط نيتك إلى آخره .. مع إن إصلاح النية يكون مصاحب للعمل ومش لازم يتوقف العمل لتصحيح النية .. فالنية ركن مصاحب للأعمال

وربنا سبحانه وتعالى يقول .. لمن شاء منكم أن يتقد أو يتأخر .. يعني مفيش مجال للتوقف ، مفيش غير حالتين بس تقدم أو تأخر

شريف طلال said...

السلام عليكم
بصى طالاما انتى بتخلصى النيه
و نيتك أنك تفيدى و لو أى شخص بيخش مدونتك بأى حاجه
و نيتك صافيه و أنك مش بتسعى لأن حد يقول عليكى (البنت دى متدينه و بتاعت ربنا ) و أن كل ألى بتسعى ليه أنك تاخدى حسنات و تفيدى دينك و أمتك يبقى خلاص
أستمرى
بس اهم حاجه أن طالاما أنتى مش دارسه فقه و شريعه و غيره و غيره زيك زيى و زى معظم المدونين يبقى نتكلم من خلال ألى سمعناه و قرأناه من ناس موثوق بيهم
عشان نبتعد عن الأخطاء
و الدين لا يقبل الزياده ولا النقصان
جزاكى الله كل خير و أستمرى دون خوف و الأجر ان شاء الله عند الله
و كل سنه و أنتى طيبه

طال الليل said...

طيب جدا إن حضرتك فتحت الموضوع الهام الذى أجده يحيك فى صدرى والذى لأجله أتوقف أحيانا عن تدوين أو نشر بعض الخواطر
لكن ألست معى أختى الكريمة أن على طرف أخر من المسألة يقف كتمان العلم والضن بالنصح محذرا ومؤنبا لمن تتناوشه مثل هذه الأفكار
لا أحد يطلب من المسلم أن يتحول إلى ملاك ولا بمقدوره هو أن ينسلخ من إهابه البشرى والذى من لوازم بشريته الخطأ ومن سماته التعثر والزلل لكن يبقى إيمان المسلم بربه ويقينه برحمته ليتابع سيره إلى الله متزودا بالتقوى و التوبة يعضد ذلك كله من إخوانه النصح ومن نفسه تعهد بتصحيح النية وتصويب الطريق
لست اجد فى راى الأخ صاحب المقال إلا خوفا من تبدل النيات أو رصدا لحالة من الفصام بين القول والعمل لدى أقلية لقيها
موضوعات حضرتك حقا متميزة بارك الله فيك

إنـســـانـة said...

رفقة التدوين مرآة للواقع بجد زى ما فى الواقع فى الكويس وفيه الوحش واحنا مش حينفع نفضل قاعدين فى بيتنا ومانعاملش الناس لحسن نكون منافقين ولا فينا رياء ولا حاجة

لا يا رفقة كدة غلط .. التدوين زى الواقع ولازم نتحرى الصدق وربنا يعيننا على انفسنا ويهدينا ويهدى الجميع

اللهم آمين

المهـ إلي الله ـاجر said...

السلام عليكم

أنت من المدونات التي نحسبها علي خير ولا نزكيكي علي الله . فنحن لا حكم لنا إلا بالظاهر ونكل امر الباطن إلي الله .. والظاهر لنا هو الخير والحمد لله .. لا يخلو الامر في بعض المدونات الاخري من مثل ما ذكر الأخ صاحب الموضوع الذي تحدثتي عنه .. ولكني لا أ‘تقده إلا أنه يشير لبعض النماذج ولا يعمم الرؤيا لأن التعميم قصور في التفكير كما هو معروف

فلا عليك .. كوني كما انتي ولا يجعلك هذا الموقف إلا أكثر تحديداً وقدرة علي الثبات في النهج الكريم الذي تنتهجيه في مدونتك .. وأنت الوحيدة القادرة علي تحديد هذا النهج وثقله والإعتناء به بين الحين والحين


ولا عليك .. فلقد وصفت مثلاً أنا والأخ عصفور المدينة والاخ دكتور خالد بأن مدوناتنا تاخذ للعصر الجاهلي !!!! (: من قبل احد المدونين عافاهم الله !!! فلم نلتفت لهذا فنحن نعرف لماذا نحن هنا وما هو الهدف والسبيل


ثبتك الله علي الحق ونفع بك

الطائر الحزين said...

لماذا نعقد الامور بهذه الطريقة
كلنا بنا اخطاء
وكلنا نعمل معاصى
وكلنا لنا ذنوب

لا احد يحاسب احد

لكن كل منا يحاول قدر جهدة ان يفعل الخير

يعنى لو انسان يفعل معصية وده يعمل خير نقول له لا اوعى تعمل خير لما تبطل تعمل معصية

لا
ان الحسنات يذهبن السيئات

اكثرى من عمل الطاعات و رب كلمة يقولها احد منا لا يلقى لها بالا هو شخصيا تكون سببا فى هداية شخص تكون له بالدنيا وما عليها



تحياتى


كل عام انت بخير

Tamer Nabil said...

كل سنة وانتى طيبة

عيد سعيد عليكى

شوفى احنا يماما بنشوف ناس بتكتب عن الدين وكل انسان وغرضة ونيتة

ومفيش حد هيدخل جوة انسان ويعرق قصدة اية من اللى كتبة وبيعمل بية ولا لا

انا اخلينى فى نفسى مدام بكتب حاجة مقتنع بيها وشايف انها صح انتهى

ماليش دعوة بغيرى

ربنا يوفقك

تحياتى

Mohamed A. Ghaffar said...

فى فرق كبير بين الكلام فى الدين والكلام فى التدين

وكل واحد ونيته وعمله ، خليكى فى نفسك وملكيش دعوه بحد

حامد said...

الغاليه رفقه ... قرأت تدوينتك وقراءت التعليقات ولكنى للأسف لم أجد اى من اخوانى المدونين قد فهم أو اقترب من منطقه الحيره لديك..لذلك وقبل التعليق على مدونتك أود ان اطرح عليك وعلى كل مدون سؤلاً ... كنت أطرحه على نفسى مرارا وتكرارا... هل تأثرنا ببعض الكتابات أو الموضوعات التى تتكلم عن أحوالنا يعنى بالضروره وجود خطاء فى تصرفاتنا وخلل فى ثبات نياتنا ... فالكثير من الكتابات والادراجات والتى تهتم بشأن العلاقات فيما بيننا وبين انفسنا وبيننا وبين الناس ثم ما بيننا وبين الله سبحانه وتعالى .. مهما بلغ الانسان من علم وتقى ورحمه الا انه بمقارنه ما يقراءه وما يفعله .. يرى نفسه مقصرا وعلى خطر .. وهذا لا يعبر عن خلل فيما نقوم به ولكنه ضروره من ضرورات نقص الانسان ومحاوله بحثه عن كماله المفقود.. فلا يصل لحد الاطمئنان اليقينى غير اثنين .. اما جاهل معتد بنفسه.. وإما رجل قد ذهب الى ربه وعلم سموا منزلته .. حتى الانبياء والمصلحين.. كانوا يروا انفسهم دائما مقصرين .. فما بالك بحال هذا يمثله .. ثم تجدى من يكتب لك عنه .. ويحاول اظهار النقص العام على اعتباره حاله فرديه تخصك انت وحدك ... هذا حال كل العقلاء عندما يقرأون او يسمعون ما يدل على تقصيرهم ونقصان عزيمتهم ..تلك واحده ..ثانيا.. الدين ليس حكرا على احد ولا يوجد فى ديننا الكريم رجال دين.. بل يوجد متدينين وعلماء..ولا يمكن اعتبار ما تريه انت او اراه او يراه غيرى عن دينه بأنه تكلف او قولا لعكس ما نعمل به .. ديننا واضح وضوح الشمس ولا يوجد به اسرار.. ومساجدنا مفتوحه الابواب والنوافذ ولا يوجد بها حجرات سريه او غيرها .. وضوح.. فقط لا غير .. ومن ضرورات هذا الوضوح أن ينقل الانسان ما يراه لغيره سواء كان عالما اومتدينا او غير ذلك والنقل يكون اما بممارسه فعل يدل على حال او بقول ينصح به .. ولهذا الامر اعتبارين.. الاول ان ما نقوله يحتمل الخطاء او الصواب .. فإن كان خطأ فلا يمكن تصحيحه الا بإظهاره وطرحه للغير .. وإن كان صحيحا.. نفع به نفسه وغيره ...ثالثا..أن الانسان فى بحثه عن الكمال قد يكون بعضنا فيه سقط متاع .. وهذا لحكمه او نتيجه لفساد النيه ، ومن يكون هكذا فلا يجب أن نقيم له المشانق أو نتسابق على جلده لأن كلامه غير فعله بل الاحرى بنا ان نرحمه ونحاول تفنيد مبداءه المتهاوى.. فأن ارد تائه خير عندى من جلد مائه غادر ..فالكثير من الكتابات والتى قد تتسم بالنصح الظاهر قد تجد بين حروفها استعلاءً فى الغالب بغير محله ووصايه قد تكون منفره من حال قد يكون لبنه اولى فى رد تائه او صلاح قلب قد افسده صاحبه .. حتى وان كان رياءً .. فلا يجب ان نقيم محاكم للتفتيش على النيات وان نشغل عقولنا بتصيد أخطاء الغير للدلاله على صحه رؤيتنا وسبق توقعاتنا ..الانسان هو الانسان منذ هبط ابينا الى الارض والى ان يرث الله الاض ومن عليه .. احلامه واحده وطموحاته لن تخرج عن عده اياء بسيطه ف مجملها ..ومن يرى من نفسه تجاوز.. فكلنا كذلك.. ومن يراى من نفسه تقصيرا فنحن اكثر منه تقصيراً... عزيزتى الغاليه رفقه.. المدونه لبنه فى بناء البحث عن الكمال وتقويم الذات .. قد تكتبين يوما ما لا يمكن ان تفعليه .. ولكنه ما دام دار بعقلك فيوما ما ستحققيه.. والسؤال الذى يمكن ان يطرحه كل مدون على نفسه.. ايهما افضل ان اكتب ما راه وان كان خيالا.. ام اكبت بحجه صعوبه تحقيقه .. ان احاول ام اكتفى بمص الشفاه عجزا ..نقطه اخيره .. الاخ العزيز كاتب المقال يشتكى من التدين الظاهر للإناث من المدونات ..كما أخبرت انت فلى ادراجك.. فهل مقياسه للتدين وحدوده التى يريدها يمكن اعتبارها حدود شرعيه ودينيه بغيرها كا المدونات تكون ساقطه الهدف او مرائيه ؟..... عزيزتى كل انسان مهما كان جميلا فبه مواطن للقبح... ومهما كان قبيحا فلابد من وجود بعض الجمال فيه.. وعنى.. دائما ابجث عن الجمال فى افعال الناس مهما كان متوارى وغير واضح .. ونصيحتى.. ابحثى عن الجمال فيما تكتبين.. وفيما تحاولين ان تكونى.. وكما تريدين... اسف للاطاله ..ملحوظه... لم اقراء قال الاخ المدون المذكوره.. لذلك ردى على كلامك فقط.. لعلى عندما اقراء المقال قد اجد لاخى اسباباً معتبره لرأيه .. .. ولك تحياتى

IRAQ Sawt Alhaq said...

السلام عليكم ورحمة الله وبركاته أختنا رفقة
كل عام وانت بخير ..
اعاده الله على كل المسلمين بالخير .
أخت رفقة أشعر في بعض الاوقات أنك تقسي على نفسك .. لم أشعر يوما وانا اقرء في مدونتك بشئ من النفاق .. فما يخرج من القلب بصدق تأكدي يدخل العقل والقلب أيضا .. مايخالف أن تجددي نيتك لله ..ولكن لا تفكري في التوقف حتى ولو لبعض الوقت فربما كلماتك في المدونة هناك من تهون عليه أو تذكره بشئ نسيه في الحياه والله الموفق
عمر

allah-slave said...

ان ا مش عارف يعني هوا سايب الرجالة الكتير اللى مسقطة البنطلونات ومكبرة الجى ومروقة الدي وجاي يمسك في البنات
سبحان الله
بس العملية تجديد للنية مش اكتر
وكفاية عليكي الردود انا مش هقدر ارد زيهم

سلام

أمــانــى said...

رفقتى
هونى على نفسك ولا تحزنى ولكن ندعو الله دائمآ اللهم طهر قلوبنا من السمعة والرياء ياااااااارب آمـــــين
اما هو كتب ايه هو له كامل حريته او هو ممكن شايفة ظاهرة معينة ونفسه الحاجة من التدوين تكون كويسة او تقدم افضل ما عندها ده برضو كويس ولكن ازاى ؟؟؟ !!!!!! صعب فى ظل تحديات ومجتمع مفتوح بكافة اشكاله
وانا برضو حزينة من اللى يقول كلمة على المتدين او اللى بيتكلموا على الدين لاننا مش بندخل جوه قلوب الناس
وربنا يجازى كل واحد يقول كلمة حق او يأثر فى الناس او يغيير منهم للافضل
سلام رفقتى

شــــمـس الديـن said...

السلام عليكم و رحمة الله و بركاتة

ازيك يا رفقة ...عاملة ايه ؟؟؟
اتمني تكوني بافضل صحة و حال

عايزة اقول لك حاجة كدا في السريع
لازم اولا و اخيرا يكون عندك ثقة جامدة اوي في نفسك ... انا مش بقول انك مش عندك و لكن تزوديها شوية , ليه بقي ؟ علشان الشيطان بيبقي ليه مداخل احنا مش نتخيلها , يعني لما بيشوف حد ملتزم و مش عارف يعمل معاه ايه يقوم يدخل له من موضوع تلبيس الرياء و ما الي ذلك

مش اي تدوينة تقرأيها تخليكي تشكي في نفسك ...

اجلسي مع نفسك كل فترة و جددي عزمك و نيتك فما تفعلين ولا تهتمي لاي كلام ايا كان

nada_adly said...

عزيزتي الغالية رفقة العمر

اول مرة اعتقد اشارك في مدونتك برأي وتعليق

بس قبل ما اشارك اسمحي لي ااقولك انتي وحشتيني جدا

واعذريني انا لسه داخلة المدونة بتاعتي من قريب وجددت فيها انا كنت اهملتها بقى لي فترة طويلة ما كنتش باهتم اصلا اني اشوفها بسبب ضغط الشغل والحمد لله على كل حال

والحقيقة انا يسعدني جدا جدا اننا نكون اصدقاء

بس مش عارفةازاي ابعت لك ايميلي على العام هنا عندك ؟

نفسي والله اتعرف عليكي عن قرب واتكلم معاكي ربنا يكرمك يارب


نرجع بقى للاخ المحترم اللي كاتب المدونة

خير بقى ان شاء الله

هو حضرته بيقول فيها ان كل الشعب بقى بتاع مدونات

طيب مثلا انا واحدة ما ادركتش قيمة المدونة الا لما بعدت عن مصر

اني افضفض


اما الكلام في الدين وان كل البنات بقت متدينة

اللي مطلع على اللي في القلوب ربنا

والكلمة امانة

وانا شخصيا اما باكتب لحد وباقول (الله يكرمك) باكون قاصدة الدعاء فعلا

مش مجرد كلمة او لازمة على لساني

عزيزتي الغالية انتي قلتي قبل كده ان (انا جعان) استاذ التدوين مع احترامي لجميع الكلمات الصادقة والمدونين المحترمين جميعا

(انا جعان) كان قالك اكتبي كل اللي يخطر ببالك واللي تحسي بيه

صح ولا لاء؟

اعتقد ان المدونة لو ماحققتش الهدف ده يبقى ايه فايدتها

اما الدين بيني وبين ربنا علاقتي بيه مافيش تالت ما بينا

واللي يمنح لنفسه سلطة انه يحكم على علاقة انسان بربه

اعتقد انه هو نفسه لازم يشوف نفسه الاول وعلاقته بالله

اهم حاجة الصدق

مصداقية محمد (ص) وصدقه كان مفتاح لجميع القلوب المغلقة

والاساس في امانة الكلمة


ماعنديش كلام تاني ااقوله يا بنتي

غير كبري دماغك ومش كل المدونات تنفع اننا نقرأها

وانا شخصيا باكتب لنفسي في مدونتي

وانا باعترف لانها مدونة شخصية مليون في المية

عرفتي واكيد انتي عارفة كده لما زرتيني ورديتي عليا فيها واسعديتني فعلا بكلماتك الرقيقة

اتمنى اني اعرف اوصل لايميلك او نتواصل لاني مش عارفة ابعت لك ايميلي ازاي على العام

eldoctor said...

اهم حاجة انك تعملى اللى مقتنعة بيه و اخلصى النية
الابتلاءات بتبقى كثيرة
و الاجر بيكون على قدر الصبر على المكاره
ولا ايه

كل عام و انت بخير

مؤمنه said...

السلام عليكم ورحمة الله وبركاته
جزاك الله كل خير على هذه اللفته الطيبه
ما علينا الا اننا نجدد النيه كل شويه حتى لا تأخذنا زينة الحياه وربنا يعينا على ان نعمل بما نقول
وكل طائر ألزمناه طائره فى عنقه
وكل انسان ادرى بما اجزت له نفسه
والسلام عليكم ورحمة الله وبركاته

قلب أبيــض said...

السلام عليكم
لا أقول هذا العيد
كل عام وانتم بخير
ولكن اقول
انتم الخير لكل عام
ولا تنسوا اخواننا فى فلسطين
وندعوكم لمتابعة
( العيد وضياع اقصانا )
مدونة قلب أبيض

مروة الزارع said...

حبيبتى رفقة عمر

انا ليا وجهة نظر مختلفة جدا
حتى لو انتى نيتك فيها رياء .. فهمانى حتى لو كدة .. عسى ان حد ياخد بكلامك ويعمل بية وتاخدى ثوابة

رفقة حبيبتى ان اشعر فيكى الصدق جدا

ومحدش بيقدر يمثل على طول وبيبان المعدن الطيب من الزائف

تحياااااااااتى الكبيرة ليكى

أمــانــى said...

كـل سنة وانتى طيبة وبالف خير وعافية يارب آمـــــين واعاده الله علينا وعلى الامة الاسلامية بالخير واليمن والبركات

نسرين - أمة الله said...

كل سنه وانتى طيبه وربنا يجعله خير على المسلمين اجمع

بيتنا القديم said...

جيت اقولك كل سنة وانت طيبة
ويارب يارب تكوني بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادري بالصلح مع من تخاصمين
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:

walaa said...

اولا كل سنه وانت طيبه

بس انا عاوزه افولك حاجه ممكن تكتبى الموضوع اللى انت عيزاه فى امور الدين وتقولى انصح نفسى واياكم بهذا العمل علشان زى ما انت برده قولتى لن الواحد ساعات بينصح بحاجه وهو مش عارف بينفذه صح ولا لا وجميل قوى اللى انت تدعوا الى الله صدقينى مش وحش حاولى تنفذى اللى انت بتقوليه مش احسن ما تدعى الى الفساد وربنا يثبتك ان شاء الله

تحياتى لك ولاء

طال الليل said...

تقبل الله منا ومنكم صالح الأعمال
كل عام وحضرتك بخير
العام القادم وحضرتك والاسرة على عرفات

IRAQ Sawt Alhaq said...

الى كل مسلم غيور الرجاء تسجيل توقيعك في هذا الرابط لازالة صورة للرسول صلى الله عليه وسلم و قد تم حاليا جمع 2,851 توقيع بحمد الله تعالى ولكننا مزالنا بحاجة الى عشرة الف توقيع. فساهم بارك الله فيك بنشر هذه الرسالة لازالة الصورة بأقرب وقت ممكن من موقع ويكيبديا وما حادثة الرسوم الدنماركية عنا ببعيد.
الرابط: http://www.thepetitionsite.com/2/rem...from-wikipedia

عالمى ازرق said...

دعى نيتك لله
شيء ايجابي جدا ان تخشي الرياء .. المقلق هو ان نثق جدا بنوايانا

كل سنه وانتى طيبه وبخير
وعيد سعيد عليكى وكل اسرتك
دمتِ بخير

رينـــــــــــا said...

السلام عليكم ورحمه الله
كل سنه وانتى با الف خير يارب
والسنه الجايه فى عرفات قولى امين

الراقص مع الذئاب said...

السلام عليكم ورحمة الله وبركاته
الاول كل عام وانتي بخير وتقبل الله منا ومنك

ثانيا
اختي الكريمة ...صحيحي دوما نيتك مع الله عز وجل...قد يكون هذا الاخ كتب موضوع ليوقظ اشياء بداخلنا
بالفعل قد نكون نكتب بصدد سماع حسن الكلام والثناء من الاخرين
ويبدأ الشيطان في جرنا رويدا رويدا الي بئر الرياء والنفاق عافنا الله وإياك

اختي الكيرمة دوما صحيحي نيتك قبل كتابة اي موضوع...ولا تنقطعي عن الكتابة وفي نيتك الدعوة
قد تقولي كلمة في مدونتك يقرأها غيرك فيتبدل حاله من حال الي حال بإرادة الله عز وجل وتكوني انت سبب في ذلك

إذن الحل هو تجديد النية وإصالح النفس حتي لا نكون من الذين يأمرون الناس بالبر وينسون أنفسهم

جزاكي الله خيرا فموضوعك هذا جرس إنذار وتنبيه للجميع


تقبل الله منا ومنك

الصارم الحاسم said...

كان فيه موضوع للاستاذ عصفور المدينة عنوانه

ولا يستخفنك الذين لا يوقنون

كل عام وحضرتك بخير

nada_adly said...

عزيزتي رفقة العمر انتي فين ؟

انا منتظرة انك تردي عليا

كل سنة وانتي طيبة وبألف خير يارب

حائر في دنيا الله said...

كل سنة وانت طيبة يا رفقة
والسنة الجاية ان شاء الله تكوني على عرفات

وبالنسبة للموضوع دا فلو توقفنا عند نظر الناس لأعمالنا ما أنجزنا شيء على الإطلاق يكفينا فقط أن تكون نيتنا لله وهو أرحم بنا من غيرنا وأنفسنا أيضاً

لك تحياتي
السلام عليكم

ŞoŖśậŖấầ said...

عدد من سعى ولبى وطاف بالبيت
يعطيك ربى السعادة وكل ماتمنيت
وعيدك مبارك:)

ان شاء الله ليا عودة لقراءة الموضوع

Future_Preacher said...

حبيبتي رفقة
وحشتني جدا صفحتك
ووحشتيني انتي كمان جدا
و بجد نفسي في يوم من الايام اشوفك حقيقي
و كل سنة و انت طيبة
و الي الله اقرب
و بالنسبة لموضوعك
الكلام فيه يطول اكيد
ده موضوع مش سهل
بس صدقيني كلنا بتمر علينا المرحلة دي
مش بي في التدوين في اي شيء بنعمله لوجه الله و بيكون في العلن بنكون خايفين يصيبنا الرياء و ساعتها عملنا حيفسد و يروح سُدي
و لكن بالنسبة للتدوين
انصحك انك ترجعي للاصل خالص
لفكرة التدوين ذات نفسها انها طرح للافكار و ساحة حوار واسعة جدا لكل انسان عايز يشارك في الافكار المطروحة دي
و ساحة عريضة لمناقشه قضايانا و ما يجول في خاطرنا
و بالتالي شيء مهم و مفيد لكل انسان عنده فكر
فكده فكده ده شيء اساسي من احتياجات الانسان الضرورية في الحياة انه يكون مسموع و يسمع غيره
لكن الاصل كمان هو دينامو كل عمل صالح بنعمله وهي النية زي ما قلتي
و خاصة للناس اللي زيك
اللي ليهم هدف من التدوين مش بس انهم يتبادلوا الاراء و لكن كمان تغيير ما في الواقع من سيء عن طريق النقد و النصح
فأنا معاكي لو انت حتقعدي مع نفسك و تعيدي حساباتك من جديد
و اتمنالك انك دايما متفقديش هدفك و مايقعش منك ابدا و يرزقك و ايانا الاخلاص و الثبات
و اشوفك علي خير يا قمر
ادعيلي علشان عندي امتحانات :(

A.SAMIR said...

من حق اي بني ادم في الدنيا انه يتكلم في كل حاجة
وطالما ان اللي بيتكلم في الدين لا يفتي بغير علم..وبيتكلم بالفطرة واللي هو حاسسه
يبقى محدش له انه ينتقده
تحياتي وكل عام وانتي بخير

العــــراق said...

كــل عــام وأختنا في الله رفقة بخيــر
وجميـع أمـة الاســــلام

IRAQ Sawt Alhaq said...

كـل عـام وأنت بخيــر
رفقة

No Fear said...

السلام عليكم
كل سنة وأنت طيبة
ياريت الموضوع مياخدش معاكي وقت كتير
ربنا يوفقك

mo'men mohamed said...

السلام عليكم
ممكن قبل ما أعلق تبعتلى الرابط بتاع الموضوع عشان أقرأه
لو سمحت
السلام عليكم

ربيــع said...

كل سنة وانتي طيبة يا احلا روح بترافق الي بيكتبوا :)

امام الجيل said...

سبحان الله
احنا لما نتكلم فى الدين
مش معنى كده اننا بنتمثل بكل ما نقوله
قصدى مبنبقاش معصومين بكلامنا ده
المهم ان الواحد يكون بيتحرى انه
ينفذ اللى بيقوله
ويقوم ويقع
ويبعد ويقرب
بس المهم ميبقاش كلام وخلاص بيتكتب
يبقى حريص على تنفيذه
حتى لو موصلوش يبقى نفسه يوصله
بس المشكلة لما نكتب كلام وتبقى افعالنا مضادة ليه تماما
هى دى المشكلة
بس طالما بنسعى يبقى خير
ونسأل الله ان كلامنا
يكون حجة لينا مش علينا
قولى امين

david santos said...

I wish you a good end of 2007 and a good year of 2008.

رفقة عمر said...

كل سنه وانتم بالف خير جميعا
وجزاكم الله كل خير على كلامكم الطيب
اللى اكيد افادنى كثير جدا
جزاكم الله عنى خير الجزاء