Monday, December 24, 2007

ومرت سنه وانا بينكم


21/12/2007

دة تاريخ من التواريخ المهمه فى حياتى وهو دخولى هذا العالم الجميل اللى عرفنى امور كتير وعرفنى على ناس جميله قوى
انا مش مصدقه ان سنه مرت بسرعه حاسه انها لسه امبارح
انا حبيت اكتب البوست دة علشان اعبر عن حبى لكم جميعا بجد انا وجودى بينكم فرق معايا كتير يمكن ربنا قدر لى ادخل عالم التدوين
لانه عالم انى هامر باصعب سنين حياتى حتى الان كانت فعلا 2007 من اصعب السنين اللى مرت عليا فقدت اختى فى شهر يناير وبعدها بشهرين فى شهر مارس فقدت والدى رحمه الله عليهما وطبعا كانت وفاتهما لها تاثير فى حياتى وحياه من حولى وايضا مريت بظروف شخصيه صعبه جدا وثقيله على نفسى الحمد لله على كل حال ولكن وجودى بينكم كان له اكبر الاثر فى التخفيف عنى
بجد انتم وقفتم جنبى كتيييير جدا
اشكركم انكم تحملتونى وتقبلتونى بينكم يمكن عمرى ما كنت اتوقع انى اجد من يقرا لى بحبكم كلكم اللى عرفتهم فى الحقيقه كل بنت عرفتها من التدوين حبتها جدا وكلهم وقفوا جنبى كتير وكل اللى اعرفهم من مدونتهم وكل اللى بيعلق عندى او مش بيعلق وكل اللى اشعر انه متقبلنى فعلا وكل من اشعر انى غير مقبوله عندهم بحبكم كلكم انتم غيرتم منى كتير هونتم عليا كتير بجد كل كلمات الشكر لا تعبر عما بداخلى ناحيتكم يمكن انا مقله فى التعليقات على المدونات لانى ليا اسبابى
منها انى احيانا مش بافهم الموضوع او الموضوع اكبر من اللازم او فى امور لا تهمنى زى الكلام فى الدستور والسياسه والكلام دة
واحيانا اشعر بعدم قبول صاحب المدونه لو جودى لانه بيبان من الرد على التعليق
باعتذر لاى حد قصرت معاها باعتذر لو كنت زعلت حد
ومرة تانيه جزاكم الله خيرا لتحملى ولتشجيعكم لى ووقفكم جنبى المستمر
دة بوست تعبير منى عن حبى لكم جميعا
اللهم كما جمعتنا على محبتك فى الدنيا اجمعنا فى جنتك مع حبيبنا وسيدنا محمد صلى الله عليه وسلم وصحبيه
اللهم امين يارب العالمين

دة لينك اول بوست ليا بداياتى البسيطه علشان تعرفوا انى استفدت بوجودى بينكم كتير

بدايه

42 comments:

خمسة فضفضة said...

السلام عليكم ورحمة الله وبركاته

كل سنة وانت طيبة يا رفقه ، ويارب يعدي عليكي مليون سنة تدوين وانت بالف خير وسعاده ويارب يبعد عنك كل الاحزان ويوفقك في حياتك ويحقق لك كل اللي تتمنيه

آمين

عصفور المدينة said...

كل عام وأنت بخير ومنورانا

هو كلمة الموضوع أكبر من اللازم دي قصدك بيها إيه
:)

IRAQ Sawt Alhaq said...

السلام عليكم ورحمة الله وبركاته
حمدلله على السلامة كنت أنوي أن أكتب لكي تعليق شديد اللهجة للعودة للتدوين والحمد لله رجعتي . ماكو داعي للشدة . أن شاء الله تكوني دأئما صاحبة كلمة لا تنقطع

mohand said...

السلام عليكم

كل سنه وكل بوست وانتي بخير يا رب


واحنا كمان استفدنا منك


تحياتي

إنـســـانـة said...

يا جميلة .. كل سنة وانتى طيبة وبيننا ومنورانا وحبانا زى ما بنحبك يارب

بجد يا رفقة انتى من المدونات اللى حبيتها جداااااااااااا ع المستوى الشخصى وانتى عارفة كدة كويس

يارب السنة الجاية تكونى محققة كل احلامك واكون فرحانة بيكى وليكى وتبقى فى احسن حال انتى وكل احبابك ياااااااارب

اللهم آميييييييييييين

مبروك يا قلبى
:))

مـحـمـد مـفـيـد said...

اختي رفقه
بجد انتي انسانه محترمه جدا وتحترمي قلمك ومساحتك للكتابه لذلك اكتسبتي حب واحترام الجميع
كل عام وانتي طيبه ومتألقه ومبدعه
ومن تقدم الي تقدم أكثر واكثر

دكتور حر said...

كل عام أنت بخير يا رفقه
وجعل الله كل كلماتك في ميزان حسناتك ان شاء الله

أنا عرفتك مؤخرا

لكن يشهد الله أن عرفتك طيبة القلب
صافية الحديث

رزقك الله العمل والإخلاص والقبول

دمت بكل خير

smraa alnil said...

رفقتي

كل سنة وانتي طيبة
وكل سنة وانتي بينا
وكل سنة وانتي نقية ونضيفة اوي

كل يوست وانتي فيه مبدعه وبتعلمينا

انتي عارفة ان انتي اكتر واحدة اثرت عليا اوي
وظروفي كانت دايما بتمنعني من اني اواصل معاكي
بس دة لا يمنع اني دايما محتجالك ودايما بحبك

كل سنة وانتي رفقتي
:)

ma_3alina said...

كل سنة وانتي طيبة يا رفقة .. وعقبال السنة رقم مليون في التدوين ..
والفايدة متبادلة زي ما انتي استفدتي من عالم التدوين .. فعالم التدوين برضه استفاد من وجودك .. حكرر تعليقي على اول بوست ليكي

:D

كل سنة وأنت طيبة ...
بداية ممتازة .. وربنا يوفقك لما يحب ويرضى ..
على فكرة حلمك جميل وأول حاجة حلوة حترجع في الحاجات الجميلة إن الناس ترجع تحلم برجوع كل حاجة جميلة

في انتظار المزيد

ftataljanna said...

كل عام وانتى بخير ان شاء الله وربنا يبارك فى اعوام عمرك ان شاء الله ويجزيكى خير عن سنينه

رفقة عمر said...

دكتورة فضفضه

اهلا بحضرتك وربنا يخليكى يارب وسعيدة جدا ان حضرتك شاركتينى المناسبه دى جزاك الله كل خير ودايما كدة سباقه بالخير ودايما واقفه جنب كل المدونين ربنا يكرمك يارب ويبارك فيكى ويرزقك سعادة الدنيا والاخرة اللهم امين يارب العالمين


**************

باشمهندس عصفور المدينه

وحضرتك بالف خير يارب
لا مش ااقصد منها حاجه خالص انا بس العيب فيا انا لما يكون الموضوع طويل بتوه منى الفكرة وانسى مقدمه الموضوع فابخرج من غير ما اعلق لانى مش بعرف اعلق ااقول ايه وانا تهوهت اصلا وانا باقرأ
صدقنى ولا ااقصد اى حاجه خاااااااااالص
اكتب زى ما حضرتك عايز انا باقرا بس ممكن اقراه على يومين تلاته اسبوع لحد ما الم كل الموضوع وافهمه
:)


**********************

عمر

الله يسلمك عمر سعيدة بوجودك بينا تانى يارب دايما موجود وعقبال ما نحتفل معاك برجوع العراق تانى لاهلها وكل بلاد المسلمين اللهم امين يارب العالمين


************

استاذ مهند

وحضرتك بالف خير شكرا لحضرتك جدا
وجزاك الله عنى خير الجزاء ربنا يكرمك يارب ويبارك فى حضرتك اللهم امين يارب العالمين

***************

انسانه

انتى عارفه اكيد انى انا كمان بحبك قد ايه كفايه انك من وفت ما عرفتك وانتى معايا فى كل موقف امر بيه وددايما بتفدينى برايك اللى دايما بيكون عاقل وبيعجبنى جدا
الحمد لله انى قابلت انسانه جميله زيك
ربنا يخليكى ليا يارب

رفقة عمر said...
This comment has been removed by the author.
No Fear said...

السلام عليكم
كل سنة و أنت طيبة
و عقبال مليووون سنة تدوين
بس تقريبا التدوين مضافش لك كتير أنت البوست الأول بتاعك جامد جدا
انت اللي ضيفتي للتدوين بجد
شكرا لك قويييييييييييييييييي
ربنا يكرمك

الطائر الحزين said...

كل عام انت بخير

Mohamed A. Ghaffar said...

كل عام وانت لله اقرب وفى التدوين اكبر

المهـ إلي الله ـاجر said...

وقد تجديها في ميزان حسناتك عشرات الأعوام ما دام النية خالصة والعمل لله . فسيبارك الله لك

وفقك الله وجعل مدونتك من المدونات المضيئة في سماء التدوين

قلب حر said...

كل سنة وانتى طيبة وبخير
وانا يسعدنى ان اول يوم واول تعليق لمدونتى الجديدة يكون عندك هنا ويسعدنى كمان لو تكونى اول واحده تعلق فى مدونتنا الجديدة
وفعلا دى مناسبة جميله لنا اننا نهنئك على مرور عام وتنهنينا على مرور يوم
وعقبالنا زيك كده

MKSARAT SAYED SAAD said...

اول زيارة لمدونتك
مبروك على مرور السنة الاولي وعقبال الميلون
تحياتي

الراقص مع الذئاب said...

السلام عليكم ورحمة الله وبركاته
كل سنة وانتي طيبة يا رفقة
وربنا يجعل كل مةاضيعك وتواجدك في ميزان حسناتك

طال الليل said...

كل عام والتدوين يزخر بحضرتك وبثلة الطيبين والطيبات من أهل الرأى والساعين لمستقبل أفضل لهذه الأمة
حقا أنظر للمدونين الهادفين والمدونات الجادات بعين إكبار فهم مصدر للأمل والتفاؤل

La RoSe said...

كل سنة وانتي طيبة يا رفقة
ومنورة دايماً

وعقبال أعوم عديدة في الخير دايماً

(F)

A.SAMIR said...

كل سنةوانتي ومدونتك بألف خير وسعادة
من الواضح فعلا ان 2007 بالنسبة ليكي كانت سنة غير مثالية على الاطلاق...بس ان شاء الله 2008 تكون اجمل واسعد علينا كلنا ان شاء الله
تحياتي

فرنسا هانم said...

كل سنه وانتى طيبه وبالف خير وسعاده
وانتى عارفه
انا اكتر واحده استفدت منك
تعليقك عندى كان اول تعليق فى حياتى
شكرا لما قدمتيه لنا ونطمع فى المزيد

رفقة عمر said...

no fear

اخبارك ايه يارب تكون بقيت احسن
وشكرا ليك كتير على كلامك الجميل ربنا يكرمك يارب
وجزاك الله كل خير

****************

الطائر الحزين

وحضرتك بالف خير
اهلا بحضرتك باسعد بوجود حضرتك دايما

***************

استاذ محمد عبدالغفار

:D
ابتسامه كبيره زى حضرتك
وجود حضرتك بابتسامتك بتدينى تفائل
ربنا يكرم حضرتك يارب
ويبارك فى عبدالرحمن الله امين يارب العالمين


**************


المهاجر الى الله

اهلا بحضرتك ربنا يرزقنا الاخلاص اللهم امين ويتقبل منا صالح الاعمال
شكرا لحضرتك كتير
جزاك الله خيرا لمشاركتى

***********

قلب حر

اهلا بيكم ومبروك المدونه الجديدة
وجعلها الله فى ميزان حسناتكم اللهم امين يارب العالمين

***************

مكسرات

وحضرتك بالف خير
وانا مبسوطه بزياره حضرتك
جزاك الله خيرا

رفقة عمر said...

الراقص مع الذئاب

اهلا بحضرتك
وكل سنه وحضرتك بالف خير
وربنا يحقق لك كل ما تتمناه وييسر لك امورك الهم امين يارب العالمين


********************

طال الليل


شكرا لحضرتك على كلامك الجميل اللى فعلا بيدخل السرور على قلبى
جزاك الله كل خير
وشكرا جدا عى حسن ظنك بى
واتمنى ان اكون كما تقول
ربنا يبارك فى حضرتك


****************
LA ROSE

وانتى بالف خير
سعدت بتواجدك جدا
جزاك الله كل خير

****************

ماعلينا

انا اتعود مش ااقول غير اللى باكون حاساه
بجد انت جمايلك عليا كتير جدا
وانا فعلا مش هاعرف
اوفيها حقها
ارجو الله ان يجزيك عنى خير الجزاء اللهم امين
ويعطيك من فضله العظيم اللهم امين يارب العالمين


***************


A.SAMIR


شكرا لحضرتك كتير لتواجدك ومشاركتى لمناسبه دى
جزاك الله كل خير
ربنا يكرمك يارب للهم امين يارب لعالمين


*************

فرنسسسسسسسسا الجميله

اخبارك ايه واخبار صحتك يارب تكونى فى احسن حال
ويارب وهو على كل شئ قدير وبالاجايه جدير
نحتفل على مدونتك بزواجك السعيد على ما يتمناه قلبك
اللهم امين يارب العالمين
وليس ذلك على الله بعزيز

مروة الزارع said...

وحشتينى بجد يا حبيبتى

كل سنة وانتى طيبة

لية غايبة عنى كدة خالص

انا بجد بتنور بيكى

ربيــع said...

نفسي ادخل المدونة بكيكة بعد البوست دا معرفش ليه
:)
كل سنة وانتي طيبة ومدونتك بخير

شريف طلال said...

كل سنه و انتى طيبه
و يا رب تفضلى منورانا على طول و عقبال المليون سنه فى التدوين يا رب
تحياتى

مؤمنه said...

السلام عليكم ورحمة الله وبركاته
أختى فى الله وحبيبتى رفقه
كل سنه وانتى بألف خير
وكل سنه وانتى معانا
وكل سنه وربنا ما يحرمنا منك
وألف مبروك علينا انتى
والحمد لله أن رزقنا الله أخت فاضله مثلك
حبيبتى فى الله يشهد الله أننا نحبك كثيرات كثيرا فى الله
والسلام عليكم ورحمة الله وبركاته

قلب أبيــض said...

السلام عليكم
اولا
كل عام أنتم بخير
وحقيقة
مدونتك من اول المدونات التى عرفتها
وتابعتها
فتتميز باللبساطة والهدوء
وعقبال 100 سنة تدوين
وبارك الله لك فيها
وجعل أعمالكم فى ميزان حسناتكم

الباحث عن الحقيقة said...

كل سنة واحنا طيبين
وجودنا معك ووجودك بينا شئ يسعدنا
حضرتك فى التدوين شئ مميزمهما اخدتنا المدونات لازم نرجع هنا
خاصة انا
انتى بالنسبالى تاريخ
يا اول من علق فى مدونتى
كل سنة وانتى طيبة

osama said...

اذا كنا كسبنا من المدونات ان نتعرف على اناس يحملون هذه الانسانيه في قلوبهم فنحمد الله ويكفي هذا ...

اللهم اذهب عنك كل هم وحزن....
ويارب ديما انت ومدونتك في تألق....


دمت بكل ود...
خالص تحياتي

doha said...

السلام عليكم ورحمة الله وبركاته
اولا كل سنة وانتى طيبة
ويارب السنة دى تكون اسعد السنين
وربنا يارب يرحم والدك واختك
ويغفرلهم
ويجعل مدونتك فى ميزان حسناتك
خالص تقديرى واحترامى ليكى

Anonymous said...

اختى الحبيبة كل عام وانت بخير كل عام وانت فى اتم صحة كل عام وانتى فى سعادة
الحقيقة يا اختى الحبية لقد بكيت وخصوصا عندما قرات تعليقات اخوانك واخواتك المدونين المحترمين وكما قال رسولنا الكريم سيدنا محمد صلى الله علية وسلم (الخير فى وفى امتى) وما دام هناك اناس مثلك ومثل المدونين الاخرين الاخيار فانشاء الله تكوم هذة علامات النصر والتمكين
اختى الحبية ادعو الله مخلصا فى الدعاء ان يكون العام المقبل عام سعادة وخير لكى ولاخوتى ولامى وكل المسلمين
اخيك عصام
ابو عبدالله

رفقة عمر said...

مروة الزارع

اهلا بيك ربنا يخليك يارب على شعورك الجميله ربنا ييسر لك كل خير ويوفقك لما يحبه ويرضاه
اللهم امين يارب العالمين


*******************


ربيع

ازيك يااحلى ربيع
انتى وجودك جاتوه نفسه مش كيك كمان
تعليقك احلى من احلى تورته
ربنا يكرمك يارب ويديم عليا محبتك
وربنا يوفقك فى الدراسه اللهم امين يارب العالمين

*****************
استاذ شريف طلال

سعيدة جدا بتواجد حضرتك ومشاركتى المناسبه دى
جزاك الله خيرا على كلامك الجميل وعلى ذوقك العالى


*******************

مؤمنه الرقيقه

ازيك عامله ايه
انا اللى بحبك فعلا تعرفى وجودك ووجود امثالك من المدونات اللى عندهم غيره على الدين
بجد فعلا بقيت مش قلقانه انى اكتب على مدونتى لانى عارفه انه فيه ناس احسن منى زيك كدة بيكتبوا وقادرين يعرفوا بديننا افضل منى
ربنا يبارك فيكى اللهم امين ويزيدك من فضله
ويستخدمك لنصره دينه اللهم امين يارب العالمين


****************

قلب ابيض

حضرتك اسم على مسمى
جزاك الله خيرا على كلامك الجميل
ودايما بيسعدنى
تواجدك على المدونه ربنا يكرمك يارب

رفقة عمر said...

الباحث عن الحقيقه

اهلا بحضرتك ليه مش بتكتب مواضيع جديدة لسه حضرتك فى الجيش ولا ايه
وانا فعلا بيسعدنى تواجد حضرتك
ربنا يبارك فى حضرتك يارب
وجزاك الله خيرا
على مشاركتك لى


*******************

osama


بجد كلمات حضرتك اثرت فيا جدا واشكرك جدا على احساسك دة
بجد مش عارفه ااقول لحضرتك ايه
ربنا يارب يكرمك وييسر ك كل خير ويعطيك من الخير من حيث لا تحتسب اللهم امين يارب العالمين


********************

doha


اهلا بحضرتك بزيارتك الاولى
وشكرا كتير لمشاركتى المناسبه دى
وشكرا على كلماتك الجميله
سعدت جدا بتواجدك
ربنا يكرمك ياارب


**************

اخى الحبيب عصام

مش عارفه ااقولك ايه غير انى بحبك قووووى وربنا يخليك ليا يااارب ومش يحرمنى منك ابدا
ويارب ربنا يجعل السنه الجديدة افضل من السنه اللى فاتت وربنا يخلينا ماما ويبارك لينا فيها ويديم علينا المحبه بينا اللهم امين يارب العالمين
ويارب تحقق كل ما تتمناه ويتيسر لك كل خير ويبارك لك فى عبدالله ويبارك لك فى مامته اللهم امين يارب العالمين

بيتنا القديم said...

"باعتذر لاى حد قصرت معاها باعتذر لو كنت زعلت حد"
.
.
.
نحن عائلة مختلفي المزاج والتوجهات لاكن

يجمعنا الاحترام والتراحم كالجسد الواحد

كل سنة وانت طيبة!

(:

MerMaid said...

كل سنة وانتي طيبة يا رفقة

طبعا جت متاخرة شوية

بس معلش

:))

كل سنة وانتي طيبة كمان بمناسبة السنة اللي جاية تجري علينا

:))

صاحب البوابــة said...

كل سنة وانتِ بيننا

اتمنى أن تؤجري بكل حرف كتبتيه

تحياتي

منة الله said...

رفقه القمر
كل عام و انت اقرب الى الله و منورانا دايما يا رب

البنت الشلبية said...

كل سنة وانتى طيبة يارب
وربنا يجعلها سنة سعيدة عليكى يارب

منى said...

انا بصراحه شديده ندمانه انى مكنتش متابعه جيده لمدونه واحده برقتك ونقاءك
يارب يجعل احزان العام الماضى فى ميزان حسناتك
ويوفقك لكل الخير فى المستقبل ان شاء الله
كل سنه وانتى طيبه