Monday, January 28, 2008

هل نحن نستحق القدس فعلا


من يوم ما اتولدت انا اسمع عن مشكله فلسطين وكنت دايما اشوف ياسر عرفات وانا صغيره وهو بيلف العالم علشان القضيه الفلسطنيه وكان شكله بيصعب عليا قوى لانه كمان كان شكل عمى الكبير وكنت وانا صغيره باحسبه عمى واشاور عليه على انه هو

لما كبرت شويه بدات افهم واستوعب فيه ايه ومين دة وفرحت قوى لما رجعت سينا كامله لينا على راى شاديه قلت عقبال فلسطين وبقيه الاراضى المحتله وبعد كدة حزنت ان سينا رجعت لينا تانى عارفين ليه سينا دى ذكرت فى القران ربنا قال عليها انها وادى مقدس

قال تعالى (فى الوادى المقدس طوى) وواقسم بيها (والتين والزيتون وطور سنين )دة المكان اللى كلم فيه سيدنا موسى ربنا عارفين دة معناه ايه انها من اقدس الامكنه لان ربنا كلم فيه سيدنا موسى ولا ن ربنا فضل بعض الشهور على بعض وبعض الاماكن على بعض احنا بقى عملنا ايه لما اخدنا هذا المكان المقدس وربنا من علينا باسترداده تانى شواطئ عراه فنادق بها خمور وصالات قمار الزنا يحدث على ارضها عادى جدا بدل ما نحافظ على قدسيه المكان دنسناه بالكبائر لما شوفت اللى حصل لسينا لما رجعت لينا فكرت كتير قوى طوال سنين معاهدات السلام وايام اسحاق رابين

هل احنا لو اخدنا فلسطين والقدس المحتله هانعمل فيها كدة زى ما عملنا فى سينا بحجه السياحه وارض فلسطين والشام عموما كلها مباركه

قال تعالى ( سبحان الذى اسرى بعبدة ليلا من المسجد الحرام الى المسجد الاقصى الذى باركنا حوله لنريه من اياتنا الكبرى) شوفوا ربنا قال باركنا حوله دة مكان معراج الرسول الى السماء مكان التقاء الانبياء يعنى كل ارض الشام مباركه وارض محرمه زى مكه والمدينه

ماينفعشى تكون عليها اى من الكبائر ولا اى ملاهى ليليه ولا اماكن ديسكو ولا صالات قمار ولا بيع للخمور ولا اى حفلات لهيفاء ولا روبى ولامورة الغريبه تفتكروا بقى احنا نستحق القدس هيهات هيهات لما توعدون انا باتفرج على حالنا وباكون عايزة اصرخ ياجماعه احنا مش اهل للنصر ربنا قال ( ان الله يحب الذين يقتلون فى سبيله صفا كانهم بنين مرصوص) احنا بقى بناين مرصوص انا باستغرب لما الاقى تسميات لمسلمين جماعه الجهاد جماعه التكفير جماعه الاخوان وغيره وغيره ودة شايف نفسه احسن من دة ودة شايف نفسه هو الحق عنده انا امامى الرسول ودستورى القران وراياتى لا اله الا الله محمد رسول الله انا مسلم وبس تفتكروا وكل واحد واخد له شويه اتباع وكل جماعه ليها فكر نتجمع امتى ونالف قلوبنا امتى مش عارفه ليه مش بتقراوا التاريخ كويس الرسول اول حاجه عاملها اصلح بين الاوس والخزرج واخى بين المهاجرين والانصار وبعد كدة اصبحوا قوه لا تقهر شوفوا صلاح الدين كنا كدة برضه متفرقين زى دلوقتى دعا كل امراء وحكام العالم الاسلامى واتحدوا تحت رايه واحدة لغايه ما انتصروا وكمان قطز عمل كدة ارجوكم اقراوا التاريخ كويس

وهانروح بعيد ليه فى حرب اكتوبر 73 لما اتفق كل العرب والمسلمين وصفيت النوايا انتصرنا يد الله مع الجماعه

ربنا قال ( ولا تكونوا كالذين فرقوا دينهم وكانوا شيعا لست منهم فى شئ ) اظن احنا بنعانى من فرقه وتمزق حتى توحيد الاهله للشهور مش عارفين شيوخ السعوديه مش بيحبوا شيوخ مصر والعكس صحيح الدعاه بيحربوا بعض وبيغتابوا بعض فين القدوة ضاعت القدوة مننا

المتدينين عندهم ازدواجيه كل واحد مع نفسه باستغرب لمما الاقى متتدينين بيغيروا من بعض او بيحقدوا على بعض ياجماعه اى حد هايوصل الفكرة والهدف لازم نكون وراه ونساعده مش لازم اكون انا او انت اى حد المهم يكون فيه حد يقدر ياثر ويجمع الناس قطز

وقف وهو لسه لم يكن حاكم وقال لرسول زعيم التتار هولاكو عندما سال من يتكلم بلسان مصر قام قطز وقال انا ووقف كل الناس وراءه لانهم وثقوا فى قدرته لو كانوا تخانقوا على السلطه كانت مصر بقت خراب من التتار مش عارفه حاجات كتير نقصانا قوى علشان نكون اهل للنصر يمكن اكون حزينه للى بيحصل فى بلاد المسلمين وخصوصا فى غزة والعراق بس شوفوا ربنا قال ايه فى الايه دى(او لما اصابتكم مصيبه قد اصبتم مثليها قلتم انى هذا قل هو من عند انفسكم ان الله على كل شئ قدير وما اصابكم يوم التقى الجمعان فباذن الله وليعلم المؤمنين وليعلم الذين نافقوا وقيل لهم تعالوا قاتلوا فى سبيل الله او ادفعوا قالوا لو نعلم قتالا لاتبعنكم هم للكفر يومئذ اقرب منهم للايمان يقولون بافواهم ماليس فى قلوبهم والله اعلم بما يكتمون ) الايات دى نزلت فى غزوة احد لما الرماه ما سمعوش كلام الرسول وتعتبر دى معصيه علشان كدة حصل اللى حصل فى غزوة احد مابالنا نحن ياخبر احنا بنعمل بلاوى لما اشوف برنامج بيتعرض على اراضى المسلمين اسمه هزى يانواعم مسابقه للرقص الشرقى رجعنا للنخاسه تانى بارداه البنت واهلها ربنا عفانا منها واحنا بنرجعلها تانى بارداتنا بس زمان كان سوق النخاسه للاماء دلوقتى الحرائر بارداتهم الحره بيعرضوا نفسهم انا مش بابرئ نفسى من المسئوليه كلنا مسئؤلون امام الله على حالنا اللى احنا فيه مش قادرة اتكلم على اللى بيحصل فى غزة دة بسبب هوانا ومعاصينا مش بسبب اعداءنا صدقونى عدونا اضعف مما نتصور ولكننا احنا العيب فينا بعد كل دة وزيادة هل ما زلنا نستحق القدس فعلا بعد ما بقى فى بلاد المسلمين اللواط والزنا والخمور والربا والعقوق والغش فى التجاره والبغض والحقد والفرقه مازلنا اهل لنصره الله لنا

بصراحه لو رجع لينا القدس وعملنا فيه زى ما عملنا فى سينا يبقى يفضل فى الاسر اكرمله واكرملنا

ولنحتسب ضحاياه شهداء عند الله فهو ارحم بيهم منا

معلش دى وجه نظرى ومش بالزم حد بيها بس طول عمرى وانا بافكر لو رجعنا القدس هايكون فيه ملاهى ليليه وصالات ديسكو بجواره
تحديث
انا عايزة اوضح انى ااقصد من البوست اننا مش اهل لنصر الله لنا واى ابتلائات ولا مصائب بتصيب الامه الاسلاميه فبما كسبت ايدينا حتى اعدءانا نفسه عارفين اسباب النصر عندنا وهى الرجوع الى دينا وتالف قلوبنا وتوحدنا
بدليل ان جولدا مائير قالت لو وصل عدد المصلين صلاه الفجر فى المسجد وصل زى عددهم فى صلاه الجمعه يبقى ده معناه نهايه وجودنا على ارض القدس لانهم عارفين ان اللى بيحافظوا على صلاه الفجر فى المسجد هم المخلصين حقا لان صلاه الفجر شديده على المنافقين
يعنى ااقصد من البوست بدل ما نقعد نلف حوالينا نفسنا وناخد طرق غلط للوصول لهدفنا من النصر الطريق معروف وسهل جدا بس احنا اللى برضه معاندين ومعتمدين على الحلول البشريه وتركين الحل الالهى
يبقى ازاى هاترجع لينا القدس
انا سمعت مقوله ان القدس بتكون مع المسلمين فى قو تهم وفى ضعفهم اول حاجه بتروح منهم هى

19 comments:

عصفور المدينة said...

بالوضع الحالي لا نستحقها وبالتالي هي لا تأتي
وسيتزامن الحدثان معا فاطمئني وهذه سنة الله

No Fear said...

السلام عليكم
أنا سعيد قوي بالأجازة اللي أنت أخدتيها لأنها رجعتك و فوقتك جامد قوي
بجد بوست رائع
المشكلة بقة بجد
أحنا كلنا عمالين نتكلم و بنسمع بعض
مين اللي هيسمع الناس التانية و الناس اللي في أيدها السلطة و الناس اللي بتعمل اللي أنت بتقولي عليه يعني الأئمة فعلا اللي بينافسوا بعض و بيشتموا بعض مين اللي هيوصل لهم كل ده
ده مثال بسيط يعني
بجد مش عارف
ربنا يهدينا جميعا و يرسل لنا من يقودنا بالرغم منه إنه مش المفروض نستني

mthlykaweyy said...
This comment has been removed by a blog administrator.
محمد عبد الغفار said...

اولاُ ترجع بس وبعدين يحلها ربنا هنعمل فيها ايه

ثانياً لن ترجع الا بمسلمين يستحقونها ومن يستحقها لن يفعل بها ما لا تستحقه

الطائر الحزين said...

كتب الله لاغلبن أنا ورسلى

لنصرة الدين

ننتظر القدوة والقائد

كالعادة

تحياتى

بارك الله فيك

mo'men mohamed said...

عشان ترجع فلسطين ونزيل الإحتلال من عليها لابد اولا وقبل كل شيىء نزيل الإحتلال الذى سيطر على نفوسنا
وصدق الغزالى لما قال
ان الإستعمار ذهب ولكنه ترك و راءه حكومات خائة و أفكار و ثقافات فاسدة تحقق مآربة
السلام عليكم

ساعد نسرين الايمن said...

رفقة عمر

قال تعالي( وانتم الاعلون ان كنتم مؤمنين ) صدق الله العظيم

هل نحن الاعلون الان ؟
اذن نحن لسنا بمؤمنين حق الايمان
وبالتالي لا نستحقها حاليا
فكم واحد منا يدعو للقدس بالتحرير؟
هل يوجد احد فينا لم يتبسم في عمره لاني القدس واقعة تحت الاحتلال كما كان يفعل صلاح الدين؟
لقد عقمت النساء ان تلد مثل خالد
وعقمت الايام ان تاتي بيوم كحطين
نحن نعيش الان عصر ضياع الحلم
نعيش في عصر الغرقد لا النسرين

منى said...

انا مبحبش المجامله
بس والله موضوع هايل قراءه نقديه لواقع اليم
واهم حاجه الناس اللى بنتوسم فيهم الخير
لما الحقديدخل بينهم
يبقى فين الخير
تحياتى وارجو تكونى استفدتى بالاجازه



حمد الله على السلامه

mohand said...

السلام عليكم

طيب ماهي في ايد الصهاينة
مش بيحصل كده برضة
ملاهي وعراه وتبادل زوجات وكل حاجه


محدش عارف النصر رايح فين

تحياتي

الصارم الحاسم said...

اذا مسكها امثال حماس فهي تستحق بإذن الله

لكن ..لازال....لازم امة مش مجرد طائفة

مؤمنه said...

السلام عليكم ورحمة الله وبركاته
ليس للجميع ذنب بما يحدث فى سينا البعض وافق والبعض اعترض فكان مصيره التشريد والبعض عندما نظر الى ماحدث للمعترضين دخل فى دائرة الصمت
وتعلمين جيدا حال ومصير الاخوان المسلمين فى بلدنا مشردون مضطهدون
نعمل ما وسعنا عمله
لا انادى بالسلبيه ولكن لا يكلف الله نفسا الا وسعها
ونسأل الله ان يعز الاسلام ويطهر المسلمين
والسلام عليكم ورحمة الله وبركاته

رفقة عمر said...

باشمهندس عصفور المدينه

اهلا بحضرتك
هو اكيد طبعا لان اسباب النصر لسه مش عندنا
ما اصابكم من مصيبه فبما كسبت ايديكم
يعنى احنا اسباب الهوان اللى احنا فيه


*****************

nofear

ازيك عامل ايه
عارف ربنا عدل هما اعطاهم التفوق التكنولوجى والعلمى واحنا اعطانا الايمان احنا بنكسب بالايمان مع القليل من التزود من الاعدادات وانتصرات المسلمين عبر التاريخ الاسلامى بتعبر عنده
لما يروح الايمان الميزان يختل
ولازم ننهزم ونبقى فى هذا الهوان زى اللى احنا فيه

*****************

استاذ محمد عبد الغفار

اهلا بحضرتك
ما انا بقول هى هاترجع لناس تستحقها وتعرف قدرها وتعرف حدود الله
وعلشان ترجع لازم يرجع المسلمين لشريعه ربهم
وطبعا وقتها مش هايكون هناك محلات للخمور ولا نوادى ليليه


*******************


استاذ الطائر الحزين

اهلا بحضرتك
فعلا ننتظر القدوة والقائد ربنا يبعته قريبا اللهم امين يارب العالمين


*****************


استاذ مؤمن محمد

اهلا بحضرتك

صدقت وصدق الشيخ الجليل محمد الغزالى رحمه الله رحمه واسعه
ربنا يرحمنا من عنده الهم امين ياارب العالمين


******************

ساعد نسرين الايمن


اهلا بحضرتك
فعلا كلام حضرتك بيعجبنى جدا علشان خاطر نسرين عايزين نشوف اراء حضرتك فى موضوعات جديدة بعيدا شويه عن نسرين ولو انها هاتكون منيثقه برضه من نسرين

ربنا يوفقك يارب ويلرك فى حضرتك ويريح بالك اللهم امين يارب العالمين


**************


اختنا العزيزة منى

الله يسلمك
جزاك الله خيرا ربنا يكرمك يارب ويبارك فى حضرك
واكيد دة من اسباب الفرقه اللى بتؤدى للهزيمه
ربنا يعفينا ويعفو عنا اللهم امين يارب العالمين

*****************

استاذ مهند

اهلا بحضرتك
حمدا لله على سلامتك
عودااحمد
هاقول لحضرتك فكرتى
ليس بعد الكفر ذنب دول اى حاجه يعملوها فى حق الاقصى لا لوم عليهم لانه مش بيمثلهم حاجه زينا فعادى انهم يعملوا فيه نوادى ليليه وغيره
لكن بالنسبه للمسلمين طبعا لا يجوز وهايتحاسبوا على اى تقصير ممكن يحصل فى الاقصى لو كان فى ايديين المسلمين
يعنى احنا مش بنعيب على حد اجنبى بيشب خمر ولكن نعيب على مسلم لو شرب خمر
دة قصدى اننا علشان نعرف قدسيه الاقصى يبقة لازم نحافظ على قدسيته وحرمانيته اليس هو ثالث الحرمين واولى القبلتين
ارجو ان تكون فكرتى وصلت
سعيدة بعودة حضرتك لمدونتك

***********


الصارم الحاسم

اهلا بحضرتك
اكيد امثال حماس لما يمسكوا كل اراضى المسلمين مش القدس بس يبقى اكيد نستحقها وقتها


*****************

اختى الحبيبه مؤمنه

امنك الله من عذاب القبر وعذاب يوم القيامه اللهم امين يارب العالمين
انا كتبت تحديث للبوست يمكن فكرة البوست توضح شويه
ااقصد اننا كلنا مش اهل للنصر ولا الراعى ولا الراعيه
ربنا يالف بين قلوبنا ويهدينا لما يحب ويرضى اللهم امين يارب العالمي

العراق صوت الحق said...

رفقة عندك حق .ولكن صدقي لن تعود القدس الا ونحن نستحق رجوعها فالمسلمين لا ينتصروا بالعدد أو القوة وانما بطاعة الله والايمان له

أمــانــى said...

رفقتى الحبيبة
لا اعرف ماذا اقول ؟
غير ان ربنا ينصرنا فى مشارق الارض ومغاربها

maii bahaa said...

اتفق معكي تماما

انتي جبتي من الآخر...احنا فعلا مانستحقهاش..بس انشاء الله هانفوق وكل واحد يبتدي بنفسه..ومايستناش الناس تبتدي ويقول اشمعنى انا يعني؟
وربنا يرحمنا جميعا..وشكرا على البوست الجميل
:)

فرنسا هانم said...

رفقه عمر الغاليه
قويه كما انتى
ونقيه كما انتى
اناسعيده بعودتك القويه
عموما
فعلا نحن عندما نتوحد نكون قوه هائله
ولكن
اننا نتوحد تحت الظروف
لم يحدث او لم اقراء اننا توحدنا من قبل بالاتفاق المسبق
كانت كل التوحدات تحت ظرف طارىء
والدليل
وحدتنا ايام حرب اكتوبر
كانت تحت ظروف الحرب وكان ميعاد الحرب غير منسق مع الدول العربيه الا سوريا فقط
ايام صلاح الدين توحدنا تحت وطاءه الحرب الصليبيه
ايام قطز وبيبرس توحدنا تحت ظروف ايضا
انا بجد
مش فاكره ان العرب
او
المسلمين اتوحدنا على موعد او باتفاق
ولعل ما يحدث الان هو بدايه للتوحد

ربيــع said...

رفقتي ازيك واحشاني اوووي :)

الموضوع كله رايك ونظرتك
بس حبيت اعمل سكوب على حاجات:

اننا نحكم على نفسنا اننا مش اهل دي نقدر نقولها لما نزول
والانتصار بيجي تبعا لمده الوحده وسرعتها

احنا زمنا دا هو الزمن بتاع التحرير؟..منقدرش نجزم لحد مينتهي زمنا

وحكايه شيوخ مش بيحبو شيوخ عشان الاهله
دي مش شرط اتفاق
الرسول صلى الله عليه وسلم قال صوموا لرؤيته
وكانو بيختلفو زمان مكنش في توحيد للاهله ايام الرسول لكل الدول
الفرق حاليا ان ناس بتعتمد رؤيه العين
وناس برؤيه فلكيه
وربنا مايجيب كره بين المسلمين

اتفق معاكي في الفكره الاساسيه
توحيــد الهــدف
و
العودة للأصل الصحيـح

ومعلش طولت بس حبيت اضيف راي :)

رفقة عمر said...

عمر

ازيك عمر يارب تكون بخير
ايوة احنا بننتصر بايمانا وقربنا من الله
بس احنا برضه معندين ورافضين نصدق دة
كل شئ باوان
وتلك الايام ندوالها بين الناس

***********************

امانى حبيبتى

وحشتينى موووت
ربنا يستجب اللهم امين
ربنا ييسر لك كل امورك يارب ويفرج كربك ويسعدك دنيا واخره اللهم امين يارب العالمين

*****************

فرنستى الجميله الطيبه

بجد باشكرك على كلامك وحسن ظنك فيا بتحرجينى بكلامك الجميل جزاك الله عنى خير الجزاء انت الاجمل والاحسن من غير نفاق بجد
اظن احنا فى وقت محتاجين فيه نتوحد وننسى الدنيا شويه وطمعنا الدنيوى
ياريت بجد نفوق من الغيبوبه اللى احنا فيها
الواحد تعب من الكلام
اسعدنى وجودك جدا


******************


maii bahaa

اهلا بحضرتك
شكرا ليكى انتى على تواجدك وتعليقك
ربنا يهدينا جميعا لما يحبه ويرضاه
اللهم امين يارب العالمين


****************

ربيع حبيبتى

وحشتينى اكتر اخبار الامتحانات ايه يارب يكون خير ونسمع اخبار حلوة
بخصوص عدم حب الشيوخ لبعض انا باشوف دة على الفضائيات وكله بيغلط بعضه مش عارفين يوصلوا لاتفاق
وانا بقول اتحاد الاهله كمثال
زمان كانت المسافات بعيدة بين البلاد وعلشان يعلنوا ان الهلال ظهر فى بلد دة عايز وقت طويل يكون الشهر خلص لكن دلوقتى سرعه لاتصالات سهلت كل حااجه
بدليل اننا بنتفق فى هلال زو الحجه علشان يوم عرفه طالما اتفقنا هنا ليه مش نكون تبع السعوديه وتكون بدايات الشهور متفق معاها
ايه المانع فى دة
وبجد انا شايفه ان الحب والالفه بين الناس قلت قوى حتى بين الاسره الواحدة طيب مش دة برضه من اسباب الفرقه
الرسول قال يد الله مع الجماعه
والبركه فى الجماعه
طيب تفتكرى هايجى النصر واحنا كدة كل واحد ماشى بدماغه وبس
ربنا يسمع منك وتكون بدايات التوحد قربت اللهم امين يارب العالمين

HebA said...

لا تجد قوما يؤمنون بالله واليوم الاخر يوادون من حاد الله ورسوله
(المجادلة22)

إِنَّمَا يَنْهَاكُمُ اللَّهُ عَنِ الَّذِينَ قَاتَلُوكُمْ فِي الدِّينِ وَأَخْرَجُوكُم مِّن دِيَارِكُمْ وَظَاهَرُوا عَلَى إِخْرَاجِكُمْ أَن تَوَلَّوْهُمْ وَمَن يَتَوَلَّهُمْ فَأُولَئِكَ هُمُ الظَّالِمُونَ
(الممتحنة9)