Wednesday, February 06, 2008

توضيح بسيط جدا


عندما بدات التدوين كنت فعلا عمرى ما كتبت ولا فى اوراقى ولا على المنتديات يمكن اشتراكى على المنتديات كانت علشان انزل برنامج او اى حاجه مش اكتر من كدة وكمان لا ليا خبره فى الادب ولا فى الشعر ومش مهتمه خالص بالادبيات يمكن باحب اقرا قوى

بس باحب قراه السير الذاتيه او كتب التاريخ او الكتب الدينيه يعنى عمرى ما فكرت ان يكون عندى كتاب ادبى

المهم عمرى ما توقعت انى اكتب اساسا الى ان استاذى الجعان فتح ليا الباب وعرفنى التدوين فرحت قوى لانى جوايا كتير قوى علشان دينى ونفسى يرجع لعزته تانى وباحزن قوى من اللى بيسيؤا ليه فحبيت اوصل احساسى اللى حسيت بيه دينى لما تعلمته بفضل الله ومازلت اتعلمه

كانت مشكلتى انى ضعيفه جدا جدا فى اللغه العربيه فعلا قدراتى الذهنيه مش بتقدر تستوعبها نهائى فعلا لغايه دلوقتى مش باعرف افرق بين الفاعل والحال والصفه وكمان مش باعرف افرق بين الاستعاره والتشبيه باتعب قوى وانا باكتب البوست لان الكلام بيطلع منى ملخبط لغه عربيه على عاميه وطبعا االجمله مش متركبه صح طيب اعمل ايه وانا عندى احساس عايزة اوصله ونفسى الناس تحسه زى يمكن اول ما بدات التدوين كانت المدونات اللى بتتكلم فى الدين قليله جدا ويمكن نادرة والموجود منها مش معروف نهائى علشان كدة كنت باكتب كل يومين بوست دلوقتى ماشاء الله المدونات اللى بتتكلم فى الدين انتشرت جدا وافضل منى بمراحل فبقيت باكتب على فترات كل ما احس ان فيه حاجه عايزة اتكلم فيها واكيد باكون سعيدة ان فيه حد بيقرالى اساسا مع كتاباتى الرديئه وقله تمكنى من اللغه العربيه انا حتى فى معهد اعداد الدعاه عدت سنه تانيه بسبب اللغه العربيه كنت ماجله مادتين وكمان سقطت فى ماده اللغه العربيه فعدت السنه
سبب كتاباتى لهذا البوست كذا مرة ياتينى تعليق من اساتذه افاضل بيصححوا ليا بعض الكلمات او بيعترضوا على خلط العاميه باللغه العربيه
انا طبعا مش زعلانه بس باحس باحراج فظيع وبانكسف قوى
اتمنى انهم يعذرونى واتمنى انهم يقراوا فى تدويناتى احساسى ويتغاضوا عن غلطاتى فى صياغتى للجمل او خلط العاميه باللغه العربيه ولازم تعرفوا انا مش اديبه ولا كاتبه انا واحده عاديه بتكتب خواطر زى اى حد عامل مدونه وبيكتب فيها خواطره فارجوكم تحملونى لو عايزنى ابطل اكتب انا مستعده انى ابطل تتدوين الحمد لله فيه كتير افضل منى
و اكيدطبعا باشكركل اللى بيوضحلى خطئى لانهم بيعلمونى بس فعلا دى اقصى قدراتى وليس فى الامكان افضل مما كان
مرة تانيه باعتذر للى بيضايقوا من اخطائى فى الكتابه
واتمنى لو حد بيعرف لغه عربيه يحاول يشرح بطريقه مبسطه لعقليه طفل فى 7 سنين اللغه العربيه
لانى باجد باتمنى افهمها واعرف افرق بين الحال والصفه والمضاف اليه
وغيرها من قواعد اللغه العربيه

57 comments:

أنا إنسان said...

والله العربي ده لغه فعلا صعبه
بس انت مش محتاجه انك تعرفي كل حاجه فيها
بس اللي ممكن تستخدميه وممكن يفيدك في كتاباتك
هوه ده اللي تتعلميه
أهم حاجه
تقنعي نفسك انها حاجه بسيطه وسهله

عصفور المدينة said...

مش أنا والله يا أستاذة
أنا مش اتكلمت معاك في الموضوع ده بس أعتقد إن شاء الله إنه حييجي بالوقت

smraa alnil said...

هههههههههههه

معلش اصلي بضحك عليا مش عليكي

اصل انا كمان مش اعرف في النحو خالص

لما كنت في المدرسة وبكتب شعر واوريه للمدرس بتاع اللغه العربية

كان بيفرح اوي وكان يوصفني بشعرا كبار

بس كنت احمر واحدة ترفع الفاعل

ولما كان يطلب مني اني اعرب حاجة
كنت برجع لاولي ابتدائي ان
احمد يشرب اللبن

وغالبا كنت بفشل

ومازلت
لو سالتيني مين ان واخواتها برضه مش هعرف

وعلي فكرة مازلت

يعني كتاباتي كلها قد لا تتم للغه العربية بصله

لاني فقط اكتب احساسي او خيالي اللي بعبر عنه باحساسي برضه

كل ما اطلبه منك انك تبقي انتي
انتي بتكتبي لنفسك وبطريقتك

ويمكن عشان انا زيك فمش باخد بالي من اخطائك اللي انتي بتقولي عليها

كوني رفقة وبس وبطريقتك

صاحب المضيفة said...

مش عيب ان الواحد يغلط

ده شكل من أشكال التعلم الغير مباشر


كملي في الطريق

وكوني دائما متعاونة ولست حجر عثرة في طريق المدونين


فهم فريق يكمل بعضهم بعضا

دمت بخير

آلام وآمال said...

معلش يا رفقة هوني على نفسك
انا حسيت م البوست انك مدايقة اوي

الموضوع بمنتهى البساطة
دي مدونة شخصية
صاحبها يكتب فيها على حريته
مفيش قانون بيحددلنا قواعد لغة نمشي عليها ف التدوين
وبالتالي شيء مش منطقي ابدا ان حد (مع احترامي للجميع) يعمل تدقيق لغوي لصاحب المدونة
الا لو صاحب المدونة ملتزم دايما بالكتابة بالفصحى

وانا على فكرة مش ضد التدقيق في حد ذاته
لكن يكون للملتزمين بالفصحى فقط

متدايقيش نفسك سا رفقة واكتبي ف مدونتك بحريتك طالما مش بتقولي حاجة غلط

آلام وآمال said...

يااااااااه
ده انا بطيء اووووووي
ههههههههه
على ما قريت البوست وكتبت التعليق الاقي خمس تعليقات؟
:D :D :D

شوفتي بئا مش انتي لوحدك اللي ضعيفة ازاي
هههههههه

واحد بيحب النحو بس على قد حاله فيه said...

مممممم
كانت الناس أول ما الأستاذ وجدى غنيم ظهر على الشاشة فى ناس كتيرة جدا معترضة عليه
وده لإنه بيتكلم بالعامية
فكانت حجته (( وما أرسلنا من رسول إلا بلسان قومه ))يتكلم زى ما بيتكلموا
لا يتنطع بألفاظ و لا يعلوا عليهم ببيان
لازم يكون بسيط و سهل
وعشان كده الشيخ وجدى نجح
أما عن النحو
فالنحو مفيش اسهل منه
مجموعة من الأسئلة و الأجوبة وانت تطلعى جملة تمام التمام
وبالتمرين و التكرار حتلاقى الموضوع سهل والنحو بيطلع متظبط
ومتنسيش القرآن
كتر القراءة فى المصحف على فكرة بيظبط النحو و الكلام كله

شىء كمان
المدونة مش بلغتها و لا بطريقة كلامها وأنا بأخذ على اللى قالولك النحو دول النقطة دى

لكل مدونة روح
مدونة غتته
مدونة خفيفة
مدونه مشوقة
مدونة عادية
مدونة جذابة
وهكذا
وده بيرجع للكاتب نفسه و روحه
لأن الكلام اللى انا كاتبه هو انا وانا هو الكلام
انا ادخل مدونة عصفور المدينة مثلا
انا مش شوفته قبل كده
ومش كلمته فى التليفون
ولا على الأيميل
ولكن لما دخلت مدونته
شوفته وعرفته
ولو شوفته فى الحقيقة
حعرفه من غير ما يعرفنى بنفسه بمجرد انى أسمعه بيتكلم مع حد فى اى قضية
عرفته من أراءه و فكره


انا مش فاكر بالظبط اول مرة دخلت فيها هنا
وعلى فكرة ده غريب
لأنى اى مدونة انا فاكر اول مرة دخلتها بيكون ايه

بس مش عارف ليه
انا فجأه لقيت عندى فى الريدر مدونة اسمها العائشة فى الأحلام
لدرجة انى كنت فى الاول كنت بأعلق على انك ولد
تسألينى ازاى اقولك معرفش


كذلك الأمر رفقة عمر
مدونة لو غيرت طريقة كلامها و طريقة نشرها وأسلوبها
لو دخلت المدونة حقول على طول
دى مش مدونة رفقة عمر
حتى وان كان نفس الإسم و الرابط و نفس المدونة

وعلى فكرة مدونتك بأدخلها وأطلع منها من غير ما اتعب


مدونتى مثلا بالإجماع
مدونة رخمة
مقالاتى طويلة وغبية
تنطعى فى الكتابة يخنق ناس كتير
مواضيعى رزلة كده ومش بسيطة
مدب فى الكلام
دايما معارض وموافقتش حد قابل كده فى رأيه
لو حد عارضنى على الملأ ( بأهزءه ) زى ما حصل مع المانجر ....... إلخخخخخخخخ


ولكن وعلى الرغم من كده
الناس لسه بتيجى عندى
مش بيقروا الموضوع وانا عارف
بس باقدم حسن النية



شىء تانى
انا مش معاكى ان المدونات اللى بتكتب فى الدين كترت
انا اللى شايفه ان المدونات السطحية هى اللى كترت
ممكن تكون المدونة حلوة بس سطحية
نادر قوى قوى قوى لما بيقابلنى مدونة لها روح فكرى وطابع الوقار اللى يجذب ويفيدنى بحاجة


انت فى معهد اعداد الدعاة اللى فى الأسكندرية ؟
انا ان شاء الله ناوى التحق بيه لما أخلص كلية
يعنى يبقى معايا شهادة فى مجال الدعوة
أصلك عارفة
احنا بقينا فى بلد بتاعت شهادات صحيييحححححح


كملى زى ما أنت كده وكبرى دماغك منهم
المهم ان فكرتك توصل

بقولك ايه لو تعرفى اى حد يسكن فى فلسطين و خاصة فى غزة
نمرته او ايميله
ياريت توصلينى بيه
nesrelsharke@hotmail.com
nesrelsharke@gmail.com
السلام عليكم

خمسة فضفضة said...

السلام عليكم ورحمة الله وبركاته

يارفقه يا حبيبتي انتِ قلتي المفيد في وسط كلامك بس مش واخده بالك منه

انا مش اديبه ولا كاتبه انا واحده عاديه بتكتب خواطر زى اى حد عامل مدونه وبيكتب فيها خواطره

ده هو فعلا الهدف من المدونات في الاساس ، ومش معني ان واحد عامل مدونه يبقي نجيب محفوظ ولاّ احسان عبد القدوس ، لا ابدا الواحد بيعمل المدونه علشان يتكلم ويقول اللي جواه واللي هوه حاسه بالطريقه اللي تعجبه من غير تصنع ولا الفاظ مكلكعه

منطقه واحده بس هي اللي ناخد بالنا منها واحنا بكتب :
القرآن والحديث ، بمعني لما اكتب آية او حديث لازم تكون اللغه والكلمات والحروف وكمان التشكيل مظبوط ميه في الميه

اما غير كده فاتكلمي براحتك وبالطريقه اللي انت عاوزاها المهم تطلعي كل اللي جواكي
بس كده

سلام يا قمر

عاشقه الفردوس said...

رفقه
رفقتي الجميله
ولايهمك ياقمر
وبعدين كل واحد وله قدرته واسلوبه للتعبير عن نفسهوعن الكلام اللي عايز يقوله

وجميل انك بتحبي العربي وعايزة تحسني من نفسك فيه
ربنا يوفقك يارفقتي
وبعدين تسيبينا ايه
لا ااااااااااااااااااااااا
لا طبعا لايمكن

ربنا يخليكي لينا ياعسل

عاشقه الفردوس said...

رفقه
رفقتي الجميله
ولايهمك ياقمر
وبعدين كل واحد وله قدرته واسلوبه للتعبير عن نفسهوعن الكلام اللي عايز يقوله

وجميل انك بتحبي العربي وعايزة تحسني من نفسك فيه
ربنا يوفقك يارفقتي
وبعدين تسيبينا ايه
لا ااااااااااااااااااااااا
لا طبعا لايمكن

ربنا يخليكي لينا ياعسل

عاشقه الفردوس said...
This comment has been removed by the author.
ma_3alina said...

كل كلامك معنديش اي اعتراض عليه
مش كده بس .. بضم صوتي لصوتك .. إن كل واحد حر يكتب بطريقته والمهم الفكرة والإحساس المطلوب إنه يوصل للقارئ

بس اعترض بشدة على نقطة هي دي إمكانياتي وليس في الإمكان أحسن مما كان ... اكتبي بطريقتك العادية عامي على فصحى ونحو على قد حالنا .. أنا بعمل كده ومعظمنا بيعمل كده .. لكن في نفس الوقت نتعلم لغتنا ونزيد فيها عشان حتى لما تربي أولادك ما يطلعوش ضعاف في النحو وفي اللغة اللي حيقروا بيها قرآنهم وسنة نبيهم

اللغة العربية مهمة جدا وسهلة جدا .. بس زيها زي أي لغة محتاجة ممارسة .. مش اللي بيتعلم إنجليزي بيقولوا له اتكلم بيها كتير ..

هل ينفع يقول ليس في الإمكان أحسن مما كان ... وما يرضاش يمارس اللغة .. كده عمره ما حيتعلم

اللغة العربية كده برضه لازم ممارسة .. والموضوع مفيهوش إحراج إلا لو كان اللي بيعلق يقصد الإحراج ... لكن لو الموضوع نصيحة عادي يبقى مفيش مشكلة وجزى الله خيرا من علمنا حرفا في اللغة

وإيه حكاية لو عايزني ابطل تدوين دي ؟؟ .. اممم .. حعديها المرة دي

وبعدين دا النحو سهل خالص .. فيه اسهل من إن أي حد يعمل أي حاجة يبقى مرفوع بالضمة ولو كانوا اتنين يبقى مرفوع بالألف ولو كانو كتير يبقى مرفوع بالواو .. فيه أسهل من كده ؟؟؟

:D

عصفور المدينة said...

توضيح
الأخ صاحب التعليق باسم واحد بيحب النحو هو الأخ مؤمن محمد صاحب مدونة كلام في الممنوع
:)
http://www.blogger.com/profile/00019293627067536870

الطائر الحزين said...

مفيش حاجة اسمها مدونات بتكتب فى حاجة معينة افضل منى

لا يوجد واحد يلم كل انواع المعرفة فى مجال واحد فما بالك بالمجالات المتعددة


ولو تحبى اروح اخنق لك سيبويه معنديش مانع


سيرى على الطريق

تحياتى

ض/خالد said...

والله أنا برأيي أن كتابات حضرتك جيدة....
بغض النظر عن موضوع العامية أو غيرها...
لكن فعلا العاطفة الصادقة للدين ...
والغيرة عليه هو ما أراه في مدونات الكثير من الاخوة والاخوات
وبالنسبة للغة العربية فكلنا ما زلنا وكنا عيال عليها
وأعتقد أنه يجلب على المدون ان يتقن اللغة العربية
لا أقول مجرد أن يعرف الفاعل والمفعول وكذا...
لا..بل ينبغي أن يكون له ملكة طيبة وقوية في اللغة
ولا بد أن يطالع أشعار الاقدمين وهنالك كتاب طيب جدا اسمه موسوعة روائع الشعر العربي مساحتها حوالي 30 ميجا

وأيضا شرح الاجرومية في النحو للشيخ ابن العثيمين مختصرة وستساعدك ان شاء الله
ونسأل الله القبول

ana ga3an said...

يا رفقة يا عزيزتي
هو اللي نعيدة نزيدة
متخليش حد يملي عليكي طريقة كتابتك
تكتبي فصحي نسخ دمياطي حتي
دي مدونتك و افعلي ما تشائي

متهيألي البوقين اللي قلتهم فوق دول
ممكن يخلو مجمع اللغة العربية
يحل دمي

النبي عربي وقولي يا باسط

mohand said...

السلام عليكم

اول واحد شاف البوست ده انا
بس منها لله مدونتك هنجتلي الجهاز

معرفتش اعلق


بصي انا عندي اقتراح مالوش حل

بما انك بتحرجي من اللي بيصحح
وبما ان التصحيح واجب برضه
ودا من الحاجات اللي هتخليكي تتعلمي

انتي ممكن تعملي حظر للتعليقات
واللي عايز يصلحلك حاجه ويفيدك

متنزليش تعليقه
لانه ببساطه باعته ليكي

وعلي فكره كلنا بنغلط
وانا شخصيا بغلط غلطات فظيعه
بس دا عادي يا رفقة

محدش يعني اتولد دكتور معجم

ولا حتي عارف كل حاجه

اتمني ان اكون افادتك

تحياتي
واكتبي زي ما انتي عايزه
السلام عليكم

mohand said...

السلام عليكم

نسيت صحيح
انا قريت الموضوع امبارح
وبما انك عارفه اني مثقف وبتاع جرايد

ولازم اقراء كل جريدة بحذافيرها

بالصدفة البحتة جه في ايدي تقريبا الاهرام بتاع النهارده

مع ان كان قدامي كل الصحف

كان فيه موضوع عن المدونات وادب المدونات

وناس بتقول ان المدونات بتخلي اللغة تنهار
وكلامهم عامي ووحش وكده يعني
وناس بتقول انها مش سبب في انهيار اللغة لان ببساطه جمهورهم قليل

المهم في الموضوع ان الكل اتفق ان المدونات بتظهر المواهب المدفونه
يعني لو كل 100 مدونة بتظهر موهبه دا شئ جيد

وكفايه انهم بيعبروا عن نفسهم من غير دار نشر وفلوس وكده

انا معاهم في دي

كفايه ان المدونة بتخرج اللي جوا الانسان

وانتي انسانه

خلاص يا انسانه


كفايه بقي رغي كتير

سلام

رفقة عمر said...

انا انسان

اهلا بحضرتك
انا معاك بس يمكن علشان انا مش ليا خيره بالكتابه مع قله تمكنى فى اللغه العربيه دة اكيد ممكن يضايق اى حد من كتاباتى
بجد نفسى اتعلم اللغه العربيه بس بتوه فى قواعدها
ربنا يسهل وييسر لنا تعلمها

******************

استاذ عصفور المدينه

اهلا بحضرتك
اولا انا اخت حضرتك الصغيره انا ليا رجاء من حضرت متقوليش استاذه
انا اختك الصغيره رفقه وبس
انا مش زعلانه ان حد كلمنى فيه بس مش عايزة يكون فيه حد مضايق من طريقه كتاباتى لانى فعلا بحاول ان الكلمات تكون صحيحه ومعبره
وغصب عنى باخلط العاميه ياللغه العربيه


***************
سمراء الجميله

ازيك ياقمر
يعنى احنا بنعانى من نفس المشكله
انا فعلا باحاول اوصل احساس
مش بزوق فى الكلام بجد نفسى اظبط طريقه الكتابه
بس مش عارفه ربنا يسهل ونتعلم من اخوانى المدونين اللى ماشاء الله بيكتبوا بلغه عربيه جميله قوى

*****************

صاحب المضيفه

اهلا بحضرتك
شكرا لحضرتك بس مش فهمت يعنى ايه اكون حجرة عثره فى طريق المدونين
هو انا ممكن اكون فى سبب توقف حد عن التدوين


****************


الام وامال

اهلا بحضرتك

شكرا ليك كتير على تعليقك اللى رفع من معنوياتى كتير ربنا يخليك يارب
هو بس انا مش بضايق بس نفسسى اللى يصحح لياا طريقتى فى الكتابه يعلق على الموضوع وبعد كدة يقول ملا حظته لا على العكس بيدخل كل اللى شايفه من البوست الخطا اللغوى وبس
فبجد باحس باحباط واحراج فظيع
وعلى طول باحاول اصحح الخطا على قدر ااستطاعتى
ربنا يخليك ياارب
وجزاك الله كل خير


***************


انا عارفه انك مؤمن محمد من الايميل


اهلا بحضرتك يابختك انك بتحب النحو نفسى احبه انا كمان
اولا مدونتك نا باحب اتابعاها جدا مين قال كلامك دة عنها لا طبعا
يمكن مواضيعك دسمه شويه بس لازم يكون فى المدونات دة ودة لان كل واحد وثقافته وواطلاعاته انت كتبت مواضيع كتير قوى كانت ججميله جدا ومش حسيت فيها باى ضيق وانا بقراها
وطبعا باشكرك جدا انك بتقرالى وبتزورنى دايما
وعندك حق لازم كل واحد يعبر عن روحه وعن اللى جواها باى شكل وباى اسلوب المهم ان فكرته واحساسه يوصل
انا مش فى الاسكندريه
بس اعتقد ان كل معاهد الجميعه الشرعيه مرتبطه بعض لان الامتحانات بتكون موحدة على مستوى المعاهد فى كل المحافظات
بخصوص اعرف عائلات فى غزة لا والل معرفشى

بس شوف
اتصل على 009728284 ثم ضع اي اربعة ارقام عشوائية
ان شاء الله هايرد عليك حد من فلسطين
وربنا يقدرك على الخير دايما يااااااارب ويرزقك الشهادة فى سبيله اللهم امين


******************


دكتور فضفضه

اهلا بصوت العقل والضمير على المدونات
حضرتك فعلا صوت العقل فى التدوين ربنا يبارك فى حضرتك
اكيد طبعا لازم مش يكون فيه اى اخطا فى القران او الاحاديث دة امر اساسى
بس فى موضوع انى اكتب جمله نحويا صح دة امر صعب عليا شويه
وان شاء الله من متابعاتى للمدونات الاخرى ربنا يسهل واتعلم منهم
شكرا على كلامك الجميل
اللى رفع من معنوياتى كتير
جزاك الله كل خير


*****************

عاشقه الفردوس


اهلا بيكى ربنا يجعلك من ساكنين الفردوس اللهم امين يارب العالمين
وبجد شكرا ليكى على مشاركتى على هذا البوست وعلى تشجيعك ربنا يكرمك يارب
ويقدر لك كل خير اللهم امين يارب العالمين
انا فعلا نفسى اللى بيقرالاى مدون يهتم بفكره واحساسه قبل كلماته وتنسيقه للحروف
لان الاحساس هو الاهم
ربنا يهدينا لما يحبه ويرضاه اللهم امين

eldoctor said...

بصى يارفقة ...
انا لما باكتب (باتكلم عن نفسى ) لما باحضر موضوع باقعد ارتب فيه فترة طويلة و اصلح العربى و اللغة ... بس بانشره بعد كتير .. انما لما باكتب موضوع فورى .. باكتبه عامى اكثر ,.,, لان دى اللغة اللى بافكر بيها ... و الموضوع مش محتاج ترجمة .. الموضوع بيعتمد عليك انت ... عايزة تكتبى ازاى سيبك من الناس .. الكلام الموجه لعامة البشر غير الموجه للمتخصصين .. زى مثلا ما دكتوزر يشرح الحالة لدكتور او يشرحها لشخص ما يعرفش حاجة فى الطب .. المهم المعلومة توصل

ربيــع said...

ممممممم
اقولك ايه ايه

يابنتي هو انتي بتكتبي منهج دراسي !!
^_^

خدي راحتك اوي ان شاء الله هندي يابنت المهم الي بيقرا يكون فاهم

عارفه خدت في وحده من المواد الي بدرسها
ان الكاتب احيانا بيلجأ متعمد يحط غلط في كلامه
عشان لو حد نقله بيكون عليه اثبات
^_^

فبقا انتي خدي حقك متسكتيش ها :)
وبعدين انا سعوديه وبكتب عربي كويس

بس البوست بتاعك لما يكون بالمصري مش بقدر اكتب بلهجتي مثلا.. بحب ارد بنفس المود بتاعك
اكتبي يابنتي وبلاش كسوف :)

ساعد نسرين الايمن said...

رفقة عمر

لم اشعر ابدا واطلاقا بوجود اي ضعف لديك في العربي

وكل تشبياتك واستعاراتك الل يقراتيها ممتازة وفي موضعها

ايه حكاية انك ضعيفة في العربي ديه ؟
علي اساس انك فرنسية مثلا

يا بنتي المهم احساس اللي بيقرا بالكلام
انتي بتكتبي في مدونة مش كتاب نحو
المهم تكوني متمكنة من المادة اللي عايزة تقوليها وبعدين اللغة هتيجي لوحدها
ابقي تابعي برنامج بلغوا عني ولو ايه البرنامج ده مفيد وخدي دروس تجويد واحفظي قران

علي فكرة
انبسطت او يانك معك اعداد دعاة
عارفة اعداد الدعاة بتاع مسجد العزيز بالله ؟
هوني عليكي رفقة عمر
فكل ميسر لما خلق له

رفقة عمر
انتي بجد رفقة عمر

رفقة عمر said...

ماعلينا

اخبارك ايه يارب تكون بخير زربنا ييسر لك كل امورك اللهم امين
انا فرحانه جدا انك ماشاء الله بدات ترجع لروحك المرحه تانى وتعليقاتك المرحه
انا طبعا معاك انى لازم اتعلم بس لغايه ما اتعلم اتمنى انهم يتقبلوا كتاباتى مع قله خبرتى فى النحو والبلاغه وكدة
عارف كان فيه برنامج للاذاعه عن اللغه العربيه وكان بيجيبوا صوت طه حسين يقول
لغتنا العربيه يسر لا عسر
انا بقى كنت دايما ااقول لغتنا العربيه عسرا لا يسر
انا لما دخلت المعهد لاقيت قواعد اول مرة فى حياتى اسمع عنها وكانت كتير كانت كلها بتدخل فى بعضها
ربنا يرزقنا الفهم اللهم امين
وموضوع ابطل تدوين دى لانى مش عايزة يكون حد مضايق منى وبعدين انا بتاثر نفسيا جدا فانا باحاول اتجنب اى شئ ممكن يضايقنى او يدخلنى فى مود اكتئابى
شكرا قوى ماعلينا
على تعليقك جزاك الله خيرا
وربنا يقدر لك كل خير


*****************

استاذ الطائر الحزين


اهلا بحضرتك ايوة اكيد الافكار متنوعه وكل واحد ليه اللى بيميزه عن التانى
بس برضه فيه ناس متمكنه من اللغه اكتر وباسلوب ادبى افضل قلازم اكيد يكونوا فى الافضليه
حضرتك عايز تخنق سبيويه بنفسه
لا وعلى ايه الطيب احسن برضه
بتشرف بوجود حضرتك بجد
جزاك الله خيرا



***********************


د/ خالد


اهلا بحضرتك
اكيد لازم اى حد فين يتمكن من اللغه بس عارف انا سمعت ان فى المخ مراكز لكل شئ بنتعلمه علشان كدة تلاقى ناس شاطره جدا فى الغات وناس شاطره فى الرياضيات وناس شاطره فىى العلوم والطبيعه وكدة
وفيه ناس شاعره وناس اديبه
انا بجد حاولت كتير جدا جدا انى اركز فى اللغه العربيه باتعب جدا وممكن احس بضيق فى التنفس لانى مش فاهمه القاعده النحويه وليه بتتقال كدة بجد باتعب
فاكيد مركز المخ المسئول عن تعلم اللغه العربيه ضعيف ومش شغال كويس بس اوعد حضرتك انى احاول اتعلم والله المستعان
جزاك الله كل خير


**************

رفقة عمر said...

استاذى الجعان

اهلا باستاذى بيسعدنى تواجدك دايما
عارفه والله حضرتك كلمتنى كتير فى الامر دة
بس حضرتك عارف انا مش باحب حد يكون مضايق فلازم ابين لهم اعذارى علشان يحاولةا يتغاضوا عن اخطائى اللغويه ونفسى يقراوا احساسى اكتتر من كلماتى الغلط نحويا واملائيا
جزاك الله كل خير
:)

****************

استاذ مهند

اهلا بحضرتك
انا باعتذر لحضرتك بالنيابه عن مدونتى انها بتهنجلك الكمبيوتر

استاذ مهند انا فعلا مش بازعل من اللى بيصحح ليا الخطا بس اللى داخل بس ومش شايف غير الخطا اللغوى او النحوى ومش بيفكر حتى انه يناقشنى فى البوست دة يبيحرجنى جدا وبيحبطنى قوى على فكرة مدونين كتير جدا نصحونى بامور كتير قوى وانا كنت باسمع كلامهم من غير زعل خالص فيه ناس طلبت منى انى اشيل صور مش عجباهم باشيلها على طول ناس طلبت منى ابطل احط اغانى سامى يوسف او اناشيد عموما بطلت
انا مش بضايق من النصيحه ابدا بس باحس اللى بيدخل يصحح ليا خطا لغوى انه بيسخر منى وعايز يقولى قبل ما تتكتبى اتعلمى الاملاء الاول
فبجد باحس باحباط شديد
واخيرا شكرا ليك كتير
وجزاك الله كل خير


*****************


استاذى الدكتور

افتقد تواجد حضرتك كثيرا على مدونتى
اهلا بحضرتك سعيدة بوجود حضرتك جدا
هو دة اللى ااقصده الكلام فى الدين بيكون شديد على النفس وانا باحاول بقدر الامكان اتكلم فيه بطريقه سلسه وبسيطه توصل بسرعه
ولان الشيخ الشعراوى رحمه الله عليه كان بسيط لاقصى درجه وانا مع انى كنت صغيره ولسه لم التزم بس كنت باستمتع بكلامه وكانت الحلقه بتخلص فى لمح البصر ومش كنت باشعر بيها نهائى وانا اتعلمت منه ازاى اكون بسيطه فى كلامى وذكرى معلومه دينيه ازاى تكون خفيفه على النفس
ربنا يرزقننا الهدايه والاخلاص اللهم امين يارب العالمين


*****************



ربيع حبيبتى


اخبارك ايه والنتيجه ظهرت ولا لسه
ربنا ينجحك يارب اللهم امين يارب العالمين
انتى لا تتخيلى انا باكون سعيدة قد ايه بغلتك المصريه مش بتغلطى خالص ماشاء الله عليكى
ربنا يكرمك يارب
انا بجد سعيدة جدا بمعرفتك وسعيدة اكتر بتواجدك على مدونتى لانك ماشاء الله اديبه بجد وتستحق كل تقدير على طريقه كتاباتك الادبيه الفلسفيه
ربنا يكرمك يارب ويديم عليا محبتك اللهم امين

****************

استاذ ساعد نسرين االايمين


اهلا بحضرتك
ليه الغيبه الطويله يارب يكون خير
انا مش عارفه المعهد العزيز بالله
انا تبع الجمعيه الشرعيه
والدراسه فيه متعه جدا ومن امتعها مصطلح الحديث وعلوم القراه واصول الفقه
بجد فرق كبير قوى لما تتعلم الامور دى فى الدين ونفهم ازاى وصلنا الشرع وعلى اى اساسا العلماء بيطلقوا الفتاوى
اسعدنى عودة حضرتك
جزاك الله كل خير

Ma 3lina said...

الحقيقة انا مش شايفة اى تعارض بين انك تكتبى عامية على فصحى

انتى بتكتبى مواضيع تمسنا جميعا باسلوبك مش لازم يعنى نحوى و تشكلى الكلمات كمان

اما بالنسبة للنحو فده الجزء الوحيد فى اللغة العربية اللى كنت بحبه خصوصا لما تقعدى تحلى متعة

ميهمكيش و اكتبى كما تريدين :)))

وضـّاح said...

مش أنا
دي تاني زيارة .. يعني أكيد مش أنا

ولكن .. حضرتك دي مدونتك تكتبي فيها براحتك .. صحيح يجب علينا أن نتحدث اللغة العربية بصورة صحيحة .. ولكن بما إن حضرتك بتجتهدي .. أظن مفيش حد يلومك

ولكن اجتهدي فيها .. وعلى كل كلنا أطفال بالنسبة للغة العربية
:)

Soul.o0o.Whisper said...

رفقة عمر ...

بجد اسلوبك حلو
حسيت انى معاكى
و عايشة كلامك

هو دا اللى كل مدون بكتب علشانه
علشان يوصل اللى جواه
و اعتقد انك نجحتى فى دا

انما بقى على اللغة
فأنا اعشق العربية الفصحى جدا
لكن للاسف بردوا ضحلة فى النحو
و يمكن اللى زاد الطين بلة إن دراستى بالانجليزى
بس ناوية بإذن الله لما أخلص آخد كورس نحو محترم
مش علشان التدوين
لكن علشان حبى للغة فى حد ذاتها

بس اوعى اوعى تتوقفى عن الكتابة علشان حد قالك كلمة
بصى دى مدونتك
و محدش اتضرب على ايده علشان يقرألك
يعنى اللى بيدخل هنا داخل علشان رفقة
مش علشان يتصيد لك الغلط

اتمنى أقرألك حاجة قريب
تقبلى خالص ودى
و معلش على الاطالة

الراقص مع الذئاب said...

السلام عليكم
كيف حالك يا اختي الكريمة
انا لا اجد اي حرج في هذا الامر
فكل ما نكتبه يعج بالاخطاء النحوية
ولن اكون مبالغا إن قلت ايضاً يمتلئ بالاخطاء الاملائية

طبعا الكتابة باللغة العربية بتكون جميلة وهو دا المطلوب حفاظاً علي هذا الكنز

بس يمكن احنا بنحب ندردش في مواضيع كتيرة وبنحب نتكلم بالعامية فيها

ولا يهمك يا رفقة

وإن شاء الله تتعودي علي الكتابة بالعربية بدون اي اخطاء....
دمتي في خير اختي الكريمة

صوت من مصر said...

عمرى ما فكرت انى افرق بين الفاعل والخبر والمخفعول به بس فى شىء انى بكتب وطول ما بكتب يبقى عايش مش مهم عربى عامى فرنساوى موزامبيقى المهم انى اكتب الى جوايه

صرخة حق said...

السلام عليكم الاول
مش هقول مقدمات كتير لاني مكنتش ناوي اكتب ولا اعلق علي اي تدوين بس يا بنت الناس الكمال لله واحدة انك تغلطي في العربي احسن من انك تغلطي في قواعد الدين والفتوي او تغلطي في الادب والاخلاق كملي يا رفقة

شريف طلال said...

يا ستى عادى
المهم توصلى ألى فى قلبك لينا
و اوعى طبعاً توقفى تدوين
لأن التدوين مش من ناس محترفه الكتابه واللغه العربيه
التدوين ده من اشخاص عاديه من الشعب بتحاول على اد ما تقدر تفيد الناس
حاولى اياً كانت لغتك و معلوماتك
و شكراً ليكى
تحياتى

امام الجيل said...

هو جميل ان الواحد يتحرى انه يكتب باللغة العربية
بس على قدر الاستطاعة
وكتابات حضرتك مش رديئة ولا حاجة
والا مكنتش اتعرفت وانتشرت وبقى ليها

زائرين ومعلقين
اللهم لا حسد
:)

شيماء الجيزى said...

بصى يا رفقه
انا رغم انى -بدعى - انى صحفية وكاتبه
وبقع فى نفس الاخطاء
وناس كتير صلحتلى
واظن ان فى تعليق جميل عندك قال
ان الغلط لوحده تعلم
لانك لما تغلطى وحد يقولك الكلمه دى مش هتطلع من عقلك ابدا
واظن ان ده شئ كويس
كمان المدونات دى معموله ليه يا اخوانا؟
مش علشان نكتب اللى احنا عايزينه
انشالله يكون رموز
انتى مش منتهجه نهج ولا عامله مسيرة للغه العربيه بتتخفى وراها
انتى مجرد مدونة الناس حبت احساسها ليس الا
واحساسك هو اللى بيقودنا ليكى
وليس الفتحه والضمه

تحياتى لكِ

دكتور حر said...

آه كده

خسستنيني من الذنب
الله يسامحك

لم اكن أقصد والله

انا اعرف ان المشاعر واصله تمام

لكن الواحد دائما ما يطمح في الكمال أو السعي اليه

يعني في ناس تانيه بتعمل كده ومش بقولها

لكن انتي عشان كلامك جميل وطيب
فقلت نبه يا واد وخلاص

عامة اكتبي كما تشائين ولا يهمك

وانا هضربهولك ان شاء الله


(:

رفقة عمر said...

د/ ماعلينا

اهلا بيكى
سعيده بوجودك جدا
اولا ماشاء الله انك بتحبى النحو لانها نعمه بجد وخصوصا عند قراه القران
هو دة الى انا ااقصده ان كل واحد بيعبر عن اللى جواه وحاسه وبيخرج الكلام منه بعفويه لانه لو فكر فى تنظيم الكلام وتهذيبه وتتدقيقه اكيد هاتضيع منه الفكرة والاحساس
شرفتنى بجد
:)

***************

استاذ وضاح

اهلا بحضرتك اكيد دة شئ يسعدنى ان حضرتك تزور مدونتى
بصراحه اللغه العربيه بحورها كتير وقواعدها كتير قوى هى اكيد جميله يكفى انها لغه القران ولغه اهل الجنه والتحدث بها المسلم بيجازا عليه بالحسنات بس هى فعلا شديدة عليا واسال الله انه ييسر لى فهمها واستعيبها

************

soul.o0o.whisper

اهلا بحضرتك بجد اسعدنى تواجدك وكلماتك جميله وكنت نفسى تتطولى اكتر من كدة
فعلا سبب كتابتى للبوست انى فعلا محتاجه الناس تقرا احساسى وتحس الفكره
اكتر من الاهتمام بالتنسيق وكدة
مع انه مهم جدا بس اكيد للمتمن من ادوات اللغه ومحترف فيها
شكرا لتشجيعك
واتمنى اشوفك كتير ياريت
جزاك الله كل خير


*****************


الراقص مع الذئاب

اهلا بحضرتك
ومبروك التخرج
ربنا يوفقك فى كل حياتك اللهم امين
شكرا كتير على كلمات وتشجيعك ليا
جزاك الله كل خير


*****************

صوت من مصر

اهلا بحضرتك
بالظبط كلام حضرتك صحيح وهو دة الى انا ااقصده فعلا
شكرا على مشاركتك الحوار معنا
جزاك الله كل خير


*************

رفقة عمر said...

صرخه حق

اخبارك ايه يارب تكون بخير ليه الغيبه الطويله دى
اسعدنى تعليقك جدا
واتمنى نشوفك على مدونتك قريبا
ربنا ييسر لك كل خير اللهم امين يارب العالمين


****************

استاذ شريف طلال

اهلا بحضرتك
وشكرا ليك انت على كلماتك ومشاركتك لى جزاك الله
كل خير


*****************
امام الجيل

اهلا بحضرتك
طبعا كلامك صح
ربنا ييسر لينا الفهم اللهم امين
كلام حضرتك بخصوص مدونى شهادة اعتز بيها جزاك الله كل خير


*******************


الصحفيه اللامعه ان شاء الله
شيماء الجيزى

اهلا بيكى بجد مبسوطه قوى بتواجد ومبسوطه اكتر بكلماتك الجميله
اكيد انا اتعلمت كتير من اخطائى ومن تصحيح الخطا بس عارفه لما يجى تصحيح الخطا بعد مناقشه البوست بيكون افضل من انه حد يدخل يصصحح الخطا وبس دون اى تعليق على فكرة البوست او مناقشته مش عارفه باحس وقتها انه مضايق منى انى باكتب غلط ومش فكر انه يركز فى فكرة البوست واحساسى اللى عايزة اوصله من البوست
لكن انا والله مش بازعل خالص من اللى يصحح ليا الخطا
لانى باعتبر كل المدونين اهلى واسرتى الافتراضيه وبحببهم كلهم انا بس عايزاهم يعذرونى لو اخطات فى الكتابه

شكرا ليى قوى بجد ادخلتى السرور على قلبى بوجودك جزاك الله كل خير
ربنا يوفقك وتخققى كل احلامك اللهم امين


*******************

دكتور حر

اهلا بحضرتك

لا ابدا والله مش ااقصد انا اللى مش عايزة اضايق حضرتك او اى حد بيحب اللغه العربيه اكيد بيضايق لما يلاقى كلمات غلط وجمل كلها اخطاء نحويه باعزر حضرتك بجد لان واضح ان حضرتك متمكن من اللغه العربيه جدا ماشاء الله فطبيعى لازم تحب كل الناس تكتب لغه عربيه صح
اللى بحب حاجه قوى بيتحمسلها جدا
بجد انا بتكلم عموما وليس شخصى لحضرتك يعنى مش تحس بالذنب ولا حاجه لان حضرتك مش اول واحد يعدلى فى كتاباتى
جزاك الله كل خير

المجاهدة said...

:):)
اعتقد ان اهم تعرفي توصلي المعلومة اللي عاوزاها بمشاعرك و احاسيسك زي ماهيا و الناس تتعلم

و انتي في الطريق هتعرفي تحسني نفسك و تحسني طريقة تعبيرك و تحسني لغتك بما ينفع الناس


ربنا يبارك فيكي و يكرمك :)

ma_3alina said...

كيف حالك يا رفقة .. وأين هي بوستاتك الجديدة .. ليه متأخرة علينا
:)

بالنسبة لحديث خالفوا اليهود فإنهم لا يصلون في نعالهم فزي ما قال شيخنا عصفور الموضوع لمن أراد .. البعض يتحرج من الصلاة وهو لابس حذاء .. اهو الإحراج ده يبقى فيه تشبه باليهود وعشان كده النبي قال خالفوا اليهود ولو عايزين تصلوا في النعال صلوا فيه ...

عارفة زي إيه الموضوع ده ؟؟

زي قول ربنا سبحانه وتعالى في سورة البقرة ..

إن الصفا والمروة من شعائر الحج فمن حج البيت أو اعتمر فلا جناح عليه أن يطوف بهما ...

الآية نزلت لأن الصحابة كان بيتحرجوا يطوفوا بالصفا والمروة لأنهم كان بيعتبروا الطواف شعيرة من شعائر الجاهلية وفيها تشبه بالكفار فربنا سبحانه وتعالى قال لهم إنها شعيرة من شعائر الحج ولا جناح ولا حرج في إنهم يطوفوا بها ..

والفرق بين حديث الصلاة في النعال والآية الكريمة إن الآية تفيد الوجوب لأن الطواف من الشعائر لكن الحديث يفيد الإباحة اللي عايز يصلي في النعال هو حر .. ولو نيته مخالفة اليهود يؤجر كمان .. بشرط إنه ما يبوظلناش فرش المسجد

يارب اكون وضحت لك النقطة دي ..

بالنسبة لتعليق الصارم فأظن أنه من مدونتك أخدنا فكرة عن التزامك وتدينك .. والصارم من خلال كلامك الجميل في مدونتك خد زينا كلنا فكرة طيبة عن علمك بالدين .. وعشان كده يمكن يكون استغرب من سؤالك ... أنا عن نفسي شايف إن سؤالك يستحق بوست منفصل أجاوب عليه فإن شاء الله أول بوست اجاوب حضرتك عليه .. لكن مبدئيا أحب اعلق على تعليقك التاني .. اللي ذكرتي فيه إن المخالفة تكون في باب الاعتقاد بس

عندك حق .. المخالفة تكون في باب الاعتقاد بس مش بس

:D

تكون كمان في باب العادات اللي اختص بيها طائفة بعينها من غير المسلمين ... يعني مثلا طائف معينة بتلبس لبس معين أو ليها قصة شعر معينة .. أهو اللبس دا وقصة الشعر من العادات بس لأنه خاص بالطائفة دي من غير المسلمين ..فالمفروض ما نتشبهش بيهم ... وعشان كده لو راجعتي أحاديث النبي عليه الصلاة والسلام في البوست عندي حتلاقي إنه نهانا عن التشبه حتى في الهيئة والشكل

كمان النهي عن التشبه بالإضافة لكونه في باب الاعتقاد والعادات فبيدخل برضه في باب العبادات .. وهنا المفاجأة بقا .. لأن الاعياد مش من العادات دي من العبادات

أيووون ... الأعياد من جملة العبادات وعشان كده النبي كان بيقول على أعيادنا : حتى تعلم يهود أن في ديننا فسحة ...

واخدة بالك من قول النبي عليه لصلاة والسلام .. في ديننا .. مقالش في دنيتنا ... يعني الفسحة والعيد من الدين .. فإذا كان الدين كامل وتمت نعمت ربنا ورضى الإسلام لنا دينا .. يبقى ازاي نزود عليه احتفال جديد وفسحة جديدة

وعشان كده رفض النبي اقرار اهل المدينة على اعيادهم .. كان ممكن يسيبهم يحتفلوا بأعيادهم ويزود عليها الفطر والأضحى .. لكنه قال لهم قد أبدلكم الله خيرا منه ... والإبدال معناه شال القديم وحط جديد

أما الأعياد اللي اخترعوها عشان الأم أو الأب .. فالموضوع كله تنشيط التجارة .. ونفسي اعرف اي ابن ده اللي ما يتوعظش من دينه ويراعي أمه طول الأيام ويستبدل بر الوالدين بهدية يجيبها لهم كل سنة .. أنا لو من والديه أقول غور أنت وهديتك .. وحقول له كمان انت مش متمسك بدينك ومتمسك بعادات الغرب ؟؟ أنت مش ابني ولا اعرفك

عاجبك كده اديني اتبريت من ابني من قبل ما يجي

:))

molhed said...

http://benkerishan.blogspot.com/
we are win

Rania said...

رفقة عمر
لقد قلت كثيرا عن مشكله يعانى منها الكثير
فانا عندما ابدا بكتابعه قصة قصيرة او اتجه الى العربية عامه
اجد من يقول انصبى المفعول به ؟ اقول هل ينصب المفعول به ؟ متى حدث هذا ؟
:))
تحياتى لك و اعتقد انه المهم ان نكتب ما بجول فى انفسنا بدون اى خجل ان كان بالعرية او بالعامية
تحياتى و مودتى

Anonymous said...

مدونتك من أجمل المدونات و بما أنك تحبين الدين فيجب عليك تعلم العربية فهى لغة القرآن و هى خالدة بخلود القرآن لذا من الواجب علينا جميعا دراسة العربية و التمكن منها فبها سيزداد فهمنا لمراد ربنا فى كتابه الكريم
أبو خالد

nonoymm said...

بصي انا كمان مش متمرسة بس زهقت بجد لما بكتب في مدونة مكتوب بالعامي الاقي اللي بيبعتلي ميل ويقولي خليه لغة عربية افضل علشان العرب اللي بيدخلوا يفهموا اسرع
ولما بكتب لغة عربية الاقي اللي بيقولي بلاش الكلام المكلكع دة اكتبي كدة كلام يتفهم
فقررت اكتب اللي عاوزاه يتكتب زي ما يطلع ساعتها شوية لغة عربية شوية عامي
المهم يوصل اللي عاوزة اقوله من غير اسفاف
وخلاص
وبيتهيالي الكلام بيبقى احلى لو خارج من قلبك على الورق عدل
دة راي
دمت بخير

رفقة عمر said...

المجاهده

اهلا بيكى سعيدة بوجودك اول مرة
هو دة كان غرضى فعلا من كتاباتى على المدونه انى اوصل احساس معين
وكان اللفظ اللى بيخرج من قلبى كنت باكتبه من غير نا افكردة عامى ولا لغه عربيه
بس طبعا اتمنى انى افهم اللغه العربيه واتمكن منها ربنا ييسرها لينا جميعا اللهم امين




***************

ماعلينا

شكرا على سؤالك بس انا حاليا مش فى بيتنا وانا مش باعرف اركز ولا اكتب الا على جهازى ومن بيتنا اول لما ارجع البيت ان شاء الله هاكتب ربنا ييسر بس اللهم امين
عارف موضوع حديث مخالفه اليهود والنصارى بالصلاه بالخف بجد والله اول مرة اسمعه علشان كدة استفسرت عنه انا لما اخدت احكام الصلاه فى سنه اولى معهد اخدنا جواز الصلاه فى الخف مع الالزام بطهارته
لكن الحديث اللى ذكرته مكنتش سمعته قبل كدة


بخصوص كلامك
تكون كمان في باب العادات اللي اختص بيها طائفة بعينها من غير المسلمين ... يعني مثلا طائف معينة بتلبس لبس معين أو ليها قصة شعر معينة .. أهو اللبس دا وقصة الشعر من العادات بس لأنه خاص بالطائفة دي من غير المسلمين ..فالمفروض ما نتشبهش بيهم ... وعشان كده لو راجعتي أحاديث النبي عليه الصلاة والسلام في البوست عندي حتلاقي إنه نهانا عن التشبه حتى في الهيئة والشكل

ايوة انا معاك انه من تشبه بقوم عندهم اعتقاد معين زى عبده الشيطان مثلا او المجوس وحد لبس زيهم او فعل افعالهم اكيد طبعا فهو منهم
لكن البنطلون والقميص والبدله دة لبس غربى لا اعتقد ان كدة يكون فيه تشبه بالغرب ويبقى كدة يكون خروج من المله لان الرسول لبس اللبس العمانى والبحرينى وكانوا لسه مش اهل ايمان على ما اعتقد
وطبعا موضوع الاعياد والاحتفال بيها مش من دينا
بس لما تقول مثلا يوم اليتيم
بجد يوم اليتيم دة فتح مجالات كويسهه قوى للايتام وبدات الناس تتحس بيهم
يعنى مش عارفه حاسساها انها مجرد تذكره اكتر من انها كونها اعياد وكدة
والله اعلى واعلم طبعا
وانا اسفه انى كنت سبب انك اتبريت من ابنك معلش سامحه المسامح كريم
:)
وبعدين بخصوص انى باعرف معلومات بسيطه فى الدين مش معنى كدة انى عارفه كل حاجه اظن الدين بحورة كتير وعلومه كتييير قوى هانفضل لغايه يوم القيامه
بنحاول نعرفه ونتعلمه ونعرف كل اسراره
وانا باتعلم منك ومن الصارم ومن باشمهندس عصصفور ومسلم وغيركم

رفقة عمر said...

ملحد

مش عارفه انت كل شويه تحط لينك مدونتك وانا بامسحه
انا فى غنى عنك وعن مدونتك
انت ليك الحريه فى اعتقداك زى ما انا مش بافرض معتقداتى عليك ياريت تخليك بعيد عننا بمعتقداتك
ربنا يهدينا جميعا لما يحبه ويرضاه


**********************

رانيا

اهلا بيكى
نورتينى
ارضاء كل الناس غايه لا ترتجى يبقى نكتب اللى بنعرفه وخلاص
وزى ما يطلع
اسعدنى مرورك جدا
جزاك الله كل خير


*****************

nonoymm

اهلا بحضرتك
هى فعلا بتكون حاجه تحير وتلخبط وتخليكى مهزوزة وانت بتكتبى لانك عارفه ان فيه ناسس ممكن تعلق على الاخطاء بتحسى اننا بقينا فى امتحان ومنتظرين النتيجه
بس كويس الواحد بيتعلم برضه من اخطائه
********************

استاذ ابو خالد

اهلا بحضرتك
شكرا لحضرتك كتير على كلامك الطيب فى حق مدونتى
جزاك الله كل خير




*****************

النجمة الصامدة said...

شاركني بالتصويت على فكرة كتابي الأول
www.somood.blogspot.com

dina said...

انا اللى شايفاه مميز فيكى عن اى حد تانى جهبز لغة عربية احساسك بالايجابية و المسئولية ناحية دينك و دا اللى مخلى كلامك صادق و واصل اوى ...و كمان اسلوبك اصلا حلو ما شاء الله يعنى لو مكنتيش انتى قلتى انك مش اوى فى العربية مكنتش اخدت بالى...ولا يهمك كلنا بنتعلم و مع الوقت حتبقى احسن من احسن استاذ عندك..خلى انتى بس روحك عالية كدا على طول و خليها على الله

فرنسا هانم said...

والله قمه فى الصراحه
انا بحييكى من كل قلبى
وبعدين
انا بخلط اللغه العربيه مع العاميه
اصل التدوين ده
مش مسئله ادبيه
لا
ده مسئله فكريه
يعنى مشاركه الاخريين الافكار
وده اعتقادى
وانا لايمكن ازايد عليكى وانتى عندك خبره تدوينيه هائله مشاء الله

BinO said...

السلام عليكم
كيف حاللك أختنا رفقة
أتمني أن تكوني في خير حال


الأعتراف بالخطأ أول الطريق لأصلاحه
لكن مش معني الأعتراف بالخطأ أن نركن جانبه ونعتبر أنفسنا في عداد الأبطال لأننا أعترفنا بما ينقصنا
:)
ديه النصيحة
بس أنا عايز أقول أن حتي من يعرفون اللغة لفظاً ونحواً وغيره لا يكتبون بها دائماً لأنهم لا يتحدثون بها
مثلنا مثل معظم الشعوب التي تنطق لغة وتكتب لغة أخري
ولكن قواعد النحو المبدئية لا يمكن أغفالها خاصة في المواضع المهم كقرائة القرأن أول سرد الأحاديث

أما عن أعترافي فهو اني لا أملك تلك القدرة أيضاً علي التكلم بالعربية الصحيحة
ولكني أحاول ان أتعلم

انا مسلمه said...

عارفة اية اهم نقطة فى الموضوع هييا نقطة التعلم ودة اللى واحد بيستفيدة جدا
وحل المشكلة بسيطة ان شاء الله وهوا ن الواحد يبقى مطلع ويقرا كتير دة بيفقرق معاة فرق السما من الارض
طب اية رايك انك تحطى هدف من اهدافك مثلا المرحلة الجاية انك تهتمى باللغة العريبة واعتبريها تعلم لغات ههههه
سعيدة بمرورى على مدونتك الجميلة
تقبلى تحياتى
مدونة قومى يا امه

حائر في دنيا الله said...

اللغة العربية ليست لغة صعبة على الإطلاق، لو أخذتي تلك الجملة بحب ستتخطي جميع مشاكلك معها، أنا شخصيا أقل زملائي في درجات العربي في الدراسة وكنت أذهب لأقاربي المدرسين ليشرحوا لي الفرق بين المبتدأ والفاعل وأنا في الكلية ولم أفهم شيء حتى الآن
فالقواعد لن تصل بنا لشيء
ولو تتقبلي نصيحة مني، أولا أنت تكتبي بشكل بسيط ومن القلب، وهذا رائع لأنه يصل بسهولة وبسرعة، ولكن لم لا تكتبي أولا على ملف ورد عربي حيث أن برنامج الورد الملحق بالأوفيس به قاموس لغوي يستطيع تصحيح أخطاء كثيرة أو التنبيه لها على الأقل، ومن ثم تغيري بعض المصطلحات العامة فلا تقولي "ازيك" ولكن "مرحبا" ولا تقولي "النهاردة" ولكن قولي "اليوم" هل وصلك ما أقصد،،، وواحدة واحدة ستجدي نفسك تكتبي بأسلوب بسيط ولكن أغلبه مطعم بكلمات سهلة، فليس الكاتب الرائع هو من يكتب كلمات معقدة بل العكس
وعن القواعد ليس هناك مشكلة أن تقولي مثلا "لعب المصريين بطولة جيدة" فهي وكما أتذكر يجب أن تكتب "المصريون" لأنهم فاعل..وتلك ليست مشكلة الآن المهم أن لا تقولي المصريون لعبوا حلو اوي، فذلك ما يسيء للغة أكثر
يبدو أني أطلت عليك ولكن فعلا لا تكتبي من عقلك على المدونة على الفور بل راجعي ما تكتبي وتعلمي من أخطائك فمن منا بلا خطأ

رحمنا الله جميعا

لك تحياتي
والسلام عليكم

رينـــــــــــا said...

رفقه ياحبيبتى كلنا هذا الرجل متتكسفيش والا حاجة محدش مبيغلطش خالص يابنتى دا تلاقى سيبويه نفسه كان بيغلط :D:D:D:D

وحشتينى جدا وربنا يكرمك والله على سؤالك
ربنا يبارك فيكى

(( قيثارة الأحلام )) said...

حلو اوى اسم مدونتك ويشبه كتير مدونتى ممكن نتبادل الزيارات يمكن بقدر نتبادل الاحلام

أحمد رفعت said...

اقولك على سر خطير
هاتي ودنك
قربي كمان
كمان

أغلب المصرين مش بيعرفوا يكتبوا عربي كويس ولى انجليزي مش عارف بنعرف نكتب ايه ...

عجبى

الـــصـــــارم said...
This comment has been removed by the author.
الـــصـــــارم said...

خدى دروس فى العربية وخلاص

رفقة عمر said...

دينا

اهلا بيك مبروك المدونه وياارب تحقيقى منها ما ترجين اللهم امين
سعيدة بوجودك جدا


****************

فرنسا الجميله

اهلا بحضرتك ربنا يخليكى دايما بترفعى من روحى المعنويه
جزاك الله كل خير


*******************


بينو

السلام عليكم ورحمه الله وبركاته
ليه كل الغيبه دى كلها
يارب تكون اخر مرة تغيب وتكون متواجد دايما
اسعدنى تعليقك جدا
جزاك الله كل خير اللهم امين يارب العالمين


***************


انا مسلمه

اهلا بحضرتك
ااتمنى اشوفك كتير
ربنا يكرمك يارب ويزيدك من فضله اللهم امين


*****************


حائر فى دنيا الله


اهلا بيك اخيرا على مدونتى سعيدة بوجودك على اى حال عارف مشكلتى ايه لما ان معظم التدوينات اللى كتبتها ونستقتها مازالت فى الدرافت لان احساسى ناحيتها قل فلم انشرها علشان كدة اول ما اكتب البوست بانشره وزى ما يطلع لانه خرج من قلبى واحساسى على الكيبورد على طول
بس هاحاول اراعى على قدر ما ااقدر انى اكتب صح
والله المستعان


******************


رينا

ازيك وحشتينى قوى
نورتينى واسعدتينى ربنا يسعدك يارب ويزيدك من فضله اللهم امين


**************

قيثارة الاحلام


اهلا بيكى فى عالم الاحلام وعالم التدوين ربنا يوفقك اللهم امين


***************

احمد رفعت

اهلا بحضرتك
اوعدك انى احتفظ بالسر دة ومش هاقول لحد ابدا
سرك فى بيييير


**************


الصارم

اهلا بحضرتك فى عالم التدوين واهلا بيك على مدونتى
ربنا يوفقك اللهم امين ياارب العالمين

تمر said...

هو انا يمكن اول زيارة ليا هنا

بس بجد هايل منك قوى الأهتمام ده

اتمنى اكون ضيفه خفيفة على مدونتك

وربنا يوفقك