الغربه

ليا اخت اكبر منى بسنتين بحبها حب كبير قريبه منى حنونه بشكل غير عادى لو طلبت منى عيونى لن امنعها عنها ولان الدنيا مكتوب فيها الفراق وخصوصا من نحب تزوجت اختى منذ 9سنوات وسافرت مع زوجها السعوديه واختى هذه تنزل اجازة كل سنتين لان ظروف شغل زوجها كدة ممكن تكون الاجازة شهرين او شهر كانت هذا العام شهر علشان المدارس بعد رمضان على طول ولقد سافرت بفضل الله
ولكن ماذا فعلت الغربه بها عادت وجدت البيت خالى من والدى رحمه الله عليه توفى والدى وهى بعيد لم تراه ثم سالت عن اختى الكبرى التى كنا مخبين عنها وفاتها وصعقت عندما علمت بالخبر وتجدد الاحزان مرة اخرى فى البيت اخى الكبير عمل عمليه قلب مفتوح كبيره وشفى بفضل الله وكانت هى ايضا بعيد توفى زوج اختى اايضا وهى بالخارج لم تراه وخالاتى واعمامى كلهم للاسف لم تراهم قبل وفاتهم
هذه هى الغربه نظل نعيش مطحونين فى الخارج لشراء السيارة الفاخره والفيلا ونترك احبابنا وراءنا لانعلم هانلقاهم مره اخرى
ام سنعود لا نجدهم او نجدهم وعوامل الزمن اثرت فى ملامحهم نشعر بالغربه بينهم ونبقى بيقينا فى الغربه بين اهلنا والغربه فى الخارج
مامااثرت فيا قوى بعد سفر اختى وجدتها تبكى بشده على غير عادتها حاولت اهديها وجدتها تقول ياترى هاترجع بعد سنتين هاتلاقينى
الامتنى كلمتها ولم استطيع الرد غير ربنا يطولنا فى عمرك ماما ويديكى الصحه ويلم الشمل تانى قد انى انتظر اجازة اختى بفارغ الصبر قد باكرهه اجازتها لانها تنزل لتزيد الشوق لها ولاولادها اللى عاملين زى الملايكه لانهم بعيد عن اى تلوث موجود هنا بنكون عاملين زى العاطشنين تيجى تعشمنا بالميه وتتركنا تانى عطشانين لابنشرب ولا بنرتوى اعرف ان من تنكتب عليه الغربه غصب عنه
لان بلدنا بقت مش بلدنا بقينا عبيد فيها بنشتغل بالسخره وناخد الفتات كتبوا على الاب يتربى ابنه بعيد عنه وكتبوا على الابن ابوه وامه يتوفوا وهو بعيد عنهم ولا تقر عينهم بابنهم اللى انكتبت عليه الغربه
لى قريب من سنه74 فى السعوديه بيشتغل خبيربترول مش بينزل خالص ولاده بيروحواا يشوفوه ويرجعوا وزوجته متقطعه بين اولادها
وبينه شويه هنا وشويه هناك
فين لما كان البيت بيجمع الاسره كلها واللى يتجوز بيتجوز فى نفس البيت مع اسرته كلهم مع بعض كان اللى بيسافر زمان كان للتعلم والدراسه بس دلوقتى الحل للاسف بقى فى السفر والغربه والبعد عن الاهل والوطن مافيش حد يقولى مصر وحشه هو لما يكون بيتك مش مترتب يبقى العيب فى البيت ولا العيب فى اصحاب البيت اللى سايبينه مش مترتب باكرهه وجودى فى هذا الزمن اللى ضاعت فيه مشاعر حلوة كتير ضاعت فيه الاحساس بالالفه وسؤال الجيرا ن على بعض او سؤال الاقارب ياتى رمضان والكل وحيد يغلق عليه بابه
وياتى العيد اللى زمان وانا طفله قبل ما تتطغى الماده على نفوس الناس كان بعد صلاه العيد بيتنا يمتلاء بالاهل والجيران يالله لكم اشتاق لهذه الايام بيتنا كان لا يخلو من الاقارب والاهل الان الاهل اما فى غربه او مشغول بالمعيشه وضنكها واللهث وراء المزيد او توفى معظمهم
انتشر الاكتئاب وكل ناس زهقانه لاننا مش لاقين قلوب تحب بعض مش لاقين ناس تسال على بعض كل يحمل همه لوحده لا يجد من يواسيه يخرجه من احزانه او يحل له مشكلته
اعشق افلام زمان وخصوصا اللى بتمثل الحارة المصريه وتلاقى لو حد عنده مشكله تلاقى الكل بجواره الفتوه دة كان شئ مهم بيدافع عن الضعيف وعلى فكرة انا اكتشفت ان الفتوة دة موجود فى الشرع واتفجات بيها موجودة فى كتاب فقه السنه للسيد سابق
ليه اصبح فيه قساوه بين الاهل وقطيعه رحم حزنى كل يوم بيزيد لان الوضع كل يوم بيسؤ
قال رسول الله صلى الله عليه وسلم
بادروا بالموت ستا (اى تمنوا الموت ) امرة السفهاء وكثره الشرط(بمعنى الشرطه ) وبيع الحكم واستخفافا بالدم وقطيعه الرحم ونشأ يتخذون
القران مزاميرا يقدمون الرجل ليغنيهم بالقران وان كان اقلهم فقها
يعنى باطن الارض ارحم من فوقها
طول عمرى ااقول انى اكرهه الفراق وانكتب عليا انى دايما افارق من احب

واضح ان فعلا اللى بيخاف من العفريت بيطلعله

خلاص هاحب الفراق ومش هاخاف منه علا وعسى يبعد عنى

فليكن بينا معاهده سلام ايها الفراق فاحبك انا ولا اخافك على ان تعاهدنى ان تكون رفيقا بىويكون بيننا هدنه

حتى استرد انفاسى واسترجع قواى التى انهكتها كثره الفراق التى اعانيها طوال حياتى