Thursday, June 14, 2007

عبدالله الثانى


معلش انا اسفه انا عارفه انى بقيت ممله قوى وبقالى كدة بكتب كذا بوست شخصى بس بجد انا حسيت انى عايزة ااقرب منكم اكتر وتعرفونى اكتر فبجد باعتذر على كميه البوستات الشخصيه دى بس البوست دة كنت لازم اكتبه لانى فرحانه قوى الحمد لله وانتم شاركتونى احزانى وكنت كئيبه قوى الفترة الماضيه فطبعا زى ما شاركتونى احزانى من حقكم تشاركونى افراحى
الحمد لله رزق اخى اليوم بولد جميل ماشاء الله عليه طبعا مش والد احمد وخالد لا اخى اللى اصغر منه وطبعا كان لازم نسميه على اسم والدى رحمه الله عليه فبقى عندنا عبدالله الثانى لان والدى اسمه عبدالله رحمه الله عليه وغفرله واسكنه الفردوس الاعلى ولاتتخيلوا مدى سعادتى بهذا الكائن الصغير الجميل وخصوصا انه اسمه عبدالله سعادتى لا توصف هو الحمد لله جاء الى الدنيا اليوم الخميس بفضل الله تعالى وانا بقى قعدت جنبه ومش قمت خالص بتامله لانه حديث عهد بربى مازال لم تلوثه الدنيا مازال رقيق ماشاء الله عليه لاتتخيلوا مدى رعبنا عندما شرق واحنا نسقيه بالمعلقه جلوكوز لانه لاتنفع الرضاعه حاليا وطبعا هو كائن رقيق واحنا طبعا لم نكن رقيقين معه فشرق مننا لا تتخيلوا قلبنا المستشفى عندنا من خضتنا بس الحمد لله ربنا ستر
عبدالله انا بحبك قوى ياريت تاخذ طيبه وكرم جدك رحمه الله عليه وايمانه وتحمله بس لا تاخذ عصبيته كفايه انا قوى اخذت عصبيته
قد ايه ربنا كريم وقد ايه عوضنا بيك وادخلت السرور الى قلوبنا شكرا ليك عبدالله على هذه البهجه التى ادخلتها على قلبى
ربنا يحميك ويبارك فيك اخى وهبك لله ارجو ان يحقق الله فيك ما يتمناه اخى لك وان تكون والدا صالحا بار
ويستخدمك يارب لنصره هذا الدين اللهم امين يارب العالمين
بجد انا هنا عندى فى البيت بيقولولى انتى بقى ليكى اسرة تانيه غيرنا قلتلهم بصراحه ايوة انا بحبهم كلهم وبجد بحس ان ليا ناس تسال عنى
من غير ما يعرفونى ولا اعرفهم وهما على فكرة غيرانين جدا ان فيه ناس تانيه اخدتنى منهم
طبعا الاسرة التانيه هى انتم مجتمع المدونيين بجد انا باعتز بيكم كلكم وقلت لازم تشاركونى فرحتى زى ما شاركتونى احزانى
جزاكم الله عنى خير الجزاء

59 comments:

Anonymous said...

الف مبروك يا رفقة وربنا يجنبه الشيطان ويارب نشوف بوست عبدالله الثالث ابنك

Anonymous said...

الف مبروك يا رفقة
وعقبالك ان شاء الله

Alaa said...

ألف ألف مبروك
بورك في الموهوب و شكرتم الواهب و رزقتم بره و بلغ أشده
ربنا ينبته نباتا حسنا ان شاء الله
و يرزقك بعبد الله انتي كمان
و لا أقولك
سميه علاء
اسمه علاء نادر اليومين دول و سعره هيغلا
هههههههه

ربنا يبارك فيكي و يحميكي

خمسة فضفضة said...

السلام عليكم ورحمة الله وبركاته

الف مليون مبروك
وحمد الله علي سلامة عبد الله الثاني

ربنا يبارك لكم فيه ويحفظه من كل سوء

عصفور المدينة said...

المقدمة بتاعة البوست غير الخاتمة خالص
يعني دوشتكم بحاجات خاصة وبعدين في الآخر انتم عائلة افتراضية لي
فعلا
بورك في الموهوب وشكرتم الواهب ورزقتم بره وبلغ أشده
وبعدين هو التوريث وصل عندكم

Reemo said...

الف مبروك
ربنا يبارك فيه ويحفظه يارب
ويخليه لوالديه
تحياتى

لحظة said...

بارك الله لاخيك فيما وهب
وشكرا وحمدا للوهاب
جعله الله قرة عين لوالديه ورزقهم بره
وجعله شابا ينشا في طاعة الله
ليكون من السبعة الذين يظلهم في ظله يوم لا ظل الا ظله
هذه دعوتي لاولادي واولاد اقاربي واولاد المسلمين جميعا
آمين

ma 3lina said...

ما شاء الله .. ما شاء الله
ألف مبارك يا رفقة والله فرحتيني بجد ..إن شاء الله يكون حاجة كبيرة كده يارب ويبارك لكم فيه وحنستنى البوست اللي تقولينا فيه إن دخل المدرسة والبوست اللي حتقولي فيه إنه اتخرج وإنه اتجوز وإنه اشتغل ...

بورك في الموهوب وشكرتم الواهب ورزقتم بره وبلغ أشده

وبعدين إنتي من حقك تكتبي حاجات خاصة بيكي عشان بعد كده ترجعي ليها وتفتكري مشاعرك لحظة كتابتها .. بتبقى ذكرى جميلة ..

Anonymous said...

بسم الله ما شاء الله

اللهم جنبه رفقة السوء وانبته في طاعتك واستخدمه في طاعتك
واجعله ذخرا للاسلام والمسلمين واهدى على يديه كثيرا من خلقك
اللهم اوسع له رزقه واتم له صحته
وارزقه من الحكمة مبلغها ومن الحلم ذروته

اللهم انه تحت رعايتك وتحت رعاية عبدة طيبة
فارزقهما من خيرك وجودك وحسنك

اللهم ارزقها بمولود بجماله ورقته
اللهم اسمعنا عنها خيرا دائما
وارزقها الزوج الصالح
امين امين
انك سميع مجيب الدعاء

اللهم انا دعوناك كما امرتنا فاستجب لنا كما وعدتنا يا ارحم الراحمين

احسن حاجة في الولد ده انو على اسمى يعني المفروض يبقى عبدالله التالت بقى


بهزر طبعا

سلام

رفقة عمر said...

كبير المتشردين
الله يبارك فيك ربنا يكرمك يااااااارب واسمع عنك دايما انك بخير
وعقبالك اللهم امين يارب العالمين

رفقة عمر said...

تحيه
سعيدة بزيارتك الاولى وبتعليقك كمان
الله يبارك فيكى ربنا يكرمك يارب

رفقة عمر said...

استاذ علاء
الله يبارك فيك ويكرمك يارب
كان نفسنا نسمى علاء بس للاسف بقى بابا مش اسمه علاء
حظنا وحش بقى تقول ايه

رفقة عمر said...

استاذى عصفور المدينه
اصل بصراحه مش احب حد يضايق منى ولا حد يزعل منى
بس بجد والله انا فعلا باعتز بيكم كلكم فعلا وهما فى البيت عارفين كل مدون واسم مدونته وكتب ايه النهاردة يعنى هما عارفينكم واحد واحد اصلا
بالنسبه للتوريث يعنى اشمعنا احنا يعنى لازم نساير الموضه احنا اب تو دايت
لازم اى جديد نتعامل معاه على طول

رفقة عمر said...

خمسه فضفضه
دايما يا دكتورة بجد بسعد بو جودك ودايما سباقه بالتهنئه ربنا يكرمك يارب ويبارك ليكى فى حياتك وزوجك واولادك اللهم امين يارب العالمين

رفقة عمر said...

ريمو
اهلا بيكى فى زيارتك الاولى واسعدنى تعليقك
ربنا يكرمك ويجازيكى كل خير اللهم امين يارب العالمين

لحظه
فرحت جدا ببوستك الاخير وفى انتظار مواضيعك واحنا كلنا اخوات وكلنا اكيد بنحب بعض وكلنا بنستفيد من بعض
وشكرا ليكى كتير على الدعوة الجميله بجد وربنا يتقبل منك يارب
جزاكى الله كل خير يارب وبرك لكى فى
اولادك وجعلهم بارين بكى يارب العالمين

اخى فى الله ماعلينا
جزاك الله خيرا على كل شئ وربنا يكرمك يارب وعقباالك ياااااارب اللهم امين يارب العالمين

رفقة عمر said...

allah-slave
لا تتخيل تعليقك بيسعدنى قد ايه وبكون سعيدة بدعواتك جدا لانى بحس انها خارجه من قلبك جد وسعيدة انك بتعتبرنى اختك وسعدت اكتر ان مدونتك فتحت تانى وطبعا سعيدة ان اسمك عبدالله ربنا يكرمك يارب وينجحك ويحقق لك كل احلامك اللهم امين وييسر لك طريق الطاعه وانزل السكينه على قلبك وملأ قلبك باليقين وشرح صدرك ونور بصيرتك اللهم امين يارب العالمين
يارب تكون عملت كويس فى الامتحانات

مـحـمـد مـفـيـد said...

بارك الله في عبد الله الصغير وجعله من يحمل لواء نصر هذه الامه

ورحم الله عبد الله الكبير وجعله مع الحبيب المصطفي في الفردوس الاعلي
اللهم أمين

الف مبروك يا عمتو رفقه

حائر في دنيا الله said...

بسم الله ما شاء الله
ربنا يكرمكم فيه وبيه


ويكون لكم ذات شأن وللأمة ذات أثر

يارب
وارزقما واياكم والمسلمين الذرية الصالحة

elbostagy2 said...

السلام عليكم ورحمة الله وبركاته

الكريمة رفقه عمر

بارك الله في الموهوب
وباعد بينه وبين الشيطان

اللهم اجعله بارا بأهله .. رفيقا بقومه .. كريما ملتزما

رزقك الله وكل بنات المسلمين بزوج صالح
وولد بار نافع

دمتم بكل ود
أسألكم الدعاء ... البوسطجي 2

Anonymous said...

بورك في الموهوب وشكرتم الواهب و رزقتم بره و بلغ أشده

أمــانــى said...

بسم الله مشاء الله
ربنا يبارك فيه ويحفظه من كل سوء يااااااارب آمـــــــــين ويكرمك يـا اختى الحبيبة يـاااااااااااارب آمـــــــــــــين

.:.-=- ELGaZaLy-=-.:. said...

الف الف الف مبروك

دة اولا وعقبالك طبعا ربنا يكرمك ويرضيكى بالخير بس تعرفى

انا اول مرة ازور مدونتك

وتعرفى حسيت فيها باية


همممممممممممممم

بصدق بجد

انتى صادقة الى حد جميل اوى

هالف شوية فى المدونة واوقلك رايي

صحيح بالنسبة لوضع نفسية المدون البوست الثالث تعرفى انى بالف سيكولوجية للتدوين

ايون بحاول وكدة

تحياتى

رينـــــــــــا said...

السلام عليكم
هو انا دايما اجى متأخرة كدا
بس المرة دى فعلا لظروف خاصه
ادعيلى

مبارك ياجميله على هذا الكائن الرقيق
ربنا يحفظه ليكم ويحميه يارب ان شاء الله
عقبالك ياجميله
ويارب نفرح بيكى قريب يارب

وبوسيلى النونو الكميل دا

Ma 3lina said...

الف مبروووووووك

بس كنا عاوزين صورته و ياريت تجيبيه نلعب بيه قصدى معاه

ربنا يبارك فيه انشاءالله
ويحفظه لوالديه

الطائر الحزين said...

السلام عليكم
بورك الموهوب وشكرت الواهب ورزقت برة وبلغ اشدة
بحسب عبد الله الثانى زى اسمة ايه الثانى واسمه دوكها الثانى
كنت قلت فى تدوينة لى لو ان لنا قلوب كالأطفال لأاصبحت جلودنا ناعمة مثلهم وحطيت بين قوسين كلمة تخاريف مش كدة
تحياتى

رفقة عمر said...

استاذ محمد مفيد
الله يبارك فيك وشكرا ليك كتير على وجودك وزيرتك مدونتى
جزاك الله كل خيرو
وبارك لك فى عبدالله مفيد وجعله بارا عطوفا بك اللهم امين يارب العالمين

رفقة عمر said...

حائر فى دنيا الله
جزاك الله خيرا وربنا يوفقك يارب ويكرمك
ويرزقك بالزوجه الصالحه والذريه الصالحه اللهم امين يارب العالمين

البوسطجى
اهلا بيك كتير مش بشوفك بتزورنى لعل المانع خير جزاك الله خيرا وربنا يكرمك يارب ورزقك بالزوجه الصالحه والذريه الصالحه اللهم امين يارب العالمين

رفقة عمر said...

الصارم الحسام
اهلا بيك سعيدة بوجودك والله يبارك فيك ورزقك الله بالزوجه الصالحه والذريه الصالحه ويكون كلهم الصارم الحسام ويستخدمهم الله لنصره هذا الدين اللهم امين يارب العالمين


امانى الطبيه
ربنا يكرمك يارب ويرزقك بالزوج الصالح والذريه الصالحه عاجلا غير اجلا اللهم امين يااااااارب العالمين

الغزالى

على فكر دى مش اول مرة تزو مدونتى دى تقريبا رابع مرة واضح ان حضرتك نسيت على العموم بتشرفنى فى اى وقت وجزاك الله خيرا على حسن ظنك بى
وربنا يوفقك ويزقك بالزوجه الصالحه والذريه الصالحه اللهم امين يارب العالمين

رفقة عمر said...

رينا
الله يبارك فيكى ويكرمك يارب وبعدين ولا متاخره ولا حاجه المهم انك جيتى وباركتى جزاك الله كل خير
وربنا ييسر لكى كل امورك ويصلح لكى الاحوال اللهم امين يارب العالمين
بس كدة هابسهولك من هنا لبكره دة احسن طلب طلبيتيه منى عقبالك يارب ويكملك على خير وربنا يرزقك بولد جميل كدة ونحتفل بيه معاكى ان شاء الله

رفقة عمر said...

دكتور ماعلينا
اهلا بيكى سعيده بو جودك الله يبارك فيكى وعقباالك يااااااااارب قريبا جدا اللهم امين يارب العالمين بالزوج الصالح الاول وبعدين الذريه الصالحه اللهم امين يارب العالمين
تعرفى كنت نفسى احط صورته بس لسه مش ليه صور ان شاء الله اول صوره ليه هانزلها تشوفوها باذن الله
عارفه انا كمان بالعب بيه وبحب اعاكسه جدا وهو بقى بيضايق ويتنرفز شكله هايطلع عصبى لا مفر


الطائر الحزين

فعلا الاطفال دول بيرفعوا اى هم عن اى حد مضايق
فيه مثل بيقول لو همك كبير حط قدامك صغير مجرد النظره ليهم وتاملهم بجد بتنسيك كل همومك واحزانك رزقك الله بالذريه الصالحه والزوجه الصالحه اللهم امين يارب العالمين

Unknown said...

دايما متأخرة انا كدة
الإحراج ده بس
:(

ألف مبرووووووووووك يا رفقتى ويارب يبارك فيه ويبقى ولد بار يارب
وابقى ادعى جمبه عشان الملايكة بقا

وعقبااااااال يااااااارب لما اشوف بوست بيقول خبر مفرح عنك انتى ياااااارب

وبعدين مافيهاش حاجة ابدا البوستات الشخصية لأن المدونة دى بتاعتك فى الفضاء البلوجرى تقولى فيه اللى انتى عايزاه وتفضفضى لينا براحتك

مبروووووووووووووك يا جميلة بجد
:D

عبدالله said...

الف مبروك يا رفقه
ربنا ينبته نبات حسنا ان شاء الله

علي العموم متوقعله مستقبل باهر علشان اسمه زي بس
:))

تحياتي

Eric Matt said...


قولي لأبيه

بورك في الموهوب وشكرت الواهب

ألف ألف مبروك

تحياتي لك من ماناساس البلد

عبدالله
ذاجرووم

:)

BinO said...

بورك في الموهوب وشكرتم الواهب ورزقتم بره وبلغ أشده
هو أنت عصبية ؟؟؟
:)
رحم الله جده

رفقة عمر said...

انسانه
ولا يهمك انا عارفه انك مشغوله ومقدرة ظروفك ربنا معاكى ويوفقك
ويحقق ليكى كل ما تتمنيه اللهم امين يارب العالمين
المهم خلصتى امتحانات ولا لسه ربنا ينجحك يارب العالمين

قلب أبيــض said...

الف مبروك
لمدونة رائعة
جزيتم خيرا
نريد منكم الزيارة

رفقة عمر said...

عبدالله
الله يبارك فيك وشكرا ليك كتير على ذوقك
اكيد طبعا اى حد اسمه عبدالله هايكون زى ما بتقول كدة كفايه انه عبدا لله سبحانه وتعالى

رفقة عمر said...

the groom
اهلا بيكى فى زيارتك الاولى وشكرا ليك كتير على تهنئتك عقبال كدة ما نهنيك قريبا جدا بالزوجه الصالحه اللهم امين يارب العالمين
وكمان اسمك عبدالله بجد شرفتنى

رفقة عمر said...

بينو
شكرا ليك كتير اخى فى الله بينو وجزاك الله كل خير لدعائك للحفيد وللجد ربنا يكرمك يارب ويوفقك فى كل حياتك ورزقت رضا الله اللهم امين يارب العالمين
بصراحه انا عصبيه وبزعل بسرعه الفانتوم ثانيه يعنى اسرع واحدة بتزعل
هو مش باين عليا ولا ايه
على فكرة فيه ناس كتير برضه مش بتصدق انى عصبيه مش عارفه ليه

ana ga3an said...

الف مبروووووووووووووووك
ربنا يبارك فية و يجعلة قرة عينة لاهلة

معلش بقالي كتير ما جتش فا دة اول بوست شوفتة و عمال افر في الباقي

رفقة عمر said...

قلب ابيض
انا باعتذر على تاخيرى فى الرد اسفه بجد مش عارفه كنت فعلا رديت بس وانا بارسل التعليق الظاهر النت فصل
على العموم نورت المدونه وربنا يكرمك يارب وشكرا على زوقك

http://kasperb4.blogspot.com/ said...

ربنا يبارك لهم فيه ويجعله ذخرا للإسلام

عقبالك ان شاء الله
:)

شباب روش طحن said...

ربنا يبارك فيه ويخلي جيته سعيدة فتكون حاته كاملة أولها طموح ومنتصفها كفاح وأخرها تأمل

ftataljanna said...

بصي بقى يا رفقه

ما تزعليش ان كومنتاتى عندك متاخرة بس بجد حكاية تجنن انى على طول متاخرة كده

يا ستي النت كان فاصل عندى والشركة طلعت عيني

فماتزعليش بقى


واما عن عبد الله الثانى فربنا يبارك لكم فيه يا رب ويبقى قرة عين لأمة وابيه

اللهم امين وعقبال ما تتجوزى يارب ويجيلك واحد زية

سكتم بكتم said...

مبروك وربنا يبارك فية يرزقة الصلاح والفلاح و أن يكون من خير الناس بأن يكون أنفع الناس للناس

.:.-=- ELGaZaLy-=-.:. said...

ايوة صحيح انا نسيت يا رفقة بجد

بس دى اول مرة بعد ما رجعت من السفر معلش كل الامور داخلة فى بعض اعتذر

Dr.khaled said...

بورك في الموهوب و شكرتم الواهب و رزقتم بره و بلغ أشده

-----------
نسأل الله أن يبارك فيه

نسرين - أمة الله said...

السلام عليكم
الواحد بيموت فى الاخبار الحلوه
يا رب يفرح قلبك دايما
الف مبروك لاخوكى على عبدلله ويارب اكرم عمت عبدلله

رفقة عمر said...

kasperb4
فتاه الجنه
شباب روش طحن
الله يبارك فيكم وجزاكم الله خيرا وعقبالكم يااااارب العالمين

رفقة عمر said...

سكتم بكتم
حمدا لله على السلامه والله يبارك فيك واشكرك على الدعوه الجميله دى ربنا يستجيب منك يارب العالمين وعقبال يارب

الغزالى
عاادى ولا يهمك بتحصل احيانا وتشرفنى فى اى وقت

د/خالد
جزاك الله خيرا على دعوتك الجميله رزقك الله بالزوجه الصالحه والذريه الصالحه اللهم امين يارب العالمين

رفقة عمر said...

نسرين امه الله
اخبارك ايه انا حبيت كل اهل الجنوب من وقت ما تعرفت على امانى
سعيدة بزيارتك الاولى وبعيد الشر عليك من الموت وربنا يفرحك يارب كمان وكمان
وعقبالك الاول بالزوج الصالح ثم بالذريه الصالحه اللهم امين يارب العالمين

ma 3lina said...

السلام عليكم ورحمة الله وبركاته

كيف حالك يارفقة وكيف حال عبد الله .. شكله شغلك عن التدوين وعن كل حاجة

هههههه . ربنا يخليه ليكوا

نفسنا said...

ندعوكم لمشاهدة العدد الثانى من مجلة نفسنا

الراقـــص مع الذئـــــاب said...

السلام عليكم
بارك الله في عبد الله الثاني وكل اولاد المسلمين
علي فكرة دا تاني مولود ارجع الاقيه الاجازة ديه
بس المولود الاول كان لواحد صاحبي عزيز عليا
وكانت بنوتة جميلة اسمها حبيبة
هروح اشوفها الناهرده ونلعب بيها...واحد صاحبنا بقي وخلف وعاوزين نفرح
ربنا يجعل فيهم البركة جميعا
الف مبروك يا رفقة
والاجازة اللي جاية إن شاء الله عاوز اسمع برضو اخبار جميلة زي جدا
1000000 بوسة لعبد الله

السلام عليكم

BinO said...

علي رأي ماعلينا
شكل عبد الله الثاني شغلكم
ربنا يحفظه

عصفور المدينة said...

استاذة رفقة لعلك بخير

رينـــــــــــا said...

السلام عليكم
انتى فين ياجميله
يارب تكونى بخير

رفقة عمر said...

ماعلينا
بينو

استاذ عصفور المدينه
رينا

جزاكم الله خيرا على السؤال انا بخير الحمد لله
ربنا يكرمكم يارب

رفقة عمر said...

الراقص مع الذئاب
حمد ا لله على السلامه
والله يبارك فيكى وعقبالك يارب بالزوجه الصالحه الاول وبعدين بالذريه الصالحه اللهم امين يارب العالمين