لاقوياء الملاحظه2..سلفنى 3 جنيه

انا ليه عملت البوست اللى فات تمهيد للبوست دة اصل حبيت تشوفوا مصر قد ايه كانت جميله وراقيه والشوارع تريح النظر والنفس طبعا كلكم اجابتكم صح انها فى مصر تحديدا الصور الاولى شارع سليمان باشا ثم قصر النيل ثم عماد الدين والصورة الاخيرة صورة البورصه المصريه زمان كان حاكم مصر فى تلك الفترة هو حاكم مسلم ولم يكن مصرى الاصل والنشأة ولكنه كان يحبها كثيراوكانت مصر مازالت تحت الخلافه العثمانيه الاسلاميه قبل ظهور كمال اتاتورك الذى قضى على الخلافه الاسلاميه فى تركيا يعنى المشكله هنا مش مشكله انه يكون حاكم من اهل البلد المشكله انه بيحكم ازاى وبيحكم بشرع الله ولا لا وهل بيحب مصلحه البلد ولا مصلحه نفسه وبس انا اخترت منطقه وسط البلد لان كل الناس تعرفها وتعلم ان هذه المبانى ما زالت شامخه لم تهتز ولم تتاثر مع انها تم بنائها من عهد الخديو اسماعيل هى وكوبرى قصر النيل وانظروا الى جمالها قبل ان تشوهها عوادم السيارات وعدم الاهتمام بصيانتها ولكنها مازالت تحتفظ بجمال الماضى انظروا الفرق بينها وبين مبانى اليوم التى تنهار من اى هزة ارضيه بسيطه انظروا الى كل الاثار الاسلاميه التى مازالت باقيه حتى الان

ايه بقى علاقه سلفنى 3 جنيه بالموضوع اتذكرون فيلم على الكسار سلفنى 3 جنيه الفيلم دة كان من التلاتينات وكان بطل الفيلم يبحث عن من يسلفه 3 جنيه ليه علشان يدفع قسط يفك بيها رهنيه البيت اللى مرهون ب20 جنيه!!!!! بيت مرهون بعشرين جنيه تخيلوا وعلى فكرة السينما كانت بتعكس واقع موجود فعلا قعدت وقلت بيت مرهون بعشرين جنيه عارفين يعنى ايه بيت بعشرين جنيه طيب لما سعر البيت عشرين جنيه يكون البيضه مثلا بكام ولا الفول بكام دة مثلا يعنى كان ببلاش بقى ولا ايه وحسبت الفارق الزمنى بين الفيلم وبين زمنا لا قيته حوالى سبعين سنه هل فى سبعين سنه ترتفع الاسعار بهذا الشكل الفظيع ايه سبب هذا مصر فى تلك الفترة كانت فى الصفوف الاولى للدول فى اشياء كثيره مع انها كانت تعتمد فقط على الزراعه لا بترول ولا صناعه ولاغيره كان الجنيه المصرى على ما سمعت من حكايات الاقدمين انه كان يساوى 3 دولار يعنى الجنيه كان اغلى من الدولار كان احسن قطن القطن المصرى احسن قمح القمح المصرى اول خط قطارات فى العالم بعد انجلترا كان فى مصر يعنى مصر تانى دوله بعد انجلترا شيوخ وعلماء مصر وقراء مصر كانوا الصفوة فى العالم الاسلامى كل حاجه كانت جميله الناس كانت جميله النفوس كانت جميله الاسره العلويه كانت مش مصريه بس كانوا بيحبوا مصر كانوا عايزنها من احسن بلاد العالم كان الملك فاروق يريد اعادة الخلافه الاسلاميه مرة اخرى ويكون مقرها فى مصرسمعت الشيخ احمد ياسين الزعيم الروحى لحركه حماس كان بيحكى عن حرب فلسطين والاسلحه الفاسدة كان بيقول الملك فاروق كان متحمس جدا لاعادة فلسطين للمسلمين تانى وكان فعلا خلاص الجيش المصرى هايدخل تل ابيب ولكنه كان يحتاج لاسلحه رفض كل العالم اعطائه سلاح اضطر يشترى الاسلحه من مخلفات الحرب العالميه فطبعا كانت كلها فقدت صلاحيتها للاستخدام يعنى مش تصدقوا انه هو السبب فى خسارتنا فى حرب فلسطين انه التاريخ المغلوط بدليل ان ربنا بالمرصاد اللى قالوا عنه انه هو السبب فى خسارتنا فى حرب فلسطين كانوا هما السبب

فى نكسه 67وفقدنا بقيه فلسطين وكمان الجولان وسيناءعلشان يعرفوا انهم لفقوا التاريخ وكذبوا علينا ودلوقتى عرفنا مين اللى بيحب مصر ومين اللى بيحب نفسه بس على فكرة كان الملك فاروق محبوب جدا وكان دايما بيشارك الناس الفقراء فى اول يوم رمضان يفطر معهم ويذهب اليهم انا سمعت كدة برضه من الاقدمين فى اسرتى يكفى ان شيخ الازهر كان مقدما على الملك فى اى مكان يجمعهما يكفى نظام الاوقاف الذى كان ريعه يخرح للمحتاجين والاعمال الخيريه دلوقتى الجنيه المصرى ولا له اى قيمه وسط بقيه العملات القطن المصرى بقى بيرجع لينا تانى القمح خلاص راحت عليه ماذا قدم لنا حكمنا اللى من دمنا قدموا لنا الفساد فى كل شئ القبح لا ارى الا كل قبيح امامى كلها عشوائيات من غير تنسيق اسمدة مسرطنه رجال اعمال فاسدون معتقلات وتعذيب ياتى العالم ليتعلم احدث طرق التعذيب عندنا قهر وذل وفقر وعنوسه الاشياء الجميله بقت نادرة جدا او مستخبيه تخشى الظهور حتى لا تكون محل نقض من الناس لانهم تعودوا على القبيح بقى فيه تلوث بيئى وتلوث سمعى وتلوث بصرى مش ملا حظين ازياد اعداد الناس اللى عندهم قصر نظر علشان الاكل طبعا مش فيه تغذيه وغير كدة ان النظر بيقوى لما العين ترى مناظر حلوه وخضرة وتناسق انا قرأت كدة فى احد المجلات يعنى ضعف نظرنا مش غريبه بسبب اننا مش شايفين اللى القبيح وبس مافيش اى مظاهر جماليه السبب ان اللى بيحكم مش راغب من الحكم غير مصلحته وبس لكن لو حكم بشرع الله الدنيا هاتفرق كتير ساعات بقول احنا اللى فاسدين ونستاهل هؤلاء الحكام ولا علشان الحكام فاسدين فانتقل الفساد لينا لان الرأس لو فسدت فسد باقى الجسد الله تعالى قال(وان احكم بينهم بما انزل الله ولا تتبع اهواءهم واحذرهم ان يفتنوك عن بعض ما انزل الله اليك فان تولوا فاعلم انما يريد الله ان يصيبهم ببعض ذنوبهم وان كثيرا من الناس لفاسقون)صدق الله العظيم

بجد انا نفسى مصر ترجع جميله تانى وناسها يرجعوا تانى لاصالتهم مفتقده الحوار الراقى بين الناس مفتقده الحب الخالى من المصالح بين الناس مفتقدة الدفء انا بحب اتفرج على افلام التلاتينات والاربعينات وبعيش معهم فى بساطتهم واسلوبهم فى الكلام الخالى من اى الفاظ غريبه لا تحب ان تسمعها الاذن ليه احنا بقينا كدة ليه وصلنا من سئ لا سوأ مش دول برضه حكام من دمنا طيب ليه مش بيحبوا مصر ومش بيحبونا ليه خربوا مصر كدة انا بحب مصر قوى ومش ممكن اعيش فى بلد تانيه غيرها وحزينه على حالها اللى وصلت اليه

ربنا يبعت ليها واحد بيحبها بجد ويرجعها ام الدنيا من تانى

الصور لمحمد على والخديو اسماعيل والملك فاروق