Wednesday, August 22, 2007

الى كل فتاه تؤمن بالله ورسوله...حجابك

فيه موضوع عارفه انا فيه ناس كتير اتكلموا فيه اول لما بدات التدوين كان موضوع الحجاب مثار وكل الدنيا بتتكلم فيه بسبب كلام وزير الثقافه عنه فقلت مالوش لازمه اتكلم فيه طالما فيه ناس كتير اتكلمت فيه لانى مش باحب اتكلم فى موضوع اتكلم فيه ناس كتير باكتفى بكلام الاخرين وخلاص لانه زى فرض الكفايه طالما واحد اتكلم فى موضوع مالوش لازمه الدنيا كلها تتكلم بس كنت على مدونه الصارم الحاسم ووجدت تعليق بيقول ان فيه ناس لسه بتذم فى الحجاب دخلت عندهم اتفجأت بالكلام واتصدمت منه طبعا مش هاقول هما مين ومش هاقول قالوا ايه
لاقيت نفسى استفزنى الكلام فقلت لازم اتكلم فى الموضوع بس مش هاتكلم عن اثبات القران والسنه للحجاب وفرضيته
لان ناس كتير اتكلمت فى الامر دة هاتكلم عنه بطريقتهم فى التفكير لانهم بيحبوا يمنطقوا كل حاجه وبيحبوا استخدام العقل والكلام دة مجرد وجهه نظرى
ليه اصلا الحجاب مهم بالنسبه للمرأه بدايه كدة هاسال سؤال بسيط للرجل المتزوج كيف تحب ان ترى زوجتك وهى فى البيت هل تحب ان تراه لابسه طرحه ولابسه عبايه باكمام طويله ولا ترى منها اى شئ ام تحب ان ترى زوجتك فى كامل زينتها وفى احسن ملابس وياريت لو ملابس تظهر جمالها
هاتكون سعيد بيها قوى وهى عامله فى نفسها كدة فى البيت علشان تتمتع بيها و بالنظر اليها دة حقك لانها زوجتك
يعنى الرجل يستمتع بالمراه ويفتن بها لما تكون فى كامل زينتها طيب اللى بيطالب المرأه بالتحرر من الحجاب انت عارف ان نواياك سيئه لانك تريد تستمتع برؤيه المرأة سافره وتستبيح لنفسك كل النساء انك تريد متعتك انت فقط انك من اعوان الشيطان تشجع المرأة لرغباتك الشخصيه فقط
سؤال للمراه بالله عليكى انت لما بتخرجى وتتزينى وتذهبى الى الكوافير وتلبسى الملابس الفاضحه على راى انيس منصور ان فتاه اليوم بتلبس ملابس وهى خارج البيت كانت تستحى امها تلبسه فى غرفه النوم شوفى مين بيقول الكلام انيس منصور وانتم عارفين انيس منصور ولا متدين ولا شيخ نرجع للسؤال ليه بتخرجى بالمنظر دة اوعى تقولى علشان نفسك مش هانضحك على بعض انتى بتتزين كدة علشان تلفتى نظر الرجال اليكى
قال الشيخ الشعراوى مرة ان المرأه اللى بتخرج فى كامل زينتها تلح على الرجل لينظر اليها بتقوله بص يا اعمى دة كلام الشيخ الشعراوى يعنى انتى بتتزين ليستمتع بكى الرجال مهما تقوليلى انا على خلق وباصلى متفقه معاكى ولا اعيب على خلقك اى شئ بس ايه ذنب انسان لا يستطيع الزواج ولا يستطيع الوصول اليك ان تفتنيه وتسببى فى افسادة هاتقوليلى ربنا قال غضوا البصر يبقى هو يغض بصرة بيبص ليه طيب ياللى بتقولى ربنا قال طيب ليه انت مش سمعتى كلام ربنا وغطيتى نفسك ورحمتى الشباب من الفتنه
انتى مش عارفه انك لما تخرجى كدة وكل انسان يفتن بيكى يبقى دة بيزيد فى عداد سيائتك وبتحملى وزره
انت مش عارفه ان الرجل غير المرأه الرجل بيفتن بالمراه ايا كانت لكن المراه تفتن بالكلمه الحلوة
اضافه بسيطه(عارفه لو فتن بكى انسان ملتزم وعارف ربنا هايكتم فى نفسه خوفا من الله لكن لو واحد مش ملتزم ولا يعرف ربنا هايخطف اى طفله ويغتصبها لانه مش قادر عليكى ولكنه هايقدر على طفله لا حول لها ولا قوة او اضعف الايمان هايتحرش باى بنت تقابله ليفرغ الشحنه التى اتشحنها بسببك ) عرفتى بقى سبب التحرش والاغتصاب وخالى بالك هاتشاركيه الاثم لانك كنت السبب فى اثارته وجعله يقوم بهذه الجريمه يعنى المفروض تتحاكمى معه لانك مشاركه فى الجريمه
انت مش عارفه انك ممكن تجعلى رجل يبغض زوجته بسببك لانها اكيد فى البيت مش هاتكون فى كامل زينتها مثلك يبقى انتى كدة تسببت فى خراب بيت وزاد عداد سيئاتك اذا كنت يعنى مهتمه بالحسنات والسيئات
ام اذا كنت غير مهتمه ومش فارق معاكى فاعملى اللى انتى عايزاه بس لازم تعرفى حاجه زى ما فتنتى رجل وجعلتيه يبغض زوجته ربنا هايسلط عليكى نفس اللى عملتيه فى غيرك وزوجك هايفتن بواحدة تانيه غيرك
لانه تزوجك فى الاول علشان شكلك ومظهرك فلما يزهق منك هايدور على شكل تانى وهايلاقى بسهوله جدا
بالنسبه للرجل اللى بيترك ابنته او زوجته او اخته تخرج بهذا الشكل ولا يغار عليه عارفين الرسول قال ايه عن الرجل الذى لا يغار على اهل بيته انه ديوث والديوث لا يدخل الجنه مش انا اللى بقول دة الرسول صلى الله عليه وسلم اللى بيقول مثلا واحدة تقول نفسى اتحجب بس مش قادرة انت لو مؤمنه بالله ورسوله والحساب هاتنفذى الامر فورا انت لو قال ليكى مديرك افعلى كذا لاما اذا لم تفعليه هاتتجازى واذا فعلتيه هايكون لكى حوافز تفتكرى هاتنفذى الامر من غير تفكير ولا لا طيب ليه بتفكرى كتير فى اوامر ربنا هاتقولى مش قادرة طيب انتى احسن من حلا شيحه ولا حنان ترك ولا رانيا علوانى اللى تركوا الشهرة واللبس المبهر علشان ربنا انتى تكونى ايه جنب شهرتهم وعلى فكرة هما ولا كبار فى السن ولا مرضى عارفه حنان ترك اتطلقت من زوجها بسبب الحجاب لانه رافض حجابها نيجى بقى للى لبست الحجاب ومش حجاب الحجاب مش مجرد قطعه قماش تضعيها على راسك انتى عارفه شروط الحجاب انه يكون سابغ يعنى مغطى الجسم كله لا يشف ولا يصف ولا يكون زينه
يعنى ولا بنطلون ضيق يصف جسمك ولا بادى مش عارفه لبستيه ازاى اصلا ولا 15 كيلو ميكياج على وجهك
ولا برفان زاعق يشمه الناس على بعد كيلو متر مربع طالما اتحجبتى يبقى التزمى الرسول قال علمت فالزم
يعنى طالما عرفتى الحجاب يبقى لازم تلتزمى بضوابطه والا انا افضل تشيلى قطعه القماش اللى ما لهاش اى لازمه نهائى وخليكى من غير حجاب علشان لا تنحسبى على المحجبات وتكونى حجه للعلمانين على المحجبات
طبعا فيه ناس بتقول ان الرقى والتقدم فى السفور طيب حنان ترك وحلا شيحه دول مش المفروض من المجتمع الراقى وصفوة المجتمع طيب اتحجبوا ليه اصلا طالما ان الحجاب ضد الرقى هاتقولى عليا انى معقدة ولا متخلفه او اتحجبت لظروف خاصه اوانضغط عليا علشان اتحجب الحمد لله اتحجبت وانا فى سنه تانيه ثانوى والحمد لله كنت متفوقه محبوبه من مدرسين ومعظم بنات المدرسه كانوا صديقاتى وكنت محبوبه منهم جدا اصغر واحدة فى اخواتى والحمد لله اسرتى مترابطه جدا وبنحب بعض بفضل الله ولا اعانى اى مشاكل فى شعرى لاحسن حد يقول انى اتحجبت علشان عندى مشاكل مع شعرى ولا حاجه امى اتحجبت بعد زواج اختى الكبيره واخواتى فيه اللى اتحجب بعد الزواج وفيه اللى اتحجب بعد الجامعه يعنى الحمد لله ولا كنت بمر بظروف سيئه
ولا حاجه ولكنى عندما عرفت الامر بالحجاب الحمد لله ارتديته مع ان كان كل صحباتى كانوا مش محجبات والحمد لله ربنا من عليا ان فيه ناس منهم تشجعوا وارتدوا الحجاب بفضل الله والحمد لله مازلت ارتديه ولم افكر يوم فى عدم ارتدائه ربنا يديمها عليا نعمه اللهم امين الحمد لله لا يعوقنى فى اى شئ نهائى بالعكس انا كنت الاول لما امشى فى الشارع مع صديقاتى لان كان حجابى كان حجاب امريكانى يعنى كان ملفت فى الاول كنت بامشى مرووشه خايفه حد يقرب منى ويعمل اى حركه مش لطيفه لما لبست العبايه ( الحجاب بضوابطه الشرعيه) لا اجد الا كل احترام ومعامله طيبه بفضل الله يعنى انا واحدة زيكم مش من المريخ ولا حاجه باروح النادى وبتعامل مع النت ومش متخلفه ولا حاجه وفيه بنات صديقاتى منتقبات برضه حياتهم طبيعيه ولا يعوقها اى شئ نهائى
فكرى كدة اختى وراجعى نفسك هل اشيائك الثمينه تتركينها فى العراء ام تخافين عليها وتبعديها عن عيون الناس هكذا انت جوهرة ثمينه يريد الاسلام حمايتك من الاخرين هل تاكلين الحلوى المكشوفه اما تاكلين الحلوى المتغلفه شوفتى الشئ المغلف بيكون محمى من التلوث ليه ترخصى نفسك ويكون جسمك مستباح لكل الناس الا تعلمين انه يستمتع بكى الكناس والغفير وغيرهم وغيرهم وطبعا ببلاش من غير ما يدفع ولا مليم الله اكرمك وجعلك حرة لا تباعين فى سوق الرقيق ليه مصره تكون جاريه ليه مصرة تظهرى ان جمال المرأه فى الشكل فقط والزينه لا المرأة افضل من كدة بكتيرواهم من ان تنحصر فى الشكل الخارجى
اخيرا كلامى الى كل فتاه تؤمن بالله ورسوله وكتابه هل عندك شك ان الله لايريد بك الخير المفروض لما الله ورسوله يقولوا امر نقول نحن سمعنا واطعنا ولا حتى نفكر مجرد تفكير فى الامر هل تشكين فيمن كان يرزقك وانت جنين فى بطن امك انه لا يريد لك الخير عندما امرك بالحجاب لازم تاخدى كل اوامر الله من غير تفكير ولا تردد كما تثقين فى دكتور التخسيس وتاخدى كلامه وانتى مستسلمه تماما ليه مش بتاخدى اوامر الله بنفس الطريقه بالاستسلام التام للامر

هدانا الله واياكى الى سواء السبيل ورزقنا حسن الاتباع

اللهم اجعلنا من الذين يستمعون القول فيتبعون احسنه

اللهم ارزقنا الاخلاص فى القول والعمل

موضوع مرتبط بهذا البوست على
مدونه حائر فى دنيا الله

ايضا عند الباشمهندس ماعلينا موضوع

33 comments:

آلام وآمال said...

دايما بسأل نفسي السؤال ده والله .. ليه البنت ترضى انها تخرج من بيتها لابسة من غير هدوم زي ما بيقولوا يعني والله حاجة فعلا تخلي الواحد ايمانه بربنا يزيد
ايوة فعلا بيزيد ايماني بربنا لما يزيد يقيني بالآية الكريمة

وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لَا يَهْتَدُونَ

هو تزيين الشيطان لها اللي اعماها عن منظرها المقزز ده
وزي ما انتي قلتي ان من اسباب خروجها بالمنظر ده هو لفت النظر ليها وبعض البنات ربنا يهديهم فاكرين انهم كده بيسارعو ف جلب ابن الحلال ( المغفل ولا مؤاخذة يعني ) لأن لو انسان عندو ذرة كرامة وشهامة مش ممكن يفكر انه يرتبط بواحدة تسمح لنفسها انها تتعرى وتظهر مفاتنها للبشر
والله الواحد بيشوف بعينه مناظر شباب وفتيات بيخرجو مع بعض سواء كانو مخطوبين او العكس او حتى لو واحد وزوجته والله الواحد بيحزن بجد على الرجولة والكرامة
ربنا يعافينا ويرزقنا ببنت الحلال العفيفة اللي تكون خاجة من بيت مسلم بجد ويكون اللي مربيها راجل فعلا مش لا مؤاخذة ديوث

اسف للتطويل لكن الموضوع بجد مستفز وربنا يهدينا جميعا

كبير المتشردين said...

رجعت يا ستي اهو وبجد بجد يا رفقة عرفت قد ايه انتي وفية جدا وجدعة جدا جدا جدا وعرفت انك اختي بجد
مش هعلق علي الموضوع ده والي قبله غير بحاجة بسيطة اووووووووووووووووي
طلب من ربنا وعارف ان الله اكبر هقول يارب يجعل موضوعك ده سبب انه يجمعك بوالدك في الجنة لان عارف ان وعد ربنا حق وعارف ان عمل ابن ادم لا ينقطع من ولد صالح يدعو له وقد تركك خلفه ربنا يجزيه عنك وعن اخواتك خير يا رب ويجله مصيره ومصيرك الجنة

ربيــع said...

يارب يهدي الجميع
والحمد لله في صحوة موجودة
بس ياريت تكون صح زي مبتقولي
وشهر الغفران بعد أيام
أتمنى أن يكون سبب في عودة الناس للدين الصحيح
والاستمرار عليه

رفقة
جزاكي الله خير انتي وكل الي اتكلموا في الموضوع

أمــانــى said...

رفقـــتى
الحجاب سبحان الله هبه ربانية والله اللى تعرف قيمته استحالة تقدر تغيره
لانه بيكون شئ أساسى ربنا يكرمنا ونلبس الحجاب اللى مفروض يكون واللى يكون خالى من اى زينة ويكون هو الزى الرسمى للبنات المسلمات ياااارب آمــــــــين ونتحدى به الدنيا كله ويكون حجة لنا وليس علينا يااااااااااااارب آمـــــــــين

عصفور المدينة said...

جزاك الله خيرا

ma_3alina said...

هما بيحاولوا يمنطقوا دعوتهم لخلع الحجاب ؟؟

أنا بحاول اوصل لأي منطق في كلامهم مش لاقي .. بيقولوا ضد تقدم المرأة .. إزاي مش عارف .. إزاي تبقى الهدوم عائق في تحقيق الطموح

كلامهم كله فارغ من أي مضمون أو هدف أو منطق .. ومفيش سبب مقنع واحد لسعيهم إن المرأة لازم شعرها يبقى باين ..

جزاكي الله خيرا يارفقة على تذكير أخواتك .. وربنا ينفع بكلماتك

واحد من الناس said...

جزاكي الله خيرا ورزقك الإخلاص في القول و العمل
للأسف الشديد ان عدد كبير من المحجبات محجبات بحكم العاده و المحيط الخارجي
وبذلك يحسبو على المحجبات رغم بعدهم كل البعد عن الحجاب
فالحجاب هو حجب الفتنه اي كان نوعها
فالحجاب يشبه الفلتر يزيل كل شيء ضار للمجتمع ذكوره و اناثه
فالصوت الفاتنيجب ان يحجب منه الفتنه
و الجسد الفاتن يجب ان يغطى وليس اظهار تضاريسه
والسلوك المائع يحجب
الخ
وهكذا فلا يخرج من المراه الا كل ما هو طيب في صالحها او صالح المجتمع

وربنا يهدي الجميع

http://1minelnas.blogspot.com/

الراقص مع الذئاب said...

السلام عليكم ورحمة الله وبركاته
سلمت يمينك يا رفقة
انا لاحظت المرة ديه لما رجعت ان معظم
المدونات بتتكلم عن الحجاب
وان في ناس بتهاجم الحجاب تاني
هما لسا معرفوش اللي حصل قبل كدا
هما لسا معرفوش ان البنت المحجبة (حجاب شرعي) غالية علينا اد ايه؟؟
هما لسا معرفوش ان مفيش بنت هتخلع حجباها بعد ما لبسته والعكس هو اللي بيحصل

هم ثلة قذرة من الناعقين..دعوهم ولا تستمعوا اليهم

وجزاكم الله خيرا وزداكم الله عفة وطهر

حامد said...

جزاك الله خيرا..

رفقة عمر said...

الام وامال
طبعا كلامك كله صح
عارف لو حد سمعك منهم هايقولوا عليك معقد وتلاقيه مش لاقى تعمل زينا وهايقولوا اللى غيرنا منا يعمل زينا
وفعلا زين لهم الشيطان سؤ اعمالهم

هدانا الله الى سواء السبيل وجنبنا الفواحش ماظهر منها ومابطن


**********
كبير المتشردين
حمدالله على سلامتك
سعيدة بعودتك جدا وجزاك الله خيرا على كلامك الذى لا استحقه
وربنا يستجيب منك اللهم امين يارب العالمين
ولك بمثل اللهم امين


********

ربيع

اهلا بيكى
جزانا الله واياك
منورانى

**************
امانى الطيبه

عارفه حديث الرسول صلى الله عليه وسلم
ان لم تستح فافعل ما شئت واعتقد البنت الى بتخرج بمنظر غير لائق اعتقد انها ليس لديها اى حياء
والحياء شعبه من شعب الايمان



*************
استاذى عصفور المدينه
جزانا الله واياك وبارك في حضرتك وفى علمك وافاد بك المسلمين اللهم امين يارب العالمين


**************

باشمهندس ماعلينا
عارف بقول باشمهندس ليه عرفت قيمتها قوى بسبب عمليه الاختراق التى حدثت للمدونه وطبعا دة لا يكون الا من خبره المهندسين

بالنسبه للموضوع ياريت تيجى على الشعر بس يهون والله لو على الشعر انت مش شايف اللبس بقى ازاى بجد انا بانكسف لهم والله
ربنا يهدينا ويهديهم اللهم امين يارب العالمين


**************

واحد من الناس
اهلا بيك الغيبه طويله قوى حمدالله على سلامتك
ربنا يستجب منك
طبعا كلامك صح وياريت الناس تفهم المقصود الحقيقى من الحجاب لانه يشمل حاجات كتير قوى مش مجرد رداء وخلاص


************
الراقص مع الذئاب

حمد الله على السلامه انا سعيدة قوى اليوم عودة الغائبين البوست دة هايكون مهم عندى
لانه شاهد عودة كبير المشردين وعودة الراقص مع الذئاب وعودة واحد من الناس
يارب دايما كدة متواجدين
ومشرفنى
ربنا يرحمنا من هؤلاء اعوان الشيطان الذين يريدون ان تشيع الفاحشه
فينا
جزانا الله واياكم ربنا يكرمك يارب

**************

استاذ حامد

اهلا بحضرتك كتير بيسعدنى تواجدك وزيارتك بتدخل السرور على
جزانا الله واياكم

حـريــة الــفـكــر والابــداع said...

والله اجمل بنت بشوفها فى نظرى البنت المحجبة
بحس بادب متتناهى واخلاق عظيمة
وكمان الحجاب موجود فى كل الديانات السماوية

Future_Preacher said...

السلام عليكم و رحمة الله و بركاااااته
رفقة
بل
رقّة
أولا : سامحيني ان تعليقي جه متأخر مش علي الموضوع لكن انا كنت عاوزة اقولك حمد الله علي السلامة من زمان و الله لكن مع الاسف بالكاد بلاقي وقت ادخل فيه ع النت لأن البيت عندي محتاس و الكمبيوتر متعرفلوش شاشة من كيبورد فمبصدّق ييجي الليل علشان أشحت اللاب توب من اخويا بعد مبيخلص شغله من عليه علشان اعرف افتح نافذتي علي عالمي الجميل وهو التدوين اللي بقابل فيه ناس أمثالك بشعر ناحيتهم انهم وجودهم مهم جدا في حياتي واني محظوظة اني عرفتهم ولو من بعيد لبعيد
ثانيا : عود أحمد يا رقتنا
عودة قوية و بجد جزاكي الله كل خير و يارب يجعله في ميزان حسناتك
حقيقي كلامك مُكمل لما قيل قبل كده لأن في ناس فعلا لما تقوليلها ربنا بيقول و الرسول بيقول بيسدوا اذانهم لانهم بيعتقدوا ان مدام الكلام بقي من ناحية الدين يبقي الدنيا حتسوَّد في وشهم
فلازم يكون اسلوبنا الدعوي له ابعاد كتير من جميع ما تشتمل عليه الحياة و ما تشتمل عليه افكار الناس و عقلياتهم

تصدقي والله يارفقة انا اتحجبت و انا في تانية اعدادي و عن اقتناع تام مني بعد امي ما كلمتني و ابي عن الموضوع ده و قد ايه لاقيت راحة نفسية في الحجاب رغم اني كنت وقتها صغيرة في نظر كثير ممن حولي وواجهت حاجات كتير من زملائي في المدرسة خصوصا اننا كنا مدرسة مختلطة و كمان لغات فمتفزلكين قوي و معتبرين اني كده حبقي متأخرة عنهم كتير لكن الحمد لله ما لبثوا الا ان تحولت نظرتهم بعد معاملتي لهم ما اثيتت اني متحضرة و الحجاب ما زادني الا تحضر و كل خير
وفي اللي كانوا يقولولي حد يعمل في نفسه كده ...لييييه حررااام عليكي تدفني شعرك
وكأن مفيش حاجة يعني اسمها اتحجب علشان ربنا
طب ماهو ربنا اللي خلقلي شعري و الحمد لله مفيهوش مشاكل قوم استخدمه انا في ما لا يرضي الله و كأني كده بشكره علي نعمته دي
الكلام يطول والله في الموضوع خصوصا ان التجارب كتير
بس الحق يقال انك احسنتي في كلامك و أسأل الله ان ينفع به و يكون سببا في تأثر من لم تلحق بعد بركب الصالحات أمثالك
حقيقي يا بخت والدك بيكي اكيد هو سعيد بيكي لأنك أكيد من عمله الصالح في الدنيا
بارك الله فيكي

Anonymous said...

جزاكي الله كل خير .. وربنا يبارك فيكي

ftataljanna said...

رفقتى

معلش اتاخرت عليكي اوى
بس بجد مشغوله اوى الفترة اللى فاتت حتى بعد ما الجهاز اتصلح

ان شاء الله اكمل بقيت مواضيعك

انا قريت الموضوع ده وجزاك الله خيرا كثيرا وجعله هو واى عمل يتبنى عليه من اى بنت فى ميزان حسناتك بس أمانه عليكي ادعى لاى بنت تقراه بالهداية وان ربنا يقوي عزيمتها علشان تصلح من حال نفسها

ربنا يهدي الجميع
انى احبك فى الله واتمنى ان يجمعنى الله بكى فى الجنة يا رب اللهم امين

ده لو دخلتها :)

مؤمنه said...

السلام عليكم ورحمة الله وبركاته
الله الله عليكى لا فضفوك جزاك الله كل خير على هذا الموضوع المثمر اهى دى الدونات الى الواحد بيدخلها بيكون عارف ان هو مش هيضيع وقت
وفقك الله وجعل عملك هذا من المقبول وانفع به الامه والسلام عليكم ورحمة الله وبركاته

allah-slave said...

بسم الله ما شاء الله
كلام في الصميم ...
كان نفسي يبقى ليا علاقات ببنات عشان اكلمهم بنفس طريقتك دي

بس طبعا يا هتقلى انت مالك
يا هتقلى ان مبسوطة كدة
يا اما واحد تانى هيفتكر انى بتكلم معاها كدة عشان اظبطها زي ما بيقولوا

يعني في بنت معايا في الدفعة محجبة حجاب حركنش خالص
يعني لابسة حجاب بس الجيبة ضيقة والمكياج مالى الوش وهكذا
وانا بامانة دايما برجع الموضوع ده للبيت
بالرغم من ان فيه بنات بتنشأ نشأة صالحة في ظل بيوت منفتة بس بردو لو كان ليا اخت في يوم من الايام كنت هفرض عليها انها تلبس لبس غير ملفت
وهيا بقى تبقى تختا الوقت اللى تلبس فيه الحجاب بمعرفتها


شكرا يا رفقة الدين والدنيا :):)

رفقة عمر said...

حريه الفكر والراى
اهلا بحضرتك
شرفتنى
وكلام حضرتك صح فعلا
ان الحجاب موجود فى كل الديانات

رفقة عمر said...

داعيه المستقبل
وحشتينى بجد
وخير البيت عندكم فيه ايه
ربنا يكرمك على كلامك الجميل الذى لا استحقه
وانا اغبطك انك سبقتينى فى ارتدائك للحجاب فرق سنتين يفرقوا كتير عند ربنا
ربنا يثبتك ويكرمك يارب
بجد اسعدتنى جدا بتعليقك وحكايه حجابك
تقبل الله منك وجعلك من عبادة الصالحين وجمعنا الله وايكى على محبته وربنا يرزق جميع بنات المسلمين الهدايه للحجاب اللهم امين يارب العالمين

رفقة عمر said...

مجهول
جزانا الله واياك
**************

فتاه الجنه

اخبارك ايه وحشتينى
ربنا يهدينا جميعا كلنامحتتاجين لهدايه ربنا احنا لسه مقصرين كتير فى حق ربنا
وربنا يتقبل منك ويجعلنا من اهل طاعته الذين يستحقون جنته اللهم امين يارب العالمين

رفقة عمر said...

مؤمنه

بتحرجينى يكلامك والله وفى الاول والاخر دة فضل من الله
ربنا هو اللى بيجرى الكلام على لسانى وليس لى فضل فى اى شئ ربنا ينفع بيه بس
وعلا وعسى اخواتنا يقتنعوا بالكلام
ويكون مفيد لهم اللهم امين يارب العالمين
ربنا يكرمك ويبارك فيكى يارب

رفقة عمر said...

عبدالله

اولا الف مبروك لاخوك وعقبالك يااااارب اللهم امين يارب العالمين
فعلا ياعبدالله الحجاب مش مجرد قطعه قماش البسها على راسى
المهم انها تدارى مفاتن جسمها
واكيد لازم يكون الحجاب عن اقتناع وحب علشان تعرف حدوده كويس ومتطالبته منها
وبعدين ما انت عندك اخت اهو هو انا مش اختك برضه ولا ايه
ربنا يكرمك عبدالله ويجازيك كل خير

Fedaa AL Eslam said...

جزاكى الله خيرا على البوست ده

وفعلا انتى معاكى حق فى كل الى بتقوليه

المشكله ان البنات مش راصيه تفهم ان الحجاب ده فرض على المسلمات فرض ولازم تنفذه ملهاش اختيار فيه

لا والكلمه الى تنرفز اوى لما اقتنع بيه الاول

يعنى ايه تقتنعى بيه كأنك بتقولى لاكلامك يا رب مش صح وانا مش مقتنعه

استغفر الله العلى العظيم
ربنا يهدى الجميع يا رب ويرحمنا احنا وكل المسلمين والمسلمات

أُكتب بالرصاص said...

معنديش غير


جزاك الله خيرا



اوفيت

محمد الجرايحى said...

الأخت الفاضلة : رفقة عمر
السلام عليكم ورحمة الله وبركاته
أحييك على هذا الطرح الطيب والقيم والذى شعرت وانا اقرأه أنه يخرج من قلب صادق يريد الخير للجميع
بارك الله فيك واعزك
أخوك
محمد

البنت الشلبية said...

جزاك الله كل خير عنا
انتى كلامك بجد دخل عقلى وقلبى وربنا يعلم
محستش بالتشدد فى كلامك وده الى خلانى اكمل قراية البوست
انا فعلا محتاجة اغير من شكلى و انتى اديتنى دفعة تشجيع
شكرا ليكى

رفقة عمر said...

فدا الاسلام
اخبارك ايه منورانى
عارفه كل انسان بيجادل فى اوامر ربنا لازم تعرفى ان العقيدة عنده فيها نقص عفانا الله مما ابتلى بيه غيرنا
لان الانسان اللى على يقين بوجود الله وان الله يريد الله به الخير
كان نفذ اوامر الله فورا
فيه مقوله بتقول كن مع اوامر الله كما البيت بين يدى مغسلينه مستسلما تماما
اللهم اجعلنا عبيد احسان لا عبيد امتحان
اللهم جنبنا الفتن ما ظهر منها وما بطن
اللهم انا نعوذ بك من مضللات الفتن
اللهم يا مقلب القلوب ثبت قلبى على دينك اللهم امين يارب العالمين

رفقة عمر said...

اكتب بالرصاص

اهلا بحضرتك زيارتك اسعدتنى كثيرا
وجزاك الله خيرا
ربنا يبارك في حضرتك ويكرمك يارب العالمين

**********

استاذ محمد الجرايحى

اهل بحضرتك بزيارتك الاولى شرفتنى
وجزاك الله خيرا على كلامك الذى لا استحقه
جزاك الله خيرا

رفقة عمر said...

البنت الشلبيه

كلامك اسعدنى كتيييييير فوق ما انتى تتخيلى ربنا يثبتك يارب اللهم امين
وعلى فكرة مش الكلام الى بياثر القلوب الطيبه هى بس التى تتلقى اى كلام ويؤثر فيها
لكن هناك قلوب لا يؤثر فيها اى كلام
وبدليل ان فيه ناس لم تؤمن بالرسول صلى الله عليه وسلم وكانت قلوبهم غليظه رفض اى موعظه وهدايه وكان مين للى بيتكلم الرسول عليه افضل الصلوت والتسليم
وقد اوتى جوامع الكلم
ربنا يكرمك يارب ويثبتك ويسر لك طريق الخير اللهم امين يارب العالمين

قوت القلوب said...

السلام عليكم..

ازيك يا رفقة؟؟

انا بقرأ مواضيعك..بس مش برد

انا اسفة اني اتاخرت في الرد عليكي..

المهم

الموضوع بتاعك مهم جدا والله..والواحد مش عارف الناس ايه اللي جرالها

الكل بقت هماه المظاهر وبس..والناس خدتها الدنيا ومبقتش تفكر باي حاجة

بس الرسول صلى الله عليه وسلم قال اذا لم تستحي فافعل ما شئت..والناس دي فعلا فقدت حيائها لذلك مش هاممهم اللي هما بيعملوه

والاهل هما اللي عليهم المسئولية دي..انا كنت عايشة في السعودية..وكان لبسي كله بناطيل عشان هناك الجو مقفول وكلنا بنبقى بنات لو رحنا في مكان مقفول او حاجة..فاما اتحجبت قالتلي هتشوفي في مصر كتير وبنات لابسة بناطيل بس احنا ملناش دعوة بالناس دي..والبسي اللي انتي عاوزاه في البيت..لكن في الخروج في الشارع هتلبسي جيبات..وفعلا الحمد لله ملتزمة في لبسي..

فالمفروض الاهل يعملوا كده مع اولادهم..لكن للاسف الاب والام بيبقوا بعيدين عن الاولاد ومش بيهتموا باي حاجة

وربنا يهدي الجميع ياارب

ويجزيكي كل خير ويهون عليكي احزانك ويرزقك بالزوج الصالح اللي يسعدك في الدنيا والاخرة..اللهم آميييييين يااارب

رينـــــــــــا said...

السلام عليكم
ماشاء الله عليكى مفيش كلام يتقال بعد كلامك ابدا غير
انى احبك فى الله
ربنا يثبتك يارب ويهدينا اجمعين ان شاء الله

رفقة عمر said...

قوت القلوب
اخبارك ايه يارب تكونى بخير وحشتينى جدا
ربنا يزيدك هدايه وعفه اللهم امين يارب العالمين
وجزاكى الله خيرا على دعائك الجميل

*********
رينااااااا
انتى فين وليه قافله المدونه
يارب يكون خير
وانا كمان احبك فى الله ربنا يكرمك ويقدر لك الخير
ويرزقك بالذريه الصالحه زيبارك لكى فى زوجك ويبعد عنكم الشيطان
اللهم امين يارب العالمين

الطائر الحزين said...

بارك الله فيك

ما وصلنا اليه ليس عن طريق المصادفة انها مراحل تسلم كل مرحلة لأخرى بتخطيط واع بدءاً من التحرر والقهر الواقع على المراءة الى الذى يحدث فى الشوراع والاعلام

تحياتى ليكى فعلا
بارك الله فيك
اعتذر مرة أخرى على التأخير

صانعة الحرية said...

السلام عليكم ورحمة الله وبركاته
حبيبتى رفقة عمر مدونتك رائعه ما شاء الله عليها ربنا يعزك يا رب ويستخدمك فى نصرة دينه والموضوع جميييييل والحجاب بفضل الله انتشر جدا ربنا يهدى الكل
وانا سعيده ان بقى فى مدونه بتجمعنى بيكى