Wednesday, August 29, 2007

لماذا كل هذا الحزن

على مدونه حائر فى دنيا الله قرات تعليق بيقول ان رئيس مصر حسنى مبارك مات
يوم 23 اغسطس ومكتمين الخبر حسيت احساس بالحزن فظييييع وبكيت وزادت نبضات قلبى وجريت على التلفزيون لا بحث على القنوات الاخباريه هل الخبر مؤكد ام اشاعه سبحان الله استغربت قوى انا ليه حزنت قوى كدة قلت معقوله حسنى مبارك مات وخصوصا انى شوفت رؤيه من اسبوعين وانا والله لا افكر فى حسنى ولا تشغلنى السياسه نهائى لانى شايفه انه مافيش فايدة ايوة عملوا احزاب وجرايد معارضه بس بجد هو فيه حاجه تغيرت فعلشان كدة مش بحب السياسه نهائى حتى المدونات اللى بتتكلم فى السياسه مش بحاول ادخلها نهائى لان علشان الدنيا تتغير من حولينا لازم احنا نتغير الاول الرسول صلى الله عليه وسلم لما نزلت الرساله نظم نفوس الناس الاول وبعد كدة نظم الدوله مش قام وقال لاهل مكه ولقريش انا عايز اغير فى الاحكام والاعراف االى اتعودوا عليها لا لما هذب النفوس استقبلت كل احكام جديدة وقامت الدوله الاسلاميه بنفوس متقبله اى شرع وسياسه جديدة دة الشئ الكويس بقى نادر لدرجه ان الناس بستغرب لما تجد احد صالح وامين كما حدث مع العمال الامناء اللى ذكرهم كل من استاذ عصفور المد ينه وبينو وداعيه المستقبل يعنى المهم نغير نفسنا الاولى علشان نعرف نغيرالسياسه لان هايكون رجال السياسه وقتها منكم ناس صالحين وهايستجيبوا لرغابتكم طالما ترضى الله ولمصلحه الناس ( لايغير الله ما بقوم حتى يغيروا ما بانفسهم ) اعود للرؤيه رايت ان احد ما يقول لى حسنى مبارك لن يتعدى الثمانين عام وهايموت عند حلوله الثمانين وهايموت مريضا وليس مقتولا وهاتحدث فوضى فى البلد ووقتها الناس هاتقول احنا عايزين جمال مبارك وهايمسك جمال مبارك الحكم والله العظيم انا شوفت الرؤيا كدة وانا لاتفرق معى مين يحكمنا اصلا لانى بصراحه اريد حكم اسلامى ياتى باختيار مجموعه من الاشخاص يتوسم فيهم الخبره والتقوى والامانه عن طريق مجموعه من العلماء ويقومون باختيار واحد من هؤلاء الاشخاص وليس واحد يرشح نفسه مين قاله انه يستحق انه يحكم اوجدير بالحكم اصلا المهم ربطت الرؤيا بخبر الوفاة واستغربت ليه حزنت يمكن علشان خلاص اتعودت على وجودة طول عمرى لم اجد احد غيره رئيسا لبلدى طفولتى ومراهقتى وشبابى كبرت وهو من اجده امامى اتعودت على وجوده مع كرهى لافعاله وللحال اللى وصلت عليه البلد من تردى فى كل شئ اخلاقيا واقتصاديا واجتماعيا بس مع كل دة حزنت هل انا فيا حاجه غلط وخصوصا عرفت انه مريض قووووى جاء دة على احد الفضائيات ولكن وزير السياحه قال انه بخير وبيستجم شويه فى شرم الشيخ بس طبعا مش مصدقه وزير السياحه لانه خلاص السن يحكم برضه
ومافيش حد كبير على المرض والموت.. يمكن لو كان خرج من الحكم وهو مازال على قيد الحياه لما كنت حزنت ولكن الموت ليس فيه شماته وفرح ابدا الموت يسبب شفقه ويحدث تعاطف مهما كان الميت ظالم
انا عارفه انا هاصدم ناس كتير بس انا حزينه وبجد لو مات هاكتئب وهافتقده كتير وعلى فكرة احنا مش ضامنين اللى هايجى بعده هايعمل فينا ايه علشان معلش يعنى احنا لا نستحق حاكم عادل لاننا اصلا محتاجين تغير من جوانا واصلاح ذات البين اولا لان الرسول قال صلى الله عليه وسلم (اينما كنتم ولى عليكم ) انا لا ادافع عنه لانى فعلا لا احبه او حد يقول انى من مؤيديه لا والله ولكنه التعود لا اكثر يعنى لو احنا كويسين جاءنا حاكم عادل واذا كنا غير ذلك جاءنا حاكم ظالم واى حكم غير الشريعه الاسلاميه يبقى كلهم
حسنى مبارك او جمال عبدالناصر او السادات
نفسى مرة حاكم يرحل عنا من غير موت يقول كفايه كدة عليا يمكن يجى حد احسن منى حتى لا نتعاطف معه عند موته وننسى كل ما فعله معنا

58 comments:

حـريــة الــفـكــر والابــداع said...

والله البوست جميل اوى بس انا زعلت من الجملة دى - حتى المدونات اللى بتتكلم فى السياسه مش بحاول ادخلها نهائى -
عامتا دى بداية قوية جدا للكلام فى الممنوعات
هههههههه

عصفور المدينة said...

انت كمان بتقولي كفاية

فيه تعليق كنت حاكة في مدونة ما من 10 شهور

مناسب جدا لموضوعك أنقله بتصرف

حقيقة أنا ليس لدي حل متكامل لمشاكل الأمة أقصد تفاصيل متكاملة للحل ولكن مطلوب ممن يزعم أنه يملك الحل أن يعطينا خطط وتصورات واضحة للجنة الموعودة وطريق الوصول إليها
الرئيس هو فعلا حلقة في سلسلة الإدارة وأكبر حلقة ولكن فعلا هل تغيير الرئيس كل أربع سنوات أو سنتين أوحتى كلما تحصل مشكلة اقتصادية أو فضيحة أخلاقية أو كارثة اسيء إدارتها سيفرش لنا الجنة الموعودة
سؤال ما هي الدولة النموذج الذي يطبق الديمقراطية في الوطن العربي؟
ممكن نقول لبنان وكمل انت
انا ممكن اقول العراق وهذا لأن الحكومة تمثل الأغلبية "زعموا"
أنا بقة باستعبط وبقول ماليش دعوة بالرئيس ولا من يحكم طالما أن الشعب هو الشعب
ما هي نسبة تعداد الطبقة الحاكمة إلى تعداد الشعب أي أين يجب التركيز في الإصلاح؟
من أين أتى كل من لا يعجبنا تصرفاته ؟
هل تثق في اختيار أغلبية الشعب في حالة تطبيق الديموقراطية؟
ما رأيك في ثقافة وتفكير غالبية الشعب وإدراكهم للمصالح والمفاسد؟
هل وجود حاكم يجلس على كرسي الحكم فترة ممتدة خير أم عدم وجود حاكم أو وجود حاكم بدون تصور سوى أن التعددية واحترام الرأي والرأي الآخر؟
هل اعتناقك وتبنيك لكافة المباديء على قدم المساواة هو حل في حد ذاته لمشكلة التسلط وفرض الرأي و هل حرية كل شخص في التعبير عن رأيه وسب رأي الآخرين وتسفيهه هو حرية في حد ذاته تكفل السلم والأمن الاجتماعي طالما ان أحدا لم يتعرض لحريته؟
وهل أنت تزعم أن الآراء الباطلة(مطلقا) في حد ذاتها بما أنها باطلة في حد ذاتها فسوف تسقط؟ ماذا لو كانت هي خيار الشعب ؟
أنا أومن أن المسيح الدجال(وعلى لغة البعض المسيخ) هو حقيقة وأن أتباعه سيكونون هم الأكثرية هل من الواجب علي حينئذ كنوع من احترام الآخر أن أقول "يصعد يصعد المسيخ الدجال"
هل سب الرئيس بما انه اصطلح في المقاييس الديمقراطية على أنه يكون من معايير الحرية أنه من معايير الحرية؟
هل سب الرئيس في دولة تتداول فيها السلطة لا يعد تسفيها لرأي الأكثرية وعدم احترام لاختيارهم
وماذا لو قام أنصار الرئيس بأخذ حريتهم وانشغلوا بالسباب ضد السابين للرئيس وسخن الموضوع شوية؟
ما هي معايير ومواصفات الرئيس الذي ننشده إذا لم يكن هو الرئيس الحالي أو من قد تصعده الأيام؟
======================================================
ملحوظة التعليق أعلاه لا يعبر عن رأي صاحب الموقع ولا كاتب التعليق ولا رأي أي أي آخر أو ثاني أو ثالث


كنت أريد من هذا التعليق أن أؤكد نفس الفكرة التي سقتيها أنت هنا

أما بخصوص الرؤيا أو الحلم فهي من انشغال بالك فعلا

الباحث عن الحقيقة said...

انا جاى زياره علشان خاطر اسلم
طبعا قريت الموضوع
ولا تعليق
والسلام عليكم ورحمة الله وبركاته
انتى بتكتبى تدوينات كتير
الحمد لله ما فاتنيش كتير
ربنا يوفقك

الباحث عن الحقيقة said...

فيه صوره فى المدونة لرجل وجهه بشوش
الوجه ده حاسس انه مألوف وكأنى اعرفه
ولا هى وجوه الناس الطيبه كلها كده
تحسى انك تعرفيها من زمان

allah-slave said...

نفس الكلام اللى كنت بقوله يا رفقة
عمر ما الشجر هيديكي فاكهة كدة من نفسه لازم نتعب الاول ونغرز في الطين ولازم (((( نحرت الارض ))))) كويس عشان تطلع الفاكهة كويسة

يعني بجد نفترض الشعب اتكاتف وجه واحد عادل وعندو اصلاحات وكل الكلام ده
هل احنا واثقين في الشعب انه هيتجاوب معاه
بلاش الشع ما احنا من الشعب برضه ... يعني هل احنا مستعدين نطبق الديموقراطية بينا وبين نفسنا
اللى الناس مش متصوراه اننا لسة شعب خام عمرنا ما جربنا الديموقراطية خالص
وكل اللى عمالين يجعروا ويقولوا عايزين حجرية وجيموقراطية ايش ضمنهم انهم هيستغلوها صح او انهم هيكونوا مستعدين ليها
هل انا واناتى مستعدين نقول لأ على حاجة اخويا شايف انها يتقال عليها اه ... دي بداية الديموقراطية
انما لو قعدتى على قهوزة وحصل استفتاء هتلاقى واحد يقول للتانى ايه رايك في جمال مبارك حلو ؟
يقولو اه نجرب !!
منين بقى هتجيلنا الديموقراطية من سوق التلات يعني ولا ايه
لازم نكون بينا وبين نفسنا ديموقراطيين بعديها نبقى دور على حد ديموقراطي يمسك الحكم
رغم انى مش بحب فكرة الرئيس اللى بصورته في الدول العربية دي الرئيس عليه يرشح حكومة ويتصرف في الازمات الدبلوماسية ويعلن قرارات الحرب غير كدة المفروض ده يبقى دور الحكومة
مش ان الرئيس يبقى ملك هوا عامل نفسه رئيس
مصر دي ماشية بالفهلوة حتى في الرئاسة

david santos said...

Thanks for you work and have a good day

Stylish said...

السلام عليكم,

تدوينة جميلة جداً .. فعلاً عندك حق .. لازم الناس تغير مفاهيمها .. لسه في ناس عايشة في زمن فات عليه كتير .. و بيفكروا بنفس التفكير .. مفيش تغيير ..

يا 100 ندامة على اللي بيحصل و اللي هيحصل ..

شكراً على سؤالِك .. الواحد بس رجع يشتغل و انشغلت شوية و بحاول أوصل لتدوينة جديدة أكتبها ..

أميرة محمد محمد محمد said...

ربنا يكرمك يا رفقة عمر دي اول مره اعلق عندك وفي كذا حاجه عايزه اقولها.موضوع عدم الاهتمام بالسياسه الا لما نبني انفسنا اولا ايه وجه التعارض بين بنائك لنفسك واهتمامك بالسياسه ثماللي احنا مهتمين بيه ده مش سياسه ولكنه احوال المسلمين يعني انا لما اهتم مين هيحكمنا اومين هيتولي شئوننا ده يبقي اهتمامي بشئون المسلمين والاسلام حث علي ذلك.الرسول كان بيهذب النفوس وكان بيربيهم عقائديا ولكن في نفس الوقت كان سياسي بارع وكان بيربيهم سياسيا علشان كده طلع ناس قدروا انهم يعملوا امبراطوريه هائله.اما لو تركت الانغماس في امور المسلمين علي اساس ان دي سياسه واحنا مش مؤهلين ليها فده غلط كبير لان طول مااحنا مش بنحتك بالواقع فعمرنا ماهنتعلم واذا حصل واوكل الامر الينا هنفشل فيه لانه لايوجد لدينا خبره.اما بخصوص بكائك لو مات هذا الفاسد الطاغيه فده مش حاجه غريبه قوي لان لما مات ستالين وده كان طاغيه سوفيتى بكاه المعتقلين اللي هو كان حابسهم ولا تعرفي تفسيرا ولكن لو شفتي الناس اللي مش لاقيه تاكل اوتشرب لو شفتى المعتقلين وبهدلتهم وحرمانهم من فلوسهم واولادهم لوشفتى اللي غرقوا في البحر واللي بيوتهم ولّعت ولو شفتى دموع اليتامي والارامل والثكالي في مصر اظن دول احق بدموعك من هذا الشئ ولا شماته في الموت.اما بخصوص ان يأتى حد أسوأ منه فاحنا بنعمل علشان ده ما يحصلش.انا بكتب في السياسه ياترى مش هتيجى المدونه عندي علي فكره هتضايق لاني احبك في الله .تحياتي

Mohamed A. Ghaffar said...

انا كمان لو توفاه الله هزعل

عشان كان ادامه فرضه يدخل الجنه من اوسع ابوابها

وعشان اللى هيجى بعده اسوأ منه عشان نحن نغير ما بانفسنا للأشنع

رفقة عمر said...

حريه الفكر والابداع

اهلا بحضرتك ياريت حضرتك ماتزعلشى لان فعلا والله انا مش بافهم فى السياسه ومش بحبها طيب ادخل اعمل ايه على المدونات السياسيه وبعدين بحس انهم بيكلموا نفسهم مافيش حد بيسمع فيه حاجه بتتغير حتى ولو فيه تغير بيكون تغير سورى مش حقيقى بس اكيد ان شء الله هازور مدونه حضرتك لانها فعلا جميله


****************


استاذ عصفور المدينه

بجد بعد كلام حضرتك مش لاقيه كلام دة فعلا اللى اقصده بس معرفتش اعبر عنع مثل حضرتك ماشاء الله
فعلا باستغرب لكل المعترضين
ايوة فعلا انفيه سلبيات كتير فى الحكم بس فين الاحسن وهل يوجد احد نقدر نعتمد عليه وهل هايكون فعلا احسن ولا اسوأ
وبالنسبه للرؤيه والله العظيم انا اصلا مش باتفرج على على القنوات المصريه نهائى ومش بتابع ى اخبار عن مبارك ومش بشغل تفكيره خالص به
وانا سبحان الله لما اشوف رؤيه وانا مش فى بال الامر باكون عارفه انها رؤيه
مثلا ان شوفت وفاه والدى فى رؤيه قبل اربعين يوم من وفاته رحمه الله عليه وعشت اربعين يوم فى رعب وانتظار الخبر الموعود وتخيل حضرتك نفس المكان اللى ظهر ليا فى الرؤيا ونفس غرفه المستشفى اللى توفى فيها
وطبعا الله اعلم الرؤيا الخاصه بوفاه مبارك حقيقيه ولا لا


***************

الباحث عن الحقيقه

اهلا بحضرتك
شكرا جدا على السؤال وشكرا لمرورك بالنبسه للصورة دى صورة والدى رحمه الله عليه توفى من خمس شهور
وفعلا والدى رحمه الله عليه كان طيب جدا

رفقة عمر said...

عبدالله

السلام عليكم اخبارك ايه
ايوة دة اللى اقصده يعنى لو جاء للحكم حاكم صالح وعادل هايعرف يمشى شعب 3/4 فاسد ورجال اعمال فاسدين تفتكر هايقدر يسيطر عليهم وهايستجيبوا ليه
وكمان الديمقراطيه دى ممكن تجيب لينا واحد زى هتلر زى بوش ناس مجتنين يعنى او طواغيت اصل الشعب ممكن ينتخبوا حاكم يقول لهم
موبيل لكل مواطن هاتلاقيهم هاينتخبوه على طول
تفتكر بقى احنا تنفع معانا الديمقراطيه فى حاله زى دى
يالله احنا بنتفرج لغايه ما نشوف ايه اخرتها


******************

david santos

Thank you
Happy with your presence

*****************


stylish

شرفتنى ايه الغيبه الطويله دى ربنا يوفقك ويقدر لك الخير اللهم امين يارب العالمين فى انتظار التدوينه الجديدة


************************

اميرة محمد

اهلا بيكى سعيدة بزيارتك واهلا بك وجه جديد فى التدوين ربنا يوفقك يارب
شوفتى انت قلتى بنفسك لازم نتعلم ونتربى الاولى على السياسه الصح وبعد كدة نتختار من بينا من يصلح للحكم بس بعد ما نكون اتعلمنا واتصلحنا
وانا والله مش بافهم فى السياسه ومش غاويه سياسيه وكل ميسر لما خلق له كان فى الدوله الاسلاميه السياسين ورجال الدين والعلماء والعامه وغيرهم انا من العامه اللى بتتفرج من بعيد وبس
وبعدين اوعى تزعلى هازورك اكيد ن شاء الله علششان اسلم واطمن عليكى
احبك من احببتنى فيه


****************

استاذ محمد عبد الغفار

سعيدة بعودة حضرتك ربنا يديم عليك نعمه الصحه للهم امين يارب العالمين
فعلا سبحان الله اعتقد انه هايقعد ليوم القيامه يتسال عن 25 سنه وعن فوق 70 الف مصرى وعلى قضايا المسلمين والعرب بصراحه الله يكون فى عونه من وقفه السؤال
انا كمان خايفه قوى من الجاى ربنا يستر

ma_3alina said...

اممممم ..

والله يا رفقة يمكن لأننا عاطفيين شوية وبنغلب العاطفة على عقلنا أحيانا فبنتعاطف مع الظلمة ..

ويمكن لأننا زي ما قلتي طلعنا واتربينا معاه فبقا اكنه رفقة عمر

:D

يعني زي ما انتي بتحبي تحتفظي بحاجتك القديمة زي الموبايل .. حتى لو بيهنج وبايظ .. فبرضه بنتعاطف مع واحد زي ده

لكن ارجع واقول رغم إني من أنصار العاطفة .. لكن موقف زي دا مش حغلب عاطفتي على عقلي

ومش حسمع للخوف اللي زرعه جوانا من إن اللي حيجي بعده حيكون اسوأ .. مش حسمح للخوف دا إنه يلغي غضبي عليه وعلى بطانته .. ورغبتي في رحيله .. وبأي طريقة

الطائر الحزين said...

ليس عيب ابدا ان تغضبى او تزعلى
لان هناك اناس يتأثر الناس بهمدون ان يعرفهم اصلا

اما الجارى عل ى ما اعتقد انه ليست هناك فرصة لظهور اناس لديهم القدرة على ممارسة السياسة والحكم هناك سياسة للتعتيم على من تسول له نفسة القرب من الحكم

اعتقد ان السلطة من الاشياء التى تمنح ولا تطلب بمعنى ان يكون على الشخص الحاكم اجماع(اجماع حقيقى) من قبل اناس عليهم هم الأخرين اجماع بالتقوى والورع

والتغيير اذا اتى من فوق سيكون اسرع جدا بمعنى اذا يسر الله للأمة رجل كما حدث ايام سيدنا عمر بن عبد العزيز

تحياتى بارك الله فيك
اعتذر عن عدم المتابعة الفترة السابقة

allah-slave said...

طب انا عايزك يا رفقة تتقلى في العشا واحلمي حلم حلو كدة ... اتفقنا ؟

Marvel - واحد زهقان said...

بوست جميل

بصراحة كدة لو الريس حصله حاجة مش هزعل عليه وبرضه مش هفرح فيه

مش هزعل لانه مش فارق معايا كتير...وجوده زي عدمه

ومش هفرح لاني هكون متوتر وقلقان من اللي هيحكم بعده

طبعا ممكن يكون اسوأ منه...لكن ممكن برضه يكون احسن منه

لو كان اسوأ منه يبقى مش هتفرق كتير...انما لو احسن منه اكيد هتفرق معانا كتير

المحصلة ان فرحي و حزني هيكون على حسب اللي هييجي بعده

حياه الأحلام said...

مدونه جميله وأحيكى على مواضيعك بجد جميله جدا

ftataljanna said...

مش عارفه يا رفقتى

بس تصدقى انا كمان حاسه انى هازعل عليه

بجد هابقى مشفقه عليه اوى تصورى انه هايتسال عن كل حد اتظلم فى عهده وعن كل حد جاع ومالقاش اكل وعن كل حد مات من المرض وكان فى ايده يساعده وعن كل واحد سرق من قوت الشعب وظلم الناس وكان فى ايده يردعه ولم يردعه وهايتسال عن كل ده كل ده ياااااااااااااااه

ده عمر بن الخطاب كان خايف يتسال عن دابة تتعثر وتقول له يوم القيامة لما لم تمهد لى الطريق يا عمر

فعلا هابقى مشفقه عليه

وهاحرزن عليه ربنا يغفر له ويرحمه ويرحمنا هو فى الاول او فى الاخر انسان زينا برضه بس للاسف هو اخطائة كانت بتشملنا احنا كمان

وفعلا اللى جى اسوا واسوا لحد ما احنا نتغير والله اعلم ده هايحصل امتى

مهبول ومهبوله said...

اول دعوه تصيب من يوم ما مسك الحكم

مش هنشمت فيه كفايه اللي هوه هيتعذب عشانهم دول دول 70 مليون ياحرام غير الفكه


مهبول

BinO said...

في بعض الأحيان أحب ألتزام الصمت
ربما لأن الكلام عندي بفلوس
:)
لأ مش بفلوس
بس الكلام مشكلته أنه أصبح زي الهواء
أنت بتحسي بالهواء
لأ بتتنفسيه
لكن مش ممكن تحسيه
ألا لو شد حيله وزعق شوية
حتضايقي منه
:)
ده تعليقي علي سؤالك في مدونتي
وغيابي يرجع لسببين
أولهما أني أعمل خارج مكتبي العزيز منذ فترة
ثانيهما أن الكومبيوتر اللي في البيت فيه مشكلة كبيرة جداً مع جوجل أنه ما بيحدثش
يعني أدخل علي مدونتك الاقي نفس الموضوع
وأضطر أستني كام يوم عشان يحدث صفحات جوجل
فزهقت بصراحة
أن لما بكتب بوست لازم أشوفه من جهاز تاني
:)
رغم أني حليت نصف المشكلة دلوقتي مع مدونتي الا أنها قائمة بنسبة كبيرة مع معظم المدونات
ربنا ييسر
====================
بالنسبة لموضوع حسني مبارك
فأنا مش معاكي تماماً
أطلاقاً
وأبداً
رغم ان رأيي مش بقوله
وموضوع السياسة بأة عامل زي الهوا والكلام برضه
بس هو بيفرق معايا أنه الأفضل البعد عنه لأنه حيرجع لوارا
ليه
؟؟؟؟
لأن السياسة أهدافها شخصية
وقتية
بحتة
ده واضح جداً
فكنت بحاول أبعد دماغي عنها
والحمد لله
أني لاقيت في ديني ما يكفيني
رأيي في حسني مبارك أنه مش البلسم اللي أتحط علي الجرح
ولا الدوا اللي داوا الجراح
ولا هو برضه الهم اللي ما يتلم
هو قدر , قدره المولي عز وجل علينا
بأعمالنا صلحت أو فسدت
بما كسبت أيدينا
لما بأنظر للسنين القليلق اللي عدت من عمري وهو موجود
الأاقي الأموور بتصير من سئ للأسوأ
رغم أني متفائل جداً
وأعلم أن فرج الله قريب
وأن الله متم نوره ولو كره الكافرون
حقا@ وصدقاً ويقيناً
الأ أننا خسرنا الكثير وتنازلنا عن الكثير
وفقدنا الكثير
والحمد لله رب العالمين

أمــانــى said...

رفقــتى

نفــس الاشاعة دى سمعتها وسألت اخويا قولتله تلاقيكم فى الحزب عارفين الراجل ان لله وان اليه راجعون ومش بتقولوا لغاية ما تخلصوا الانتخابات
رد عليـا
طـبعآ فى حاقدين ومغرضين هما اللى بيطلعوا الاشاعات دى

دى اشاعة

انا فى الاول كنت خايفة قبل ما جمال يظهر على الشاشة بالشكل ده
لان بابا الله يرحمه لما اقوله خلاص عايزين نغير وانا من ساعة ما وعيت على الدنيا مش شايفة غيره قالى ما بلاش تقولى كده احسن مش عارفين مين اللى هيجى اصل الدنيا مليانة وكله يقول انا اولى
بصى حسنى ربنا يرحمه واحنا ربنا يتولانا برحمته لاننا وصلنا الى حال ما يعلم به الا المولى عز وجل
وهو برضو هيتسأل علينا راع هيتسـأل على رعيته

على فكرة الاحزاب مش كويسين ومفيش حد فى مصــر يطلع ويقول انا اهو اللى هنفعكم
كله كلام هجص فى الهجايص
يبقى سلميلى على الحبابيب ومتسألينش علشان انا بأهيس والسيرة دى بتعملى حساسية

اللهم ولى من يصلح ياااااااااااارب آمــــــــــــــين

الصارم الحاسم said...

ده عشان حضرتك بس طيبة جدا جدا


يموت.....متهيألي هيبقى اسعد خبر اسمعه في حياتي


الحاجة الوحيدة اللي ممكن تزعلني انه يموت بمرض على سريره...مش حد يقتله وسط جنوده ومواكبه اللي قرفنا بيها على الفاضي 26 سنة

رفقة عمر said...

ماعلينا
اخبارك ايه العطل اتصلح ولا لسه
منتظرين القطار
عارف والله لو مشى من غير موت مش هازعل لكن الموت برضه ليه حاله تانيه ويخليك تشفق على الميت
المهم هو كان فى برج العرب اميارح وتخيل قعدت اتفرج عليه وكنت فرحانه انا ماشاء الله جامد
ولا كانه عنده 79 سنه ويارب كون اللى جاى احسن يارب
كل سنه وانت طيب مش النهاردة برضه التوقيت الشتوى باين هايبتدى

رفقة عمر said...

الطائر الحزين
اهلا بحضرتك تشرف فى اى وقت ولا يهمك خالص انا عارفه ماشاء الله المدونات كتير وكلها احسن من بعض
ربنا يقدرناعلى قراتها كلها
واكيد تفرق كتير انه يكون الحاكم عن طريق الاجماع ويكون اجماع حقيقى مش سورى وياريت يكون من اهل التقوى والورع نتمنى
ربنا كريم قادر يصلحنا ويصلح حكمنا
كل سنه وحضرتك طيب
رمضان كريم


**************

عبدالله

هو الواحد لما يتقل فى لعشا يحلم احلام حلوة طيب ولازم يكون اكل معين ولا اى اكل ماشى ياعبدالله بتتريق عليا
:D

**************

واحد زهقان

اهلا بحضرتك شرفتنى
ماهو دة برضه اللى مخوفنى ربنا يستر من الجاى وربنا يلطف بينا
كل سنه وحضرتك طيب


*****************


حياه الاحلام

مبروك البلوج الجديد واهلا باختى فى الاحلام
مبسوطه ان فيه حد بيشاركنى نفس فكرة الاحلام والعيش فى الاحلام
ربنا يوفقك يارب
كل سنه وانت طيبه


*******************

مهبول ومهبوله

اهلا بيكم ومشرفنى ومبروك البلوج اجديد ربنا يكتب لكم التوفيق يارب
والفكه بقى دول يجوا كام كدة
منورنى
وكل سنه وانتم طيبين

رفقة عمر said...

بينو
اخبارك ايه مفتقدينك
المشكله اللى بتقول عليه بتحصلى بس لما اعمل ريستارت للكمبيوتر باشوف البوست الجديد بعد ما بعمل ريستارت
ياريت تشوف حل للمشكله دى اعمل ابديت للويندوز يمكن تنحل المشكله
انا كمان والله مش مهتمه خالص
بس موته هايثر فيا غصب عنى
يعنى اتعودنا عليه برضه يعنى الرسول لما اليهودى اللى كان بيرمى امام منزل الرسول صلى الله عليه وسلم القاذورات غاب الرسول افتقده وذهب للاطمئنان عليه
يعنى العشره برضه تحكم
وهو عشرته طولت معانا
كل سنه وانت طيب وربنا يوفقك يارب وترجع مكتبك العزيز قريبا

رفقة عمر said...

فتاه الجنه

اخبارك ايه يارب تكونى بقيتى احسن
ربنا يكرمك ويفرج كربك اللهم امين
وربنا يصلحنا حتى تنصلح لنا الدنيا وينصلح حكمنا
كل سنه وانت طيبه


****************


امانى

انتى شوفتى الناس اللى كانت مترشحه قدامه ناس ما يعلم بيهم الا ربنا حسيت انهم المفروض يعمل شو فى سيرك مش يكونوا رؤساء والله كانت حاجه تكسف كنت مسكوفه ليهم والله
اهو احنا بنتفرج لما نشوف ايه اللى جاى وربنا يسلم يارب
كل سنه وانت طيبه


*****************

الصارم الحاسم

اهلا بحضرتك

ربنا يخليكى يارب
على فكرة لو مات مقتول كدة هايبقى
شهيد
لكن لو مات على سريرة يكون افضل برضه

كل سنه وحضرتك طيب

آلام وآمال said...

انا اللي مدايقني اوي ف بعض المدونات السياسية ومدونات الاخوان بالخصوص انهم بيشتموا وبيقولو الفاظ وحشة جدا على الرئيس
انا مش فاهم بصراحة ازاي هم بيدعو انهم بيتكلموا بالدين والشرع وف نفس الوقت يشتموا الشتايم دي
انا بصراحة مش عارف ايه مبررهم ف الشتايم دي
هل هم مش عارفين ان ده يعتبر ذنب وهيتحاسبو عليه
بغض النظر عن ان الحاكم ظالم او غيره ده مش يديهم الحق ابدا انهم يشتموا عليه ده حرام والله هو مهما كان بردو بشر واحنا محرم علينا ان احنا نغتاب حد او ننم على حد
وان كان على افعاله فربنا هو اللي هيحاسبه عليها واذا كان عند حد اعتراض فيعترض بالادب والذوق

ده اسلامنا وده ديننا

ديننا ينهى عن البذاءة والكلام الفظ وعمر الشتايم والشعارات ما هتغير الوضع اللي احنا فيه ابدا

اسف للتطويل بس دي حاجة فعلا غايظاني اوي واللي غايظني اكتر انهم بيزعمو انهم متدينين

هيهات هيهات

صانعة الحرية said...

السلام عليكم
ازيك يا بطوطه
انا صحيت يوم اربعه وعشرين اقولهم انا حلمت انه مات
وبعدين بحكى لواحده زميلتى بقولها حلمت بيكى انك كلمتينى وقولتى لى انه مات
كانت المفاجأه قالت لى انا فعلا كلمتك وانا دخلت السلوك فى بعضها
يعنى كان بجد مش حلم والله يا بطوطه انا كمان قعدت اعيط بس لانه صعب على انه
مات دون ان يتوب ويرجع الى الله ويحاول ان يصلح ما افسده ويخرج هؤلاء المعتقلين من معتقلاته
وكمان خفت على مصر اوى قلت اكيد هتمر بايام صعبه جدا
كنت خايفه وعماله افكر مين الاصلح انه يحكم مصر؟؟؟؟؟
جزاكى الله خيرا على الموضوع وعلى شجاعتك

eldoctor said...

الموضوع كبير و عايز كلام كتير عليه.. ما تفرقش كتير هو أو غير .. الملك و الدوام لله وحده .. لى عودة باذن الله

حياه الأحلام said...

الله يبارك فيكى يا قمر وأنا مبسوطه أكتر أنى لقيت حد يشاركنى أحلامى وممكن نعمل موسوعه أحلام مشتركه نورتى البلوج بتاعى
وربنا يوفقك فى مواضيعك يارب

شقاوة شعب said...

اندهشت لان اول بوست اقرأه لكى مرتبط باسم المدونة
"العائشة فى الاحلام"
وانتى اتكلمتى فى البوست ده عن حلم تتوقعى انه يكون حقيقة
على اى حال فكتاباتك قيمة وتدل على شخصية هادئة ورومانسية

فى حاجة لفتت انتباهى فى كلامك لما قلتى ان مش مهم مين بيحكم ...المهم الناس تتهذب اولا وان النبى صلى الله عليه وسلم هذب نفوس الناس اولا ثم جاءت امور الحكم

اقولك حبيبتى النبى صلى الله عليه وسلم كان ادامه كام واحد هذب نفوسهم ثم انطلق لامور الدولة ...
والسؤال : هل النبى انتظر حتى يفرغ ممن تهذيب نفوس شبه الجزيرة العربية كلها او حتى قريش كلها ليبدأ فى الاهتمام بشؤن الدولة والعمل على تقوييتها ؟؟
ام اتخذ مجموعة من الصحابة دخلوا فى الاسلام ثم انطلقت هذه المجموع الى المدينة لبناء دولة اسلامية قوية من خلال "الحكم" استطاعت ان تدخل مكة يوم الفتح منتصرة قوية وساعتها اكتمل العدد ودخل الجميع فى الاسلام مرة واحدة انصياعا لاوامر حاكم مسلم قوى


ده اللى عايزة اوصله ان ما ينفعش نفضل طوووووول العمر بنهذب فى النفوس ...المصريين جواهم خير كتير وايمان قوى وكتير منهم ملتزمين بجد لكن شوفى فى المقابل حاكم بيسمح بكل مايفسد هذه النفوس ويرجعها عن الحق
يبقى دلوقتى احنا محتاجين ايييه نهذب فيهم عشان ترجعهم الجبهة الاخرى
ام نعمل بالسياسة لوضع حاكم افضل يعين الملتزمين منهم على الثبات على دينهم ويشجع الاخرين على الدخول فى دين الله أفواجا

*************
الاعداد الان كبيييرة جدا اكبر من ان نقول سننتظر حتى ينصلح حال الجميع وتهذب كل النفوس او معظمها
نحن نحتاج اليوم لشخص او فئة نحسن الظن بها تأخذ هذه البلد فى نقلة واحدة الى الاسلام وتطبيقه فى كل شؤن الدولة وساعتها سيطبق الجميع الاسلام ويروا محاسنه واثره على حياتهم فتهذب نفوسهم وينصلح حالهم باذن الله وامره

*****************
الخلاصة اننا لا يمكن ان نهتم بجانب على حساب الاخر خاصة اذا كان الاخر هو من يصيغ حياة الان فى مصر ويشكلها
إما فى الطريق الصحيح او فى الطريق الخطأ

أعتذر على الاطالة
والله ولى التوفيق

الراقص مع الذئاب said...

السلام عليكم ورحمة الله وبركاته
وانا مثلك يا اختي الكريمة
اكره كل ما يتعلق بالسياسة واللهث ورائها ولا اكترث بها
من اراد الولاية فليحملها علي كتفه

واعرف ان من واجبتنا مواجهة الفساد وان اعظم الجهاد قولة حق (عند) سلطان جائر
وناس كتير اوي فاهمة الحديث غلط
مش مهم
بس انا في وضعي دا متمناش ابدا موت الريس
عشان احنا كمجندين هندبهدل
هنتحبس داخل الوحدات العسكرية 6 شهور لغاية ما ينتخبوا رئيس جديد
يعني مش هشوف الشارع لمدة 6 شهور كاملة...
ربنا يسترها

اللهم ولي علينا خيارنا ولا تولي علينا شرارنا

إن شاء الله يكون اضغاث احلام يا رفقة
:)

دمتي في خير إن شاء الله

رفقة عمر said...

الالام وامال

ايوة فعلا عندك حق عارف مش المدونات الاخوان بس اى مدونه بتمثل حزب اوفكر معين
والله انا لا اثق فى اى حد يرشح نفسه ان الحكم دة مسئوليه وليطلبه بيكون عايز مصلحته الشخصيه لان الحكم هو اللى يسعى للشخص وليس الشخص اللى يسعى اليه
فبسال الناس اللى بتطلب الحكم انتم عارفين فعلا الدوله محتاجه ايه ومتاكدين انكم هاتقدروا تحلوا المشاكل المعقدة وعندكم حلول فعلا ؟؟؟؟؟؟؟؟؟؟؟
كل سنه وانت طيب رمضان كريم


*******************
صانعه الحريه

اهلا بيكى فى زيارتك الاولى نورتينى
شكرا على كل كلامك الجميل اللى ذكرتيه فى البوست اللى فات وانا كمان اكون سعيدة طبعا ان التدوين بيعرفنى على
ناس جميله زيك
انا كمان خايفه قوى من الجاى وخايفه على مصر جدا ربنا يستر

رفقة عمر said...

الدكتور

اهلا بحضرتك غايب عننا ليه يارب تكون بخير
كل سنه وحضرتك طيب
رمضان كريم

رفقة عمر said...

حياة الاحلام

اهلا بيك انا الاسعد وربنا يوفقك يارب ومنتظرين البوستات الجديدة


********************

شقاوة شعب

اهلا بحضرتك شرفتينى واشكرك على كلامك جزاك الله خيرا

شوفتى الرسول بنى الدوله فى مكان تانى غير موطنه الاصلى اللى كان رافض اى تغير وذهب الى المدينه بعد ما كان اهلها جميعا دخلوا فى الاسلام وهذبت نفوسهم فتقبلوا الحكم الاسلامى بكل سلاسه
ازلا اعذرنى لا اشعر بثقه نحو اى حد حتى ولو وثقت فيه اخاف عليه من جو الفساد اللى حوله لو وضعتى تفتحه سليمه فى وسط سله مليانه تفاح فاسد فسدت اكيد بسبب فساد بقيه التفاح
اكيد عرفتى اللى حاصل لا سماعيل هنيه اكيد نسا لا غبار عليه وجاء وسط ناس فاسدين
قوليلى بقاله سنه او اكتر فى الحكم قدر يعمل ايه لا يوجد غير مؤيديه اللى حواليه والباقيه الفاسدة ترفضه بشدة وتهدم اى عمل يقوم به

عارفه الملك فاروق سمعت انه كان نفسه قوى ترجع لخلافه الاسلاميه تانى وتكون مركزها مصر ولكن كل من كان حوله كانوا فاسدين فطبعا استسلم لهم

يعنى اللى اقصده تفتكرى احنا نستحق حاكم عادل واحنا اصلا مش عادلين مع بعض الاخوة تاكل حق بعض فى الميراث او لو كانوا شركاء الابن يطرد امه او ابيه وغيرها وغيرها
اكيد الحوداث بدل ما كانت نص صفحه دلوقتى بقت ليها جرائد ومجلات متخصصه فى الحوداث بس
يالله ربنا ييسر لنا الامور يقدر لنا الخير
وفى الاخر اللى عايزة ربنا هايكون

كل سنه وانت بالف خير
رمضان كريم

رفقة عمر said...

الراقص مع الذئاب

اهلا بيك
ربنا يطول فى عمره لغايه لما تخلص جيش اللهم امين
واكيد اضغاث احلام اتمنى

كل سنه وانت طيب
رمضان كريم
تقبل الله منك الصلاه والصيام والقيام

حائر في دنيا الله said...

وعمال أقول رفقة ماشية جنب الحيط رفقة بتسمع الكلام.. ماعلينا بس لو احتجتي عيش وحلاوة السوبر ماركت فاتحلي حساب عنده
المهم
مشكلة هذا الوطن أنه لو غاب هذا الشخص تحديداً فلن نعرف ماذا سيحدث لأنه ليس بلد مؤسسات بل بلد أفراد ومشكلة هؤلاء الأفراد أنه لو وضعت مصلحتهم في كفة ومصلحة الوطن في كفة لرجحت بالطبع مصلحتهم وفكيك على برة
ولأنهم لا يريدون الابتعدا عننا فإنهم الآن يتشبتون ببعض لاستمرار هذا النظام سواء بإبنه أو بأحد من أتباعهم حتى تسير المركب ويظل كل شيء كما هو اللي فوق بيسرق كما هو واللي تحت بيتمص دمه بره كما هو

ولك تحياتي
السلام عليكم

صلعم said...

لانى بصراحه اريد حكم اسلامى ياتى باختيار مجموعه من الاشخاص يتوسم فيهم الخبره والتقوى والامانه عن طريق مجموعه من العلماء ويقومون باختيار واحد من هؤلاء الاشخاص وليس واحد يرشح نفسه


يعني باختصار عاوزة حكم شبيه بحكم طالبان او حكم حماس في غزة

ربيــع said...

نصمت
نعترض ونحمل اللافتات
نستنكر الطريقة
نعد الناس بالتغير الأفضل
:
:
|...ثم يزول ما كنا نرفضه|...
:
:
فنعيد الصمت
ويأخذنا الحنين له


وما نلبث نعود لهذه الدائرة
(:

"مع اني مليش في السياسة اوي زي حالاتك ..بس تصدقي يارفقة حلوة طريقتك في الكلام عنها"
:)

رفقة عمر said...

حائر فى دنيا الله

عيش وحلاوة مش بتقول العيش سعره ارتفع طيب هاتقدر تجيب كل يوم عيش وحلاوة
شكلى هاطول انت حر
فعلا انا بجد مش عارفه لو فى اى لحظه هو حصل له اى حاجه احنا هانعمل ايه مش فاهمه
ربنا يلطف بينا
ويقدر لنا الخير اللهم امين
كل سنه وانت طيب

رفقة عمر said...

صلعم
كل سنه وانت طيب رمضان كريم

اولا لما ناس من اهل التقوى والصلاح ومن اهل الدين ومن اهل القضاء وخبراء السياسه يعملوا لجنه ويختاروا ناس يحسبونهم على تقوى وعلى علم ودرايه بشئون الحكم ويكون المرشحين كلهم افضل من بعض وبعد كدة يسيبوا الشعب يختار بينهم يبقى دة شئ غلط
مش واحد نصاب ولا مجنون يرشح نفسه ويقول كلمتين حلوين للناس والناس يعينى بكل ساذجه تنتخبه
وبخصوص حكم طالبان اولا انا لم اكن هناك فى افعانستان لاحكم عليهم
انت بتاخد الاخبار من اعدائهم
وبعدين الحكم بالشريعه الاسلاميه هايحقق العدل للجميع
علشان هايكون مش شرع بشرى داخل فيه الاهواء ولكنه شرع الهى
والناس سواسيه امام الله
لا تفضيل بينهم الا بالتقوى

كل سنه وانت طيب مرة تانيه

رفقة عمر said...

ربيع
ازيك عامله ايه
انت ياربيع ماشاء الله عليكى اديبه
كلماتك قليله وجميله
كويس ان طريقه كتاباتى السياسيه عجبتك
:D
كل سنه وانت طيبه
لينا ناس هناك عندكم فى جدة خلوا بالكم منهم

Future_Preacher said...

رفقتي الحبيبة
اولا اقول المهم
انتي ايه اخبارك ووحشتوني والله الفترة البسيطة اللي غبت فيها بس لسه حغيب تاني شوية كمان الي أن يأذن الله
و كل سنة و انتي طيبة
و لا يأتي رمضان القادم الا و قد تحقق ما تريديه
اللهم امييين
------
نييجي للبوست
تصدقي أول ما سمعت الاوشاعة دي افتكرت جملة قالها اللي و لا عادل و لا امام في مسرحية كده لما قالوله ان الزعيم مات
قال : هو في رئيس بيموت يا باشا...!!!سبحان الله
بصي هو انا حفسرلك انتي ليه زعلتي علي حد معرفتي بشخصيتك لحد دلوقتي ....
هو انتي زعلك عليه حيكون بالظبط لو عندك تحفة في بيتك من زمااااااان قوي يمكن مش بتحبيها لكن مستخسرة ترميها علشان قيمتها التاريخية المتمثلة في قدمها
فاليوم اللي حتتكسر فيه التحفة دي مش حتزعلي الا لكونها مرت عليكي حاجات كتير قوي شهدتها تلك التحفة و هو ده بس وجه الحزن
و ده برضه اللي ناس كتير حتستشعره و أنا منهم وقت ما ربنا يأذن و يتكل علي الله
بس أعتقد إنه ممكن يموت مقتول و الله أعلم لأن من قتل يقتل و لو بعد حين
.
.
تصدقي أخويا اول ما قولتله علي الاشاعة دي قالي بمنتهي العفوية : لا يمكن يكون مبارك مات
قولتله اشمعني
قاليي معقول مبارك يموت في الايام الجميلة دي و احنا داخلين علي رمضان
:)
يكفي انه هو اللي خلي الشعب كله حرامية بيسرقوا بعضم البعض لأن اذا كان ربُ البيت بالدف ضارب فما بال أهل البيت

حائر في دنيا الله said...

لا تقلقي فجنيه من الجديد الفضية يأتي بسبعة كيلو عيش أو أكثر هذا إن لم تكوني عاملة رجيم
وإن كنتي فأعتقد أنك لا تحتاجين للحلاوة إذن...المهم
نريد موضوع غير ذلك لأني والريس على علاقة غير طيبة وليس معقول كلما دخلت وجدته في وجهي والموضوع ويكون عنوانه كيف ندعو في رمضان
أي أوقات الدعاء المحببة بالأحاديث طبعاً ثم أي الأدعية وشخصيا أفضل اكما ذكر عمر خالد مرة على عدد من الأدعية طوال الشهر
إتجدعني ونفذي الأمر دا لو سمحتي بسرعة
!!!!

السلام عليكم

البنت الشلبية said...

سلام عليكم
ازيك يا جميلة عاملة ايه
انا كمان كتبت بوست عن الموضوع ده
وقولت فيه انى حاسة انى هموت قبله ههههه
وبعدين معدش فى اى رئيس يقول اتنحى عشان لاى بعدى ده حلم بعييييييييييييييييييييد اوى
يمكن يتحقق قولى آمين

Sampateek said...

متفقة معاكي جدا في ان تدخلنا في السياسة لن يغير شئ و انا مثلك اخاف مما هو ات
و اللي تعرفه احسن من اللي متعرفوش
ربنا يجعل لنا مخرجا و ينولنا زمن يعز فيه اهل طاعته و يذل فيه اهل معصيته

تحياتي
و رمضان كريم

رينـــــــــــا said...

السلام عليكم
رفقه زيك انا جيت اسلم لقيت البوست الجميل دا
نصدقى انا كمان حسيت بنغزة حزن
بس دا لاننا شعب طيب للاسف
العاطفه عندنا اعلى من اننا نكره حد حتى لو أذنا أذيه الرئيس
وانا رأى دى مش حاجة وحشه احنا شعب طيب وحبوب وحنين وعلشان كدا ربنا حامينى مش خاينين ولا غدرين

انا كمان هزعل لو مات
سلامى ليكى يا قمر
وكل سنه وانتى الى الله اقرب

Anonymous said...

اهو لا مات ولا حاجة يا جماعة سيبيكوا بقي من الاشاعات دي

بلد اشاعات صحيح
:)

رفقة عمر said...

داعيه المستقبل

اخبارك يه ربنا ييسر الامور عندكم وتفضى لينا بقى
يمكن كلامك صح انا يابنتى بلغت من العمر ارذله ولم اجد امامى غيره عمرى كله تقريبا لغايه دلوقتى هو اللى قدامى احداث كتير مرت بحياتى منها السعيد ومنها الحزين
كلمته اللى بيقولها كل سنه بمناسبه 6 اكتوبر
مسابقه القران الكريم فى رمضان وحاجات كتير فجأه كدة الاقى واحد تانى لا بجد هايخد وقت معى لما اتأقلم على الوضع الجديد
كل سنه وانت طيبه ورمضان كريم
تقبل الله منا ومنك الصيام والقيام اللهم امين


*******************

حائر فى دنيا الله

بجد الجنيه بيجيب 7 كيلو عيش
وبالنسبه للحلاوة الطحينيه انا مش بحبها اصلا لو كنتاكى ممكن
معلش سامحنى مكنتش اعرف انك مش بتحب حسنى انا اتفجأت بصراحه فيه حد مش بيحب حسنى
اوعدك اغيره البوست قريب
وشكرا ليك كتير على حسن ظننك بى
وهاحاول ان شاء الله اكتب البوست
ربنا يقدرنى ان شاء الله
كل سنه وانت طيب

*****************

شلبيه

ازيك عامله ايه يارب تكونى بخير
انا عارفه انه مافيش رئيس بيتنحى بس اهو حلم من ضمن الاحلام
كل سنه وانت طيبه رمضان كريم

رفقة عمر said...

سامبتيك

اخبارك ايه وحشتينا كتير يارب تكونى بخير ودايما متألقه
ربنا يستر ويولى علينا خيرانا ولا يولى علينا شرارا اللهم امين
كل سنه وانتى بالف خير
رمضان كريم


************

رينا

عامله ايه والغربه عامله فيكى ايه عارفه ان رمضان هايكون صعب عليكى السنه دى بس تعرفى بكرة هاتلاقى نفسك حبيتى حياتك جدا وتبقى لما ترجعى لمصر تبقى نفسك ترجع تسفرى تانى انا ليا اختى كدة متزوجه فى السعوديه وخلص اتعودت على الغربه
ربنا يقدر ليكى الخير وييسر لك امورك
كل سنه وانت طيبه

************
مجهول

عارف موضوع مرضه مش اشاعه انا متاكدة عارف ليه كان المفروض النهاردة يستقبل الملك عبدالله ولا استقبله ولا حاجه
كمان اسرائيل وامريكا قلقنين جدا
غير كل الدبلوماسين مش عارفين فين الحقيقه لانه لغايه دلوقتى لم يظهر شخصيا امام اى وكالات انباء عالميه نهائى
وبعدين هو فيه حد كبير على المرض والموت سبحان الله
الكل فانى وهو وحده الباقى
كل سنه وحضرتك طيب

مؤمنه said...

السلام عليكم ورحمة الله وبركاته
يارب نبقى كويسين عشان يتولى علينا حد كويس دى الى أقدر أقوله
الحاجه الوحيده الى مطمنه الواحد فى توالى الحكم على مصر من سئ لأسوأ هو الأيه الكريمه الى بتقول (ادخلومصر انشاء الله أمنين) صدق الله العظيم

جنـه said...

انا برضه سمعت الاشاعه دي

اولا ماصدقتش
وفضلت شويه كده اتخيل ده لو حصل فعلا

ماحستش لا بزعل ولا بتاثر
انا هيكون زعلي ع الشعب اللي هيخلص من حسني يجيلوا جمال

انا برضه مش باحثه سياسيه
بس انا احب اقرا وجهات النظر في كل المجالات
وبدخل المدونات السياسيه وبحاول اتابع

ولما اشوف ان بعض الشباب اللي بيحاولو مجرد محاوله للتغيير بيعتقلوا وبيتعاملوا اسوا معامله بعيده عن اي معامله انسانيه

لما اشوف تقرير علي قناه الجزيره ان ازاي البلد دي بتعلم شباب في كليه الشرطه
واول مبدا فيها اهانه كل ماهو انساني عند التعامل مع اي مواطن
ده فيه ماده غرضها تعليم الشتيمه يارفقه

ولو قعدنا نلف عن مسئول غيره عن الشعب ده مش هنلاقي
حتي المسئولين اللي تحت منه بيبقي من اختياره هو
ولو هو اساء اختياره لمعاونيه ذنب الناس دي ايه
فعلا مش هزعل عليه ابدا وهيبقي عندي امل ولو صغير انه ممكن ييجي رئيس افضل

لحظة said...

المشكله اننا مش شايفين حل غير الموت
الطوفان زي بتاع سيدنا نوح عليه السلام ياخد الناس الوحشة
ويطهر الارض للناس الطيبة
وي مسلسل كان اتعمل من ييجي كام سنه بتاع المجداوية لكا كل المتجبرين في العيلة غرقوا في المركب اللي استخسروا يصونوها
المشكلة انهم هيغرقوها ويمشوا هم قبل ما تغرق بيهم
او زي ما قال قائل
البلد دي عايزة تتهد وترجع تتبني تاني على نضافة
تحياتي

ana ga3an said...

عزيزتي
حزنك طبيعي و متوافق مع شخصيتك جدا
فحسني مبارك للاسف تحول في نظرة فئة معينة من الشعب الي صورة الاب و ان كان الحقيقي هو حاليا يبقي جد

لا شماتة في الموت في كل الاحول
و لكن تعليقي علي كلمة قولتيها
انك هاتفتقدية لو مات
مش قادر افهم هاتفتقدي اية بالظبط

البنت دى شكلها بتقبض من الحكومة يا اخوانا

تقديري

رفقة عمر said...

مؤمنه
اخبارك ايه
كل سنه وانت طيبه
اكيد لكل امه عصوره اضمحلال وعصور اذهارواظن احنا شبعان من عصور الاضمحلال اعتقد ان الاوان لعصور الاذهار
ربنا يدنا لعمر علشان نشوف حتى البدايات

نورتينى

****************

جنه الهادئه

كل سنه وانت طيبه منورانى
مش عارفه انا زعلت ليه فعلا بس هو دة عيب المصرين عاطفين قوى
ويسامحوا بسرعه من اساء لهم مجرد لو اصابه مرض او مات
احنا مستجلين ليه بكرة الايام تظهر لنا المستخبى
وارجو ان يكون خير
ان الله على كل شئ قدير

*****************
لحظه
حمد الله على سلامتك وحشتينى بجد
عارفه بحس ان الحياه فى مصر سمك لبن تمر هندى مش عارفه احنا شعب متدين ولا علمانى ولا عربى ولا شرقى ولا اوروبى ولا احنا ايه بالظبط
بجد حاسه بتوهان فظيع وحاجات كتير ضاعت فى النص
كل سنه وانت طيبه
رمضان كريم

رفقة عمر said...

استاذى الجعان

سعيدة جدا بوجود حضرتك عندى فى المدونه مفتقدين مشاركتك لينا
عارف هافتقد ايه الاربع وعشرين ساعه اخبار عنه بعد نشرة 6 ونشره 9 التقرير على رحلاته وووزيارته
يعنى بقى شئ مقرر يومى علينا من يوم ما فتحت عينى على الدنيا وقبل ظهور الدش كانوا بيلغوا مسلسل الساعه 8 علشان يجبوا زيارات لرئيس ونشاطه عايز كل دة ومش افتقده
دة عشره عمر

كدة بتعترف عليا يعنى اتعامل مع المدونين ازاى دلوقتى وهما عرفوا انى جاسوسه عليهم وبقبض من الحكومه
كل سنه وانت بالف خير
ورمضان كريم

شباب روش طحن said...

أتفق معك إن الحل مش في تغيير الحكم وبس لكن في تغيير الناس وربنا يستر من ألي حايجي بعد حسني وأعتقد إحنا محتاجين تغيير في نفوس الناس ومع مرور الوقت ممكن حال الدوله يتغيير بدون مظاهرات أو ثورات بس يشترط إن الناس المؤمنه دي تكون ناجحه ومتفوقه وليها مراكزها عشان تبقي قدوه الدين حايجمع الشعي كله ويصحيه وبطريقه سلميه جدا ممكن حالنا يتغيير

AbdElRaHmaN Ayyash said...

:)
سلبية غير عادية مننا اننا نقول ملناش في السياسة
و ذهلت لما لقيت سمبتيك بتقول ان اللي نعرفه احسن من اللي منعرفوش
لا اللي منعرفوش احسن
و اننا ندخل في السياسة نتعلم فيها أفضل من اننا نساق زي كل حاجه ملهاش رأي ولا عقل و لا ارادة
بصراحة انا شايف ان كلامك مش صح مطلقا
حسني مش اللي يتزعل عليه
ولا السياسة للنخبه ولا للناس اللي بيفهموا
ولو مش هنجرب الديمقراطية من فوق و من الصفر يبقى مش هناخدها
بجد انا استغربت من البوست و من تعليقات كتير اوي

AbdElRaHmaN Ayyash said...

اها
بالنسبة لمشكلة بينو
الحل بتاعها انك تسيب الشبكة اللي انت مشترك فيها و تشوف شبكة تانية , أو تغيروا السيرفر اللي انتو جايبينه
او أبسط حل
انك تقول للاخ المسؤول عن الشبكة انه يشيل الهارد بتاع السيرفر