Monday, August 06, 2007

فى ظل الرحمن

الموضوع دة مرتبط بموضوع عمر والمعتصم يعنى ايه حب فى الله وليه فيه انسان ترتاح له عن غيره وليه انسان اول ماتشوفه تحس انك تعرفه من زمان وتالفه وما هى حق الاخوة فى الله ومن الذى يستحق صحبتك ومن الذى يجب ان لا تعطيه ثقتك لانه لا يستحقها
الموضوع دة دايما شاغلنى وبسال ليه الاصدقاء مش يكونوا صافين مع بعض ويحبوا بعض بصدق الصديق فعلا اغلى شئ يحصل عليه الانسان فى هذه الدنيا علشان كدة سيدنا ابوبكر رضى الله عنه لقبه الرسول بالصديق لانه تشمل معنى الصديق ومعنى التصديق ومؤازة الصديق فى وقت الشدة والضيق الله الكلام طلع فيه سجع ربنا يستر وماعلينا مش يقول عنى انى بتقعر فى الحديث فى هذه الايام وجدت معظم الناس تشتكى من قله وجود الصديق والخل الوفى وتشتكى انها لوحدها فى الدنيا طيب هل انت صديق بحق وخلا وفى هل تعامل الناس كما تحب ان تعامل ولا انت بتعامل الناس على قدر تعاملهم معك ان احسنوا احسنت وان اساؤ اسئت واحيانا ان احسنوا اسات
الرسول الكريم صلى الله عليه وسلم قال ( لا تكن امعه ان احسن الناس احسنت وانا اساءو اسأت ولكن كن ان احسن الناس احسنت وان اسأءو احسنت ايضا ) او كما قال رسول الله صلى الله عليه وسلم
مشكلتنا اننا ننتظر المعامله الحسنه من الاخرين الاول طيب ليه مش ناخد احنا المبادرة ونعامل الناس بالحسنى لو انسان فيه خير سوف تاثره بحسن خلقك ولو انسان قلبه قاسى يبقى على الاقل حاولت معه لانى اعلم ان هناك ناس ولا تنفع معهم اى رقه فى التعامل قلوبهم قاسيه كالحجارة وقد ذكرهم الله سبحانه وتعالى فى القران فى سورة البقره
قال رسول الله صلى الله عليه وسلم ( المؤمن الف مألوف ولا خير فيمن لا يألف ولا يؤلف)وطبعا كلنا عارفين الاحاديث التى تتكلم عن الحب فى الله ودرجات المتاحبين فى الله ومن السبعه الذين يظلهم الله فى ظله يوم لا ظل الا ظله رجلان او امراتان تحابا فى الله اجتمعا عليه وتفرقا عليه شوفوا الحديث الروعه هذا
قال رسول الله صلى الله عليه وسلم(ينصب لطائفه من الناس كراسى حول العرش يوم القيامه وجوهم كالقمر ليله البدر يفزع الناس وهم لا يفزعون ويخاف الناس وهم لا يخافون وهم او لياء الله الذين لا خوف عليهم ولا هم يحزنون فقيل من هؤلاء يارسول الله فقال هم المتاحبين فى الله تعالى ) يا الله حاجه بسيطه وكلنا هانسعد بها وهى الحب هاتجعل الناس المتحابين بهذه الصورة واحنا للاسف مش بنحب نفسنا لو بنحبها كنا حاربنا علشان نوصل لهذه المرتبه وهذه المرتبه تكون بالحب فى الله بصدق مش كلام وبس ولكن احيانا تحدث امور خارجه عن ارادتنا وهى نحب اشخاصا ونالفهم عن اشخاصا اخرى فان شبه الشئ ينجذب اليه بالطبع ودة سر خفى لا يعلمه الا الله وعبر الرسول صلى الله عليه وسلم عن ذلك بقوله ( الارواح جنودا مجنده فما تعارف منها ائتلف وماتناكر منها اختلف) فالتناكر نتيجه التباين والائتلاف والتناسب نتيجه الذى عبر عنه التعارف
قال رسول الله صلى الله عليه وسلم(ان ارواح المؤمنين ليلتقيان على مسيره يوم وما راى احدهما صاحبه قط ) واظن دة واضح قوى فى التدوين انا عن نفسى فيه مدونات احب اصحابها وااتالف معهم وارتاح لهم وانا لا اعلمهم لا ن الكلام الذى يخرج من القلب يدخل القلب وهكذافى حياتى لا اتعامل الا مع من يوافق النفس والروح لانى لا احب النفاق والحب والبغض دة من اسرار الله
وحب من تشاء وابغض من تشاء ولكن اجعل حبك لله وبغضك لله ولا تؤذى من تكرهه او تكون سببا لايلامه
الرسول الكريم قال ( هذا قسمى فيما املك فلا تلومنى فيما لا املك)واكيد بيكون الائتلاف دة بسبب التناسب فى الطباع والاخلاق باطنا وظاهرا اما الاسباب التى او جبت تلك المناسبه فليس فى قوة البشر الاطلاع عليها ولتصديق ذلك
قال رسول الله صلى الله عليه وسلم ( لو ان مؤمنا دخل مجلسا فيه مائه منافق ومؤمن واحد فقط لجاء حتى يجلس الى هذا المؤمن ولو ان منافقا دخل الى مجلس فيه مائه مؤمن ومنافق واحد فقط لجاء حتى يجلس اليه) ودة يدل على ان شبه الشئ منجذب اليه بالطبع وان كان هو لا يشعر به وكان مالك ابن دينار يقول لا يتفق اثنان فى عشرة الا وفى احدهما وصف من الاخر وانا اجناس الناس كاجناس الطير ولا يتفق نوعان من الطير فى الطيران الا وبينهما مناسبه قال فراى يوما غرابا مع حمامه فعجب من ذلك فقال اتفقا وليس فى شكل واحد ثم طارا فاذا فاذا هما اعرجان فقال من ههنا اتفقا

ان اردت حسن العشره فالق صديقك وعدوك بوجه الرضا من غير ذله ولا هيبه منهم وتوقير من غير كبر وتواضع من غير مذله وكن فى جميع امورك فى اوسطها وازهد ما فى ايد الناس يحبك الناس وعامل الناس كما تحب ان تعامل وحبك
للناس اكيد هايحبك الناس
سبحان من جعل الأخوة بيننا..رب القلوب مقسم الأرزاق.
.مني إليك تحية ممزوجة..بمحبة من داخل الأعماق.
.يارب أنت خلقتنا وجمعتنا..فأجعل لنا بعد الفراق تلاقي.
.في مجلس ذكر " لا..بل " في..جنة الفردوس أو في النعيم الباقي

للصحبه حقوق ان شاء الله البوست القادم اذكرها بالتفصيل

اعتذرلاستاذى عصفورالمدينه انى لسه مش عملت التاج بس انا خارج البيت ومش بدخل النت كتير والبوست دة كتبته من زمان وكان فى الدرافت
ان شاءالله اعمل التاج قريبا

13 comments:

مـحـمـد مـفـيـد said...

بوستاتك مميزه جدا
جعلها الله في ميزان حسناتك بجد

الصارم الحاسم said...

زمان اما كنات اسمع الحديث...رجلين تحابا في الله..اجتمعا عليه وتفرقا عليه

كنت اظنه يعني الموت..ما هوا نتيمي في وشي اهو هيروح فين الا بالموت

لكن في مرحلة اخرى..ومع كثرة الحل والترحال... قابلت ناس كتير..منهم اخوة بمعنى اخوة بجد في الدين...واجتمعنا وتفرقنا

ويمكن فيه ناس لم ارها منذ سنين..ويمكن لن ارها ثانية

في هذه الدنيا على الأقل


وعندما بدأت التدوين والانترنت ..أحسست بها مرة ثانية

وقتها فهمت معنى الحديث فعليا

أحبهم واتذكرهم بالخير دائما....أتذكر لحظات الطاعة...ولحظات العاون على الخير...لعل الله يجمعنا في جنته ...آمين

عصفور المدينة said...

جزاك الله خيرا
أعانك الله
ولو كان بعدك عن المنزل يجعلك تكتبين مثل هذا الكلام الرائع فمش عارف أقول أيهما أفضل

ma_3alina said...

ماشاء الله .. ماشاء الله
العائشة في الأحلام بتقول كلام فيه سجع .. والمرة الجاية مش بعيد تقول قصيدة .. ولو إن بقية كلامها أجمل من أجمل القصائد

بمناسبة القصائد .. فيه منظومة اسمها عشرة الإخوان .. هي مغناة .. وفيها آداب الصداقة وتعريفها .. هي بجد جميلة جدا جدا جدا .. يمكن تكون صعبة شوية للي يسمعها مرة واحدة .. لكن لو سمعتيها كتير وركزتي في كلامها حتلاقيها سهلة خالص ومعانيها غاية في الجمال ... وحيبقى نفسك كل الناس يسمعوها ويتعلموها وينفذوها .. زيي كده

ربنا يجزيك خير ويجعله في ميزان حسناتك فواحدة من الدعائم الثلاثة لبناء دولة الإسلام هي الأخوة في الله


رابط منظومة عشرة الإخوان

karamella said...

جزاكي الله خيرا
اللهم ارزقنا اخوة في الله ندخل بها في ظل عرشك يوم لا ظل الا ظل
احس بانك رومانسية رقيقة جدا احسبك علي خير ولا ازكي علي اله احد
احبك في الله

mo'men mohamed said...

نسيتى انك تذكرى حديث سبعة يظلهم الله فى ظله
جزاك الله كل خير اختى
لك عندى تاج
السلام عليكم

أمــانــى said...

رفقتـــى وحبيبتى
فعلآ انها جنود مجندة لا نعرف كيف تمشى ولا الى اين تمضى ولامع من تلقتى سبحانك ربى
لقد بعد المسافات بين الاحبة ولكن القلوب كلها مجتمعة سبحانك ربى
اننى احبك فى الله أختى الحبيبة والرفقة رفقة دربى وطبعى وفكرى
اللهم بارك لنا فى صحبتنا ياااااااااااارب آمــــــــــين واجعل موعدنا الجنة يااااااااااارب آمـــــــــين
ربــنا يكـرمك ياااااااا رفقتى ياااااااااااارب آمــــــــين وربنا يفرح قلبك يااااااااااارب آمــــــــــــين

Memo said...

بجد يا رفقه انتي ريحتيني نفسيا بالبوست ده جدا وانا كان مودي اطران اساسا ربنا يباركلك

الباحث عن الحقيقة said...

ربنا يباركلك فى قلبك
بتحسسينى اننا كلنا اخوات واننا لو غبنا هنلاقى حد يحس بينا
بوست جميل ومريح للنفس
الحمد لله على نعمة الايمان والاسلام
وربنا يزيدك يا اختى الطيبه من فضله

قلب أبيــض said...

السلام عليكم
كلام ممتاز فكرنا بالعزة ومعنى الاخوة الصحيح والصمود
يلا الحمد لله
اخوك قلب ابيض

No Fear said...

السلام عليكم
عندك حق فعلا في موضوع إننا إحنا ممكن مش بنكون أصدقاء أوفياء و نطلب من الناس تكون أوفياء معنا
بس فعلا ساعات الواحد بيحس يعني ممكن من معاملة هذا الإنسان مع أهله مع الناس مع أصدقائه الأخرين يعني مش هيختلف معايا عن طبيعته
بس أصلا الحقيقة من كتر المأسي اللي الواحد بيشوفها من الأهل مثلا و الجرايد خير دليل مبقاش يفكر في الصديق
هي نظرة تشاؤمية و غبية و ممكن تكون حرام كمان بس الواحد شايف كده أتمني و الله العظيم أكون غلطان
تصبحي علي خير

Future_Preacher said...

رفقتي
بارك الله في قلمك و عقلك
فعلا من أجمل اللحظات اللي بحبها و عمري ما بنساها لما أحس اني قاعدة مع صحابي واحنا حسين في الجلسة دي اننا متحابين في الله و يا سلام لو كنا قاعدين بنذكر الله و نتكلم عن الرسول صلي الله عليه و سلم و عيوننا تمليء بالبكاء
بجد ساعتها بحس اني دخلت الجنة و اني شامة ريحتها و بتمني ان اللحظة دي متنتهيش ابدا
يارب لا تحرمنا ابدا من هذه النعمة
تصدقي كنت دايما ليا خاطرة كده مش عارفة هي صح و لا متنفعش تتقال
إن لو انا جيت يوم القيامة و ربنا متقبلش مني اي عمل و اعمالي كلها ضاعت كنت بحس اني مش حيبقالي الا حبي لاصدقائي في الله و حينجيني
و يكون سبب في دخولي الجنة
اللهم أجمعني بكل من احبهم فيك في ظلك يو لا ظل الا ظلك و منهم اختي في الاسلام و في التدوين رفقة عمر
اللهم اميييييييييين
اني احبك في الله

رفقه عمر said...

استاذ محمد مفيد
حمدلله على سلامتك
افتقدناك كثيرا
عمره مقبوله اللهم امين يارب العالمين
جزاك الله خيرا ربنا يكرمك يارب
******************
الصارم الحاسم
فعلا الواحد قابل ناس كتير كانوا ليهم تاثير فى حياته وغيروا فيه كتير منهم واحدة اتذكرها هى كانت بعد فضل الله عليا سببا فى ارتدائى الحجاب جزاها الله عنى خير الجزاء والمشكله انى نسيت اسمها لانها كانت من وانا فى تانيه ثانوى
ربنا يكرمها يارب
ويجمعنا مع الصالحين فى الفردوس الاعلى اللهم امين يارب العالمين

**************
استاذى عصفور المدينه
جزاك الله خيرا على تشجيعك الدائم ليا ربنا يكرمك يارب
ورزقك الله صحبه الصالحين
وجعلك من اولياء الله الذين لا خوف عليهم ولا هم يحزنون اللهم امين يارب العالمين
****************

ماعلينا
انا كنت خايفه منك لما طلع الكلام بالشكل دة بس الحمد لله عدت على خير
جزاك الله خيرا على رايك فى كتاباتى ربنا يكرمك يارب
على فكرة اللينك مش بيفتح معايا
*************
كراميلا
ربنا يكرمك يارب على كلامك الطيب
وانا احبك فى الله
جمعنا الله على محبته اللهم امين يارب العالمين
************
محمد مؤمن
على فكره انا لمحت للحديث فى كلامى
بس لم اذكرة لانى اعلم انكم جميعا تعرفونه فحبيت اضع احاديث جديدة كنت اول مرة اسمعها فحبيت انقلها لكم جزاك الله خيرا
هاجاوب التاج قريبا ان شاء الله
***********
امانى الطيبه
مش هاقولك غير انى بحبك قوى
واتمنى ان مش فيه حاجه تفرقنا ابدا اللهم امين يارب العالمين

****************
ميمو

وحشتينى ايه الغيبه الطويله دى قدرتى عليها معقوله بس يارب تكونى بخير ودايما كدة تتطمنينا عليكى ياريت

*****************
الباحث عن الحقيقه
اهلا بحضرتك بجد سعيدة بزيارتك الاولى مدونتك جميله قوى ربنا يبارككلك اللهم امين يارب العالمين
****************
قلب ابيض
اهلا بحضرتك
هى اكيد الدنيا هاتفرق لما يكون المسلمين مجتمعين على قلب رجل واحد ويحبوا بعض بجد
مش هاتكون المصلحه هلى الاساس هاتكون مصلحه الدين هى الاهم ولها الاولويه
شرفتنى
***************
no fear
اخبارك ايه يارب تكون بخير وفى احسن حال اللهم امين يارب العالمين
انا معاك ان الصديق الوفى بقى صعب وجودة قوى فى الزمن دة بس بجد كن انت صديق وفى وربنا هايرزقك بالاصدقاء الاوفياء فعلا ولو بعد مجهود فى البحث فعلا ربنا بيحقق الانسان اللى بيتمناه بس يصبر
لان التمكين لا يكون الا بعد الصبر
سعدت بوجودك ويارب اشوفك دايما بخير ومتفائل اللهم امين يارب العالمين
****************
داعيه المستقبل
صاحبه القلب الكبير
فعلا كلامك صح اولا المرء يحشر مع من احب يعنى لو انتى بتحبى انسانه صالحه وتحسبيها انها على خير سوف تحشرين معها
ثانيا المؤمن المقرب الى الله يشفع فى 70 من اهله واكيد من ضمنهم صحبته فى الدنيا
علشان كدة لازم نختار الصحبه الصالحه حتى تكون لنا معينا فى الدنيا والاخرة
احبك الذى احببتنى فيه
وانا ايضا احبك فى الله