ليه انت بتدون

السؤال دة انا سالته لنفسى قبل ما ابتدى تدوين لانى اصلا مش كنت اعرف ايه تدوين لولا استاذى الجعان اللى عرفت منه التدوين ولما قلتله مش بعرف اكتب قالى اكتبى اللى بتحسيه وبس واكتبى زى ما بتتكلمى برضه فكرت كتير انا بحب ايه ايه اللى احب اكتب فيه افتكرت امر وهو انى كنت اخذت دورة فرونت بيدج او تصميم صفحات الانترنت انى اعمل سايت اتكلم فيه عن دينى لانى اريد تحقيق الايه الكريمه (ولتكن منكم امه يدعون الى الخير ويامرون بالمعروف وينهون عن المنكر واؤلئك هم المفلحون) سورة ال عمران

وحديث الرسول صلى الله عليه وسلم (بلغوا عنى ولو ايه) كنت بخاف ان ربنا يحاسبنى انى عرفت الصح ومش ابلغه زى ما انا عرفته وبما انى خجوله جدا مستحيل اعرف اتكلم بكل اللى عايزة اوصله لحد علشان كدة كنت نفسى اعمل سايت اتكلم فيه بحريتى بس للاسف توقف الحلم لانى انشغلت فى امور اخرى او يمكن لم اجرؤا على هذه الخطوة لانها محتاجه ناس معايا ومش عرفت ابتدى ازاى حتى اراد الله لى ان افعل ما تمنيته عن طريق المدونه وجزا الله كل خير من دلنى على هذا الامر وانتم عارفين طبعا مين هو استاذى الجعان بجد كل كلمه قلتها هنا فى المدونه لم تخرج منى الا وانا احسها واتعايشها دائما الايه الكريمه هذه فى بالى( كبر مقتا عند الله ان تقولوا ما لا تفعلون)وايضا الايه الكريمه (مثل الذين حملوا التوراة ثم لم يحملوها كمثل الحمار يحمل اسفار بئس مثل القوم الذين كذبوا يايات الله والله لا يهدى القوم الظالمين)كم من الناس من يحفظ ايات الله ويعرف احاديث الرسول ولكنه للاسف لا يعمل بها ولا يعلمها لاحد خفت ايضا انا اكون كالحمار الذى يحمل الاسفار اكيد انا مقصرة فى كثير جدا فى حق الله ولكن بجد اللى فعلا حسيته وشعرت بحلاوته بقوله على المدونه يمكن اكتر وقت حسيت فيه قيمه القرب من الله عند وفاة والدى رحمه الله عليه بجد لما اتوقع ما حدث عندما خرج الطبيب يخبرنا بتوقف القلب وااستحاله اعادته مرة اخرى انتظرت انى ابكى لم ابكى انتظرت احد من اخواتى يبكى لم يبكوا والهمنا الله لقول انا لله وانا اليه راجعون ونحتسبه الى الله ليست شجاعه منى ولا قوة تحمل ولكنها رحمه الله والسكينه التى ينزلها الله عند وقوع المصيبه الحمد لله على كل حال

وهكذا كان غرضى من عمل هذه المدونه لم اهتم انى اتعرف قدر اهتمامى ان يصل ما احسه للاخرين كما حسيته انا انى ابلغ ما تعلمته بنفس الطريقه اللى حاسيته بيه وتعايشته يمكن كل همى انى اكتب كل حاجه عرفتها او بمعنى اصح كل حاجه بحسها واتعايشها اكيد سعدت انى اجد من يقرأ لى ويثنى على المدونه واشكر كل من يضع تعليق ولانى اريد من يقرأ المدونه يقرأ فقط لغرض القراءة وليس لصاحبه المدونه تعمدت انى مش حد يعرفنى من المدونين وان يكون معرفتنا فقط من خلال المدونه يمكن تلاثه من المدونات البنات اللى تعرفت عليهم فعلا ومش هاقول هما مين هما عارفين نفسهم تعليقاتى كلها فى حدود لا احب اتعدى حدودى مع احد ولا احب احد يتعدى حدودة معى

لانى لا يهمنى شئ غير انى اعمل شئ لدينى ولو هذا العمل الضعيف يمكن هو مش دينى بحت ووعظ وكدة لانى مش اهل للوعظ بس انا بقول اللى عايشاه وبس ولكنى ارجو الله ان يقبله منى

فهل كل واحد فينا سال نفسه قبل ما يبتدى تدوين ليه ابتدى التدوين ايه اللى عايز يقوله لان الانسان هايحاسب على كل كلمه ينطقها

انا عملت البوست دة علشان الناس تعرف ليه انا بكتب ليه مش حابه اعمل صداقات عن طريق المدونه مش عايزة حد يهتم بشخصيه صاحبه المدونه قد ما يهتم باللى بكتبه مش عايزة حد يقرا علشان يجاملنى ويضع تعليق من غير حتى ما يفكر يقرأ البوست

فكرت بجد بعد وفاة والدى رحمه الله رحمه واسعه انى مش اكتب تانى بس قلت فى نفسى اغلبى شيطانك انتى عملتيها لله يمكن حد يقرأ مرة شئ ممكن ياثر فيه او يجعله يعيد تفكيرة مرة اخرى

انت بقى بتدون ليه؟؟؟؟؟؟؟

قل ان صلاتى ونسكى ومحيا ومماتى لله رب العالمين